Kinabuhi ug Ministeryo ni Jesus

Kinsa ba Gayod si Jesus?

DIHANG midunggo ang sakayan nga gisakyan ni Jesus ug sa iyang mga disipulo sa Betsaida, dihay usa ka tawong buta nga gidala sa mga tawo kaniya ug nangamuyo sila nga unta iyang hikapon ang tawo ug ayohan siya. Gigunitan ni Jesus ang buta sa kamot ug gidala sa gawas sa balangay ug, human nga gilud-an ang iyang mga mata, nangutana: “Duna ka bay nakita?”

“Nakakita akog mga tawo,” mitubag ang tawo, “tungod kay nakakita akog daw mga kahoy, apan sila naglakawlakaw.” Gitapion ang iyang mga kamot diha sa mga mata sa tawo, gibalik ni Jesus ang iyang panan-aw ug mitin-aw ang tanan. Ug gipapauli ni Jesus ang tawo nga gisugo sa dili pagsulod sa siyudad.

Mipaingon na karon si Jesus uban sa iyang mga disipulo sa mga balangay sa Cesarea Filipo, sa halayong amihanan sa Palestina. Habog nga pagtungas kadto nga may mga 50 kilometro paingon sa matahom nga dapit sa Cesarea Filipo, usa ka lungsod nga mga 350 ka metro sa ibabaw sa lebel sa dagat. Hayan mikabat ug daghang mga adlaw ang maong panaw.

Diha sa dalan, milakaw si Jesus nga nag-inusara aron mag-ampo. Mga siyam o napulo ka bulan ang nahibilin una pa sa iyang kamatayon, ug nabalaka siya bahin sa iyang mga disipulo. Daghan na ang mibulag sa pagsunod kaniya. Ang uban tingali naglibog ug nangaluya tungod kay iyang gisalikway ang mga paningkamot sa tawo sa paghimo kaniyang hari ug tungod kay siya wala, dihang gihagit sa iyang mga kaaway, mihimog mga milagro gikan sa langit sa pagpamatuod sa iyang pagkahari. Unsay gituohan sa iyang mga apostoles kon kinsa siya? Dihang miduol sila sa dapit nga iyang giampoan, si Jesus nangutana: “Kinsay gisulti sa mga tawo kon kinsa ako?”

“Ang uban miingon nga si Juan Bawtista,” sila mitubag, “ang uban si Elias, ug ang uban si Jeremias o usa sa mga propeta.” Oo, sila nagtuo nga usa niining mga tawhana si Jesus nga gibangon gikan sa mga patay!

“Apan, kamo, unsa may inyong sulti kon kinsa ako?” si Jesus nangutana.

Si Pedro dalidaling mitubag: “Ikaw mao ang Kristo, ang Anak sa buhi nga Diyos.”

Tapos mipahayag sa pag-uyon sa tubag ni Pedro, si Jesus miingon: “Sultihan ko ikaw, Ikaw mao si Pedro, ug sa ibabaw niini nga bato pagatukoron ko ang akong kongregasyon, ug ang mga ganghaan sa Hades dili gayod makabuntog niana.” Dinhi unang gipahayag ni Jesus nga siya magtukod ug usa ka kongregasyon ug nga bisan ang kamatayon dili gayod makabihag sa mga sakop niini tapos sa ilang matinumanong kinabuhi sa yuta. Dayon iyang gisultihan si Pedro: “Hatagan ko ikaw sa mga yawi sa gingharian sa mga langit.”

Busa gipadayag ni Jesus nga si Pedro makadawat ug linain nga mga pribilehiyo. Wala, wala hatagi si Pedro sa unang dapit taliwala sa mga apostoles, ni gihimo siyang patukoranan sa kongregasyon. Si Jesus mao ang Batong-pamag-ang nga niini gitukod ang iyang iglesya. Apan pagahatagan si Pedro ug tulo ka yawi nga gamiton sa pagbukas, sa ato pa, sa kahigayonan alang sa mga pundok sa mga tawo sa pagsulod sa Gingharian sa mga langit.

Gigamit ni Pedro ang unang yawi sa Pentekostes 33 K.P. dihang iyang gipakita sa mahinulsolong mga Hudiyo kon unsay ilang buhaton aron maluwas. Iyang gigamit ang ikaduha human gilayon nga iyang gibuksan sa magtutuong mga Samaritano ang kahigayonan sa pagsulod sa Gingharian sa Diyos. Dayon, sa 36 K.P. iyang gigamit ang ikatulong yawi pinaagi sa pagbukas alang sa dili-tinuling mga Hentil, si Cornelio ug sa iyang mga higala, sa samang kahigayonan.

Gipadayon ni Jesus ang iyang pagsultihay uban sa iyang mga apostoles. Iyang napasubo sila pinaagi sa pagsulti sa mga pag-antos ug kamatayon nga atubangon unya sa Jerusalem. Wala makasabot nga banhawon si Jesus ngadto sa langitnong kinabuhi, gipinig ni Pedro si Jesus. “Magmaluluton ka sa imong kaugalingon, Ginoo,” siya miingon. “Dili gayod kana mahitabo kanimo.” Miliso siya, si Jesus mitubag: “Pahilayo kanako, Satanas! Ikaw usa ka babag kanako, tungod kay ang imong gihunahuna, dili mga hunahuna sa Diyos, kondili sa mga hunahuna sa tawo.”

Dayag, ang uban gawas sa mga apostoles mipanaw uban kang Jesus, busa iyang gitawag sila sa pagpatin-aw nga dili masayon nga mahimong iyang mga sumusunod. “Kon adunay buot mosunod kanako,” siya miingon, “kinahanglang magdumili siya sa iyang kaugalingon ug magapas-an sa iyang kahoy sa pagsakit ug padayong magsunod kanako. Kay bisan kinsa nga buot magaluwas sa iyang kalag mawad-an niana; apan bisan kinsa nga mawad-an sa iyang kalag tungod kanako ug sa maayong balita makaluwas niana.”

Oo, kinahanglang magmaisogon ang mga sumusunod ni Jesus ug magasakripisyo sa kaugalingon kon buot nilang pamatud-an nga takos sa iyang pag-uyon, sumala sa iyang gipamulong: “Kay bisan kinsa nga magakaulaw tungod kanako ug sa akong mga pulong niining mananapaw ug makasasalang kaliwatan, igakaulaw usab siya sa Anak sa tawo inig-abot niya sa himaya sa iyang Amahan kauban sa balaang mga manulonda.” Marcos 8:22-38; Mateo 16:13-28; Lucas 9:18-27.

◆ Nganong nabalaka si Jesus sa iyang mga disipulo?

◆ Unsay hunahuna sa mga tawo kon kinsa si Jesus?

◆ Unsang mga yawi ang gihatag kang Pedro, ug sa unsang paagi kini gigamit?

◆ Unsang pagbadlong ang nadawat ni Pedro, ug ngano?