Nagapabilin Ka Bang Hinlo sa Tanang Paagi?

“Pahalayo kamo, pahalayo kamo, gumula kamo dinha, ayaw kamo paghikap sa butang mahugaw; gumula kamo gikan sa iyang taliwala, magpabilin kamong mahinlo, kamong nagadala sa mga sudlanan ni Jehova.”—ISAIAS 52:11.

SA KALIT sila nahigawas​—tapos sa 70 ka tuig nga pagkaulipon! Ang usa ka balaod sa hari sa mga 538 W.K.P. nagtugot sa Hudiyonhong nasod sa pagbalik “ug sa pagtukod pag-usab sa balay ni Jehova ang Diyos sa Israel.” (Esdras 1:2, 3) Sunod, laing makapakurat nga hitabo: “Si Haring Ciro [sa Persia] mismo nagpagula sa mga sudlanan sa balay ni Jehova, nga gikuha ni Nabukodonosor gikan sa Jerusalem.” (Esdras 1:7, 8) Apil kanila mao ang sagradong mga sudlanan nga gipasipad-an ni Belsasar ug sa iyang mga dagkong tawo sa gabii sa pagkapukan sa Babilonya pinaagi sa kawalay-ulaw nga paggamit niana sa pagdayeg sa bakak nga mga diyos! (Daniel 5:3, 4) Sa maong panahon ang kanhing mga binihag makabalik sa maong mga sudlanan ngadto sa Jerusalem ug gamiton kana sa pagdayeg kang Jehova!

2. (a) Unsang tagna ni Isaias ang nahinumdoman sa mga namalik? Kang kinsa kadto napadapat? (b) Nganong sila giawhag nga dili mohikap sa bisan unsang butang mahugaw?

² Samtang sila mahinamong nangandam sa pagbiya, ang mamalik nga mga Hudiyo pihong nakahinumdom sa mga pulong sa propetang si Isaias: “Pahalayo kamo, pahalayo kamo, gumula kamo gikan dinha, ayaw kamo pagkamkam sa butang mahugaw; gumula kamo gikan sa iyang taliwala, magpabilin kamong mahinlo, kamong nagadala sa mga sudlanan ni Jehova.” (Isaias 52:11) Hinuon, ang mga Levihanon mao ang aktuwal nga nagdala sa mga sudlanan. (Numeros 1:50, 51; 4:15) Bisan pa niana, gitagna ni Isaias nga ang tanang mamalik mahimong sa ngalan mga magdadala sa sudlanan. Sa ingon ang tanan obligadong magmahinlo. Dili nila hukasan ang mga Babilonyanhon sa mga mahalong butang sama sa gibuhat sa mga Israelinhon sa pagbiya nila sa Ehipto. (Itandi ang Exodo 12:34-38.) Kinahanglang sila mahigawas sa materyalistikanhon o mahakogong motibo sa pagbalik. Bahin sa “mahugawng mga larawan” sa Babilonya, ang paghikap lamang sa usa niana makapahugaw.a (Jeremias 50:1, 2) Pinaagi lamang sa paghinlo sa tanang paagi nga ang mga Hudiyo makalakaw sa “Dalan sa Pagkabalaan” balik sa Jerusalem.​—Isaias 35:8, 9.

3. Kinsa karon ang nagadala sa “mga sudlanan” ni Jehova? Nganong usa ka dakong hagit nga sila magpabiling hinlo?

³ Ang mga Saksi ni Jehova karong adlawa sa susama kinahanglang magmahinlo ingong mga magdadala sa “mga sudlanan” ni Jehova. Gikutlo ni apostol Pablo ang mga pulong ni Isaias ug gipadapat kana ngadto sa mga Kristohanon sa iyang adlaw, nga nag-ingon: “Atong hinloan ang atong kaugalingon sa tanang kahugawan sa unod ug sa espiritu, nga magahingpit sa pagkabalaan diha sa kahadlok sa Diyos.” (2 Corinto 6:17–​7:1) Gawas sa pagkinabuhi sa mahugawng kalibotan, kinahanglang kita makigbisog sa atong napanunod makasasalang mga hilig. (Genesis 8:21) Ang Jeremias 17:9 nagapahinumdom kanato: “Ang kasingkasing labi pang maluibon kay sa bisan unsang butang ug walay paglaom. Kinsay makaila niini?” Gilimbongan sa uban ang ilang kaugalingon ug ang uban sa pagtuo nga ang ilang kinabuhi mahinlo ug dalawaton sa Diyos, dihang sa pagkamatuod kana dili diay. Sila nagabuhat sa usa ka matang sa pagsinalingkapaw. Busa ang matag usa kanato kinahanglang mangutana, ‘Nanlimbasog ba gayod ako sa pagkahimong hinlo sa atubangan ni Jehova sa tanang paagi?’ Sa pagbulig kanato sa pagbuhat niana, atong itumong ang hunahuna sa upat ka bahin sa pagkahinlo.

Lawasnong Pagkahinlo: Pagaunahon

4. (a) Nganong ang pisikal nga kahinlo pagaunahon taliwala sa katawhan ni Jehova? (b) Nganong lisod usahay ang paghupot sa hataas nga sukdanan sa kahinlo?

⁴ Ang lawasnong kahinlo ginauna sa katawhan ni Jehova karong adlawa sama ra sa karaang panahon. (Exodo 30:17-21; 40:30-32) Kon buot sabton, magatahod ba kita sa “mga sudlanan ni Jehova” kon ang atong buhok, mga kamot, nawong, ngipon, o mga kuko hugaw o kon baho ang atong lawas? Hinuon, sayon nga kita maimpluwensiyahan sa mugbong mga sukdanan sa kalibotan.​—Roma 12:2.

5. (a) Nganong hinungdanon nga atong huptang taas ang atong mga sukdanan sa kahinlo? Paghatag ug mga panig-ingnan sa unsang paagi ikapadapat kining tambaga. (b) Sa unsang paagi ang mga ansiano makatabang?

⁵ Sa unsang paagi kita malahi sa kalibotan kon kita mopahiuyon sa mugbong mga sukdanan sa kalibotan? Dili ba ang hugawng balay o dili-hinlong dapit sa pagsimba magpahinabong ‘ang pulong sa Diyos mapasipalahan’? (Tito 2:5) Apan kon kita manghinlo sa lawas, mamunit ug mga hugaw sa mga dapit sa kombensiyon, motabang sa paghinlo sa Kingdom Hall, ug huptan ang atong mga balay​—bisan ang labing kabos nga balay​—nga hapsay ug hinlo, kita nagadayeg sa Diyos! (Itandi ang 1 Pedro 2:12.) Mga ansiano, ihatag ang maayong sulundan sa pagkahinlo. Ayaw “pagpugong” sa paghatag ug nahiangayng tambag kon kinahanglan.​—Buhat 20:20.

6. Unsa man ang angay nga mahimong atong sukdanan sa sinina alang sa mga tigom ug pagsangyaw sa kanataran?

⁶ Komosta ang sininang atong ginasul-ob dihang nagasimba panahon sa mga tigom ug kon magsangyaw sa kanataran? Dili ba angay nga kana ‘ligdong ug maayong-pagkahikay’? (1 Timoteo 2:9; Hebreohanon 10:23-25) Ayaw ipangatarongang kita obligadong magsininag maayo panahon lamang nga kita may bahin sa tigom. Ang sobra ka kaswal nga sinina maoy dili ligdong ug dili angay sa pagsimba. Ang gubaong mga bag sa pagsangyaw ug mga Bibliyang gisi na ang mga eskina o hugaw makadaot usab sa mensahe sa Gingharian.

Paglikay sa Kahugawan sa Hunahuna

7. Unsa ang yawi sa kahinlo sa hunahuna, sumala sa Filipos 4:8?

⁷ Sa Filipos 4:8 si Pablo mitambag: “Sa kataposan, mga igsoon, bisan unsang mga butang matuod, bisan unsang mga butang maugdang, bisan unsang mga butang matarong, bisan unsang mga butang maputli, bisan unsang mga butang hiligugmaon, bisan unsang mga butang dungganon, bisan unsang maayong batasan ang anaa ug bisan unsang butang takos sa pagdayeg ang anaa, padayon sa pagpalandong niining mga butanga.” Bisan pa niana, sa bisan diin kita giatake sa mga tentasyon sa pagtan-aw sa “ang ‘laglom nga mga butang ni Satanas.’”​—Pinadayag 2:24.

8. Sa unsang paagi ikailustrar ang mga kapeligrohan nga ihatag sa nagkalainlaing matang sa kalingawan? Paghatag ug lokal nga mga panig-ingnan.

⁸ Pananglitan, ang pagkasayon sa pagbaton sa materyal nga pornograpiko ug sobra ka mapintason misangpot sa seryosong mga suliran alang sa pila ka tiggamit ug videocassette recorders. Sa Uropa, ang usa ka minyong igsoong lalaki nagtan-awg law-ayng mga teyp inigkatulog na sa iyang asawa. Ang binhi sa buhat nga daotan natisok pag-ayo, nga misangpot sa pagpanapaw. (Itandi sa Santiago 1:14, 15.) Sa usa ka Aprikanhong nasod, ang usa ka grupo sa Saksing mga batan-on nanghulam ug law-ayng mga teyp gikan sa mga higala sa eskuylahan ug nagtan-aw kanila samtang wala diha ang ilang mga ginikanan. Bisan pa niana, usa ka ansiano sa Nigeria miingon: ‘Anaa ang labawng kapeligrohan sa regular nga mga programa sa TV nga susamang nagapasundayag sa kapintasan, krimen, gubat, mga esena sa romansa, ug pagtamay sa pagkamaunongon sa kaminyoon.’ Ang barot mapaukyabong mga mantalaan, pornograpikong mga magasin, mga nobelang makapukaw sa sekso, mga pelikula, ug musikang makadaldal sa kadaotan kanat usab nga mga kapeligrohan.

9. (a) Nganong kita magmapilion kon bahin sa atong pamatian, tan-awon, ug basahon? (b) Unsa ang angay natong sanong kon atubangon sa mangil-ad nga materyal?

⁹ Dili kita makahimo sa paghugaw sa atong mga hunahuna sa mga butang “makauulaw ganing iasoy.” (Efeso 5:12) Busa magmapilion bahin sa imong patalinghogan, tan-awon, ug basahon. Magmabinantayon ug sanong dayon sa pagsalikway sa ngil-ad nga materyal. (Salmo 119:37) Kinahanglan kinig dakong pagpugong-sa-kaugalingon, tingali masambingayong ‘pantonon ang imong lawas ug uliponon kini.’ (1 Corinto 9:27) Hinuon, hinumdomi kanunay nga ang atong ginatan-aw sa tago makita sa “Usa nga dili makita.” (Hebreohanon 11:27) Busa likayi ang butang mangil-ad. “Tinoa ninyo sa kanunay kon unsay dalawaton sa Ginoo.”​—Efeso 5:10.

“Magmabinantayon” sa Pagpabiling Hinlo sa Moral

10. (a) Unsa ang usa ka hinungdan daghan kaayo ang gibadlong o gipalagpot kada tuig? (b) Unsang prinsipyo sa Bibliya ang angay magagiya sa atong kagawian sa mga bakasyon ug sa trabahoan?

¹⁰ Sa Efeso 5:5 si Pablo nagpasidaan: “Kay kamo nahibalo niini, nga nag-ila niini sa inyong kaugalingon, nga walay makihilawason o tawong mahugaw o tawong dalo​—nga nagkahulogang tigsimbag diyosdiyos​—ang may panulondon sa gingharian ni Kristo ug sa Diyos.” Bisan pa niana, libolibo kada tuig ang gibadlong o gipalagpot tungod sa seksuwal nga imoralidad​—‘ang pagpakasala batok sa lawas.’ (1 Corinto 6:18) Kadaghanan, kini resulta lamang sa dili “pagkamabinantayon sumala sa pulong [sa Diyos].” (Salmo 119:9) Pananglitan, daghang igsoon dili magbantay sa ilang maayong kagawian o sa moral panahon sa mga bakasyon. Kay nagapasagad sa teokratikanhong pakig-uban, sila makighigala sa kalibotanong mga bakasyonista. Kay mangatarongang sila ‘maayo kaayong mga tawo,’ ang pila ka Kristohanon miduyog kanila sa kaduhaduhaang mga kalihokan. Sa susama, ang uban nahimong sobra ka mahigalaon sa ilang mga kauban sa trabaho. Usa ka Kristohanong ansiano nalangkit kaayo sa usa ka babayeng empliyada nga iyang gibiyaan ang iyang pamilya ug nakig-ipon kaniya! Misangpot ang pagpalagpot. Pagkamatuod ang mga pulong sa Bibliya, “Ang daotang mga kauban makadaot sa mapuslanong mga batasan”!​—1 Corinto 15:33.

11. Nganong ang Kristohanong sosyal nga mga katigoman angay maayong pagkadumala?

¹¹ Kining tahoa naggikan sa South Africa: “Ang laing kapeligrohan nga makadaot sa moral nga katul-id sa daghan mao ang dagkong mga parti . . . nga ang pipila niana himoon tapos sa mga sesyon sa distritong kombensiyon.” Hinuon, ang gagmayng Kristohanong mga panagtigom nga maayong pagkadumala talagsa rang mous-os ngadto sa “mga paghudyaka-bahakhak.” (Galacia 5:21) Kon idulot ang alkoholikong mga ilimnon, himoa kana nga may magadumala ug sa kasarangan. “Ang bino mabiaybiayon,” ug sa impluwensiya niini, ang pila ka igsoong lalaki wala makabantay sa moral nga paagi o nakapukaw sa nahikatulog nga mga kahuyangan. (Proverbio 20:1) Sa ingon, duha ka batan-ong ministro nagbuhat sa homoseksuwal nga mga buhat tapos makainom ug sobrang alkohol.

12, 13. (a) Sa unsang paagi gipakamatarong sa pipila ang imoral nga kagawian? Nganong bakak ang maong pangatarongan? (b) Sa unsang paagi kita makapabiling nagabantay batok sa mga kapeligrohan sa maayong moral?

¹² Kon matental sa pagpakasala, hinumdomi nga, bisan pag unsa tingali nato ka hinlong tan-awon sa gawas, ang bililhon mao kon unsa kita sa sulod. (Proverbio 21:2) Lagmit gibati sa pipila nga pasayloon sa Diyos ang balikbalik nga pagtipas ngadto sa imoral nga kagawian tungod kay sila mahuyang. Apan dili ba kini “paghimo sa dili-takos nga kalulot sa Diyos nga pasumangil sa malaw-ay nga kagawian”? (Judas 4) Ang pipila nagahunahuna gani nga “si Jehova wala makakita kanato.” (Ezekiel 8:12) Ugaling, hinumdoming “walay usa ka linalang ang dili dayag sa iyang panan-aw, apan ang tanang butang hubo ug dayag sa mga mata niya kang kinsa kita magahatag ug husay.”​—Hebreohanon 4:13.

¹³ Busa pagbantay sa mga kapeligrohan sa maayong mga kagawian! “Ayaw ninyo hisgoti bisan ang pakighilawas ug kahugawan sa tanang matang o kadalo sa inyong taliwala, maingon nga angay kini sa balaang mga katawhan; ni ang makauulaw nga kagawian ni binuang nga sinultihan ni mahilas nga tistis, mga butang nga dili maayo.” (Efeso 5:3, 4) “Dumti ang daotan,” bisan unsa pa kamakapahimuot tingali kana sa unod.​—Roma 12:9.

Pagpabiling Hinlo sa Espirituwal

14, 15. (a) Sa unsang paagi ang pipila nagladlad sa ilang kaugalingon sa espirituwal nga kahugawan? (b) Sa unsang paagi gigamit sa mga apostata ang ilang ‘mga baba sa paglaglag sa ilang isigkatawo’? (c) Sa unsang mga paagi ang mga apostata mahugaw gayod, ug unsay ilang nahikalimtan?

¹⁴ Giladlad sa pipila ang ilang kaugalingon sa espirituwal nga kahugawan pinaagi sa pagpatokar sa relihiyosong mga sibya sa radyo ug telebisyon. Sa usa ka Aprikanhong nasod, gitan-aw sa pipila ang mga drama sa TV nga nagpasundayag nga paborable sa mga patuotuo sa tradisyonal animistang mga relihiyon. Hinunoa, si apostol Pablo nagpasidaan sa labi pang makapatayng kapeligrohan​—ang apostatang mga tawo nga “nagalunod sa pagtuo sa pipila.” (2 Timoteo 2:16-18) Ang mga tawong sama niana nagalungtad pa! (2 Pedro 2:1-3) Ug may panahong sila milampos sa paghugaw sa hunahuna sa uban. Sumala sa ginaingon sa Proverbio 11:9: “Pinaagi sa iyang baba ang tawo nga mibulag sa pagtuo nagalaglag sa iyang isigkatawo.”

¹⁵ Kadaghanan ang mga apostata o mibulag sa pagtuo mohaylo sa garbo sa kaugalingon, nga moangkon nga kita gihikawan sa atong mga kagawasan, apil ang kagawasan sa paghubad sa Bibliya sa atong kaugalingon. (Itandi ang Genesis 3:1-5.) Sa pagkamatuod, ang maong mga maghuhugaw-unta nagatanyag lamang sa pagbalik ngadto sa makaluod nga mga pagtulon-an sa “Dakong Babilonya.” (Pinadayag 17:5; 2 Pedro 2:19-22) Ang uban mohaylo sa unod, nga moawhag sa kanhing mga kaubanan nga “magpaesi-esi” kay ang ubos nga buluhaton sa pagsangyaw sa balay-balay maoy “dili kinahanglanon” o “dili kasulatanhon.” (Itandi ang Mateo 16:22, 23.) Matuod, ang maong mga tig-ulog-ulog tingali hinlong tan-awon sa gawas sa lawasnon ug sa moral nga paagi. Apan sa sulod sila mahugaw sa espirituwal, kay nagpadaog sa garboso, independenteng panghunahuna. Ilang nahikalimtan ang tanang ilang nakat-onan bahin kang Jehova, sa iyang balaang ngalan ug mga hiyas. Wala na sila moila nga ang tanang ilang nakat-onan bahin sa kamatuoran sa Bibliya​—ang mahimayaong paglaom sa Gingharian ug sa paraisong yuta ug ang pagpukan sa bakak nga mga doktrina, sama sa Trinidad, dili-mamatay tawhanong kalag, walay-kataposang pagsakit, ug purgatoryo​—oo, kining tanan miabot kanila pinaagi sa “matinumanon ug maalamong ulipon.”​—Mateo 24:45-47.

16. Sa unsang paagi ang matarong maluwas “pinaagi sa kahibalo”?

¹⁶ Makaiikag, usa ka magtatan-aw sa sirkito sa Pransiya miingon: “Ang pila ka igsoon nalimbongan kay kulang silag tukmang kahibalo.” Kana ang hinungdang ang Proverbio 11:9 nagaingon: “Pinaagi sa kahibalo ang matarong pagaluwason.” Kini wala magkahulogan sa pagpamati sa mga apostata o pagsusi sa ilang mga sinulat. Hinunoa, kini nagkahulogan sa pagkadangat sa “tukmang kahibalo sa balaang tinago sa Diyos” pinaagi sa makugihong personal nga pagtuon sa Bibliya ug sa mga basahon sa Sosyedad nga gipasukad sa Bibliya. Kay nakabaton niining tukmang kahibalo, kinsa ba ang mahimong mausisaon kaayo nga mamati sa apostatang mga pahayag? Hinaot walay tawong “magalimbong kaninyo pinaagi sa makapadaning mga pangatarongan”! (Colosas 2:2-4) Ang bakak relihiyosong propaganda gikan sa bisan unsang tinubdan angay likayan samag hilo! Sa pagkamatuod, sanglit gigamit sa atong Ginoo ang “matinumanon ug maalamong ulipon” aron ipasa kanato ang “mga pulong sa kinabuhing walay kataposan,” ngano pa mang magtinguha kita sa paglantaw sa laing dapit?​—Juan 6:68.

Magpabilin Ka Bang Mahinlo?

17, 18. Nganong bililhon nga ugmaron ang (a) pisikal nga kahinlo, (b) kahinlo sa hunahuna, (c) moral nga kahinlo, ug (d) espirituwal nga kahinlo?

¹⁷ Busa dako ang nalangkit sa pagpabiling hinlo sa atubangan ni Jehova nga Diyos. Ang paghupot sa atong mga lawas, atong mga balay, atong sinina, ug atong mga Kingdom Hall nga mahinlo sa pisikal nagapatahom sa atong mensahe sa Gingharian. Ang pagpabiling hinlo sa hunahuna motabang nato sa pagpabiling hinlo sa moral ug espirituwal nga paagi. Kini nagaawhag nga atong pamatian ang tambag ni Pablo sa Filipos 4:8, sa pagbutang sa atong mga hunahuna sa mga butang matuod, maputli, ug dalayegon.

¹⁸ Makapabili usab kita nga labaw kay sukad masukad nga kinahanglang magpabilin kitang hinlo sa moral diha sa pulong ug buhat. Si Jehova sa tin-aw nagapasidaan kanato nga kadtong nagabuhat sa bisan unsang matang sa imoralidad dili makapanunod sa Gingharian sa Diyos. (1 Corinto 6:9-11) Bisan tingalig mopatim-awng kahimut-anan kaayo ang maong mahugawng mga butang, kon magapugas kita sumala sa unod, atong pagaanihon ang kadunotan gikan sa unod. (Galacia 6:8) Sa kataposan, anaa ang bahin sa pagpabiling hinlo sa espirituwal, sa doktrinal nga paagi. Ang maong kahinlo motabang nato sa paghupot sa kaputli sa atong mga kasingkasing ug mga hunahuna. Sa ingon kita matandog sa kanunay sa pagpangita sa mga hunahuna sa Diyos bahin sa mga butang​—dili ang atong kaugalingon.

19. Unsay makatabang sa mga dinihogan ug “dakong panon” sa pagpabiling hinlo sa tanang paagi?

¹⁹ Sa dili madugay ang pangunang tigpasiugda sa kahugawan​—si Satanas nga Yawa​—uban sa iyang mga demonyo, igatambog sa halalom nga bung-aw. Hangtod sa maong panahon, hinaot ang tanang alagad ni Jehova​—dinihogan ug ‘dakong panon’​—magpabiling hinlo ingong mga magdadala sa mga sudlanan ni Jehova. (Pinadayag 7:9, 13-15; 19:7, 8; 20:1-3) Ang bugno mapinadayonon ug lisod. Apan, hinumdomi, nga si Jehova dagayang nagahatag sa iyang “espiritu sa pagkabalaan.” (Roma 1:4) Ang iyang mahinlong organisasyon, pinaagi sa mga ansiano niini, andam usab sa pagtabang nato pinaagi sa paghatag ug maayo, Kasulatanhong tambag. Uban sa maong tabang ug atong kaugalingong determinasyon, kita makapabiling hinlo sa tanang paagi!

[Mga footnote]

Mga Pangutana sa Pagsubli

◻ Nganong ang namalik nga mga Hudiyo gikan sa Babilonya kinahanglang hinlo?

◻ Sa unsang paagi kita makahatag pagtagad sa kahinlo sa pisikal?

◻ Sa unsang paagi kita makapanalipod sa atong mga hunahuna gikan sa kahugawan?

◻ Sa unsang paagi kita makapabiling nagabantay batok sa moral nga mga kapeligrohan?

◻ Sa unsang paagi atong mahuptan ang atong espirituwal nga kahinlo?

1. (a) Sa unsang paagi ang usa ka balaod sa hari nagtugot nga ang mga sudlanan ni Jehova ibalik sa Jerusalem? (b) Sa unsang paagi nahugawan ang pipila niadtong mga sudlanan?

[Hulagway sa panid 16]

Ang atong mga balay angay mahimong mga sulundan sa kahinlo

[Hulagway sa panid 17]

Ang Kristohanon angay mogamit ug maayong hukom sa paglikay sa mga video teyp ug programa sa TV nga makahugaw sa hunahuna

[Hulagway sa panid 18]

Ang gagmayng mga panagkatigom mahimong makapalig-on sa moral

[Hulagway sa panid 19]

Ang madasigong mga Saksi nagapabiling hinlo sa espirituwal ug makakaplag ug panalipod ug kalipay pinaagi sa makugihong pagtuon sa Bibliya