Mga Iglesya Gipig-otan

“Ang isyu sa homoseksuwalidad nagsamok sa relihiyosong grupo sa tibuok Amerika,” miingon ang The New York Times. “Gipig-otan sila gikan sa gawas sa paghupay sa ilang tradisyonal nga kasuko ug diha sa sulod sa pagbag-o sa ilang teolohiya.” Ang nagapaluyong hinungdan sa kapit-osan mao ang kausaban sa tinamdan sa sekso ug sa kasungian nga ang mga teksto sa Bibliya “gihatagag sayop sa interpretasyon o sayop nga paghubad sa mga kaaway sa homoseksuwalidad.” Pananglitan, ang mga kritiko sa tradisyonal nga paghubad nag-ingon nga ang siyudad sa Sodoma gilaglag tungod sa ilang kakulang sa pagkamaabiabihon, nga hinungdanon kaayo sa karaang mga magpapanaw, ug sa intensiyon sa paglugos sa mga bisita—dili sa homoseksuwal nga mga buhat. Miingon usab sila nga, diha sa Roma 1:26, 27, ang pagpunting ni apostol Pablo sa kausaban sa “kinaiyanhong paggamit sa ilang kaugalingon nga sukwahi sa kinaiyahan,” yanong nagpasabot sa “pagbulag gikan sa kultural nga kinaiyahan, dili sa homoseksuwalidad.” Busa, gibag-o sa daghang mga iglesya ang ilang tinamdan sa mga homoseksuwal, ug gidawat gani sa uban ang mga homoseksuwal ingong mga ministro.

Apan ang mao bang “modernisasyon” kaharmoniya sa kabubut-on sa Diyos? “Dili; Ako, si Yahweh, dili mausab.” puwersadong mipahayag ang Bibliya diha sa Malaquias 3:6. (The Jerusalem Bible) Tin-awng nagpahayag usab ang Bibliya nga walay “mga lalaki nga gitipigan alang sa dili kinaiyanhong katuyoan, ni mga lalaki nga makig-ipon sa mga lalaki . . . ang makapanunod sa gingharian sa Diyos.” (1 Corinto 6:9, 10; itandi sa Levitico 20:13.) Imbes awhagon ang mga Kristohanon sa pagsagop ug mas matugotong tinamdan alang niadtong nakasala batok sa Diyos, ang Bibliya nagtambag: “Pahilayo gikan sa tanang kahugawan ug sa tanang buling, ug pagkadaotan, ug dawata uban sa kaaghop ang tinanom nga pulong nga arang makaluwas sa inyong mga kalag.”—Santiago 1:21.