Armageddon—Gikan sa Usa ka Diyos sa Gugma?
“ARMAGEDDON”—unsay ipasabot niining ngalana sa Bibliya? Nga ipailaila sa matag panahon sa usa ka makahuloganong hapin, ang serye sa matulon-anong mga artikulo bahin niining ulohana gihisgotan sa upat ka isyu sa Ang Bantayanang Torre sa Hulyo ug Agosto 1985. Gilaomang kining Kasulatanhong mga panaghisgot maglipay kanimo sa kahibalo bahin sa kon unsa ang tinuod nga ARMAGEDDON.
UNSAY imong hunahuna inigkakita nimo sa pulong “Armageddon?” Alang sa daghan kini nagkahulogan sa usa ka mapintasong pag-atubangay tali sa dagko kaayong mga gahom sa kalibotan. Gipanan-aw sa kadaghanan ang kataposang katalagman—usa ka nukleyar nga katalagman nga maghimo sa atong yuta nga naawaaw, radyoaktibong daw agipo nga may pipila ra kon duna may makalabang-buhi. Apan, supak nianang popular nga mga opinyon, dili mao kanay ipasabot sa Armageddon.
Ang Bibliya mao ang tinubdan sa pulong “Armageddon.” Ug dinha kini makita lamang kausa—diha sa ika-16 nga kapitulo sa basahong Pinadayag. Tapos sa paghisgot sa unsang paagi ang “tanang hari sa kalibotan” pagatigomon nga tingob “alang sa gubat sa Dakong Adlaw sa Diyos nga Makagagahom sa Tanan,” ang tagna nagaingon: “Ilang gitawag ang mga hari nga tingob sa usa ka dapit nga gitawag, sa Hebreohanon, Armageddon.”—Pin 16 Mga bersikulo 13 ngadto 16, The Jerusalem Bible.
“Ang gubat sa Dakong Adlaw sa Diyos nga Makagagahom sa Tanan”! Tin-aw, ang Armageddon maoy gubat sa Diyos. Matuod, kini maglangkit sa mga hari, o mga nasod, sa kalibotan. Apan sila mangabot, dili sa pagpakigbugno sa usag usa, kondili sa pagpakigbugno batok sa Diyos ug sa langitnong kasundalohan nga gipangulohan sa tinudlo niyang Hari si Jesu-Kristo—kinsa gihulagway nga nagsakay sa usa ka maputing kabayo. Unsay sangpotanan? Ang asoy sa Bibliya mabasa: “Ang mga hari sa yuta ug ang ilang kasundalohan nagtigom sa pagpakiggubat batok sa usang nagsakay sa kabayo ug batok sa iyang kasundalohan. . . . [Sila] gipamatay pinaagi sa hataas nga pinuti sa usang nagsakay sa kabayo . . . Ug ang tanang langgam nangabusog sa ilang mga unod.”—Pinadayag 19:19-21.
Usa ka Madugoong Gubat
Malaglagon kaayo unya ang Armageddon nga ang pagpamatay gitumong ingong usa ka pag-ani sa “alanihon sa yuta” pinaagi sa usa ka hait nga galab. “Ug gipalihok sa manulonda ang iyang galab sa ibabaw sa yuta ug gipamutol ang mga parras sa yuta, ug iyang giitsa kana ngadto sa dakong pigsanan sa kasuko sa Diyos. Ug ang pigsanan gipanggiokan sa gawas sa siyudad, ug migula ang dugo gikan sa pigsanan nga abot sa mga bokado sa mga kabayo, sa gilay-on nga tulo ka gatos ug kawhaan ka kilometro.”—Pinadayag 14:15-20.
Oo, lalom ang gihabogon sa dugo sa kamot sa mga puwersang tiglaglag sa Diyos. Ang 69 milyong nangamatay sa duha ka gubat sa kalibotan wala ra sa kumingking kon itandi sa pinatay sa gubat sa Diyos sa Armageddon. Mahitungod kanila ang manalagnang si Jeremias misulat: “Ang mga pinatay ni Jehova nianang adlawa molukop sa usa ka tumoy sa yuta ngadto sa laing tumoy sa yuta. Sila dili pagahilakan, ni pagahiposon, ni igalubong. Sila mahimong kinalibang sa ibabaw sa nawong sa yuta.”—Jeremias 25:30-33.
Ang nagdilaab nga mga udyong, mga ulan sa kalayo, ug ubang makalaglag nga mga puwersa nga moduyog sa paghukom sa Diyos makapalisang sa mga kasingkasing sa katawhan sa tibuok yuta. Sa kaguliyang sila moliso, ang matag usa batok sa iyang silingan, samtang mohapak ang tiglaglag nga mga puwersa sa Diyos nga walay pagsapayan sa edad o sekso. Kay ang Diyos nagasugo kanila nga dili maluoy: “Panikbas kamo. Ayaw tugoti nga ang inyong mata maluoy, ug ayaw kamo pagkahangawa. Tigulang lalaki, batan-ong lalaki ug ulay ug bata ug mga babaye inyong tibawason—ngadto sa usa ka kalaglagan.”—Ezekiel 9:5, 6; Zacarias 14:12, 13.
Apan nganong mahitabo kini? Sa unsang paagi ang usa ka Diyos sa gugma makahatag nianang mandoa? O siya ba dili mabination, dili matinagdanon, ug mapanimaslon nga Diyos nga walay pagtagad sa iyang tawhanong kalalangan? Ang usa ka Diyos sa gugma tinuod bang magpahinabo sa maong gubat sa Armageddon?