SIKLO

Ang pangunang Hebreohanong yunit sa gibug-aton (1Sa 17:​5, 7; Eze 4:10; Am 8:5) ug sa kantidad. Pinasukad sa aberids nga gibug-aton sa mga 45 ka bato nga gikulitan ug tinong gibug-aton sa siklo, ang siklo lagmit maoy 11.4 g. Ang usa ka siklo katumbas sa 20 ka gerah (Num 3:47; 18:16), ug adunay pamatuod nga ang 50 ka siklo katumbas sa usa ka mina. (Tan-awa ang MINA.) Kon banabanaon sa modernong bili, ang usa ka siklo nga plata mokantidad ug $2.20, ug ang usa ka siklo nga bulawan mokantidad ug $128.45.

Ang siklo sagad nga gihisgotan maylabot sa plata o sa bulawan. (1Cr 21:25; Neh 5:15) Sa wala pa gamita ang mga sensilyo, ang mga piraso sa plata (ug usahay mga piraso sa bulawan) maoy gigamit ingong salapi, ug ang gibug-aton tinoon sa panahon nga himoon ang transaksiyon. (Gen 23:​15, 16; Jos 7:21) Ang mga butang maylabot sa tabernakulo usahay gitakda pinaagig mga siklo “sumala sa siklo sa balaang dapit.” (Ex 30:13; Lev 5:15; 27:2-7, 25) Lagmit kini maoy aron ipasiugda nga ang bato sa timbangan kinahanglang tukma o, tingali nga kini kinahanglang mahiuyon sa naandang bato sa timbangan nga gigamit diha sa tabernakulo.

Gituohan sa kadaghanan nga ang ‘mga pirasong plata’ nga sagad gihisgotan diha sa Hebreohanong Kasulatan maoy mga siklo nga plata, ang yunit sa kantidad sa salapi. (Huk 16:5; 1Ha 10:29; Os 3:2) Gipamatud-an kini diha sa Septuagint (diin ang Gregong pulong alang sa ‘mga pirasong plata’ sa Genesis 20:16 pareho ra sa Gregong pulong alang sa ‘mga siklo’ sa Genesis 23:​15, 16) ingon man usab sa mga Targum. Sumala sa Jeremias 32:​9, ang manalagna mibayad ug “pito ka siklo ug napulo ka pirasong plata” alang sa usa ka uma. Tingali kini mao lamay legal nga mga pulong nga nagkahulogang 17 ka siklo nga plata (AS, Da, NE, RS), o lagmit, kini nagkahulogang pito ka siklo nga bulawan ug napulo ka siklo nga plata.

Ang 2 Samuel 14:26 mahimong magpasabot nga dihay “harianon” nga siklo nga lahi sa ordinaryong siklo, o ang gitumong tingali mao ang naandang bato sa timbangan nga gigamit diha sa palasyo sa hari.