Dako Kaayong Panganod sa mga Saksi!

“Sanglit ginalibotan man kita sa dako kaayong panganod sa mga saksi, . . . dalaganon ta nga malahutayon ang lumba nga gibutang sa atong atubangan.”—HEBREOHANON 12:1.

HANDURAWA ang imong kaugalingon nga usa ka magdadagan diha sa istadyom. Miabante ka, nangusog ang imong tanang kaunoran, ang imong mga mata nagtan-aw sa sangkoan. Apan komusta ang mga mananan-aw? Buweno, silang tanan nahimong madaogong mga magdadagan! Sila dili lamang yanong mga tumatan-aw kondili aktibong mga saksi sa pulong ug sa buhat.

1, 2. (a) Unsang mapasumbingayong talan-awon ang anaa sa hunahuna ni Pablo dihang nagsulat sa Hebreohanong mga Kristohanon? (b) Nganong ang kaubang Hebreohanong mga magtutuo nagkinahanglag malig-ong pagtuo?

² Si apostol Pablo hayan may samang mapasambingayong talan-awon diha sa hunahuna dihang nagsulat sa mga Kristohanon sa Hebreohanon (c. 61 K.P.). Sila nagkinahanglan ug malig-ong pagtuo. (Hebreohanon 10:32-39) Pinaagi lamang sa pagtuo nga ilang gisunod ang pasidaan ni Jesus sa pagkalagiw dihang gilibotan ang Jerusalem sa nagkampong mga kasundalohan (sa 66 K.P.) sa pipila ka tuig sa wala pa kini laglaga sa kamot sa mga Romano (sa 70 K.P.) Ang pagtuo nakalig-on usab kanila dihang sila “gilutos tungod sa pagkamatarong.”​—Mateo 5:10; Lucas 21:20-24.

3. Diha sa Hebreohanon 12:1, unsa “ang sala nga daling makasabod kanato,” ug unsang lumba nga giawhag ang mga Kristohanon sa pagdalagan nga malahutayon?

³ Tapos sa pagrepaso sa una-Kristohanong mga binuhatan sa pagtuo (diha sa Hebreohanon, kapitulo 11), si Pablo miawhag: “Sanglit gilibotan man kita sa dako kaayong panganod sa mga saksi, iwakli ta ang tanang kabug-at [nga makababag kanato sa espirituwal nga paagi] ug ang sala [kakulang sa pagtuo] nga daling makasabod kanato, ug dalaganon ta nga malahutayon ang lumba [alang sa kinabuhing dayon] nga gibutang sa atong atubangan.” (Hebreohanon 12:1) Ang pagrepaso ni Pablo sa pagtuong nagalihok nagpasiugda sa nagkalainlaing bahin niini ug makatabang kanato, dinihogan man kitang mga Kristohanon nga nagadalagan sa lumba alang sa pagkawalay-kamatayon sa langit kun bahin man kita sa “dakong panon” nga may tumong nga kinabuhing walay kataposan diha sa paraisong yuta. (Pinadayag 7:4-10; Lucas 23:43; Roma 8:16, 17) Apan unsa man gayod ang pagtuo? Unsa ang pipila ka bahin niining espirituwal nga bahandi? Ug sa unsang paagi molihok kita kon kita may pagtuo? Samtang mangita ka sa mga tubag niining mga pangutanaha, palihog basaha ang gikutlong mga bersikulo sa Hebreohanon kapitulo 11 ug 12 sa panahon sa pagtuon sa imong kaugalingon ug sa kongregasyon.

Unsa Gayod ang Pagtuo

4. Unsa ang pagtuo?

⁴ Gibatbat una ni Pablo ang pagtuo. (Basaha ang Hebreohanon 11:1-3.) Sa usa ka bahin, ang pagtuo mao ang “kasegurohan sa mga butang nga ginapaabot.” Ang tawo nga may pagtuo may pagsalig nga ang tanang butang nga gisaad sa Diyos sama nga natuman na. Ang pagtuo usab maoy “tin-aw nga pamatuod sa pagkaanaa sa mga butang nga dili makita.” Ang katuohang pamatuod sa dili makitang mga butang malig-on kaayo nga ang pagtuo ginaingon nga katumbas niana nga ebidensiya.

5. Unsay atong nasabtan mahitungod sa pagtuo?

⁵ Pinaagi sa pagtuo ang “mga tawo sa karaan gipanghimatud-an” nga sila nakapahimuot sa Diyos. Dugang pa, “pinaagi sa pagtuo atong nasabtan nga ang sistema sa mga butang”​—ang yuta, ang adlaw, ang bulan, ug ang mga bitoon​—“gibuhat pinaagi sa pulong sa Diyos, nga tungod niana ang mga butang nga makita gibuhat gikan sa mga butang nga wala makita.” Kita kombinsido nga si Jehova mao ang Maglalalang niining mga butanga, bisag dili kita makakita kaniya tungod kay usa man siya ka dili-makitang Espiritu.​—Genesis 1:1; Juan 4:24; Roma 1:20.

Pagtuo ug ang “Karaang Kalibotan”

6. Nganong si Abel may “kasegurohan” nga ang matagnaong mga pulong ni Jehova mahitungod sa ‘binhi sa babaye’ mamatuman?

⁶ Ang usa sa daghang mga bahin sa pagtuo mao ang pagpabili sa panginahanglan ug pagsakripisyo alang sa mga kasal-anan. (Basaha ang Hebreohanon 11:4.) Sa “karaang kalibotan,” ang pagtuo sa halad nga dugo gipakita ni Abel, ang ikaduhang anak sa unang tawhanong magtiayon, si Adan ug Eva. (2 Pedro 2:5) Sa walay duhaduha si Abel nakasabot sa makamatayng mga epekto sa napanunod nga kasal-anan. (Genesis 2:16, 17; 3:6, 7; Roma 5:12) Tataw nga nakakita usab siya sa katumanan sa sugo sa Diyos nga miresultag mahagong pagtrabaho ni Adan ug dakong kasakit sa panahon sa pagsabak ni Eva. (Genesis 3:16-19) Busa si Abel may “kasegurohan sa mga butang nga ginapaabot” nga ang ubang mga butang nga gipamulong ni Jehova mamatuman. Lakip niini ang matagnaong pulong nga gipunting ngadto sa pangunang-maglilimbong nga si Satanas dihang miingon ang Diyos sa bitin: “Ibutang ko ang panagkaaway sa taliwala mo ug sa babaye ug sa taliwala sa imong binhi ug sa iyang binhi. Ug siya magasamad sa imong ulo ug ikaw magasamad sa iyang tikod.”​—Genesis 3:15.

7. (a) Sa unsang paagi nagpakita si Abel ug pagpabili sa panginahanglan sa paghalad alang sa mga kasal-anan? (b) Sa unsang paagi ‘gipanghimatud-an sa Diyos ang mga gasa ni Abel’?

⁷ Nagpakitag pagtuo si Abel sa gisaad nga Binhi pinaagi sa pagtanyag sa Diyos ug halad nga hayop nga sa malarawanong paagi maoy kapuli sa kaugalingong kinabuhi ni Abel. Apan ang iyang walay-pagtuong magulang nga si Cain mihalad ug walay-dugong mga utanon. Ingong mamumuno, giula ni Cain tapos niadto ang dugo ni Abel. (Genesis 4:1-8) Apan namatay si Abel nga nasayod nga giisip siya ni Jehova nga matarong, “nga gipanghimatud-an sa Diyos maylabot sa iyang mga halad.” Sa unsang paagi? Pinaagi sa pagdawat sa halad ni Abel nga gitanyag diha sa pagtuo. Tungod sa iyang pagtuo ug pag-uyon sa Diyos, ang Dinasig nga Rekord nagpadayon sa pagpamatuod maylabot niini, ‘bisag namatay si Abel, siya nagasulti pa gihapon.’ Iyang nakita ang panginahanglan ug halad alang sa mga kasal-anan. Ikaw ba may pagtuo sa mas dako pang kahulogan sa halad-lukat ni Jesu-Kristo?​—1 Juan 2:1, 2; 3:23.

8. (a) Unsay atong nakat-onan mahitungod sa pagtuo gikan sa maisogong pagwali ni Enoch? (b) Sa unsang paagi “gilalin si Enoch aron dili makaagig kamatayon”?

⁸ Ang pagtuo mopalihok kanato sa pagsulti mahitungod sa balita sa Diyos uban sa kaisog. (Basaha ang Hebreohanon 11:5, 6.) Ang usa sa unang saksi ni Jehova nga si Enoch maisogong mitagna bahin sa silot nga gipakanaog sa Diyos diha sa mga dili-diyosnon. (Judas 14, 15) Sa walay duhaduha naningkamot ang mga kaaway ni Enoch sa pagpatay kaniya, apan “gikuha” siya sa Diyos aron dili siya makaagi sa pagtinga sa kamatayon. (Genesis 5:24) Apan, una, “siya gipanghimatud-an nga siya nakapahimuot gayod sa Diyos.” Sa unsang paagi? “Pinaagi sa pagtuo si Enoch gilalin aron dili makatagamtam sa kamatayon.” Sa susama, si Pablo gibalhin, o “gisakgaw ngadto sa paraiso,” hayan nakadawat ug panan-awon sa umaabot nga espirituwal nga paraiso sa Kristohanong kongregasyon. (2 Corinto 12:1-4) Busa si Enoch tingali nakakitag panan-awon sa umaabot nga Paraiso sa yuta dihang gipakatulog siya ni Jehova diha sa kamatayon, nga luwas gikan sa mga kamot sa kaaway. Aron kahimut-an sa Diyos kita, sama kang Enoch, kinahanglang mosulti sa balita sa Diyos uban ang kaisog. (Buhat 4:29-31) Kinahanglang motuo usab kita nga naglungtad ang Diyos ug nga “mohatag ganti niadtong kinasingkasing nga mangita kaniya.”

9. Sa unsang paagi ang dalan ni Noe nagpakita nga ang pagsugot sa mga sugo sa Diyos maoy laing bahin sa pagtuo?

⁹ Ang pagsunod sa mga sugo sa Diyos maoy laing bahin sa pagtuo. (Basaha ang Hebreohanon 11:7.) Naglihok diha sa pagtuo, ‘gihimo [ni Noe] ang gisugo sa Diyos.’ (Genesis 6:22; 7:16) Nakadawat si Noe ug “pasidaan gikan sa Diyos sa mga butang nga wala pa makita” ug mituo sa pulong ni Jehova nga dunay mahitabong tibuok-yutang lunop. Uban ang pagtuo ug matinahurong kahadlok sa Diyos, si Noe “mihimog arka alang sa pagluwas sa iyang panimalay.” Tungod sa pagsunod ug sa matarong nga mga buhat, iyang gihukman ang dili-diyosnong kalibotan tungod sa daotang mga binuhatan niini ug nakita nga takos kini sa kalaglagan.​—Genesis 6:13-22.

10. Bisan pag nagtukod si Noe ug arka, unsa pang kalihokan ang iyang gigahinan ug panahon?

¹⁰ Si Noe maoy usa usab sa mga saksi ni Jehova sa pagkaagi nga siya maoy “usa ka magwawali sa pagkamatarong.” (2 Pedro 2:5) Bisan ug okupado sa paghimog arka, siya migahin ug panahon sa pagwali, sama sa gihimo sa mga Saksi ni Jehova karon. Sa pagkatinuod, maisogong giwali ni Noe ang pasidaan sa Diyos ngadto sa mga tawo sa wala pa ang baha, apan “sila wala magpakabana hangtod nga miabot ang baha ug gibanlas silang tanan.”​—Mateo 24:36-39.

Pagtuo Taliwala sa Tapos-sa-Lunop nga mga Patriarka

11. (a) Sa unsang paagi gipakita ni Abraham ang pagtuo nga naglakip sa bug-os nga pagsalig sa mga saad ni Jehova? (b) Tungod sa pagtuo, unsang “siyudara” ang gipaabot ni Abraham?

¹¹ Ang pagtuo naglakip sa bug-os nga pagsalig sa mga saad ni Jehova. (Basaha ang Hebreohanon 11:8-12.) Tungod sa pagtuo si Abraham (Abram) misugot sa sugo sa Diyos ug mibiya sa Ur sa mga Caldeanhon, usa ka siyudad nga daghag ikahatag sa materyal nga paagi. Siya mituo sa saad ni Jehova nga “ang tanang mga panimalay sa yuta” magapanalangin sa ilang kaugalingon pinaagi kaniya ug nga ang iyang binhi hatagan ug yuta. (Genesis 12:1-9; 15:18-21) Ang anak ni Abraham si Isaac ug apo nga si Jacob maoy “mga manununod uban kaniya sa mao rang saad.” Tungod sa pagtuo si Abraham “mipuyo ingong dumuloong diha sa yutang saad diha sa langyawng yuta.” Siya nagpaabot sa “siyudad nga adunay tinuod nga mga patukoranan, ang magtutukod ug magbubuhat sa maong siyudad mao ang Diyos.” Oo, si Abraham naghulat sa langitnong Gingharian sa Diyos nga ilalom niini siya pagabanhawon ngadto sa kinabuhi sa yuta. Ang Gingharian ba adunay hinungdanong bahin diha sa imong kinabuhi?​—Mateo 6:33.

12. Unsay nahitabo tungod kay may pagtuo si Sarah sa mga saad ni Jehova?

¹² Ang mga asawa sa mahadlokon sa Diyos nga mga patriarka nagtuo usab sa mga saad ni Jehova. Pananglitan, tungod sa pagtuo ang asawa ni Abraham nga si Sarah, bisan wala makaanak hangtod nga miabot siyag 90 anyos ug “lapas na sa panuigon,” nakadawat ug gahom “sa pagpanamkon ug kaliwat, . . . sanglit iya mang giisip nga kasaligan siya [Diyos] nga nagahimo sa saad.” Sa ulahi, nanganak si Sarah kang Isaac. Busa gikan sa 100 nga panuigong si Abraham, nga “giisip nga patay na” maylabot sa pagsanay, sa ulahi “misanay ang kaliwatan nga ingon kadaghan sa mga bitoon sa kalangitan.”​—Genesis 17:15-17; 18:11; 21:1-7.

13, 14. (a) Bisan si Abraham, Isaac, ug Jacob “wala makadawat sa katumanan sa mga saad,” unsay ilang gihimo? (b) Sa unsang paagi makapahimulos kita gikan sa pagpalandong sa pagkamaunongon sa mga patriarka ngadto kang Jehova bisag dili pa nato makita dayon ang katumanan sa iyang mga saad?

¹³ Ang pagtuo motipig kanatong maunongon kang Jehova bisan ug dili kita makakita dayon sa katumanan sa iyang mga saad. (Basaha ang Hebreohanon 11:13-16.) Ang tanang matinumanong mga patriarka nangamatay nga wala makakita sa bug-os nga katumanan sa mga saad sa Diyos kanila. Apan “sila nakakita [sa gisaad nga mga butang] gikan sa halayo ug gidawat sila ug mipahayag sa katilingban nga sila mga estranghero ug temporaryong mga pomuluyo sa yuta.” Oo, sila nagpuyo sa tibuok nilang kinabuhi diha sa pagtuo, kay milabay ang daghang mga kaliwatan dihang naangkon sa mga kaliwat ni Abraham ang Yutang Saad.

¹⁴ Ang kamatuoran nga wala nila madawat ang katumanan sa mga saad sa Diyos sa ilang kinabuhi wala makasakit sa buot ni Abraham, Isaac, ug Jacob o nagpahimo kanilang mga apostata. Wala nila talikdi si Jehova ug mibalik sa Ur, ug nagpalusbog sa kalibotanong mga kalihokan. (Itandi sa Juan 17:16; 2 Timoteo 4:10; Santiago 1:27; 1 Juan 2:15-17.) Dili, kadtong mga patriarka ‘nangitag’ usa ka labi pang maayong yuta kay sa Ur, “sa ato pa, usa nga langitnon.” Busa si Jehova ‘dili maulaw nga pagatawgon nga ilang Diyos.’ Ilang gipatunhay ang ilang pagtuo sa Labing Hataas hangtod sa kamatayon ug pagabanhawon sa ulahi sa kinabuhi dinhi sa yuta, nga bahin sa ginsakopan sa “siyudad,” ang Mesiyanikong Gingharian nga giandam sa Diyos alang kanila. Apan ikaw komusta? Bisan pag ikaw ‘nagalakaw sa kamatuoran’ sa daghan nang katuigan, nga natigulang na diha sa pag-alagad ni Jehova, kinahanglang imong ipatunhay ang imong pagsalig sa iyang gisaad bag-ong sistema. (3 Juan 4; 2 Pedro 3:11-13) Pagkadako sa imong ganti nga dawaton ug sa matinumanong mga patriarka tungod sa maong pagtuo!

15. (a) Unsay nakahimo kang Abraham sa pagtanyag kang Isaac ingong halad? (b) Sa unsang paagi apektado ang atong pagtuo sa hitabo nga nalangkit kang Abraham ug Isaac? (c) Sa matagnaon unsay gilarawanan niadtong hitaboa?

¹⁵ Ang walay pagpanukong pagsunod sa Diyos maoy importanteng bahin sa pagtuo. (Basaha ang Hebreohanon 11:17-19.) Tungod kay wala magpanukong misunod si Abraham kang Jehova, siya “andam sa paghalad kang Isaac,” nga iyang “bugtong anak”​—ang bugtong niyang anak kang Sarah. Nganong gihimo kadto ni Abraham? Tungod kay “iyang giisip nga ang Diyos arang makabanhaw kang [Isaac] gikan sa mga patay,” kon gikinahanglan, aron matuman ang saad sa kaliwat pinaagi kaniya. Dihadiha ang punyal sa kamot ni Abraham nakatapos unta sa kinabuhi ni Isaac, apan ang tingog sa manulonda nakapugong niini. Busa, gidawat ni Abraham si Isaac gikan sa kamatayon “sa sinambingay nga paagi.” Sa ingon angay nga mapukaw usab kita sa pagsunod sa Diyos diha sa pagtuo bisag ang atong kinabuhi o sa atong mga anak ang mameligro. (1 Juan 5:3) Dugang pa, hinungdanon usab, nga si Abraham ug Isaac niadto matagnaong naghulagway kon sa unsang paagi itagana ni Jehova nga Diyos ang iyang bugtong Anak si Jesu-Kristo, ingong lukat aron kadtong motuo kaniya makabaton ug kinabuhing dayon.​—Genesis 22:1-19; Juan 3:16.

16. Maylabot sa atong mga anak ug sa pagtuo sa mga saad sa Diyos, unsang pananglitan ang gihatag sa mga patriarka?

¹⁶ Kon kita may pagtuo, tabangan nato ang atong anak sa pagbutang sa ilang paglaom diha sa gisaad sa Diyos alang sa umaabot. (Basaha ang Hebreohanon 11:20-22.) Malig-on kaayo ang pagtuo sa mga patriarka nga bisag ang mga saad ni Jehova kanila wala gayod matuman sa bug-os sa ilang tibuok nga kinabuhi, ilang gipasa kini ngadto sa ilang mga anak ingong mahal nga panulondon. Busa, si “Isaac ug si Esau gipanalanginan ni Jacob mahitungod sa mga butang nga moabot,” ug gipanalanginan ni Jacob dihang hapit na siyang mamatay ang mga anak ni Jose nga si Ephraim ug Manases. Tungod kay si Jose mismo may malig-ong pagtuo nga mobiya ang mga Israelitas sa Ehipto alang sa yutang saad, iyang gipapanumpa ang iyang mga igsoon sa pagdala sa iyang mga bukog uban kanila dihang mogikan na sila. (Genesis 27:27-29, 38-40; 48:8-22; 50:24-26) Imo bang gitabangan ang imong pamilya sa pagpalambo sa samang pagtuo nianang gisaad ni Jehova?

Ang Pagtuo Mopalihok Kanato sa Pag-una sa Diyos

17. Sa unsang paagi ang mga ginikanan ni Moises milihok diha sa pagtuo?

¹⁷ Ang pagtuo mopukaw kanato sa pag-una kang Jehova ug sa iyang katawhan kay sa bisan unsang butang nga itanyag niining kalibotana. (Basaha ang Hebreohanon 11:23-26.) Mga ulipon ang mga Israelitas nga nagkinahanglag kagawasan gikan sa kaulipnan sa Ehipto dihang milihok ang mga ginikanan ni Moises diha sa pagtuo. ‘Wala sila mahadlok sa sugo sa hari’ sa pagpatay sa mga Hebreohanong batang lalaki nga natawo. Hinunoa, ilang gitagoan si Moises sulod sa tulo ka bulan, sa kataposan gibutang siya diha sa takupis nga banban ug gibutang diha sa kabugangan sa daplin sa Suba sa Nilo. Nakit-an sa anak nga babaye ni Paraon, siya ‘gipadako ingong iyang kaugalingong anak.’ Apan, una sa tanan, giatiman si Moises ug gibansay sa espirituwal nga paagi sa panimalay sa iyang amahan ug inahan, si Amram ug Jocabed. Dayon, ingong sakop sa panimalay ni Paraon, siya “gitudloan sa tanang kaalam sa mga Ehiptohanon” ug nahimong “gamhanan sa iyang mga pulong ug mga binuhatan,” gamhanan sa mental ug sa pisikal nga mga katakos.​—Buhat 7:20-22; Exodo 2:1-10; 6:20.

18. Tungod sa pagtuo, unsang baroganan ang gihuptan ni Moises maylabot sa pagsimba ni Jehova?

¹⁸ Bisan pa, ang Ehiptohanong edukasyon ug ang materyal nga kahalangdon sa harianong balay wala mopahimo kang Moises sa pagsalikway sa pagsimba kang Jehova ug nahimong usa ka apostata. Hinunoa, “tungod sa pagtuo si Moises, dihang midako na, wala mosugot nga pagatawgon siya nga anak sa anak nga babaye ni Paraon,” usa ka dalan nga napamatud-an dihang iyang gipanalipdan ang usa ka Hebreohanong igsoon. (Exodo 2:11, 12) Gipalabi ni Moises nga “mag-antos sa pagdagmal kauban sa mga tawo sa Diyos [isigka-Israelitas nga mga magsisimba ni Jehova] kay sa pagpahimulos sa lumalabayng kalipay sa pagpakasala.” Kon usa ikaw ka bawtismadong alagad ni Jehova nga may malig-ong kahibalo sa tukmang espirituwal nga pagbansay, mosunod ka ba sa pananglitan ni Moises ug mobarog nga malig-on alang sa tinuod nga pagsimba?

19. (a) Sa unsang paagi gipakita nga giuna ni Moises si Jehova ug ang Iyang katawhan diha sa iyang kinabuhi? (b) Unsang balos ang gipaabot ni Moises?

¹⁹ Gipalabi ni Moises ang iyang kahimtang uban sa katawhan ni Jehova “tungod kay iyang giisip ang pasipala nga pagaantuson alang kang Kristo ingon nga labi pa ka dakong bahandi kay sa mga bahandi sa Ehipto.” Hayan ‘giisip [ni Moises] ang pasipala nga mahimong karaang tipo ni Kristo, kun Usa nga Dinihogan sa Diyos, ingon nga labi pa ka dakong bahandi kay sa mga bahandi sa Ehipto.’ Ingong sakop sa harianong panimalay, iyang mapahimuslan unta ang bahandi ug kadungganan sa Ehipto. Apan nagpakita siyag pagtuo ug “nagatutok sa balos”​—kinabuhing dayon pinaagi sa pagkabanhaw sa yuta diha sa gisaad nga bag-ong sistema sa Diyos.

20. Unsay anaa sa eksperyensiya ni Moises nga nagpakita nga ang pagtuo makapaisog kanato ingong mga alagad ni Jehova?

²⁰ Ang pagtuo makapaisog kanato tungod kay may pagsalig kita kang Jehova ingong manluluwas. (Basaha ang Hebreohanon 11:27-29.) Tapos nakadungog nga nakapatay si Moises ug Ehiptohanon, nagtinguha ang hari sa pagpatay kaniya. “Apan mikalagiw si Moises gikan kang Paraon ug mipuyo sa yuta sa Midian.” (Exodo 2:11-15) Busa maoy gipunting ni Pablo ang Pagpanglakaw sa mga Hebreohanon sa ulahi gikan sa Ehipto dihang miingon siya: “Tungod sa pagtuo siya [Moises] mibiya sa Ehipto, dili nga nahadlok sa kasuko sa hari [nga naghulga sa pagpatay kaniya tungod sa paghawas sa Diyos alang sa Israel], kay siya milahutay man sa ingon ingong nakakita sa Usa nga dili-makita.” (Exodo 10:28, 29) Bisag wala gayod makakita si Moises sa Diyos, ang pakig-atubang ni Jehova kaniya tinuod kaayo nga siya milihok nga daw nakakita sa ‘Usa nga dili-makita.’ (Exodo 33:20) Ingon ba niana ka malig-on ang imong relasyon kang Jehova?​—Salmo 37:5; Proverbio 16:3.

21. Mahitungod sa paggula gikan sa Ehipto, unsay nahitabo “tungod sa pagtuo”?

²¹ Sa wala pa mogikan ang Israel sa Ehipto, “tungod sa pagtuo iyang [Moises] gisaulog ang paskua ug ang pagsablig sa dugo, aron ang maglalaglag dili makatandog sa ilang [mga Israelitas] mga panganay.” Oo, nagkinahanglag pagtuo ang pagsaulog sa paskua uban sa pagsalig nga ang panganayng mga anak nga lalaki sa Israel dili maapil sa kamatay samtang nangamatay ang mga Ehiptohanon, ug kining pagtuoha nabalosan. (Exodo 12:1-39) Dugang pa “tungod sa pagtuo sila [ang mga tawo sa Israel] mitabok sa Dagat nga Mapula nga daw yuta sa mamala, apan ang mga Ehiptohanon sa pagsulay nila sa paghimo sa ingon nangalumos.” Pagkakatingalahang manluluwas ang Diyos! Ug tungod niining maong kaluwasan, ang mga Israelitas “nahadlok kang Jehova ug mituo kang Jehova ug kang Moises nga iyang alagad.”​—Exodo 14:21-31.

22. Mahitungod sa pagtuo, unsang mga pangutana ang pagatagdon pa?

²² Ang pagtuo ni Moises ug sa mga patriarka usa gayod ka tinuod nga sulondan sa mga Saksi ni Jehova karon. Apan unsay nahitabo dihang nakig-atubang ang Diyos sa mga kaliwat ni Abraham ingong organisadong nasod sa teokratikanhong paagi? Unsay atong makat-onan gikan sa dugang mga binuhatan sa pagtuo sa karaang panahon?

Unsaon Nimo sa Pagtubag?

◻ Unsa ang pagtuo?

◻ Unsay gitudlo kanato sa pananglitan ni Enoch mahitungod sa pagtuo?

◻ Sa unsang paagi ang mahadlokon ug Diyos nga mga patriarka nagpakita nga ang pagtuo kinahanglang adunay bug-os nga pagsalig sa mga saad ni Jehova?

◻ Unsay lihok ni Abraham nga nagpakita nga ang walay pagpanukong pagsugot sa Diyos maoy importanteng bahin sa pagtuo?

◻ Unsay mga lihok ni Moises nga nagpakita nga ang pagtuo nagkahulogan sa pagbutang pag-una kang Jehova ug sa iyang katawhan kay sa bisan unsang butang nga ikatanyag sa kalibotan?