Mga Batan-on—Ayaw Kamo Pagpalimbong

“Si Satanas nagapadayon sa pagtakoban ingong manulonda sa kahayag.”—2 CORINTO 11:14.

WALAY duhaduhang kitang tanan sa usa o laing panahon nalimbongan. Tingali kamo nagdula nga niana gilipat ka sa usa ka kaatbang nga magdudula pinaagi sa malimbongong tikang nga ikaw nahigawas sa posisyon ug siya ang nakaeskor nga nakadaog sa dula. O tingali ikaw nakapalit ug nindot-tan-awong bestida, nga unya imong nadiskobrehang tapos sa pagsul-ob niana sa mubong panahon ug pagpalaba niana ang panapton dili diay dekalidad sumala sa mipatim-aw. Kinsa, sa linangkob, ang daling malimbongan, nga mao, malansisan o mabitik? Dili ba kadtong menos ug kasinatian? Ug kadaghanan ang sangpotanan labi pang seryoso kay sa yanong pagkapildi sa dula o nalimbongan sa gipalit nga butang.

2. Sa unsang paagi ang pipila ka batan-on naagak sa seryosong buhat nga daotan?

² Pananglitan, si Julie, nga segunda anyo pa lang sa hayskul, maoy, sumala pa niya, “nahigugma” sa “labing guwapo ug popular nga ulitawo sa tibuok eskuylahan.” Siya misaysay: “Ako siyang giingnang dili ako andam alang sa gusto niya, apan kanunay niya akong sultihang ako iya gayong gihigugma, ug magmaayo ra ang tanan. Sa mibalibad gihapon ako, kana ang panahong gihatag niya ang ultimatum. Miingon siya, ‘Tinuod nga gihigugma ko ikaw, ug abi kog kana usab ang imong pagbati. Kon dili nimo kana pamatud-an, tingali maayo pag dili na kita magkita.’” Mao nga misugot si Julie ug nakahimog pakighilawas. Sa sunod adlaw, sa iyang nadiskobrehang nanghambog ang batan-ong lalaki mahitungod sa iyang “nakongker,” nakaamgo siya nga bug-os siyang nalimbongan. Angay unta niyang hisayrang kon tinuod siyang gihigugma sa lalaki, dili unta niya kadto buhaton.

3. (a) Nganong ang pakighilawas seryoso kaayong buhat nga daotan? (b) Unsa ang tumong ni Satanas nga Yawa?

³ Ang butang nga nabuhat niya tungod kay siya nalimbongan o nalansis maoy usa ka seryosong paglapas sa kasugoan sa Diyos. Tungod niana ang Bibliya nagaawhag: “Kalagiw sa pakighilawas.” Ug kini yanong nagaingon: “Walay makihilawason . . . ang may panulondon sa gingharian ni Kristo ug sa Diyos.” (1 Corinto 6:18; Efeso 5:5) Busa bisan tuod si Satanas nga Yawa dili matinagdanon kon kaha ikaw makadaog o mapildi sa dula sa bola o mopalit ka nga maalamon o dili ba, siya tinong naningkamot sa paglimbong kanimo sa paglapas sa kasugoan sa Diyos. “Ang inyong kaaway, ang Yawa, nagalibotlibot sama sa usa ka leyon nga nagangulob, nga nagapangitag matukob,” nagapasidaan ang Bibliya. (1 Pedro 5:8) Sa pagkamatuod, siya nagagamit sa tanan niyang malalangong panghunahuna, apil ang pagtakoban nga manulonda sa kahayag, sa pagpahilayo kanato gikan sa pag-alagad kang Jehova nga Diyos! Dili ba kana makapahinuklog nga hunahunaon?​—2 Corinto 11:14.

Kuhaig Pagtulon-an ang Nahitabo Kang Eva

4. Nganong ikaingong ang mga batan-on linaing tumong ni Satanas?

⁴ Apan alang kaninyong mga batan-on, kini labi pang makapahinuklog nga hunahunaon: Kamo linaing puntiriya ni Satanas. Ngano man kana? Tungod sa inyong pagkabatan-on, menos pa ang inyong panahon sa pagbatog kahibalo ug kaalam, ug si Satanas nagapili sa mga kulang ug kasinatian. Kana iyang gibuhat sa sinugdanan mismo sa iyang pag-alsa. Hinumdoming iyang giduol si Eva sa tanaman sa Eden, dili ang iyang banang si Adan nga gilalang nga una kaniya. Ug milampos si Satanas. Iyang gilimbongan, oo, gipahisalaag ang batan-on pa ug kulag kasinatian nga si Eva pinaagi sa pagpakaaron-ingnon. “Kay si Adan ang unang gilalang,” nagapatin-aw ang Bibliya, “dayon si Eva. Gawas pa, si Adan wala hilimbongi, apan ang babaye bug-os nga hinglimbongan ug nakasala.”​—1 Timoteo 2:13, 14.

5. (a) Angay dili kita maagak sa paghunahuna sa unsa? (b) Unsa ang gikabalak-an ni apostol Pablo, ug nganong kadto nahiangay?

⁵ Ayaw gayod itugot nga kamo hupayon sa paghunahunang ang mga paagi ni Satanas dili mosaler kaninyo, nga dili gayod siya makapalapas kaninyo sa mga kasugoan sa Diyos. Hinumdomi ang balaang pasidaan nga “si Satanas nagapadayon sa pagtakoban nga manulonda sa kahayag.” (2 Corinto 11:14) Si apostol Pablo sa husto nabalaka nga ang Batid sa Panglimbong basin molampos sa iyang mga paagi sa pagtental sa dili kaayo sinating kaubang mga Kristohanon ni Pablo. Si Pablo misulat: “Ako nahadlok nga sa usa ka paagi maingon nga si Eva hinglimbongan sa bitin pinaagi sa lipatlipat niini, ang inyong mga hunahuna basin madaot nga mapahilayo sa katim-os ug kaputli nga angay kang Kristo.”​—2 Corinto 11:3.

6. Unsa ang kahulogan nga matental?

⁶ Matikding si Eva dili yanong nalimbongan o nalansisan; siya natental usab. Kini nagkahulogang siya nadani ngadto sa makadaot nga dalan tungod sa makapadaning panghaylo o tentasyon. Sumala sa Webster’s Third New International Dictionary, ang pagtental nagkahulogan “pagdani ngadto sa pagsupil,” “pagdani o pag-angkon pinaagi sa o daw pinaagig hilom malalangong kamadanihon.” Sa tino, kining diksiyonaryo nagaingon, ang pagtental nagkahulogan “pagdani (sa usa ka babaye) nga makigsekso sa unang panahon.” Kita makabatog kaayohan pinaagi sa pagsubli sa paagi ni Satanas sa pagtental kang Eva (bisan tuod wala malangkit ang seksuwal nga relasyon niining bahina) ug pinaagi sa pagmatikod usab sa susamang mga paaging iyang gigamit karong adlawa.

7, 8. (a) Unsa ang katuyoan sa pangutana ni Satanas kang Eva? (b) Sa unsang paagi gihimo ni Satanas nga ang pagkaon gikan sa kahoy mopatim-awng madanihon kaayo?

⁷ Sa sinugdan mismo sa iyang paagi sa pagtental, si Satanas, sa malalangong paagi, migamit sa usa ka bitin aron ipahinabo nga si Eva mosugod sa pagkuwestiyon sa kasugoan sa Diyos. Sa mga pulong nga gilaraw pag-ayo sa pagpukaw sa katahap ug kawalay-pagsalig, siya nangutana: “Tinuod bang ang Diyos miingong dili kamo mokaon gikan sa tanang kahoy sa tanaman?” Pinaagi niadtong makahahadlok nga pangutana, si Satanas nagpasabot nga makaluoy intawon nga siya dili makakaon gikan sa tanang kahoy sa tanaman. Sa pagkamatuod, siya nangatarongan nga, inay mamatay sumala sa giingon sa Diyos nga mahitabo kaniya, kana makahatag gayod kaniyag kaayohan. “Kay ang Diyos nahibalo nga sa adlaw mismo sa inyong pagkaon gikan niana,” si Satanas mipasalig kaniya, “ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.”​—Genesis 3:1-5.

⁸ Pagkadaotan ug pagkamalinglahon gayod si Satanas, sa pagpasabot nga ang Diyos may gitagong mapuslanong kahibalo gikan kang Eva! Sumala kang Satanas, ang Diyos migamit pag panghulga sa kamatayon sa pagpugong kaniya sa paggamit sa katakos sa paghukom sa kaugalingon. ‘Oy, alkansi ka!’ siya, sa pagkamatuod, misulti kang Eva. ‘Dili ka mamatay. Imong mapahimuslan ang gipahimuslan mismo sa Diyos. Makahukom ka sa imong kaugalingon kon unsay maayo o daotan.’ Madanihon alang kang Eva nga makahimo sa iyang kaugalingong mga desisyon nga dili manubag kang bisan kinsa.

9. Sumala sa gipakita sa Santiago 1:14, 15, unsang sunodsunod nga hitabo ang mitultol sa sala ug sa kaulahian sa kamatayon ni Eva?

⁹ Ingong sangpotanan, si Eva misugod sa pagtan-aw sa kahoy nga maibogon. “Busa nakita sa babaye nga ang kahoy maayo nga pagakan-on ug kadto butang mapangandoy sa mga mata, oo, ang kahoy maayong tan-awon. Busa siya mikuha sa bunga niana ug mikaon niana.” (Genesis 3:6) Apan human niadto, sa nasayran ni Eva nga wala niya madawat ang gisaad, siya mipatin-aw: “Ang bitin​—kana naglimbong kanako.” (Genesis 3:13) Sa pagkamatuod, kadto nagtental usab kaniya, nga nag-agak kaniya pinaagi sa makapadaning panghaylo o tentasyon hangtod ang mahakogong kaibog mipahinabo sa iyang pagpakasala, ug ingong sangpotanan, sa kataposan sa iyang kamatayon.​—Santiago 1:14, 15.

Pagbantay sa mga Laraw sa Yawa

10. Nganong dili kinahanglang kita mahimong walay alamag sa mga laraw ni Satanas, ug unsang mga instruksiyon ang maalamon natong sundon?

¹⁰ Si Satanas nagagamit ug susamang mga laraw, nga mao, mga plano, mga maneobra, ug mga panglingla, sa paglimbong ug pagtental sa mga batan-on karong adlawa. Apan sanglit ang Bibliya nagataganag hingpit nga kasaysayan sa malimbongong mga paagi ni Satanas, dili kinahanglang ikaw mawalay alamag sa iyang mga laraw. (2 Corinto 2:11) Ang imong gikinahanglan mao ang maayong salabotan sa pagpatalinghog sa mga pasidaan ug mga instruksiyong gitagana ni Jehova nga Diyos pinaagi sa iyang Pulong ug organisasyon.​—Proverbio 2:1-6; 3:1-7, 11, 12; 4:1, 2, 20-27; 7:1-4.

11. Sa unsang paagi si Satanas kadaghanan nagatental o nagalimbong sa mga batan-on sa pagbuhat ug daotan?

¹¹ Sa unsang paagi si Satanas subsob nagadani o nagahaylo sa mga batan-on sa pagbuhat ug daotan? Siya nagabuhat niana pinaagi sa pagpatim-aw nga madanihon kaayo apan sa samang panahon dili makadaot kadtong butang ginatunglo sa Diyos, mga kalihokang mahimong motultol sa pagkawala sa pag-uyon sa Diyos, sama nga mipatim-awng ingong ang bunga ngadto kang Eva. Ug sama sa iyang gibuhat kang Eva, sulayan niya ang pagpasiugda sa ideya nga ikaw maalkansi sa butang makapalipay. Busa, sa malalangon, malimbongong paagi si Satanas nagapaningkamot sa pagdaot sa inyong pagtahod sa Pulong ni Jehova, ingon man sa mga instruksiyong gihatag sa inyong mahadlokon-sa-Diyos nga mga ginikanan ug organisasyon sa Diyos. Busa nga may maayong katarongan ang Bibliya nagaawhag, “Bumarog kamo nga malig-on batok sa mga lipatlipat [o, sumala sa ginaingon sa The Kingdom Interlinear Translation of the Greek Scriptures, “mabitikong mga buhat”] sa Yawa.”​—Efeso 6:11.

12. (a) Unsang kamatuoran mahitungod kang Satanas ang angay natong tanan nga isipong seryoso, ug ngano? (b) Unsay imong pag-isip sa giingon sa 1 Juan 2:15 ug Santiago 4:4? (c) Unsay buot ni Satanas nga malimbongong ipatuo kanimo?

¹² Dayag, si Eva hungog sa pagtuo sa bakak ni Satanas. Dili ba daghang batan-on karong adlawa susamang nagapakawalay-bili sa mga pasidaan sa Pulong ni Jehova o niadtong gihatag sa ilang mga ginikanan o Kristohanong mga ansiano? Komosta ka man? Pananglitan, giisip mo bang seryoso nga si Satanas nga Yawa mao ang magmamando niining kalibotana ug nga, ingong diyos niining sistema sa mga butang, siya nagabuta sa mga hunahuna sa katawhan? (1 Juan 5:19; Juan 12:31; 14:30; 16:11; 2 Corinto 4:4) Naningkamot ka ba gayod sa pagpamati sa sugo sa Diyos: “Ayaw ninyo higugmaa ang kalibotan o ang mga butang sa kalibotan”? (1 Juan 2:15) Ug pangutan-a ang imong kaugalingon: ‘Nagtuo ba gayod ako sa Kasulatanhong pahayag, “Busa, bisan kinsa nga buot mahimong higala sa kalibotan nagahimo sa iyang kaugalingon nga kaaway sa Diyos”’? (Santiago 4:4) Buot ni Satanas nga ikaw limbongan sa pagtuo nga ang kalibotan dili makuyaw, nga ang mga kalihokang ginapasiugda niini dili makadaot. Apan pagbantay! Ayaw pagpalimbong!

Malimbongong mga Pangdani Karong Adlawa

13. Unsang kostumbreha ang napopular sa daghang dapit, ug unsay buot ni Satanas nga atong tuohan mahitungod niana?

¹³ Si Satanas kadaghanan magdani sa mga tawo sa pagbuhat ug daotan pinaagi sa mga butang nga sa kaugalingon dili tingali daotan o wala tungloha sa tin-aw sa Bibliya. Pananglitan, bisan tuod daghang magtiayon adunay makapahimuot nga mga madumdoman sa malipayong mga panahong ilang natagamtam panahon sa ilang panagtrato, dunay lagmit nga mga kapeligrohan kon ang lalaki ug babaye magdeyt nga silasila ra. Sa pagkamatuod, ang pakigdeyt bubag-o nga kostumbre nga napopular sa daghang dapit sukad lamang sa Gubat sa Kalibotan I. Buot ni Satanas nga patuohon ka nga ang kostumbre yanong dili-daotang matang sa kalingawan nga pinaagi niana masinati sa mga batan-on ang mga sakop sa kaatbang nga sekso sa usa-sa-usa nga paagi. Apan, sa pagkamatuod, ang kostumbre napuno sa moral nga mga kapeligrohan.

14. Unsay atong pagahunahunaon sa kostumbre sa pakigdeyt matulotimbang? (b) Unsang mga pagbati ang maugmad sa pagpakigdeyt?

¹⁴ Ang tigulang, hamtong nga mga Kristohanon, tungod sa ilang kasinatian, mas nakamatngon niining mga kapeligrohana ug busa makahatag sa mapuslanong pagtultol. (Proverbio 27:12) Apan tingali imong gibating walay kapeligrohan sa pakigdeyt ug ang imong mga ginikanan sobra ka estrikto, nga nagahikaw kanimo sa kalingawan. Apan maingong ang mga tawo mahukman pinaagi sa mga bungang ilang gipamunga, mao usab ang mga kostumbre sama sa pakigdeyt. (Proverbio 20:11; Mateo 7:16) Pananglitan, ang usa ka 18-anyos nga regular nakigdeyt, ug kinsa namabdos, miingon: “Ako usa sa kaliboang batan-ong naghunahunang kini dili mahitabo kanako.” Miangkon siyang tapos sa pagpakigdeyt sa taastaas nga panahon “ang pagkinuptanay sa kamot ug paghalok dili na makapaukyab.” Sa susamang paagi, ang usa ka 17-anyos nga babaye nga kanunay nakigdeyt, mitaho: “Ang panaghalok ug panaggakos mosamot hangtod nga pangandoyon ko gayod nga makigsekso kanako ang lalaki.” Talagsaong pagbati? Dili gayod.

15. Sa unsang mga trahedya ang pakigdeyt may dakong tulubagon o responsabilidad?

¹⁵ Kon ang mga batan-ong naibog sa pisikal sa usag usa magpalain kanunay sa ilang kaugalingon, maingon nga kasagaran kon magdeyt, ang seksuwal nga tinguha mahimong mosamot hangtod kana moganoy bisan sa maayog-tuyo nga mga batan-on ngadto sa paglapas sa kasugoan sa Diyos. Hunahunaang kapin sa usa ka milyong tin-edyer nga babaye sa Tinipong Bansa mamabdos kada tuig ug ginatos ka libolibo kanila ang nagpataktak sa bata o nanganak sa ilang mga anak nga dili minyo. Ikasubo, usahay ang pipila nianang mga tin-edyer nga babaye maoy mga anak sa mga Saksi ni Jehova ug mao usab ang mga batan-ong lalaki nga nahilangkit kanila. Ang makibag-ong kostumbre sa pakigdeyt kinahanglang magpas-an sa dakong responsabilidad sa maong mga trahedya, ingon man sa tingali minilyong bag-ong kaso sa mga sakit nga ipasa sa seksuwal nga paagi kada tuig.

16. (a) Diin lamang tukmang pagatagbawon ang seksuwal nga mga tinguha? (b) Unsay mahitabo sa daghan sa katawhan sa Diyos?

¹⁶ Gituyo sa Diyos nga ang seksuwal nga tinguha pagatagbawon sulod sa mga bugkos sa kaminyoon, diin kini makapatungha sa kalipay ug katagbawan. (Hebreohanon 13:4; Proverbio 5:15-19) Ugaling, gigamit nga malalangon ni Satanas kining hinatag-sa-Diyos nga gasa sa pagtental sa mga tawo sa pag-abusar sa sekso ug pagpakighilawas. Sa karaang panahon, 24,000 ka Israelinhon ang gipatay sa usa ka adlaw tungod niining salaa batok sa Diyos, ug sa pagkakaron libolibo kada tuig ang ipalagpot gikan sa Kristohanong kongregasyon tungod sa pakighilawas. Busa magmaalamon. Pamati sa tambag ug direksiyon. Ayaw itugot nga ikaw hilimbongan.​—Numeros 25:1-9, 16-18; 31:16.

17. (a) Unsang malimbongong hunahuna ang gipasiugda ni Satanas mahitungod sa mga butang sama sa mga dula, musika, ug sayaw? (b) Nganong ang kalingawan sa kalibotan dakong kapeligrohan sa katawhan sa Diyos?

¹⁷ Magmaigmat, usab, sa ubang laraw ni Satanas. Pananglitan, ang mga dula, musika, ug sayaw nahimong iladong bahin sa kalingawan sa iyang kalibotan. Tinuod, kining mga butanga sa kaugalingon dili gayod daotan ug mahimong makalipay ug mapuslanon pa. (1 Timoteo 4:8; Zacarias 8:5; Lucas 15:25) Apan, si Satanas sa pagkamalimbongon nagpasiugda sa hunahuna nga kana dili peligroso, bisan pag regular nga apilan uban sa mga tawo sa kalibotan. Apan ang Pulong sa Diyos nagapasidaan: “Ayaw kamo pagpalimbong. Ang daotang mga panagkauban makadaot sa mapuslanong mga batasan.” (1 Corinto 15:33) Hunahunaa kini. Kon ang relihiyon ug politika bahin sa sistema ni Satanas, dili ba binuang ang pagtuo nga ang kalingawang gipasiugda sa kalibotan nahigawas sa iyang impluwensiya? Kinahanglang ikaw kanunayng magbantay nga dili “itugot nga ang kalibotan alirong kaninyo magpuga kaninyo sa hulmahan niini.”​—Roma 12:2, The New Testament in Modern English, ni J. B. Phillips.

Mga Tagana sa Pagpanalipod sa mga Batan-on

18. Nganong angay ninyong pabilhan ang mga ginikanan nga nagatudlo ug nagagiya kaninyo?

¹⁸ Si Jehova nga Diyos mahigugmaong mihimog mga tagana sa pagpanalipod sa mga batan-on gikan sa pagkahilimbongan. Nahauna, iyang gitagana ang inyong mga ginikanan sa pagtudlo ug paggiya kaninyo. Ug malipay ka kon ilang buhaton kana. Ang usa ka masulob-ong 18-anyos, kinsa gipaangkan, mimulo nga kadto dili unta mahitabo “kon gibuhat pa sa akong mga ginikanan ang ilang katungdanan ingong mga ginikanan, ug kon gisultihan ako sa mga kapeligrohan sa usa ka trato, ug kon gidid-an ako sa pagpakigtrato.” Busa magpasalamat kon ikaw may mga ginikanang mahadlokon sa Diyos. Sila wala magsulay sa pagpit-os kanimo ug paghimo sa kinabuhi nga dili makapahamuot pinaagi sa mga pagpiot nga ilang ipahamtang kanimo. Sa kaatbang, sila nahigugma kanimo ug buot manalipod kanimo. Pahimusli ang ilang kasinatian ug kaalam pinaagi sa pagtinguha sa ilang tambag.

19. Unsang dugang tabang ang gitagana sa pagpanalipod sa mga batan-on?

¹⁹ Dugang pa, gitagana ni Jehova ang iyang yutan-ong organisasyon sa pagtabang kanimo. Pananglitan, ang matag gula sa Pagmata! nagadala sa pangunang artikulong “Mga Batan-on Nangutana . . . ” nga nagapakita sa pagkamakataronganon sa mga sukdanan ni Jehova. Sa susama, ang pulyetong School and Jehovah’s Witnesses gitagana sa pagtabang kanimo sa pagsunod sa mga kasugoan ug mga prinsipyo sa Diyos diha sa tunghaan. Ang dugang pagdasig ug tambag gihatag pinaagi sa mga panid sa Ang Bantayanang Torre ug sa mga tigom sa kongregasyon, mga asembliya sirkito, ug distritong mga kombensiyon. Sa pagkamatuod, kining ulohana mismo, “Mga Batan-on​—Ayaw Kamo Pagpalimbong,” maoy usa ka pakigpulong sa bag-o pang distritong kombensiyon ingon man ang ulohan sa usa ka bahin sa Tigom sa Pag-alagad.

20. (a) Nganong daghang tabang ang gitagana sa mga batan-on? (b) Unsang tinamdan ang motabang kaninyo sa pagsukol sa mga paningkamot ni Satanas sa paglimbong kaninyo?

²⁰ Hinaot dili gayod ninyo hunahunaong pinaagi niining tanang pagtagad kami nagasulay sa paglumpong kaninyo aron hikawan kamo sa inyong kalipay. Hinunoa, ang organisasyon sa Diyos nahigugma kaninyo, ug ang tanan nga gipatik ug gipamulong gituyo sa pagpanalipod kaninyo​—sa pagluwas sa inyong kinabuhi! Kat-oni ang pagpabili niining mga taganaha. Himoang batasan ang pagtuon sa Bibliya nga gamiton ang mga basahon sa Sosyedad; itugot nga ang mga kamatuoran magpukaw sa inyong pagpabili. Hinaot inyong mabatonan ang tinamdan sa usa ka 18-anyos si kinsa, tapos sa pagtagad sa pintok nga tambag nga gitumong sa mga batan-on, misulat: “Kana nakapaamgo gayod kanako unsa ka bulahan natong mga batan-on nga kita anaa sa kamatuoran! Walay laing organisasyon sa yuta ang nagaatiman ug nahigugma pag-ayo sa iyang mga batan-on!” Hinaot kita magkahiusa ug suklan ang mga paningkamot sa Yawa sa paglimbong kanato, kay kita dili ingong walay alamag sa iyang mga laraw!

KAHON SA PAGSUBLI

◻ Nganong ang mga batan-on maoy linaing tumong ni Satanas?

◻ Sa unsang paagi si Satanas nagtental kang Eva sa pagbuhat ug daotan?

◻ Sa unsang paagi si Satanas karon kadaghanan nagatental sa mga batan-on sa pagbuhat ug daotan?

◻ Unsa ang mga tagana sa pagpanalipod sa mga batan-on?

1. (a) Sa unsang mga paagi ang daghan kanato nalimbongan? (b) Kinsa, sa linangkob, ang daling malimbongan?

[Hulagway sa panid 10]

Maingong gitinguha ni Satanas ang paglimbong kang Eva, kinsa menos ug eksperyensiya kay kang Adan, ang mga batan-on sa linain mao ang puntiriya ni Satanas

[Hulagway sa panid 13]

Kon ang mga batan-on magpalain sa ilang kaugalingon, ang seksuwal nga tinguha mahimong mosamot ug motultol sa paglapas sa kasugoan sa Diyos