Kinabuhi ug Ministeryo ni Jesus

Ang Tawong Dato ug si Lazaro

SI Jesus nakigsulti sa iyang mga disipulo bahin sa hustong paggamit sa materyal nga mga bahandi, nagpatin-aw nga kita dili mahimong mga ulipon niini ug sa samang higayon mga ulipon sa Diyos. Ang mga Pariseo namati usab, ug sila misugod sa pagyubit kang Jesus tungod kay sila mga mahigugmaon man sa salapi. Busa siya miingon kanila: “Kamo mao ang nagapakamatarong sa inyong kaugalingon sa atubangan sa mga tawo, apan ang Diyos nahibalo sa inyong mga kasingkasing; kay ang gipakahalangdon sa mga tawo kangil-aran man sa atubangan sa Diyos.”

Ang panahon miabot nga nahitabo ang kaatbang diha sa mga tawong dato sa kalibotanong mga manggad, sa politikanhong gahom, ug sa relihiyosong pagkontrolar ug impluwensiya. Sila ipaubos, ug kadtong moila sa ilang espirituwal nga panginahanglan ipataas. Gipunting ni Jesus ang maong kausaban sa dihang mipadayon siya sa pag-ingon sa mga Pariseo:

“Ang Kasugoan ug ang mga Propeta milungtad hangtod sa pag-abot ni Juan [Bawtista]. Sukad niadtong panahona ginawali ang maayong balita mahitungod sa gingharian sa Diyos, ug ang matag-usa ka tawo nagasulod niini sa linugsanay. Apan, mas masayon pang mahanaw ang langit ug ang yuta kay sa dili-matuman ang gamayng bahin sa Kasugoan.”

Ang mga eskriba ug mga Pariseo magarbohon sa ilang giangkong nagsunod sa Kasugoan ni Moises. Hinumdomi nga sa dihang milagrosong gihatagan ni Jesus ug panan-aw ang usa ka tawong buta sa Jerusalem, sila nanghambog: “Kami mga tinun-an ni Moises. Kami nasayod nga ang Diyos nakigsulti kang Moises.” Apan karon ang Kasugoan ni Moises natuman sa gimbut-ang katuyoan niini sa pag-agak sa mga mapaubsanon ngadto sa gitudlo sa Diyos nga Hari, si Jesu-Kristo. Busa sa sinugdan sa ministeryo ni Juan, ang tanang matang sa mga tawo, ilabina ang mga mapaubsanon ug ang kabus, nanlimbasog nga mahimong mga ginsakopan sa Gingharian sa Diyos.

Sanglit natuman na karon ang Moisesnong Kasugoan, ang obligasyon sa pagsunod niana gikuha. Ang Kasugoan nagtugot sa pagbulagay diha sa nagkalainlaing mga katarongan, apan karon si Jesus miingon: “Ang si bisan kinsa nga magabulag sa iyang asawa ug mangasawag lain nakapanapaw, ug ang mangasawa sa usa ka babayeng binulagan nakapanapaw.” Pagkadako tingali sa kalagot sa mga Pariseo sa maong mga pahayag, ilabina kay nagtugot silag pagbulagay sa bisan unsang katarongan!

Mipadayon sa iyang pahayag diha sa mga Pariseo, miasoy si Jesus ug sambingay nga nagpasiugdag duha ka lalaki diin ang situwasyon, o kahimtang sa ulahi kalit nga nabag-o. Nahibalo ka ba kon kinsa ang gihawasan sa mga lalaki ug kon unsay kahulogan sa kausaban sa ilang kahimtang?

“Dihay usa ka tawong dato,” miasoy si Jesus, “ug nagsapot siya ug purpura ug lino nga manipis, maluho niyang ginatagamtam ang matag adlaw. Apan sa gawas sa iyang pultahan ginadala ang usa ka tawong kabos nga ginganlan si Lazaro, nga nalukop sa kabahong ug nangandoy nga unta mabusog sa mga mumho nga mangatagak sa lamesa sa tawong dato. Oo, ang mga iro usab manuol ug motilap sa iyang mga kabahong.”

Gigamit ni Jesus ang tawong dato sa paghawas sa Hudiyohanong mga lider sa relihiyon, apil dili lamang ang mga Pariseo ug mga eskriba kondili ang mga Saduseo ug ang labawng mga saserdote. Sila dato sa espirituwal nga mga pribilehiyo ug mga higayon, ug sila nanagpanggawi sama sa tawong dato. Ang ilang besti sa harianong purpura naghawas sa ilang maayong posisyon, ug ang puting lino naglarawan sa ilang pagpakamatarong sa kaugalingon.

Kining mapahitas-ong tawong-dato nga matang naglantaw sa kabos, komung tawo uban ang bug-os nga pagtamay, nagtawag kanilang ‘am ha·’aʹrets, o mga tawo sa yuta. Busa, ang makalilimos nga Lazaro naghawas niining mga tawhana diin sila wala hatagi sa relihiyosong mga lider ug hustong espirituwal nga pagkaon ug mga pribilehiyo. Busa sama kang Lazaro nga naputos sa kabahong, ang komung mga tawo gitamay nga masakiton sa espirituwal ug angay lamang makig-uban sa mga iro. Apan, kadtong iya sa Lazaro nga matang gigutom ug giuhaw sa espirituwal nga pagkaon ug busa anaa sa ganghaan nga nagapangita nga makadawat ug bisan unsang mga mumho sa espirituwal nga pagkaon nga mangahulog gikan sa lamesa sa tawong dato.

Karon si Jesus mipadayon sa pagbatbat sa kausaban sa kahimtang sa tawong dato ug Lazaro. Unsa kining mga kausabana, ug unsay gihawasan nila? Kining mga pangutanaha konsiderahon sa sunod gula sa among magasin.Lucas 16:14-21; Juan 9:28, 29; Mateo 19:3-9; Galacia 3:24; Colosas 2:14.

◆ Sa sinugdanan sa ministeryo ni Juan, unsang kausaban ang gipaila ni Jesus nga nahitabo?

◆ Unsa ang pagakuhaon inigkamatay ni Jesus, ug sa unsang paagi naapektohan niini ang bahin sa diborsiyo?

◆ Diha sa sambingay ni Jesus, kinsa ang gihawasan sa tawong dato ug ni Lazaro?

◆ Unsang impormasyon ang atong paabuton sa sunod gula niining magasina?