“Tinapay sa Kinabuhi” Mabatonan sa Tanan

“Ako mao ang buhi nga tinapay nga nanaog gikan sa langit; ang bisan kinsa nga mokaon niini nga tinapay siya mabuhi sa walay kataposan; ug, sa pagkatinuod,

ang tinapay nga akong ihatag mao ang akong unod alang sa

kinabuhi sa kalibotan.”—JUAN 6:51.

ANG kalibotan sa katawhan dugay nang nabuhi sa tinapay, ang labing kaylap nga ginakaong kalan-on sa yuta. Sa tukma, gitawag kining kalan-on sa kinabuhi. Apan karon ang kagutom sa tinapay nahimong dakong isyu. Ang kagutmanan ug pagkanihit sa kalan-on nagaapektar sa upat ka bahin sa molupyo sa yuta. Di pa dugay, ang The Globe and Mail sa Toronto, Canada, miingon, “Ang pagkanihit sa kalan-on, sama sa gubat, walay giilang utlanan.” Gikutlo sa pamantalaan ang usa ka ehekutibo sa emerhensiya nga kalihokan sa HK sa Aprika nga nagpasidaan nga ang Aprika anaa na sa ngilit sa “usa sa labing dakong tawhanong trahedya, usa sa labing dakong hagit sa tawo, nga atong giatubang sukad.”

² Si Jesus nagtagna nga ang kakulangan sa pagkaon mahimong bahin sa ilhanan sa iyang presensiya sa gahom sa Gingharian. (Mateo 24:3, 7, 32, 33; 25:31, 32; Lucas 21:11) Pagkadako sa atong kalipay nga haduol na ang iyang Gingharian! Sa dili madugay, ang mahimayaong Hari molaglag sa tanang mga kaaway sa katawhan, sa pagwala sa politikal ug ekonomikanhong mga inhustisya nga maoy nakapatungha niining masakit nga pag-antos. Dayon ang tanang katawhan malipay sa pagdawat sa ilang tinapay sa matag adlaw.​—Mateo 6:10, 11; 24:21, 22; Daniel 2:44; Proverbio 29:2.

2, 3. (a) Ang kakulangan sa pagkaon maoy bahin sa unsa nga ilhanan? (b) Sa unsang paagi ang problema sa pagkaon masulbad? (c) Unsa pa ang gikinahanglan, ug unsang malipayong pasalig ang gihatag sa Isaias 25:8?

³ Ilalom sa matarong nga kagamhanan, ang atong maayong yuta may katakos sa pagpatunghag “pagsugwak” sa kalan-on, igo sa pagtagbaw sa daghan pa kay sa presente nga populasyon sa kalibotan. (Salmo 72:12-14, 16, 18) Maghimog “usa ka kombira” si Jehova sa maayong mga butang alang sa iyang katawhan. (Isaias 25:6) Apan aduna pay butang nga gikinahanglan. Sa modagan ang panahon, magkasakit ug mamatay ba gihapon ang mga tawo? Makalipay, ang Isaias 25:8 mipadayon sa pag-ingon bahin kang Jehova: “Lamyon niya ang kamatayon sa walay kataposan, ug pagapahiran sa Soberano Ginoong Jehova ang mga luha gikan sa tanang mga nawong.” Sa unsang paagi motungha kini?

Mahigugmaong Tagana ni Jehova

4. Unsang mahigugmaong tagana ang gihatag sa Diyos sa Ehipto?

⁴ Sa administrador pa si Jose sa pagkaon sa Ehipto, dihay daghan kaayong lugas. Tungod kini kay si Jose, tapos nga natudlo ni Paraon, maalamong nangandam sa gitagnang pito ka tuig nga gutom, ug mahigugmaong gidugangan ni Jehova ang iyang panalangin. (Genesis 41:49) Abunda ang kalan-on alang sa tanan, ug may ikahatag pa. Sa dihang ang amahan ni Jose nga si Jacob, mga igsoon ni Jose, ug ang ilang pamilya miadto sa pakig-uban kang Jose sa Ehipto, nakapahimulos silag dako pinaagi nianang tagana sa kahitas-an. Sa walay duhaduha kadtong mga Israelinhon sinati usab sa may lebadora nga minasa, sanglit nakita nga nagsugod kini sa Ehipto.

5. (a) Sa unsang paagi nagtagana si Jehova ug kalan-on sa kamingawan? (b) Kinsa ang nakigbahin sa Israel niini nga panalangin, ug ngano?

⁵ Sa ulahi, dugang mihatag mahigugmaong tagana si Jehova sa iyang katawhan. Nahitabo kini sa dihang ang milyonmilyong mga Israelinhon migikan sa Ehipto sa pag-agi sa kamingawan sa Sinai. Sa unsang paagi makakitag kalan-on kining dakong panon nianang awaaw, dili-mahigalaong disyerto? Bisag nasuko si Jehova sa ilang kakulang sa pagtuo, iyang “gibuksan ang mga ganghaan sa langit. Ug nagpadayon siya sa pagpaulan kanila sa mana aron kan-on, ug naghatag kanila ug lugas gikan sa langit.” “Pinaagi sa tinapay nga gikan sa langit siya padayong nagpatagbaw kanila” sulod sa 40 ka hataas nga katuigan. (Salmo 78:22-24; 105:40; Exodo 16:4, 5, 31, 35) Ug ayaw kalimot, nga ang mga Israelinhon wala mag-inusara sa pagkaon sa mana. “Ang nagkasagol nga panon sa katawhan” nga dili Israelinhon nagpakitag pagtuo kang Jehova ug miuban kanila sa paggawas gikan sa Ehipto. Gitagan-an usab sila sa Diyos ug mana.​—Exodo 12:38.

6. (a) Unsa ang mas dako nga panginahanglan sa tawo, ug ngano? (b) Unsay gipasiugda sa mga halad sa Israel, ug unsay ilang gilandongan?

⁶ Apan, ang katawhan nagkinahanglan ug mas labaw pa kay sa literal nga “tinapay nga gikan sa langit.” Bisan kadtong mikaon sa milagrosong pagkataganang mana nangatigulang ug nangamatay, tungod kay ang napanunod nga makasasalang kahimtang sa tawo nakahimo sa kamatayon nga dili malikayan, bisan unsa pay kan-on. (Roma 5:12) Ang mga halad sa mga Israelinhon naghatag paagi sa pagpatunhay sa maayong relasyon sa Diyos, apan kadtong mga halara nagpasiugda usab sa pagkamakasasala sa nasod. Kini “dili gayod bug-os makakuha sa mga sala.” Dugang pa, kadtong mga halara naglandong sa “usa ka halad” ni Jesus, gitagana sa pagwala sa kasal-anan sa “walay kataposan.” Gikan sa iyang nabayawng baroganan sa langit, makahimo na karon si Jesus sa paggamit sa bili niana nga halad.​—Hebreohanon 10:1-4, 11-13.

“Tinuod nga Tinapay nga Gikan sa Langit”

7. (a) Ang mga pulong ni Jesus sa Juan kapitulo 6 kinahanglang sabton sa unsang bag-ong konteksto? (b) Nganong gibadlong ni Jesus ang panon sa katawhan?

⁷ Karon moadto kita sa Juan kapitulo 6. Ang gipamulong ni Jesus dinhi dili sumpay sa natala sa kapitulo 5. Ang konteksto lahi, sanglit milabay ang usa pa ka tuig. Kini karon maoy 32 K.P. Ang esena dili na taliwala sa nagpakamatarong sa kaugalingon nga mga Hudiyo sa Jerusalem kondili taliwala sa komung mga tawo sa Galilea. Bag-o pa lang nakahimo si Jesus ug milagro sa pagpakaon sa 5,000 ka tawo nga gikan lamang sa lima ka tinapay sa sebada ug duha ka gagmayng isda. Sa pagkasunod adlaw, misunod ang panon sa katawhan kang Jesus, nagpaabot ug laing libreng pagkaon. Busa gisultihan sila ni Jesus: “Kamo nangita kanako, dili tungod kay nakakita kamo sa mga milagro, kondili kay kamo nakakaon na man sa mga tinapay ug nangabusog. Ayaw ninyo paghagoi ang kalan-on nga mawagtang ra, kondili mao hinooy hagoi ninyo kanang kalan-on nga molungtad ngadto sa kinabuhing walay kataposan.” Gipadala si Jesus sa iyang Amahan aron sa paghatag niining kalan-ona alang sa tanan nga mopakitag pagtuo kaniya. Kini mao “ang tinuod nga tinapay nga gikan sa langit,” nga may mas malungtarong mga epekto kay sa literal nga mana nga gikaon sa karaang mga Israelinhon.​—Juan 6:26-32.

8. Sa unsang paagi mabatonan sa usa ang kinabuhing walay kataposan?

⁸ Mipadayon si Jesus sa pagbatbat sa mga kaayohan nga makuha gikan niana nga “pagkaon,” sa pagsulti kanila: “Ako mao ang tinapay sa kinabuhi. Siya nga moduol kanako dili gutomon, ug siya nga motuo kanako dili gayod uhawon. . . . Kay mao kini ang kabubut-on sa akong Amahan, nga ang tanan nga makakita sa Anak ug motuo kaniya makabaton ug kinabuhing walay kataposan, ug pagabanhawon ko siya sa kataposang adlaw.”​—Juan 6:35-40.

9, 10. (a) Sa unsang paagi “ang tinapay sa kinabuhi” lahi sa mana? (b) Sumala sa Juan 6:42-51, kinsay gihatagan ni Jesus sa iyang unod? (c) Sa unsang paagi sila ‘mokaon sa iyang unod’?

⁹ Gilalisan niadtong materyalistikong mga Hudiyo kining mga pulonga. Ang nakita lamang nila kang Jesus mao nga siya anak ni Jose ug Maria. Gipasidan-an sila ni Jesus: “Ayaw na kamo pagbagutbot. Walay makahimo sa pagduol kanako gawas kon ang Amahan, nga nagpadala kanako, magadani kaniya; ug pagabanhawon ko siya sa kataposang adlaw.” Dayon mibalik siya sa pag-ingon: “Ako mao ang tinapay sa kinabuhi. Ang inyong mga ginikanan nanagkaon sa mana sa kamingawan apan nangamatay gihapon sila. Ako mao ang buhi nga tinapay nga nanaog gikan sa langit; ang bisan kinsa nga mokaon niini nga tinapay siya mabuhi sa walay kataposan’ ug, ang tinapay nga akong ihatag mao ang akong unod alang sa kinabuhi sa kalibotan.”​—Juan 6:42-51.

¹⁰ Busa, kadto maoy alang sa “kinabuhi sa kalibotan”​—ang enterong malukat nga katawhan​—nga gihatag ni Jesus ang iyang unod. Ug ang “bisan kinsa” sa kalibotan sa katawhan nga mokaon sa simbolikong “tinapay,” pinaagi sa pagpakitag pagtuo sa makalukat nga gahom sa halad ni Jesus, makasulod ngadto sa dalan sa kinabuhing walay kataposan. Dinhi, ang “nagkasagol nga panon sa katawhan” nga miambit sa mga Israelinhon sa pagkaon sa mana sa kamingawan naglandong sa dakong panon sa “ubang karnero” ni Jesus kinsa, lakip sa dinihogang nanghibilin sa “Israel sa Diyos,” karon nagakaon sa unod ni Jesus sa mahulagwayong paagi. Ilang gihimo kini pinaagi sa pagpakitag pagtuo sa iyang halad.​—Galacia 6:16; Roma 10:9, 10.

11. Unsa pay ubang mga pulong ni Jesus nga nalisang ang mga Hudiyo, ug ngano?

¹¹ Balik sa Galilea, ang kadaghanan sa mga tigpatalinghog ni Jesus nalisang sa iyang pakigpulong. Busa samtang naghisgot pa sa tema bahin sa iyang unod, mipadayon siya, pinaagi sa pagsulti kanila: “Sa pagkatinuod magaingon ako kaninyo, Gawas kon mokaon kamo sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon. Siya nga mokaon sa akong unod ug moinom sa akong dugo adunay kinabuhing walay kataposan, ug pagabanhawon ko siya sa kataposang adlaw; kay ang akong unod mao ang tinuod nga kalan-on, ug ang akong dugo mao ang tinuod nga ilimnon.” (Juan 6:53-55) Pagkamakalilisang tinuod! Dili lamang makaluod ang ideya sa kanibalismo (tigkaon ug tawo) sa mga Hudiyo kondili gidili sa Kasugoan diha sa Levitico 17:14 ang pagkaon sa “dugo sa tanang matang sa unod.”

12. (a) Unsay gipasiugda ni Jesus dinhi? (b) Unsang mga kasulatan ang nagpakita nga dili lamang kini limitado sa kaubang mga manununod ni Jesus?

¹² Siempre, gipasiugda ni Jesus dinhi nga mao kini ang himoon sa kang bisan kinsa nga nagtinguhang makabaton ug kinabuhing walay kataposan pinaagi sa pagpakitag pagtuo sa halad ni Jesus nga himoon sa ulahi sa pagtanyag sa iyang hingpit tawhanong lawas ug sa pagbubo sa kinabuhi nga dugo. (Hebreohanon 10:5, 10; 1 Pedro 1:18, 19; 2:24) Kining maong tagana dili limitado ngadto sa kaubang mga manununod ni Jesus. Lakip usab niini ang “dakong panon,” nga makalabang buhi sa “dakong kasakitan,” kay sila “nakalaba ug nakapaputi sa ilang besti sa dugo sa Kordero.” Ang ilang pagbaton ug pagtuo sa halad ni Jesus, sumala sa gipakita usab sa ilang paghatag “balaang pag-alagad” sa Diyos, moresulta sa ilang kaluwasan latas sa labing dakong kagul-anan sa yuta. Maingon man, gideklarar nga matarong si Rahab ug naluwas sa gilaglag ni Josue ang Jericho.​—Pinadayag 7:9, 10, 14, 15; Josue 6:16, 17; Santiago 2:25.

“Kinabuhi Diha sa Inyong Kaugalingon”

13. (a) Sa pagtandi sa Juan 5:26 ug Juan 6:53, unsay pagamatikdan? (b) Unsang komung konstruksyon sa gramatika sa Grego ang makatabang kanato sa pagsabot sa Juan 6:53? (c) Busa, unsay kahulogan sa pagbaton ug “kinabuhi diha sa inyong kaugalingon,” ug kang kinsa aplikado kining mga pulonga?

¹³ Diha sa Juan 6:53, 54, gipakasama ni Jesus ang “kinabuhing walay kataposan” sa pagbaton ug “kinabuhi diha sa inyong kaugalingon.” Busa, niini nga konteksto, ang ekspresyong “kinabuhi diha sa inyong kaugalingon” daw lahig kahulogan gikan sa gigamit ni Jesus sa Juan 5:26. Ang mga ekspresyon nga adunay samang konstruksyon sa gramatika sama sa pagbaton ug “kinabuhi diha sa inyong kaugalingon” makita sa ubang dapit sa Gregong Kasulatan. Pananglitan: “Batoni ang asin diha sa inyong kaugalingon” (Marcos 9:50) ug “nagpakaagom diha sa ilang kaugalingon ug balos” (Roma 1:27).a Niini nga mga pananglitan, ang mga pulong wala magkahulogan sa gahom sa paghatag ug asin o sa pagpahamtang ug balos sa uban. Busa, sumala sa konteksto sa Juan 6:53, ang pagbaton ug “kinabuhi diha sa inyong kaugalingon” dinhi nagkahulogan sa pagsulod sa kataposan sa kabug-osan sa kinabuhi. Ang “gamayng panon” sa mga manununod sa Gingharian makaeksperyensiya niini sa ilang pagkabanhaw ngadto sa langit. Maeksperyensiyahan kini sa “ubang karnero” tapos sa kataposan sa usa ka libo ka tuig, sa masulayan na sila ug ikadeklarar nga matarong alang sa kinabuhing walay kataposan sa Paraiso nga yuta.​—1 Juan 3:2; Pinadayag 20:4, 5.

14. Kinsa pa ang makapahimulos sa “tinapay nga gikan sa langit,” ug sa unsang paagi?

¹⁴ Ang uban, usab, makapahimulos sa “tinapay nga gikan sa langit.” Si Jesus miingon bahin sa usa nga ‘mokaon sa iyang unod ug moinom sa iyang dugo’ apan mamatay: “Akong pagabanhawon siya sa kataposang adlaw.” Tin-aw nga ang dinihogang mga Kristohanon nga natulog sa kamatayon banhawon sa pagtingog sa “kataposang trompeta,” nga mahitabo sa panahon sa “pagpadayag” ni Jesus-Kristo sa himaya sa Gingharian. (1 Corinto 15:52; 2 Timoteo 4:1, 8) Apan komusta ang palaabuton sa “ubang karnero” nga natulog diha sa kamatayon? Ang mga pulong ni Marta sa dihang namatay si Lazaro makaikag dinhi, kay niadtong panahona walay lain ang paglaom sa mahadlokon sa Diyos nga mga Hudiyo gawas lamang sa yutan-ong pagkabanhaw. Ang pagtuo ni Marta gipahayag niining mga pulonga: “Ako nasayod nga siya [Lazaro] pagabanhawon sa kataposang adlaw.” (Juan 11:24) Kita nga buhi karon sa presensiya ni Kristo makalaom nga ang mga matinumanong “dakong panon” nga nangatulog sa kamatayon makabaton ug unang pagkabanhaw dinhi sa yuta, aron sila makaambit pag-usab sa “tinapay nga gikan sa langit,” uban sa palaabutong kinabuhing walay kataposan. Pagkadakong paglaom kana, usa ka seguradong paglaom sa pagkaagi nga gibanhaw mismo si Jesus gikan sa mga patay!​—1 Corinto 15:3-8.

“Sa Panaghiusa Diha Kang Kristo”

15. Ang mga pulong ni Jesus “nahiusa diha kang Kristo” aplikado kang kinsa, ug nganong mao kanay imong tubag?

¹⁵ Si Jesus mipadayon: “Siya nga mokaon sa akong unod ug moinom sa akong dugo magpabilin nga nahiusa kanako, ug ako nahiusa diha kaniya.” (Juan 6:56) Kini, matuod diha sa kang “bisan kinsa” nga motuo sa halad ni Jesus, nga may palaabuton nga makabaton ug “kinabuhi diha sa iyang kaugalingon.” Ang tanang magpakita niining matanga sa pagtuo mahimong ‘nahiusa uban kang Jesus.’ Siempre, ang “dakong panon,” nga adunay yutan-ong mga paglaom, wala “nahiusa diha kang Kristo” sa diwa nga mahimong iyang kaubang mga manununod, mga sakop sa iyang pangasaw-onon nga makadawat ug langitnong pagkabanhaw sama sa iyang nadawat. (Roma 8:1, 10; 1 Corinto 1:2; 2 Corinto 5:17; 11:2; Galacia 3:28, 29; Efeso 1:1, 4, 11; Filipos 3:8-11) Apan ang tanan nga may yutan-ong paglaom mamahimo, kinahanglan gayod, nga bug-os nga nahiusa sa Amahan ug sa Anak sa pagkahibalo ug sa pagbuhat sa “hingpit nga kabubut-on sa Diyos,” nga matuod usab diha sa “gamayng panon.”​—Roma 12:2; itandi sa Juan 17:21.

16. (a) Unsang hinungdanong mga paagi nga ang tanan nga may pagtuo sa halad ni Kristo “nahiusa diha” kang Jesus? (b) Sa unsang paagi gipabanaag ang ilang pagkausa sa katuyoan ug sa paningkamot?

¹⁶ Busa, ang hinalad nga bili sa unod ug dugo ni Kristo mabatonan sa tanan karon nga magpakitag pagtuo, ug sa tanan nga magapahimulos niini makahimo, sa hinungdanong mga paagi, nga “nahiusa diha” kang Jesus. Ang tanan mahimong bahin sa unibersohanong pamilya ni Jehova nga Diyos. Niining malisod nga “kataposang mga adlaw,” ilang gitagamtam ang tibuok yutang panaghiusa sa pagtuo, katuyoan, ug kalihokan. Sa pagpakitag pagtuo kang Jesus, sila makahimo sa “pagbuhat ug mas dagkong mga buhat” sa sukod kay niadtong gihimo ni Jesus sa dinhi pa sa yuta. Ug maayong masayran nga ang minilyon sa “dakong panon” naglangkob karon ug 99.7 porsiento niadtong nagabuhat sa buluhaton ni Jehova karong panahona. (Juan 14:12; Roma 10:18) Kining pagkausa sa katuyoan ug paningkamot gipabanaag sa dakong pagpamatuod sa tibuok yuta ug sa mainandamong pagpaluyo sa mga programa sa pagpanukod sa Watch Tower Society. (Salmo 110:3) Kon pila sa kalibotan sa katawhan ang motuo pa ug mohugop ngadto niining bililhong panaghiusa pagatan-awon pa. Ang bag-ong taho nagpakita nga adunay 3,024,131 ka aktibong mga Saksi.

17. Unsang mga punto ang kinahanglang pabilhan sa tanang motambong sa Memoryal?

¹⁷ Gilaoman nga daghang interesado ang motambong sa 1986 nga pagsaulog sa Memoryal. Ang minilyong “ubang karnero” motambong, uban sa nagkadiyutayng kaliboan sa “gamayng panon”​—ang tanan sa kinasingkasing mapabilhon sa mahigugmaong tagana ni Jehova pinaagi ni Kristo, sanglit nasayod kon unsa ka hinungdanon ang unod ug dugo ni Kristo. Apan, kinahanglang tin-awng masabtan sa tanan kon diin sila nagbarog. Ang pakig-ambit sa mga emblema sa Memoryal dili makahatag kinabuhing walay kataposan. Kini maoy mga simbolo sa halad ni Jesus, nga aplikado una may labot sa “bag-ong pakigtugon.” Kadtong mga dinihogan nga giagak niana nga pakigtugon, ug sila lamang, ang tukmang makaambit sa mga emblema. Mahimo nga ang usa bahin niana nga bag-ong pakigtugon o dili. (1 Corinto 11:20, 23-26) Sila nga dili bahin nianang bag-ong pakigtuon ug wala maagak ni Jesus ngadto sa usa ka pakigtugon sa gingharian dili makaambit sa mga emblema sa Memoryal, apan kinahanglang ilang ilhon kon unsa ka bililhon kanila ang nahalad nga unod ug dugo ni Jesus. (Lucas 22:14-20, 28-30) Kining paghalad mao ang paagi diin sila makabaton ug kinabuhing walay kataposan sa yuta.

18. Unsang kalipay ang moresulta gikan sa tin-awng pagsabot sa kahulogan sa halad ni Jesus?

¹⁸ Busa hinaot nga atong atubangon kining Memoryal nga okasyon nga may tin-awng pagsabot sa tanan kon unsay kahulogan alang sa katawhan sa halad ni Jesus. Hinaot nga pabilhan sa “gamayng panon” ang ilang pagkatinawag, ug hinaot nga ang nagkadaghang panon sa “ubang karnero” malipay sa palaabuton sa pagbaton ug hingpit yutan-ong ‘kinabuhi diha sa ilang kaugalingon,’ samtang ilang gipabilhan ang ilang panaghiusa, karon, uban sa Amahan, sa Anak, ug sa nagkakunhod nga gidaghanon sa dinihogang nanghibilin nga ania pa sa yuta. Pagkadako sa atong kalipay nga “ang tinapay sa kinabuhi” karon mabatonan sa tanan!

[Mga footnote]

Mga Pangutana Agig Repaso

◻ Sa 32 K.P., unsang duha ka matang sa mana ang gihisgotan ni Jesus, ug gitagana kini alang kang kinsa?

◻ Kinsay gidapit ni Jesus sa ‘pagkaon sa iyang unod ug sa pag-inom sa iyang dugo,’ ug unsaon nila sa paghimo niini?

◻ Unsay kahulogan sa pagbaton ug ”kinabuhi diha sa inyong kaugalingon,” ug sa unsang paagi ug kanus-a kini mabatonan?

◻ Unsang kalipay ang mahimong maambitan karon may labot sa “tinapay sa kinabuhi”?

1. Unsang malisod nga kahimtang ang giatubang karon sa katawhan?