Kinabuhi ug Ministeryo ni Jesus

Usa ka Misyon sa Kaluoy Ngadto sa Judea

SA MGA semana sayo pa niana, sa panahon sa Piyesta sa Dedikasyon sa Jerusalem, ang mga Hudiyo naningkamot sa pagpatay kang Jesus. Busa mibiyahe siya sa amihanan, dayag sa usa ka lugar nga dili halayo gikan sa Dagat sa Galilea.

Dili pa dugay, mipaingon na usab siya sa habagatan padulong sa Jerusalem, nga nagsangyaw sa kadalanan sa mga balangay sa Perea, usa ka distrito sa sidlakan sa Suba sa Jordan. Mao pay pagkatapos niya sa paghatag sambingay bahin sa tawong dato ug Lazaro. Karon siya nagpadayon sa pagtudlo sa iyang mga disipulo sa mga butang nga iyang gitudlo una pa niana didto sa Galilea.

Siya miingon, pananglitan, nga maayo pa sa usa ka tawo “kon higtan ug galingan ang iyang liog ug itambong siya sa dagat” kay sa magapandol siya sa “mga gagmay” sa Diyos. Iyang gipasiugda usab ang panginahanglan sa kapasayloan sa sala, nga nagsaysay: “Bisan kon ang [usa ka igsoon] makasala sa usa ka adlaw sa makapito ka besis kanimo ug sa makapito magabalik siya kanimo, nga magaingon, ‘Nagbasol ako,’ kinahanglan pasayloon mo siya.”

Sa dihang mihangyo ang mga disipulo, “Dugangi ang among pagtuo,” si Jesus mitubag: “Kon kamo may pagtuo nga ingon ug liso sa mustasa, makaingon kamo niining kahoy nga sikomoro, ‘Paibot ug patanom ka diha sa lawod!’ ug kini mosugot kaninyo.” Busa bisan ang gamay nga pagtuo makahimog dagkong mga butang.

Sunod, giasoy ni Jesus ang tinuod-sa-kinabuhi nga situwasyon nga nag-ilustrar sa hustong tinamdan sa usa ka alagad sa Diyos nga makagagahom. “Kinsa ba kaninyo nga may ulipon nga nagadaro o nagabantay sa mga karnero,” matud pa ni Jesus, “nga moingon kaniya gikan sa umahan, ‘Umari ka sa madali ug lumingkod ka tambong sa kan-anan’? Dili ba hinoon moingon siya kaniya, ‘Hikayi akog ipanihapon, ug pagtapis ug silbihi ako hangtod nga makakaon ug makainom, ug tapos ikaw na usab ang mokaon ug moinom’? Pasalamatan ba niya ang iyang ulipon tungod kay siya nagbuhat sa gisugo kaniya? Mao usab kamo, kon nakabuhat na kamo sa tanan nga gisugo kaninyo, ingna ninyo, ‘Kami mga ulipon nga walay hinungdan. Kay kami igo lang nagbuhat sa among katungdanan.’” Busa, ang mga alagad sa Diyos dili angay mobati nga sila naghatag ug pabor sa Diyos pinaagi sa pag-alagad kaniya. Hinunoa, kinahanglan ilang hinumdoman ang pribilehiyo nga ilang nabatonan sa pag-alagad kaniya ingong sinaligang mga sakop sa iyang panimalay.

Dayag nga wala magdugay human mihatag niini nga ilustrasyon nga miabot ang mensahero. Siya gipadala ni Maria ug Marta, ang mga igsoon ni Lazaro, nga nagpuyo sa Betaniya sa Judea. “Ginoo, tan-awa! ang imong mahal nga higala nagmasakiton,” miasoy ang mensahero.

Si Jesus mitubag: “Kining sakita dili ikamatay, kondili alang kini sa himaya sa Diyos, aron ang Anak sa Diyos pagahimayon pinaagi niini.” Human nga mipabilin pa ug duha ka adlaw sa dapit diin didto siya, si Jesus miingon sa iyang mga tinun-an: “Mangadto kita pag-usab sa Judea.” Apan, ilang gipahinumdoman siya: “Rabbi, ang mga Hudiyo bag-o pa lang naninguha sa pagbato kanimo, ug karon moadto ka na usab didto?”

“Dili ba ang adlaw napulo man ug duha ka takna?” Si Jesus nangutana sa pagtubag. “Kon may magalakaw sa adlaw siya dili mapandol, kay siya magatan-aw man sa kahayag niining kalibotan. Apan kon adunay magalakaw sa gabii, siya mapandol kay ang kahayag wala man diha kaniya.”

Ang gipasabot ni Jesus mao nga ang “takna sa adlaw,” o panahon nga gitugot sa Diyos alang sa iyang ministeryo sa yuta, wala pa molapas, ug samtang kini wala pa molapas, walay makadaot kaniya. Kinahanglang iyang gamiton sa bug-os ang mubong takna sa “adlaw” nga nabilin kaniya, kay human niana moabot “ang gabii” sa dihang patyon na siya sa iyang mga kaaway.

Si Jesus midugang: “Ang atong higala nga si Lazaro natulog, apan moadto ako didto aron sa pagpukaw kaniya.”

Tingali naghunahuna nga mipahulay lang si Lazaro ug nga klarong timaan kini nga siya maulian, ang mga tinun-an mitubag: “Ginoo, kon natulog lang siya, mamaayo ra siya.”

Unya si Jesus sa walay lipodlipod miingon kanila: “Si Lazaro namatay, ug tungod kaninyo ako nalipay nga wala ako didto aron managpanuo kamo. Apan tana mangadto kita kaniya.”

Nakaamgo nga patyon si Jesus sa Judea, tungod sa tinguha nga mapanalipdan siya, gidasig ni Tomas ang iyang kaubang mga tinun-an: “Mangadto usab kita aron mamatay uban kaniya.” Busa bisag nameligro ang ilang kinabuhi, giubanan sa mga tinun-an si Jesus diha sa iyang misyon sa kaluoy ngadto sa Judea. Lucas 13:22; 17:1-10; Juan 10:22, 31, 40-42; 11:1-16.

◆ Dili pa dugay diin nagsangyaw si Jesus?

◆ Unsang pagtulon-an ang gisobli ni Jesus, ug unsang tinuod-sa-kinabuhing situwasyon ang iyang giasoy aron sa pag-ilustrar sa unsang punto?

◆ Unsang balita ang nadawat ni Jesus, ug unsay iyang gipasabot sa “adlaw” ug sa “gabii”?

◆ Unsay gipasabot ni Tomas sa dihang miingon siya, ‘Mangadto kita aron mamatay uban kaniya’?