Ang Kamatuoran Bahin sa Impiyerno

DAYAG, ang nagpaluyong doktrina sa pagtuo sa silot inigkamatay mao ang pagtuo nga ang matuod nga tawo dili tinuod mamatay inigkamatay sa unodnong lawas apan nga may usa ka butang​—kasagaran nga gitawag kalag​—nga magpadayon nga buhi inigkamatay sa lawas. Kini nga pagtuo, sumala sa makita nato sa naunang artikulo, mobalik ngadto sa unang mga taga-Sumeria ug mga taga-Babilonya sa Mesopotamia. Sa ulahi, gisagop kini sa mga Grego, kansang mga pilosopo, sama kang Plato, naghashas sa teoriya. Ang ilang nahashasan nga dualistikong pagtuo sa “lawas ug kalag” nahimong bahin sa apostatang Hudiyong pagtuo.

Kanus-a sagopa sa nag-angkong mga Kristohanon ang pagtuo sa pagkabuhi tapos mamatay? Tinong dili sa panahon ni Jesus ug sa iyang mga apostol. Ang Pranses nga Encyclopædia Universalis nagaingon: “Ang [apokripang] Apocalypse of Peter (ika-2ng siglo K.P.) mao ang unang Kristohanong basahon nga nagabatbat sa silot ug mga pagsakit sa mga makasasala diha sa impiyerno.”

Sa pagkamatuod, mopatim-aw nga taliwala sa unang mga amahan sa iglesya, may dakong kawalay-panag-uyon mahitungod sa impiyerno. Si Justin Martyr, Clement sa Alexandria, Tertullian, ug Cyprian maoy dapig sa kalayong impiyerno. Gisulayan ni Origen ang pagtuis sa impiyerno, nga giangkon nga ang mga makasasala sa impiyerno sa kadugayan mamaluwas ra. Gisunod siya sa dako o gamayng gidak-on ni Gregory sa Nazianzus ug Gregory sa Nyssa. Apan gitapos ni Augustine kanang malumong mga ideya sa impiyerno. Sa iyang librong Early Christian Doctrines, ang propesor sa Oxford nga si J. N. D. Kelly misulat: “Sa pagkaikalimang siglo ang higpit nga doktrina nga ang mga makasasala wala nay ikaduhang higayon tapos niining kinabuhia ug nga ang kalayo nga magalamoy kanila dili gayod mapalong sa bisan diin naglabi.”

Mahitungod sa purgatoryo, ang librong Orpheus​—A General History of Religions nagaingon: “Gituohan ni San Agustin nga may dihadihang kahimtang sa pagsulay tali sa umaabot nga kalipayan ug pagtunglo, nga mao ang pagputli sa mga kalag pinaagi sa kalayo. Kini ang Orphic [paganong Grego] ug Virgilian [paganong Romanhong] doktrina sa Purgatoryo: walay usa ka pulong mahitungod niana diha sa Ebanghelyo. . . . Ang doktrina sa Purgatoryo . . . gihan-ay sa ikaunom nga siglo, ug giproklamar nga usa ka doktrina sa Iglesya pinaagi sa Konsilyo sa Florence (1439).” Ang New Catholic Encyclopedia nagaangkon: “Ang Katolikong doktrina bahin sa purgatoryo gipasukad sa tradisyon, dili sa Sagradong Kasulatan.” Mahitungod sa Limbo, si Cardinal Ratzinger sa Roma nagaangkon nga kini maoy “usa lamang ka teolohikanhong pangagpas.”

Walay Silot Tapos Mamatay

Apan, komosta ang Bibliya? Nagaingon ba kini nga ang kalag magpadayong buhi inigkamatay sa lawas ug busa masilotan sa kalayong impiyerno o purgatoryo? Ang New Catholic Encyclopedia nagaingon: “Ang ideya nga ang kalag magpadayong buhi tapos mamatay dili sayon hiilhan diha sa Bibliya. . . . Ang kalag diha sa D[aang] T[estamento] nagkahulogan dili sa usa ka bahin sa tawo, kondili sa tibuok nga tawo​—ang tawo ingong usa ka buhing linalang. Sa susama, sa B[ag-ong] T[estamento] kini nagkahulogan sa tawhanong kinabuhi: ang kinabuhi sa usa ka indibiduwal.” Busa ang nagpahiping pasikaranan sa pagsilot human mamatay dili makabarog. Ang Bibliya nagaingon: “Ang kalag nga makasala mamatay.” (Ezekiel 18:4, Revised Standard Version, Katolikong Edisyon) Kini nagapahayag usab: “Ang bayad sa sala mao ang kamatayon.” (Roma 6:23, RSV) Busa, sa dihang ang Bibliya nagahisgot bahin sa dimahinulsolong daotang mga tawo nga mopadulong sa “Gehenna,” “walay-kataposang kalayo,” o “ang linaw sa kalayo,” kini nagagamit lamang ug simbolikong pinulongan nga nagahisgot nga sila makaagom ug permanenteng kamatayon, “ang ikaduhang kamatayon.”​—Mateo 23:33; 25:41, 46; Pinadayag 20:14; 21:8;a itandi ang 2 Tesalonica 1:7-9.

Impiyerno Haw-asan Pinaagi sa Pagkabanhaw

Nan, init ba ang impiyerno? Dili sumala sa Bibliya. Sa pagkamatuod, ang Hebreohanon ug Gregong mga pulong nga gihubad sa pila ka Bibliya nga “impiyerno” nagkahulogan lamang sa komung lubnganan sa mga tawong patay. Dili kini usa ka init nga dapit sa pagsakit. Hinunoa, kini usa ka dapit sa pahulay, nga gikan niana ang mga patay mogula sa pagkabanhaw. (Ecclesiastes 9:10; Buhat 24:15) Si Oscar Cullmann, propesor sa Theological Faculty of the University of Basel, Switzerland, ug sa Sorbonne, sa Paris, nagahisgot bahin sa “dakong kalainan tali sa Kristohanong pagdahom sa pagkabanhaw sa mga patay ug sa Gregong pagtuo sa imortalidad sa kalag.” Tukma, siya nagaingon nga “ang kamatuoran nga ang ulahing Kristiyanidad naghatag koneksiyon tali sa duha ka pagtuo . . . sa pagkamatuod dili gayod usa ka koneksiyon kondili pagsalikway sa usa [doktrina sa Bibliya sa pagkabanhaw] nga dapig sa lain [ang paganong pagtuo sa imortalidad sa tawhanong kalag].”​—Italiko amoa.

Ang mga Saksi ni Jehova wala magsalikway sa ilang pagtuo sa pagkabanhaw sa pagpabor sa ideya sa imortalidad sa kalag. Malipay sila nga ipakig-ambit kanimo ang ilang malipayong paglaom ug pamatud-an kanimo gikan sa Bibliya nga, sa pagkatinuod, ang impiyerno dili init.

[Mga Footnote]