Pagkahalangdon sa Ngalan ni Jehova!
“Oh Jehova nga among Ginoo, pagkahalangdon sa imong ngalan sa tibuok yuta!”—SALMO 8:1, 9.
1. Nganong ‘gipasuka’ ni Jehova ang yuta sa mga Canaanhon?
SA KATAPOSAN, sa 1473 W.K.P., ang Israel nagbarog sa yutang saad. Apan ang mga katuigan sa teokratikanhong gubat naghulat sa unahan, kay kinahanglang ilang hinloan ang yuta sa daotang mga pumoluyo niini. Ingon ba gayod niana ka daotan ang mga Canaanhon? Tinuod ingon sila niana ka daotan! Ang ilang pagsimbag mga diyosdiyos ug ang imoral nga paagi sa kinabuhi dulumtanan sa panan-aw ni Jehova ug kapeligrohan sa katawhan sa Diyos. Busa, gisugo sa Diyos si Moises sa pagpahayag nga Iyang gamiton ang Iyang balaang nasod, ang Israel, ingong Iyang Tigpahamtang sa silot. Busa, ‘gipasuka’ ni Jehova ang yuta sa mahugawng mga nasod.—Levitico 18:1-30; Deuteronomio 12:29-32.
2. Unsang “mga bunga” ang gipamunga sa relihiyosong mga sistema sa kalibotan?
2 Karon, tingali ibangon usab nato ang pangutana, Daotan na ba gayod ang kalibotan nga takos nang laglagon? Buweno, komusta ang relihiyosong sistema sa kalibotan? Makasubo, sila napakyas sa pagpasidungog sa Maglalalang, si Jehova nga Diyos. Ang mga tawo sa Kakristiyanohan mibulag kaniya, “ang tuboran sa buhing tubig, aron sila makakalot ug mga atabay, likian nga mga atabay, nga dili kasudlan ug tubig.” (Jeremias 2:13) Ang pagtulon-an sa ilang sekta walay sulod nga “tubig” sa kamatuoran. Gipakita nila ang ilang kaugalingon nga bahin sa kalibotan pinaagi sa pagpaluyo sa mga gubat ug sa mga politika ug sa matugotong mga batasan niini sa sekso. Sumala sa gipamulong ni Jesus, sila mailhan “pinaagi sa ilang mga bunga.”—Mateo 7:16, 17; itandi sa Galacia 6:7, 8.
3. Unsay miresulta sa paglapas sa kalibotan sa kasugoan sa Diyos?
3 Komusta ang moral nga paggawi sa kalibotan? Karong bag-ong mga katuigan, adunay tibuok-yutang pagdaghan sa mga aborsiyon, pagsabak sa mga tin-edyer, ug bungkang nga mga panimalay, ilabina diha sa mga yuta nga gitawag Kristohanon. Diha sa ubang kayutaan, ingon ka daghan sa 50 porsiento sa tanang mga kaminyoon natapos sa diborsiyo. Ang “seksuwal nga kausaban” sa katuigan sa 1960 adunay ubang madaotong mga resulta. Ang usa niini gikutlo diha sa The New York Times sa Hunyo 13, 1986, ilalom sa unang panid nga nag-ulohan: “NAPULO KA PILONG PAGTUBO SA MANGAMATAY SA AIDS GILAOMAN SA KATUIGANG ’91.” Gipadayag sa artikulo nga sa 1991, ang numero sa mga pasyente sa AIDS (Acquired Immune Deficiency Syndrome) sa Tinipong Bansa lamang moabot ug kapin sa 100,000 nga may tinuig nga gasto sa medisina hangtod sa 16 bilyones dolyares. Kining makamatayng sakit napasa ilabina sa homoseksuwal nga kalihokan, pag-abuso sa droga, ug pagdugang ug dugo—diin tanan supak sa balaod sa Diyos.—1 Corinto 6:9, 10; Galacia 5:19-21; Buhat 15:19, 20.
4. (a) Sa unsang paagi lahi ang atong gubat nianang sa Israel sa mga panahon ni Josue? (b) Asa kutob nga kita makig-uban sa mga tawo sa kalibotan, ug ngano?
4 Sa panahon ni Josue, gipadala ni Jehova ang Iyang balaang nasod sa paghinlo sa Yutang Saad pinaagi sa literal nga gubat. Karon, espirituwal ang atong pakiggubat. (2 Corinto 10:3, 4) Kitang mga Saksi dili mohimog mabangis nga lihok sa pagpapha niadtong nagasalikway sa Pulong sa Diyos. Si Jehova ang mopapha kanila sa iyang tinudlong panahon ug sa iyang kaugalingong paagi. (Deuteronomio 32:41, 43) Dili kita magpakigsandurot sa mga tawong walay-prinsipyo, hinunoa kita makapakitag tinuod nga gugma pinaagi sa pagpahibalo kanila sa maayong balita sa Gingharian. (1 Corinto 15:33) Tudloan nato sila sa Pulong sa Diyos ug dasigon sila nga ‘maghinulsol, ug magbag-o, aron mapala ang ilang mga kasal-anan.’—Buhat 3:19; Mateo 21:31, 32; Lucas 5:27-32.
Si Rahab ug ang Iyang Banay
5, 6. (a) Nganong miadto ang mga espiya sa Jericho ug sa balay ni Rahab? (b) Karon, sa unsang paagi gitubag ni Jehova ang mga pagpangayog panabang? (c) Sa unsang paagi gipakita ni Rahab nga “higala siya sa kalinaw”?
5 Bisan sa wala pa makatabok ang Israel sa Suba sa Jordan, gihatagag pagtagad ni Jehova ang siyudad sa Jericho. Gisugo ni Josue ang duha ka espiya, nga naghawas sa tanang banay sa Israel, ug gisultihan sila: “Lakaw kamo, tan-awa ang yuta ug ang Jericho.” Nganong panid-an ang Jericho? Bisag gamay ang siyudad ug walay ikasarang sa kasundalohan sa Israel, agianan kadto paingon sa Canaan. Apan ang presensiya didto sa mga espiya nakahatag higayon alang niadtong anaa sa Jericho sa pagpaila sa ilang kaugalingon sa dayag kon sila ba dapig kun batok kang Jehova. “Busa [ang mga espiya] miadto ug miabot sa balay sa usa ka daotang babaye nga ginganlag Rahab, ug sila misaka didto.” (Josue 2:1-7) Sa walay duhaduha balaang pagtultol ang nag-agak niadtong mga espiyaha sa balay ni Rahab, sama nga gitultolan sa mga manulonda karon ang sa mga Saksi ni Jehova ngadto sa mga tawo nga nagapangayog espirituwal nga tabang! “Ang mga mata ni Jehova anaa sa mga matarong, ug ang iyang mga igdulongog anaa sa ilang pagpangayog panabang.”—Salmo 34:15; tan-awa usab ang 2 Cronicas 16:9.
6 Nganong ang mga espiya misulod sa balay sa usa ka daotang babaye? Dili alang sa imoral nga mga katuyoan kondili sa paglingla sa Canaanhong mga tumatan-aw. Ang mga pulong ni Rahab sa mga espiya nagpaila nga siya walay imoral nga interes kanila. Nahibalo nga sila mga alagad ni Jehova, siya mipahayag kanila sa iyang dakong tinguha nga mahimong magsisimba ni Jehova. Iyang gipameligro pa gani ang iyang kinabuhi pinaagi sa pagtago kanila diha sa iyang atop. Sama siya sa “karnero” sa sambingay ni Jesus, nga nagpakitag kalulot sa “mga igsoon” sa Ginoo. (Mateo 25:31-46) Samtang maalamong nagalihok, ang mga Saksi ni Jehova karon dili magpanuko sa pagduaw ug sa pagtuon sa Bibliya uban niining mga interesadong ‘mga higala sa kalinaw.’—Lucas 10:5-7.
7. (a) Sa unsang paagi gipakita ni Rahab ang iyang pagtuo kang Jehova? (b) Unsang kaisipan ang kinahanglang ipakita sa mga bag-ohan karon, ug unsa ang angay nilang buhaton?
7 Nakahibalo si Rahab sa gamhanang mga buhat ni Jehova. Ngadto sa gitagong mga espiya siya mipahayag pagtuo, nga nag-ingon: “Ako nahibalo nga ihatag ni Jehova kaninyo ang yuta, ug ang kahadlok kaninyo midangat kanamo, ug nga ang tanang mga pomuluyo sa yuta hingpugdawan tungod kaninyo.” Tapos gisugilon ang taho nga iyang nadungog mahitungod sa gamhanang mga buhat ni Jehova, si Rahab mipadayon: “Si Jehova nga inyong Diyos mao ang Diyos sa langit sa kahitas-an ug dinhi sa ubos sa yuta. Busa karon, palihog, panumpa kamo kanako sa ngalan ni Jehova, kay ako nagpakitag mahigugmaong kalulot kaninyo, sa ingon kamo kinahanglang magpakitag mahigugmaong kalulot sa panimalay sa akong amahan, ug hatagi ako ug usa ka kasaligang ilhanan.” (Josue 2:9-13) Sama kang Rahab, ang mga bag-ohan nga nagtuon sa kamatuoran sa Diyos karon dili angayng mahadlok tungod sa paghukom nga duol nang ipahamtang sa “adlaw ni Jehova.” (Sofonias 1:14-18) Hinunoa, sila mitalikod gikan sa dili-diyosnong mga paagi ug nangita sa tabang sa mga Saksi ni Jehova aron makabaton ug kaluwasan.—Salmo 3:6-8; Proverbio 18:10.
8. (a) Unsay katugbang karon sa pagbutang ni Rahab ug “pisi nga mapula” sa iyang bentana? (b) Nganong gipahayag nga matarong si Rahab, ug unsa ang resulta?
8 Ang ilhanan nga gihatag sa mga espiya kang Rahab mao ang “pisi nga mapula” nga ihigot niya sa bentana nga maoy agian sa pag-eskapo sa mga espiya. (Josue 2:17-21) Tungod sa pagbutang ni Rahab sa ilhanan, ang iyang balay wala malakip dihang gilaglag ang Jericho. Sama usab karon, kadtong nagapakitag pagtuo sama kang Rahab natiman-an alang sa kaluwasan ingong dedikado, bawtismadong mga magsisimba ni Jehova. Ang Pinadayag 7:9, 10, 14 nagbatbat kanila ingong “dakong panon” nga “nakalaba ug nakapaputi sa ilang mga besti sa dugo sa Kordero.” Sila nagpakitag pagtuo sa gihalad nga dugo ni Kristo ug giubanan kinig Kristohanong mga binuhatan. (Roma 10:9, 10) Atong mabasa diha sa Santiago 2:24, 25: “Makita ninyo nga ang tawo ipahayag nga matarong pinaagi sa mga binuhatan, ug dili lamang pinaagi sa iyang pagtuo. Ug sa ingon usab nga paagi, dili ba si Rahab bisan gani daotang babaye gipahayag nga matarong pinaagi sa binuhatan, tapos nga maabiabihon niyang gidawat ang mga mensahero ug sa pagpagawas kanila sa laing agianan?”
9. (a) Unsa ang nalangkit sa “mga binuhatan” ni Rahab? (b) Unsay miresulta sa maisogong pagwali karon?
9 Lakip sa “mga binuhatan” ni Rahab mao ang pagpanalipod sa duha ka espiya ug sa pagtigom sa uban niyang panimalay alang sa kaluwasan. Sa samang paagi, ang “dakong panon” sa modernong panahon okupado sa maunongong pagpaluyo sa dinihogan “matinumanon ug maalamong ulipon” samtang kining pundoka nagataganag espirituwal nga “pagkaon sa hustong panahon” ug nagadumala sa tibuok-yutang kalihokan sa pagwali sa Gingharian. (Mateo 24:45-47) Sa iyang bahin, maisogon si Rahab sa pagpamatuod sa panimalay sa iyang amahan—usa ka kalihokan nga puno sa kapeligrohan, kay mahimong luiban siya. (Itandi sa Mateo 10:32-36.) Sa susama, diha sa daghang kayutaan diin adunay pagtutol karon, kinahanglang maisogon ang mga Saksi ni Jehova sa paghatag pamatuod. Miresulta kinig dakong pagpanigom, ug kasagaran tibuok pamilya ang nanagpanggula sa Babilonyang Bantogan sa ilang pagbarog alang sa putli nga pagsimba kang Jehova.—Salmo 73:28; 107:21, 22.
Jericho—Kaniadto ug Karon
10. Unsang linaing pagtagad ang gihatag sa Jericho?
10 Atong tan-awon kining dramatikong mga hitabo gikan sa lahi nga anggulo. “Ang Jericho tinakpan pag-ayo tungod sa mga anak sa Israel, walay makagula ug wala usay makasulod.” Mao kini ang unang Canaanhong siyudad nga nailalom sa espada sa kalaglagan ni Jehova. Tungod niana, ingong unang mga bunga nga gipahinungod sa Diyos, nakadawat kadto ug linaing pagtagad. Si Josue mibatbat: “Ang siyudad mahimong usa ka butang nga pagalaglagon gayod; kana ug ang tanang butang nga anaa niana iya kang Jehova.”—Josue 6:1, 17; itandi sa Exodo 22:29; Levitico 27:26.
11. (a) Unsang makapukawng katumbas ang atong nakita karon? (b) Paghatag pananglit sa “kalisang” sa Babilonyang Bantogan.
11 Katumbas gayod kini sa Babilonyang Bantogan, ang kalibotang empiryo sa bakak nga relihiyon nga midangat na sa kinatayoktokan sa pagkadaotan niining namansahag dugo nga ika-20ng siglo! Kini misulay sa pagtak-op sa mga pultahan niini batok sa pagsulong sa mga Saksi ni Jehova. Sumala sa mga pulong ni Rahab, “ang kahadlok” sa katawhan sa Diyos midangat diha niana. Pananglitan, ang pamantalaan sa Italya nga La Repubblica sa Nobyembre 12, 1985, may ulohan: “NANGALISANG ANG MGA IGLESYA SA MGA SAKSI NI JEHOVA.” Ang artikulo mitaho mahitungod sa tigom, nga giapilan sa mga kardinal sa Romano Katoliko, nga gihimo sa Bologna aron sa pagsanta sa hulga sa mga Saksi ni Jehova. Ang papa nagpadala ug telegrama sa pagdasig ug pagpaluyo. Ang singgit gipalanog: “Ila nang gidagsaan ang tibuok kalibotan,” ug gideklarar nga “karon ang iglesya molihok” sa pag-atubang niini nga “hulga.” Apan molampos ba kini?—Jeremias 1:17-19.
12. (a) Sa unsang paagi ang ideya sa Babilonyang Bantogan mahitungod sa “diyos” lahi sa kamatuoran? (b) Nganong makig-away si Jehova alang sa iyang mga saksi?
12 Ang Babilonyang Bantogan misagop ug makalibog nga panon sa mga diyos, gikan sa misteryosong Trinidad sa Kakristiyanohan ngadto sa milyonmilyong mga diyos sa mga relihiyon sa Sidlakan. Sa wala pa sugoa si Josue, si Moises miingon: “Pamati, O Israel: Si Jehova nga atong Diyos maoy usa lamang ka Jehova.” Karon, ang mga Saksi ni Jehova lamang ang nagbarog sa paghimaya niining “usa ka Diyos ug Amahan.” (Deuteronomio 6:4; Efeso 4:6) Si Jehova makig-away alang kanato sama sa iyang gihimo sa mga adlaw ni Josue ug sa ubang maunongong mga lider sa Israel.—2 Cronicas 20:15, 17; 32:7, 8; Isaias 54:17.
Pagpahamtang sa Paghukom
13. (a) Unsay mga hitabo nga mitultol sa paglikos sa Jericho? (b) Unsang mga katumbas ang atong nakita karon?
13 Bug-os nga nangandam si Josue alang sa paglikos sa Jericho. Ang mga lalaki nga nanubo sa kamingawan gituli. Kini nagsimbolo sa ilang pagkuha sa tanang butang nga nakaulang sa bug-os nga debosyon kang Jehova. (Deuteronomio 10:16; 30:5, 6) Ang pagsaulog sa Paskua gibalik. Ang mga tawo misugod sa pagkaon sa mga abot sa yuta dihang wala na ang milagrosong pagkataganang mana. Dugang pa, ang “prinsipe sa kasundalohan ni Jehova,” sa walay duhaduha ang dili-pa-tawong Logos, mipakita kang Josue, gipasaligan siya. Ug mapaubsanong gidawat ni Josue ang presensiya niining Usa. Niining tanan, atong nakita ang mga katumbas diha sa mga eksperyensiya sa modernong-adlawng mga saksi ni Jehova samtang ilang gipahinungod ang ilang kaugalingon sa buluhaton karon. Ang atong espirituwal nga pagkaon labi pang nagkalainlain ug mas matambok sa unod dihang “ang matinumanon ug maalamong ulipon” anam-anam nga nagaabante sa unahan ilalom sa pagpanguna ni Ginoong Jesu-Kristo.—Josue 5:1-15.
14. Unsang katingalahang mga taktika ang gisugo ni Jehova nga himoon aron malikosan ang Jericho?
14 Tan-awa karon ang esena sa gubat. Pagkakatingalahang mga taktika ang gigamit ni Jehova! Kausa sa usa ka adlaw sulod sa unom ka adlaw, ang mga saserdote sa Israel mimartsa palibot sa Jericho, nga nagdala sa Arka, nga naghawas sa presensiya ni Jehova. Nag-una kanila mao ang pito ka saserdote nga nanaghuyop sa mga trompeta sa laking sungay sa karnero, uban sa mga sundalo sa Israel nga nagmartsa sa unahan ug sa luyo kanila. Apan sa ikapitong adlaw ‘mibangon sila ug sayo, dihang mibanagbanag na,’ ug mimartsa libot sa siyudad sa pito ka beses. Pagkadako tingali sa kalisang sa mga taga Jericho!—Josue 6:2-15.
15. Unsang katugbang ang nakita sa kalihokan sa mga Saksi ni Jehova karon?
15 Atong nakita ang tagsaong katugbang niini diha sa gihimo sa mga Saksi ni Jehova karon sa tibuok yuta. Dili pa dugay, dihay tagsaong pagdako sa atong kalihokan sa pagwali sa Gingharian. Sulod sa lima ka tuig hangtod sa 1985, ang mga ranggo sa payunir miuswag ug 134 porsiento. Ang panon sa mga payunir ug ubang matinumanong mga magmamantala sa Gingharian mibangon ug “sayo,” sa literal nga diwa, ug madasigong nakigbahin sa pagwali sa mga paghukom ni Jehova. Ngadto sa mga lider sa mga relihiyon sa Kakristiyanohan, kining mga Saksi nakitang “usa ka dakong katawhan ug kusganon.” Ang mga klero “nag-antos sa hilabihan nga kasakit” dihang ilang nakita nga ang pagwali sa kamatuoran nakapahinabo sa daghang mga matinud-anon sa pagbiya kanila ug mibarog alang kang Jehova.—Joel 2:1-3, 6.
16. (a) Unsang mga milagro ang nagtimaan sa pagkalumpag sa Jericho? (b) Sa unsang paagi gibalosan ang pagtuo ni Rahab?
16 Sa kataposan gisugo ni Josue ang katawhan: “Suminggit kamo; kay si Jehova naghatag kaninyo sa siyudad.” Midahunog ang dakong singgit sa gubat. Ang yuta mikurog ug—milagro sa tanang milagro—nalumpag ang padir sa Jericho. Ang mga Israelinhon masundanong miasdang sa paglaglag sa tanang buhing butang sa siyudad. Ilang gisunog kini. Apan tan-awa! Usa ka gamayng seksiyon sa padir sa gawas nagbarog gihapon, ug sa mga bentana niini mao ang mapulang pisi. Si Rahab ug ang pamilya sa iyang amahan gipagawas nga wala laglaga. Sa ulahi, ang pagtuo ni Rahab dugang gigantihan dihang nahimo siyang asawa sa Isarelinhong si Salmon ug usa sa kagikan ni Jesu-Kristo.—Josue 6:16-26; Mateo 1:5.
17. Unsay gilandongan niining mga milagroha?
17 “Busa napamatud-ang nagauban si Jehova kang Josue, ug ang iyang kabantog nasangyaw sa tibuok yuta.” Sa samang paagi, ang halangdong ngalan ni Jehova mabayaw dihang malaglag ang Babilonyang Bantogan ug mahukasan sa iyang bahandi ug himaya inigsugod sa “dakong kasakitan.”—Josue 6:27; Pinadayag 17:16; 18:9, 10, 15-17; Mateo 24:21, 22.
Ang Apostata Napakyas
18. (a) Nganong ‘ang kasingkasing sa mga tawo misugod sa pagkatunaw’? (b) Unsay gihimo ni Josue nianang malisod nga kahimtang?
18 Tapos gilayon sa matunog nga kadaogan sa Jericho, usa ka katingalahang butang ang nahitabo. Ang kasundalohan nga gipadala ni Josue sa pagsulong sa kanait nga siyudad sa Ai napilde! “Busa ang mga kasingkasing sa mga tawo misugod sa pagkatunaw ug nahimo sama sa tubig.” Ang naguol nga Josue mituaw diha sa pag-ampo: “Alaut, Soberano Ginoong Jehova, . . . unsay buhaton mo sa imong dakong ngalan?”—Josue 7:2-9.
19, 20. (a) Sa unsang paagi gihusay ni Jehova ang kabuangan ni Achan, ug uban sa unsang pasalig ngadto kang Josue? (b) Unsang modernong-adlawng katugbang ang nakita?
19 Gipadayag ni Jehova kang Josue nga “usa ka makauulawng kabuangan” ang nahimo sa Israel. Si Achan sa tribo ni Juda ang napadayag nga mao ang nakasala. Gikan sa mga inagaw sa Jericho nangawat siya ug “maanindot” nga sapot nga Babilonyanhon, ug mga bulawan ug salapi. Si Achan ‘gihinginlan’ ni Jehova, ug siya ug ang iyang pamilya gibato. Dayon sila ug ang ilang mga kabtangan gisunog. Ingong walay kataposang pamatuod niana nga pagpahamtang sa silot ni Jehova, ibabaw kang Achan gitapok ang daghang bato, ug ang lugar gitawag “Walog sa Achor,” diin ang maong ngalan nagkahulogang “Paghingilin; Kagubot.” Sa makausa pa, si Jehova miingon kang Josue: “Ayaw kahadlok o kalisang.” Nabayaw ang ngalan ni Jehova sa pagkaagi nga wala na gayod mapilde pa sa gubat si Josue.—Josue 7:10–8:1.
20 Aduna bay modernong-adlawng katumbas sa sala ni Achan? Oo, aduna. Si apostol Pablo mipasidaan mahitungod sa “mga mabangis nga mga lobo” nga dili magtagad sa teokratikanhong kahikayan ug magpadayon sa ilang kaugalingong hakog nga dalan. Sukad sa 1919, sa matag karon ug unya, kining maong mga hakog nagapanungha taliwala sa katawhan sa Diyos. Ingong bag-ong pananglit, sa katuigan sa 1970 ang pipila ka inilang mga ansiano mireklamo. Makawala sa ilang “dignidad” ang pagpamatuod sa balay ug balay, sa pagwali sa balita sa Gingharian sumala sa gihatag nga sumbanan sa mga apostoles ni Jesus. (Buhat 5:42; 20:20, 21, 29, 30) Daw matahom kanila ang pagbalik sa mga pagtulon-ang Babilonyanhon. Sa maliputon misulay sila sa pagbangon ug mga pagduhaduha sa “kataposang mga adlaw” ug sa pagpahinay sa buluhaton sa mga Saksi ni Jehova. (2 Pedro 3:3, 4) Sa kataposan, sila gipalagpot.—2 Juan 10, 11; itandi sa Filipos 1:15-17; Hebreohanon 6:4-8.
21. (a) Unsay hinungdan sa paghinay sa buluhaton sa ulahing bahin sa katuigan sa 1970? (b) Unsa ang nakatabang sa ‘pagpadali’ sa buluhaton sukad niadtong panahona?
21 Ang Bantayanang Torre sa Enero 15, 1980, sa walay lipodlipod nagpakita sa Kasulatanhong basehanan sa atong balay ug balay nga ministeryo ug ang pagkahinungdanon niini. Ang maunongong mga Saksi mabaskog nga nagapadayon sa unahan ngadto sa katuigang 1980! Malagmit ang presensiya sa gamayng numero sa mga apostata nakaamot sa pagpahinay sa buluhaton ni Jehova sa kataposan sa katungang bahin sa katuigang 1970—dihang ang aberids sa tinuig nga pag-uswag sa aktibong mga ranggo sa mga Saksi ni Jehova mius-os ubos sa 1 porsiento. Apan, ang tinuig nga pag-uswag sa kataposang lima ka tuig may aberids nga kapin sa 6 porsiento. Ang mga magmamantala sa Gingharian nakaabot ug labing taas nga gidaghanon sa tibuok-yuta nga 3,024,131 sa 1985, kon itandi sa 2,179,256 sa 1975. Si Jehova nagpadayon sa ‘pagpadali’ sa iyang buluhaton!—Isaias 54:2, 3; 60:22.
22. Samtang magpadayon pa kita sa pagsusi sa basahon ni Josue, unsa ang angay natong pabilhan mahitungod sa ngalan ni Jehova?
22 Sa pagkatinuod, ang ngalan ni Jehova nahimong halangdon sa tibuok yuta! Apan daghan pa siyag ‘iasoy’ kanato diha sa basahon ni Josue, nga ato karong tan-awon.—Isaias 42:8, 9.
Diha sa Basahon ni Josue—
◻ Unsang sumbanan ang atong nakita sa kalibotan karon?
◻ Unsay atong nakat-onan gikan sa asoy ni Rahab?
◻ Unsay atong nakita nga kaamgid sa atong mauswagong kalihokan?
◻ Unsay gilandongan sa pagkalumpag sa Jericho?
◻ Unsay gipakita maylabot sa pag-atiman sa sala ni Achan?