Kinabuhi ug Ministeryo ni Jesus

Ang Pagpili sa Iyang mga Apostoles

KADTO mga usa ka tuig ug tunga sukad si Juan Bawtista nagpailaila kang Jesus ingong ang Kordero sa Diyos, ug gisugdan ni Jesus ang iyang publikong ministeryo. Niadtong panahona si Andres, Simon Pedro, Juan, ug tingali si Santiago (ang igsoon ni Juan), ingon man si Felipe ug Nataniel (nga gitawag usab Bartolome) nahimong una niyang mga tinun-an. Sa nahaigong panahon, daghan pa ang mikuyog kanila sa pagsunod kang Kristo.

Sa maong panahon si Jesus andam na sa pagpili sa iyang mga apostoles. Kini sila mahimong iyang suod nga mga kauban nga hatagag linaing pagbansay. Apan una sila pilion, si Jesus miadto sa usa ka bukid ug migugol sa tibuok gabii sa pag-ampo, lagmit nangayog kaalam ug panalangin sa Diyos. Sa pagbanagbanag sa adlaw, iyang gitawag ang iyang mga tinun-an ug gikan kanila iyang gipili ang 12. Bisan pa niana, sanglit sila nagpadayong mga tumutuon ni Jesus, sila gitawag gihapong mga tinun-an o disipulo.

Ang unom nga gipili ni Jesus, nga ginganlan sa ibabaw, mao ang nahimong iyang unang mga tinun-an. Si Mateo, si kinsa gitawag ni Jesus gikan sa iyang opisina sa buhis, napili usab. Ang lima pa nga napili mao si Judas (ginganlan usab ug Tadeo), si Judas Iskariote, si Simon nga Cananeo, si Tomas, ug si Santiago nga anak ni Alpeo. Kini nga Santiago ginganlan usab nga si Santiago nga Ubos, tingali sa pagpalahi kaniya sa laing apostol nga si Santiago.

Sa maong panahon ang maong 12 kauban ni Jesus sa usa ka panahon, ug nailhan niya silag maayo. Ngani, ang pipila kanila maoy iyang mga paryente mismo. Si Santiago ug ang iyang igsoong si Juan dayag mga ig-agaw igtagsa ni Jesus. Ug posibleng si Alpeo mao ang igsoon ni Jose, ang amaama ni Jesus. Busa ang anak ni Alpeo, ang apostol nga si Santiago, ig-agaw usab ni Jesus.

Hinuon, si Jesus walay suliran sa paghinumdom sa mga ngalan sa iyang mga apostoles. Apan makahinumdom ka ba kanila? Aw, hinumdomi lamang nga adunay duhang ginganlag Simon, duhang ginganlag Santiago, ug duhang ginganlag Judas, ug nga si Simon may igsoong si Andres, ug nga si Santiago may igsoong si Juan. Kana ang yawi sa paghinumdom sa walo ka apostoles. Ang upat pa nagaapil sa maniningil ug buhis (Mateo), ang usa nga sa ulahi nagduda (Tomas), usa nga gitawag gikan sa silong sa usa ka kahoy (Nataniel), ug ang iyang higalang si Felipe.

Napulog-usa sa mga apostoles maoy taga Galilea, ang teritoryong pinuy-anan ni Jesus. Si Nataniel maoy taga Cana. Si Felipe, Pedro, ug Andres maoy taga Betsaida sa sinugdan. Apan si Pedro ug si Andres sa ulahi mibalhin sa Capernaum nga daw maoy gipuy-an ni Mateo. Si Santiago ug Juan may patigayon sa pagpangisda ug lagmit nagpuyo sa Capernaum o duol niana. Mopatim-awng si Judas Iskariote, kinsa sa ulahi nagbudhi kang Jesus, mao ang bugtong apostol nga taga-Judea. Marcos 3:13-19; Lucas 6:12-16.

◆ Kinsa sa mga apostoles ang mga paryente ni Jesus?

◆ Kinsa ang mga apostoles ni Jesus, ug sa unsang paagi mahinumdoman nimo ang ilang mga ngalan?

◆ Taga diin ang mga apostoles?

[Hulagway sa panid 9]

Sa wala pa mopili sa iyang 12 ka apostoles, gigugol ni Jesus ang tibuok gabii sa pag-ampo kang Jehova