ESTAKA SA PAGSAKIT
Usa ka instrumento sama niadtong gikamatyan ni Jesu-Kristo pinaagi sa paglansang. (Mat 27:32-40; Mar 15:21-30; Luc 23:26; Ju 19:17-19, 25) Sa klasikal nga Grego ang pulong (stau·rosʹ) nga gihubad nga “estaka sa pagsakit” diha sa Bag-ong Kalibotang Hubad pangunang nagtumong sa usa ka tul-id nga estaka, o usok, ug walay ebidensiya nga ang mga magsusulat sa Kristohanon Gregong Kasulatan migamit niini aron ipasabot ang usa ka estaka nga may balabag.—Tan-awa ang PAGLANSANG; Int, pp. 1149-1151.
Ang librong The Non-Christian Cross, ni John Denham Parsons, nag-ingon: “Walay bisan usa ka tudling-pulong diha sa daghang sinulat nga naglangkob sa Bag-ong Tugon, nga, diha sa orihinal nga Grego, nagpakitag bisan dili-direktang ebidensiya nga ikaingong ang stauros nga gigamit sa kaso ni Jesus maoy lahi kay sa ordinaryong stauros; ilabinang dili ikaingon nga kini naglangkob, dili sa usa ka pirasong kahoy, kondili sa duha ka pirasong kahoy nga gilansang nga nagkuros. . . . Usa ka dakong sayop gayod sa atong mga magtutudlo nga hubaron ang pulong nga stauros ingong ‘krus’ sa dihang maghubad sa Gregong mga dokumento sa Simbahan ngadto sa atong lumad nga pinulongan, ug paluyohan kana nga buhat pinaagi sa pagbutang ug ‘krus’ diha sa atong mga leksikon ingong mao ang kahulogan sa stauros nga walay pagpatin-aw pag-ayo nga kana dili gayod mao ang pangunang kahulogan sa maong pulong sa mga adlaw sa mga Apostoles, ug wala mahimong pangunang kahulogan niini bisan hangtod sa dugayng panahon human niana, ug kini nakabaton lamang ug kahulogan nga ingon niana, kon ugaling nakabaton man gayod, tungod lamang kay, bisan ug walay nagapaluyong ebidensiya, sa usa ka katarongan ug sa lain gituohan nga ang partikular nga stauros nga diha niana gipatay si Jesus maoy ingon niana ug porma.”—London, 1896, pp. 23, 24.
Kon Nganong si Jesus Kinahanglang Mamatay Diha sa Estaka. Sa panahon nga si Jehova nga Diyos mihatag sa iyang balaod ngadto sa mga Israelinhon, sila nag-obligar sa ilang kaugalingon sa pagsunod sa mga gipangayo niini. (Ex 24:3) Apan, ingong mga kaliwat sa makasasalang si Adan, dili sila makahimo sa pagsunod niini sa hingpit nga paagi. Tungod niini sila nailalom sa tunglo sa Balaod. Aron mahanaw kining linaing tunglo gikan kanila, si Jesus kinahanglang bitayon diha sa estaka sama sa usa ka tinunglong kriminal. Mahitungod niini si apostol Pablo misulat: “Ang tanan nga nagasalig sa mga buhat sa balaod nailalom sa tunglo; kay nahisulat: ‘Tinunglo ang matag usa nga wala magpabilin sa tanang butang nga nahisulat diha sa linukot nga basahon sa Balaod aron sa pagbuhat niini.’ . . . Pinaagi sa pagpalit, gipagawas kita ni Kristo gikan sa tunglo sa Balaod pinaagi sa pagkahimong tinunglo inay nga kita, tungod kay kini nahisulat: ‘Tinunglo ang matag tawo nga gibitay sa estaka.’”—Gal 3:10-13.
Mahulagwayong Paggamit. Ang “estaka sa pagsakit” usahay nagpasabot sa mga pag-antos, kaulaw, o pagsakit nga nasinatian tungod sa pagkahimong sumusunod ni Jesu-Kristo. Matod pa ni Jesus: “Si bisan kinsa nga dili magadawat sa iyang estaka sa pagsakit ug magasunod kanako dili-takos kanako.” (Mat 10:38; 16:24; Mar 8:34; Luc 9:23; 14:27) Ang ekspresyong “estaka sa pagsakit” gigamit usab sa samang paagi sa paghawas sa kamatayon ni Jesus diha sa estaka, nga tungod niana posible ang pagkatubos gikan sa sala ug ang pagkapasig-uli ngadto sa Diyos.—1Co 1:17, 18.
Ang kamatayon ni Jesus diha sa estaka sa pagsakit mao ang pasikaranan sa paghanaw sa Balaod, nga maoy nagpahimulag sa mga Hudiyo gikan sa mga dili-Hudiyo. Busa, pinaagi sa pagdawat sa pagpasig-uli nga gipaposible tungod sa kamatayon ni Jesus, ang mga Hudiyo ug mga dili-Hudiyo mahimo nang “usa ka lawas ngadto sa Diyos pinaagi sa estaka sa pagsakit.” (Efe 2:11-16; Col 1:20; 2:13, 14) Kini nahimong usa ka bato nga kapandolan alang sa daghang mga Hudiyo, sanglit sila miinsistir nga ang pagtuli ug ang padayong pagtuman sa Moisesnong Balaod mahinungdanon aron makabaton ug pag-uyon sa Diyos. Tungod niana si apostol Pablo misulat: “Mga igsoon, kon ako nagwali pa gihapon ug pagtuli, nganong ginalutos pa man gihapon ako? Kon mao, sa pagkatinuod, ang kapandolan sa estaka sa pagsakit nahanaw na.” (Gal 5:11) “Silang tanan nga buot mohimog maanindot nga dagway diha sa unod mao ang nagpugos kaninyo sa pagpatuli, aron lamang sila dili lutoson tungod sa estaka sa pagsakit ni Kristo, si Jesus. Dili gayod unta mahitabo nga ako manghambog, gawas lamang sa estaka sa pagsakit sa atong Ginoong Jesu-Kristo, nga pinaagi kaniya ang kalibotan nalansang nganhi kanako ug ako ngadto sa kalibotan.” (Gal 6:12, 14) Tungod sa pagsugid sa kamatayon ni Jesus diha sa estaka sa pagsakit nga maoy bugtong pasikaranan alang sa pagbaton ug kaluwasan, si Pablo gilutos sa mga Hudiyo. Ingong resulta niini nga pagsugid, alang sa apostol ang kalibotan daw samag gilansang, gihukman, o namatay, samtang ang kalibotan naglantaw kaniya uban ang pagdumot, ingong usa ka kriminal nga gilansang diha sa estaka.
Ang mga tawo nga midawat sa Kristiyanidad apan sa ulahi miliso ngadto sa usa ka imoral nga paagi sa pagkinabuhi nagpamatuod sa ilang kaugalingon nga “mga kaaway sa estaka sa pagsakit ni Kristo.” (Flp 3:18, 19) Ang ilang mga buhat nagpasundayag nga sila walay pagpabili sa mga kaayohan nga miresulta tungod sa kamatayon ni Jesus diha sa estaka sa pagsakit. Sila “nagyatak sa Anak sa Diyos” ug ‘nag-isip nga ordinaryog bili ang dugo sa pakigsaad nga pinaagi niini gibalaan sila.’—Heb 10:29.