Mga Ansiano—Bantayi ang Gipiyal Kaninyo
“Tagda ninyo ang inyong kaugalingon ug ang tibuok panon, nga niini ang balaang espiritu mao ang nagtudlo kaninyo nga mga magtatan-aw, sa pagbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.”—BUHAT 20:28.
1. Unsay naapil diha sa gipiyal sa Kristohanon?
GIHATAGAN ni Jehova nga Diyos kadtong anaa sa iyang yutan-ong organisasyon ug katingalahang butang nga gipiyal. Apan unsa ang gipiyal? Kini maoy usa ka bililhong butang nga gitugyan diha sa usa ka tawo nga may tulobagon. Ang Kristohanong butang nga gipiyal nag-apil sa “hularan sa maayong mga pulong,” ang kamatuoran nga gihatag pinaagi sa Kasulatan ug giapod-apod sa “matinumanon ug maalamong ulipon” ingong “pagkaon sa hustong panahon.” (2 Timoteo 1:13, 14; Mateo 24:45-47) Kining butang nga gipiyal nag-apil sa ministeryo nga nalangkit sa kamatuoran, nga kinahanglang iwali sa sulod ug sa gawas sa kongregasyon. (2 Timoteo 4:1-5) Ang mga magmamantala sa gingharian, apil ang dinihogan sa espiritu nga mga ansiano, kinahanglan magtamod niining butang nga gipiyal ingon nga bililhon kaayo.
2. Ang mga ansiano dunay unsang dugang butang nga gipiyal, ug unsay gisulti ni Pedro bahin niini?
2 Ang Kristohanong mga ansiano dunay dugang butang nga gipiyal—ang responsabilidad sa pagkamagbalantay sa panon sa Diyos. Niining bahina, si apostol Pedro misulat: “Ngadto sa mga ansiano taliwala kaninyo magatambag ako, kay ako usab usa man ka tigulang sama kanila ug saksi sa mga pag-antos ni Kristo, ug mag-aambit usab sa himaya nga igapadayag unya: Tagda ninyo ang panon sa Diyos nga gitugyan diha kaninyo, dili ingon nga gipugos kamo, kondili sa kinabubut-on; dili alang sa gugma sa pagpanapi, kondili sa kamadasigon; dili sa hinarihari ibabaw niadtong panulondon sa Diyos, kondili ingon nga mga panig-ingnan sa panon. Ug inigpadayag kaninyo sa pangulong magbalantay, kamo managpakadawat unya sa dili-malawos nga purongpurong sa himaya.”—1 Pedro 5:1-4.
3. Tuboran sa unsa ang Kristohanong mga ansiano?
3 Ang Kristohanong mga ansiano “kinahanglang mahimong usa ka tagoanan gikan sa hangin ug usa ka salipod gikan sa bagyo, sama sa mga sapa sa tubig sa usa ka dapit nga mamala, ingon sa landong sa usa ka dakong bato sa disyerto.” (Isaias 32:1, 2) Kini nagkahulogan nga ang mga ansiano angay maoy mga tuboran sa kasegurohan, kalinaw, ug kalig-on sa panon sa samag-karnero nga mga alagad sa Diyos. “Labaw sa kasarangan” ang gikinahanglan sa mga ansiano, o luyoluyong mga magbalantay, sa panon tungod kay sila “gipiyalan ug daghan.” (Lucas 12:48) Ug sila siyempre dunay usa ka hamiling butang nga gipiyal nga kinahanglang bantayan.
Nganong Gipiyal Diha Kaninyo?
4. Nganong daghang ansiano ang gikinahanglan?
4 Ang paglungtad sa kapin sa 60,000 ka kongregasyon sa mga Saksi ni Jehova sa tibuok-kalibotan nagkinahanglan ug libolibong kuwalipikado sa espirituwal nga mga lalaki sa pag-atiman sa panon sa Diyos. Dunay daghang ansiano sa matag nasod, ug kini maoy usa ka tuboran sa kalipay. Sa tibuok-kalibotan sa aberids dunay mga 60 ka magmamantala sa Gingharian diha sa matag kongregasyon. Busa, dunay daghang trabaho ang pagabuhaton sa mga ansiano.—1 Corinto 15:58.
5. Pinasukad sa unsa nga ang pribilehiyo sa pag-alagad ingong ansiano gihatag diha sa usa ka tawo?
5 Kon usa ikaw ka ansiano, nganong kining bulahan nga pribilehiyo gihatag kanimo? Tungod kay ikaw nakahimo ug pipila ka butang, ug ikaw dunay espirituwal nga mga kuwalipikasyon. Pananglitan, ikaw makugihong nakatuon sa Pulong sa Diyos. (Josue 1:7, 8) Ikaw madasigong nakapakigbahin sa pag-alagad sa kanataran, nakatabang usab sa uban nga mahimong mga magmamantala sa Gingharian. Sanglit “nasulayan una sa katakos,” ikaw matinumanong nakaalagad ingon nga usa ka ministeryal nga alagad. Ikaw ‘naninguha,’ o naningkamot nga mahimong kuwalipikado, sa pagkahimong usa ka ansiano, nakasabot nga ang pagkahimong usa ka magtatan-aw maoy “usa ka maayong buhat.” (1 Timoteo 3:1, 10) Sama kang Timoteo, ikaw “maayo ug dungog sa mga igsoon.” (Buhat 16:2) Sa dihang girekomendar ingong ansiano, hayan anaa ka na sa imong ulahing panuigong 20 o gulang-gulang pa ug eksperyensiyado sa kinabuhi. Ang kongregasyon may pagtahod kanimo ingong hamtong sa espirituwal, maduol nga igsoon nga takos sa paghatag epektibong Kasulatanhong tambag ug dili magabutyag sa mga butang tinago.—Proverbio 25:9, 10.
Kon sa Unsang Paagi Imong Mabantayan ang Gipiyal Kanimo
6, 7. Ang 1 Timoteo 4:13-15 nagtaganag unsang tambag sa pagtabang sa usa ka tawo sa pagbantay sa gipiyal kaniya ingong ansiano?
6 Oo, kon usa ikaw ka ansiano, kadto maoy sa maayong mga katarongan nga gipiyalan ka sa Kristohanong pagkamagtatan-aw. Ug gibati mo nga pagkadako nga pribilehiyo kini! Apan sa unsang paagi imong mabantayan ang gipiyal kanimo?
7 Ang usa ka paagi sa pagbantay sa gipiyal kanimo ingong usa ka ansiano mao ang pagkapositibo ug pagkamakugihon sa pag-atiman sa imong mga buluhaton. Kitang tanan dunay tinudlong mga buluhaton sa nagkalainlaing responsabilidad sa organisasyon ni Jehova. Busa, pabilin sa imong dapit, ug magmakontento sa ‘paggawi nga ubos.’ (Lucas 9:46-48; itandi ang Maghuhukom 7:21.) Mahala ang imong mga pribilehiyo, ug ayaw gayod ‘pagtinapol.’ (Proverbio 10:4) Ayaw pag-urong, apan uban sa tabang ni Jehova, magmauswagon sa tanang bahin sa ministeryo. Sa pagkamatuod, sunda kining tambaga nga gihatag ni Pablo kang Timoteo: “Pagkugi pagbasa sa kasulatan atubangan sa kadaghanan, sa pagpanambag, sa pagpanudlo. Ayaw pagsagdi ang gasa nga anaa kanimo nga gikahatag kanimo pinaagi sa panagna ug sa dihang gipandongan ka sa mga kamot sa lawas sa mga tigulang. Palandonga kining mga butanga; magmapuliki niini, aron makita sa tanan ang imong pag-uswag.”—1 Timoteo 4:13-15.
8. Unsay makatabang sa ansiano sa paghatag makataronganong tambag diha sa pag-alagad sa kanataran uban sa sakop sa iyang pamilya ug sa uban?
8 Paneguroa nga imong mahuptan ang usa ka maayo, mabungahong iskedyol sa personal nga pagtuon. Ingong usa ka ansiano, ikaw sa tukma gilaoman nga mohatag maayong tambag sa Kasulatan. Aron masangkapan ka niining responsabilidara, nabasa na ba nimo ang enterong Bibliya nga mapalandongon, tingali sa makadaghang higayon? (Proverbio 15:28) Komosta ang imong mga asaynment sa plataporma? Andama sila pag-ayo, mainampoong mangayog tabang kang Jehova aron ikaw makahatag espirituwal nga katugob niadtong presente sa atong mga tigom. Ang mga ansiano ilabina angay ‘mosulti ug maayong butang nga makapalig-on, aron makahatag kinig kaayohan ngadto sa mga tigpatalinghog.’—Efeso 4:29; Roma 1:11.
9. Sumala sa 2 Timoteo 4:2, unsay kinahanglang buhaton sa usa ka ansiano?
9 Ingong ansiano, sunda ang tambag ni Pablo: “Iwali ang pulong, magmakugihon niana bisan sa maayong panahon, sa magubot nga panahon, himoa ang pagpamadlong, ang pagsaway, ang pagpanambag diha sa tumang pagkamapailobon ug sa arte sa pagpanudlo.” (2 Timoteo 4:2) Nabalaka si Pablo mahitungod sa apostasiya tungod kay dunay pipila diha sa kongregasyon nga ‘nakiglantugi bahin sa mga pulong,’ nga naghimog ‘binuang nga mga pagsukitsukit,’ ug ‘misupak sa kamatuoran.’ (2 Timoteo 2:14-18, 23-25; 3:8-13; 4:3, 4) Bisan pa, kon nag-antos man ang kongregasyon ug magubot o maayong panahon, si Timoteo gisugo sa “pagwali sa pulong.” Kini mopalig-on sa isigkamagtutuo aron masuklan ang apostasiya. Sama usab karon, kinahanglan iwali sa mga ansiano ang matuhopon nga Pulong, o mensahe, sa Diyos, nga nagaabot sa kasingkasing ug nagadasig sa pagsunod sa mga sukdanan ni Jehova.—Hebreohanon 4:12.
10. Nganong ang ansiano regular nga mokuyog sa pag-alagad sa kanataran uban sa mga sakop sa iyang pamilya ug sa uban?
10 Aron makasulti nga may awtoridad, ang ansiano kinahanglan magkinabuhi nga nahiuyon sa Pulong sa Diyos. Apan siya wala magbantay sa bug-os sa gipiyal kaniya kon siya ‘mowali sa pulong’ diha lamang sa plataporma sulod sa kongregasyon. Sa sama nga konteksto giawhag ni Pablo si Timoteo: “Buhata ang buluhaton sa usa ka ebanghelisador.” Aron ‘matuman sa bug-os ang imong ministeryo’ ingong usa ka ansiano, kinahanglan imong iwali ang Pulong sa Diyos sa “publiko ug sa balay ug balay.” (2 Timoteo 4:5; Buhat 20:20, 21) Busa, gawas sa pag-alagad sa kanataran uban sa sakop sa imong pamilya. Kini makaamot sa espirituwal nga bugkos tali kanimo ug sa imong asawa ug makahatag dakog kaayohan sa imong mga anak. Paggugol usab ug panahon, sa pakigbahin sa buluhatong pagsangyaw uban sa ubang mga sakop sa kongregasyon. Kini makapalig-on sa espirituwal nga bugkos ug mopalambo sa inigsoong gugma. (Juan 13:34, 35) Siyempre, kinahanglang maningkamot ang ansiano sa pagtimbang sa pagbahin sa bililhong panahon tali sa iyang pamilya ug sa kongregasyon. Ang paggamit sa salabotan makapugong kaniya sa paggugol ug daghang panahon sa usa, nga mapasagdan ug makadaot sa lain.
11. Nganong magkugi ang usa ka ansiano sa pagdugang sa iyang katakos ingong magtutudlo?
11 Aron mabantayan ang gipiyal kanimo ingong usa ka ansiano, pagkugi usab sa pagdugang sa imong katakos ingong magtutudlo. “Siya nga nagatudlo, patudloa siya,” miingon si Pablo, “o kon siya nga nagatambag, patambaga siya.” (Roma 12:7, 8) Sanglit ang magtutudlo nagabarog ingong instruktor sa atubangan sa uban, sila may katungod sa paglaom ug dako kaniya. Kon seryosong masayop ang usa ka ansiano sa iyang pagpanudlo ug kini mopahinabog mga suliran sa kaubang mga magtutuo, siya nahilinya alang sa paghukom sa Diyos. Oo, ang mga magtutudlo, “makadawat ug mas mabug-at nga paghukom.” (Santiago 3:1, 2; Mateo 12:36, 37) Busa ang mga ansiano kinahanglan mahimong seryosong mga estudyante sa Pulong sa Diyos ug ipadapat kini sa kinabuhi. Unya ang ilang Kasulatanhong pagtulon-an, inubanan sa pagpadapat sa kaugalingon, pabilhan ug dako sa isigkamagtutuo. Kini makapanalipod usab sa kongregasyon gikan sa dili-maayong mga impluwensiya, apil ang apostasiya.
Likayi ang mga Lit-ag
12. Unsang tambag ang gipatik kas-a niining basahona nga makatabang sa ansiano sa paglikay sa dili-maayong paggamit sa dila?
12 Bantayi usab ang gipiyal kanimo ingong ansiano pinaagi sa paglikay sa mga lit-ag. Ang usa niini mao ang dili-maayong paggamit sa dila ingong magtutudlo. Ang panginahanglan sa panagana niining bahina dugay nang gipasiugda sa organisasyon ni Jehova. Pananglitan, diha sa isyu niini sa Mayo 15, 1897, gihisgotan niining basahona ang Santiago 3:1-13 ug miingon ilabina mahitungod sa mga ansiano: “Kon sila larinog dila kini mahimong motultol ug dako nga panalangin, makadani ug daghan ngadto sa Ginoo, sa kamatuoran ug sa dalan sa pagkamatarong; o, sa laing bahin, kon nahugawan sa kasaypanan, ang dila mohimog dili-maasoy nga kadaot—kadaot sa pagtuo, sa moral, sa maayong mga buhat. Matuod, nga ang bisan kinsa nga magagamit sa gasa sa pagpanudlo naghimo sa iyang kaugalingon nga bukas sa nagadugang nga responsabilidad diha sa panan-aw sa Diyos ug sa mga tawo. . . . Ang bisan kinsa nga mahimong usa ka tuboran nga gikan kanila magagula ang balaang Pulong, nga nagadalag panalangin ug kapahulayan ug kusog, kinahanglang magtino nga walay mapait nga mga tubig, bakak nga mga doktrina nga mopahinabog tunglo, usa ka kadaot—nagapasipala sa Diyos ug nagatuis sa iyang Pulong—ang mogawas sa ilang mga baba. Sa pagpili sa magdudumala sa mga tigom ang kuwalipikasyon bahin sa ‘dila,’ sumala sa gipakita dinhi, dili gayod pagakalimtan. Ang masakit nga dila dili pilion, kondili ang mas maaghop, ang kasarangan, nga ‘nagabusal’ sa ilang mga dila ug mainampingong nagapaningkamot sa ‘pagsulti ingong mga manalagna sa Diyos’ lamang.” Pagkahinungdanon nga gamiton sa ansiano ang iyang dila sa hustong paagi!
13. Ang mga ansiano kinahanglan mag-amping bahin sa unsa maylabot sa kalingawan?
13 Ang sobrang kalingawan maoy usa usab ka lit-ag nga pagalikayan. Ang kalingawan angay makapapresko ug makapalig-on, dili makapakapoy ug makabalda sa Kristohanon. Dugang pa, ang mga magtatan-aw kinahanglan “kasarangan sa mga batasan.” (1 Timoteo 3:2) Kon ang pagkamakasaranganon maoy nagamando sa imong buhaton maylabot sa kalingawan, kini magabantay kanimo ug sa imong pamilya ug makahatag maayong pananglitan sa kongregasyon. Ikaw dili makahatag maayong pananglitan kon, sa matag karon ug unya, ikaw molakaw alang sa mga katuyoan sa kalingawan sa mga hinapos sa semana samtang ang imong isigkamagtutuo makugihong nakigbahin sa pag-alagad sa kanataran. Ang maayong balita kinahanglan iwali, ug ang mga ansiano angay manguna niining buluhatona ingon nga madasigong mga magmamantala sa Gingharian.—Marcos 13:10; Tito 2:14.
14. (a) Unsang pananglitan sa Kasulatan ang nagpasiugda sa panginahanglan alang sa mga ansiano sa pagbantay batok sa seksuwal nga imoralidad? (b) Kinahanglan dili pagakalimtan sa mga ansiano ang unsang balikbalik nga tambag mahitungod sa pagtabang ug espirituwal nga mga sister?
14 Ang seksuwal nga imoralidad maoy laing lit-ag nga likayan. Ang moral nga pagkadunot sa kalibotan makaimpluwensiya bisan sa usa ka ansiano kon siya dili mosukol sa mga tintasyon nga gigamit ni Satanas sa iyang mga paningkamot sa pagbungkag sa integridad sa katawhan sa Diyos. (Itandi ang Mateo 4:1-11; 6:9, 13.) Hinumdomi nga si propetang Balaam, wala-molampos sa iyang pagsulay sa pagtunglo sa Israel, nangatarongan nga si Jehova mismo motunglo kanila kon sila madala sa pakigbahin sa pagsimba sa sekso. Busa gitudloan ni Balaam ang Moabihanong hari si Balak sa “pagbutang ug kapangdolan sa atubangan sa mga anak ni Israel, pinaagi sa pagdani kanila sa pagkaon sa mga hinalad ngadto sa larawan ug sa pagpakighilawas.” Sila ba milikay sa lit-ag? Wala, kay 24,000 ka Israelinhon ang nangamatay sa hampak nga gikan ni Jehova tungod kay sila naghimog imoral nga relasyon uban sa mga babayeng Moabihanon ug misimba sa ilang mga diyosdiyos. (Pinadayag 2:14; Numeros 25:1-9) Hinumdomi, usab, nga bisan si David, ‘nga usa ka tawo nga uyon sa kasingkasing sa Diyos,’ nahulog sa lit-ag sa seksuwal nga imoralidad. (1 Samuel 13:14; 2 Samuel 11:2-4) Nan, ingon nga ansiano, patalinghogi ang balikbalik nga tambag sa “matinumanon nga piniyalan” sa dili pagtabang sa usa ka espirituwal nga sister nga kamo rang duha kondili magpauban ug laing ansiano sa pag-atiman alang niini nga responsabilidad.—Lucas 12:42.
15. Sa unsang paagi ang pamilya sa ansiano makatabang kaniya nga makalikay sa lit-ag sa materyalismo?
15 Ang materyalismo maoy laing lit-ag nga likayan sa usa ka ansiano. Magmakontento sa pangunang mga kinahanglanon, nahibalo nga si Jehova mohatag ug igo-igong tagana. (Mateo 6:25-33; Hebreohanon 13:5) Bansaya ang imong pamilya nga magmadaginoton, kay ang pagkausikan maoy usa ka kawatan sa panahon ug kahinguhaan nga magamit sa pagtabang sa pamilya, maingon man sa pakigbahin sa pag-alagad sa kanataran, sa pagpalig-on sa kongregasyon, ug sa pagpalambo sa mga intereses sa Gingharian. Ang ansiano makabaton ug kaayohan gikan sa kooperasyon sa iyang pamilya niining bahina ug mapasalamaton nga sila wala magapangayo kaniyag mga butang nga sa aktuwal wala gayod kinahanglana. Sa pagkamatuod, “maayo pa ang diyutay nga inubanan sa pagkahadlok kang Jehova kay sa dakong bahandi ug inubanan sa kasamok.”—Proverbio 15:16.
“Tagda Ninyo ang Inyong Kaugalingon”
16. Unsang tambag ang gihatag ni Pablo sa mga magtatan-aw sa Efeso?
16 Kon ginapabantay ang mga ansiano sa gipiyal kanila, kinahanglan ilang ipadapat ang tambag ni Pablo ngadto sa mga magtatan-aw sa Efeso. Iyang gisultihan sila: “Tagda ang inyong kaugalingon ug ang tibuok panon, nga niini ang balaang espiritu nagtudlo kaninyo nga mga magtatan-aw, sa pagbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak. Ako nahibalo nga sa makagikan na ako pagasudlon kamog mabangis nga mga lobo nga dili magtagad sa panon uban sa kalumo, ug gikan kaninyo adunay managpanindog nga mga tawo nga magasultig mga binalit-ad aron sa pagpamira sa mga tinun-an ngadto kanila. Busa, magtukaw kamo, ug hinumdomi nga sulod sa tulo ka tuig, sa gabii ug sa adlaw, kamong tanan wala ko undangi sa pagpahamangno uban sa mga luha.”—Buhat 20:28-31.
17, 18. Unsang tambag nga gipatik niining magasina sa mga 80 ka tuig sa miagi nga aplikado gihapon sa Kristohanong mga ansiano?
17 Kapin sa 80 ka tuig sa miagi, ang The Watch Tower (Marso 1, 1909) mikutlo sa nag-unang tambag ni Pablo ngadto sa kaubang mga ansiano ug mikomento: “Ang mga Ansiano bisan asa ang ilabinang magpatalinghog; tungod kay sa tanang pagsulay ang labing pinili ug labing ilado makabaton ug labi pa ka grabe nga mga babag ug mga pagsulay. Busa si [Santiago] nagtambag, ‘Pipila lamang kaninyo ang mahimong mga magtutudlo, mga igsoon, kay nasayod kamo nga ang usa ka magtutudlo makadawat ug labi pa ka mapig-oton nga pagsulay.’ Maingon man, kami, nagatambag sa tanang mga Ansiano nga putli ug kasinglasing, dili-hakog, nga walay lain ang batonon nila kondili ang gugma ug maayong mga tinguha alang sa tanang katawhan, ug nga sila mahimong dugang ug dugang mapuno sa mga bunga ug mga grasya sa balaang Espiritu, magaatiman usab sa panon. Hinumdomi, nga iya sa Ginoo ang panon ug kamo dunay responsabilidad sa Ginoo, maingon man ngadto kanila. Hinumdomi, nga kamo ginapabantay sa (intereses) sa ilang mga kalag ingon nga kamo may tulobagon sa Dakong Pangulong Magbalantay. Hinumdomi, nga ang pangunang butang mao ang Gugma, diha tanan; ug, samtang dili pagapasagdan ang mga doktrina, paghatag linain nga pagtagad sa kaugmaran sa Espiritu sa Ginoo taliwala sa nagkalainlaing mga sakop sa iyang Lawas, aron sa ingon sila ‘makaambit sa panulondon sa mga balaan diha sa kahayag.’ ug, sumala sa Balaan nga kabubut-on, dili mag-antos sa pagkapandol niining daotang adlaw, kondili, nakabuhat sa tanan, makabarog nga bug-os diha kang Kristo, sa iyang Lawas, sa iyang mga Sakop, sa iyang mga Kaubang-nagasakripisyo, sa iyang mga Kaubang-Manununod.”
18 Kadtong mga pulonga gitumong alang sa dinihogan-sa-espiritu nga mga ansiano ug sa mga isigkamagtutuo nga nahilinya sa pagsabot ug sa mga sirkumstansiya sa organisasyon ni Jehova niadtong unang mga adlaw. Bisan pa, aplikado gihapon kanang tambaga karong adlawa! Bisan kon ang ilang mga paglaom langitnon ug yutan-on, ang Kristohanong mga ansiano kinahanglang magtagad sa ilang kaugalingon, magbantay sa gipiyal kanila, ug mahigugmaong atimanon ang mga intereses sa panon sa Diyos.
Kalipay Mosangpot Gikan sa Pagbantay sa Gipiyal Kanimo
19, 20. Nganong ikaingon nga mosangpot ug kalipay kon ang mga ansiano magbantay sa gipiyal kanila?
19 Kalipay—sa pagkamatuod, kinasingkasing nga kalipay—mosangpot gikan sa pagbantay sa gipiyal kanimo ingong usa ka Kristohanong ansiano. Dunay kalipay ang pagdumalag maayo sa seryosong responsabilidad. Busa magmaampingon, mainampoon, makugihon. Bantayi ang gipiyal kanimo ingong ansiano ug tan-awa ang umaabot nga panahon sa dihang ikaw makaingon, sama sa tawo nga dunay sudlanan sa tinta sa magsusulat: “Ako nakabuhat na sumala sa gisugo mo kanako.”—Ezekiel 9:3, 4, 11.
20 Oo, buhat nga maunongon ingong ansiano aron kini ang ikaingon mahitungod kanimo sama nga gikaingon usab kini kang Noe: “Kini iyang gibuhat.” (Genesis 6:22) Gikan sa maong makugihon nga pag-alagad, ang kongregasyon makabaton ug kaayohan sa daghang paagi. Labaw sa tanan, mapasidunggan si Jehova pinaagi sa malig-on, aktibong mga kongregasyon nga gialagaran sa matinumanong mga ansiano kinsa nagabantay sa gipiyal kanila. Apan labaw pa ang gikinahanglan kon, sa ingon, ikaw sultihan: “Maayong pagkabuhat, buotan nga ulipon!” (Lucas 19:17) Ingong ansiano, kinahanglan tagdon mo usab ang panon sa Diyos uban sa kalumo.
Unsay Imong Ikasulti?
◻ Unsang dugang butang gipiyal ang nabatonan sa Kristohanong mga ansiano?
◻ Ang usa ka ansiano mohimo ug unsang positibong lakang aron mabantayan ang gipiyal kaniya?
◻ Aron mabantayan ang gipiyal kaniya, unsang mga lit-ag ang kinahanglang likayan sa ansiano?
◻ Nganong mosangpot ug kalipay kon bantayan sa mga ansiano ang gipiyal kanila?
[Hulagway sa panid 10]
Ang Kristohanong mga ansiano “kinahanglan mahimong usa ka salipod gikan sa bagyo”
[Hulagway sa panid 12]
Ingong ansiano, pakigbahing regular sa pag-alagad sa kanataran uban sa mga sakop sa imong pamilya ug sa uban
[Hulagway sa panid 13]
Kon bantayan mo ang gipiyal kanimo ingong ansiano, ang kongregasyon makabaton ug kaayohan sa daghang paagi