Ang Misteryosong mga Magkakabayo sa Apokalipsis
IKAW misud-ong nga nahingangha samtang, nga nanglupad ang balhibo ug ikog ug nanglisngag ang mga ilong, ang kabayo naglagapak nga milugsong sa batoong bakilid. Ang bagisong nagkabayo daw natapot sa montora nga morag siya bahin nianang nagdulhog, nag-uyog nga kabayo.
Kon kaha nagaduaw sa halayong banikanhong Australianong rantso sa baka o, sa halayong katunga sa kalibotan, sa kapatagan sa Amerikanhong rantso, ang hulagway sa usa ka magkakabayo nga nakaila gayod sa iyang kabayo tinuod makalingaw. Samang makapahingangha mao ang katahom sa usa ka parada sa binansay-kaayong mga kabayo ug mga magkakabayo.
Ang maong mga magkakabayo ug ilang mga kabayo makapahibulong gayod kanato. Ugaling, ang mga kabayo ug mga magkakabayo nga nasaksihan sa magsusulat sa basahong Pinadayag (ang Apokalipsis) kulbahinam nga tan-awon! Sila misteryoso ug makalilisang. Ang maong mga magkakabayo kaylap nailhang mga Magkakabayo sa Apokalipsis.
Handurawa nga karon, nga nagdahunog padulong kanimo, mao ang upat ka batid nga magkakabayo, nga ang usa nagpakayab pag espada! Matikdi ang bulok sa ilang mga kabayo. Ang matag usa maoy lahi. Ang usa ka kabayo puti, ang usa pula, ang usa itom, ug ang usa luspad berdehon-dalag nga bulok. Sila tinuod katingad-anan, misteryosong hulagway.
Sundi ang tulin-ug-lihok nga asoy sa kon unsay nakita sa magsusulat sa Bibliya, si apostol Juan. Siya miingon: “Unya nakita ko ang usa ka maputi nga kabayo, ug ang nagkabayo niini nagdalag pana. Siya gihatagan ug purongpurong, ug siya misakay ingong mananaog sa pagpanaog. . . . Ug ang laing kabayo migula, nga mapula, ug ang nagkabayo niini gihatagan ug gahom sa pagwagtang sa pakigdait gikan sa yuta, ug gihimo nga ang mga tawo magpinatyanay sa usag usa; siya gihatagan ug usa ka dakong espada. . . . Ug didto nakita ko ang usa ka maitom nga kabayo, ug ang nagkabayo niini may timbangan sa iyang kamot, ug nadungog ko ang usa ka tingog . . . nga nag-ingon, ‘Ang usa ka litrong trigo alang sa [suhol sa usa ka adlaw], ug tulo ka litrong sebada alang sa [suhol sa usa ka adlaw]’ . . . Ug didto nakita ko ang usa ka kabayo nga abohon ug bulok, ug ang ngalan sa nagkabayo niini maoy Kamatayon, ug ang Hades nagsunod kaniya. Sila gihatagan ug gahom ibabaw sa ikaupat ka bahin sa yuta, sa pagpatay sa mga tawo pinaagi sa espada, gutom, kamatayon, ug sa mapintas nga mga hayop sa yuta.”—Pinadayag 6:2-8, An American Translation.
Sukad kining panan-awona unang gisulat, ang kahulogan niini nakapalibog sa dimaihap nga magbabasa. Unsay gihawasan niining misteryosong mga kabayo ug mga magkakabayo niini? Kanus-a nagsugod ang ilang pagsakay? Ang ila bang pagsakay may kalabotan sa kinabuhi karong adlawa? Gihatag ang nagkadaiyang mga katin-awan bahin sa kon unsay gihawasan sa mga kabayo ug sa mga nagkabayo niini, ug kon kanus-a gayod nahitabo ang ilang pagsakay.
Ang kinadak-ang kalainan anaa sa mga hubad sa maputi nga kabayo ug sa nagkabayo niini. Pananglitan, ang New Catholic Encyclopedia nagasaysay nga ang maputi nga kabayo nagahawas sa ‘kadaogan sa ebanghelyo kaha o sa imperyalismo.’
Sa librong Daniel and the Revelation, si Uriah Smith nagahatag niining hubara: “Ang maputi nga kabayo . . . maoy haom nga simbolo sa mga kadaogan sa ebanghelyo sa unang siglo . . . Ang pagkaputi sa kabayo nagkahulogan sa kaputli sa pagtuo nianang panahona.”
Ang The Expositor’s Bible nagaingon: “Sa unang nagkabayo ang kawsa inay ang pagkatawo ni Kristo gipailaila kanato, sa kinasayohang ang-ang sa madaogong pag-uswag niini, ug uban ang saad sa umaabot nga kadaogan niini. . . . Atong masayran nga ang kawsa niini anaa sa kalibotan, nga kining ginghariana anaa sa sulod nato, ug kadtong mosupak niini pagapildihon.” Bisan pa niana, si Woodrow Kroll, sa The Christian Jew Foundation, mibating ang nagkabayo sa maputi nga kabayo mao ang Antikristo.
Misugyot ang pipila nga adunay lima ka kabayo ug magkakabayo, dili ra upat. Busa sa unsang paagi kita masayod kon hain sa daghang paghubad ang husto? Sa unsang paagi kita makatino nga adunay hustong pagsabot? Kinsa ba gayod kining misteryosong mga magkakabayo sa Apokalipsis, ug kanus-a magsugod ang pagsakay niini?