Ang Pulong ni Jehova Nagmadaogon!
“Sa gamhanang paagi ang pulong ni Jehova mikaylap ug nagmadaogon.”—BUHAT 19:20.
1. Unsay pagakobrehan niining pagtuon sa basahon sa Bibliya nga mga Buhat sa mga Apostol?
GIBUKSAN ni Jehova ang pultahan sa kalihokan. Si Pablo, “ang apostol sa mga nasod,” mao ilabina ang nanguna nianang buluhatona. (Roma 11:13) Sa pagkamatuod, ang atong pagpadayon sa pagtuon sa mga Buhat sa mga Apostol makakaplag kaniya nga nakigbahin sa kulba-hinam nga misyonaryong mga panaw.—Buhat 16:6–19:41.
2. (a) Sa unsang paagi si apostol Pablo nag-alagad ingong dinasig sa Diyos nga magsusulat gikan sa mga 50 K.P. ngadto sa 56 K.P.? (b) Unsay nahitabo sa gipanalanginan sa Diyos ang ministeryo ni Pablo ug ang uban?
2 Si Pablo maoy dinasig usab sa Diyos nga magsusulat. Gikan sa mga 50 K.P. ngadto sa 56 K.P., iyang gisulat ang 1 ug 2 Tesalonica gikan sa Corinto, Galacia gikan niadtong siyudara o sa Syria Antioquia, ang 1 Corinto gikan sa Efeso, 2 Corinto gikan sa Macedonia, ug Roma gikan sa Corinto. Ug samtang gipanalanginan sa Diyos ang ministeryo ni Pablo ug ang uban, “sa gamhanang paagi ang pulong ni Jehova mikaylap ug nagmadaogon.”—Buhat 19:20.
Gikan sa Asia Ngadto sa Uropa
3. Sa unsang paagi si Pablo ug ang iyang mga kauban naghatag ug maayong pananglitan may kalabotan sa pagtultol sa balaang espiritu?
3 Si Pablo ug ang iyang mga kauban naghatag ug maayong pananglitan sa pagdawat sa pagtultol pinaagi sa balaang espiritu. (16:6-10) Tingali pinaagi sa madungog nga mga pagpadayag, mga damgo, o mga panan-awon, ang espiritu nagpugong kanila sa pagsangyaw sa distrito sa Asia ug sa lalawigan sa Betania, sa ulahi naabot sa maayong balita. (Buhat 18:18-21; 1 Pedro 1:1, 2) Nganong gibabagan man sa espiritu ang unang pagsulod? Diyutay lamang ang mga mamumuo, ug gitultolan sila sa espiritu ngadto sa labi pang mabungahong mga natad sa Uropa. Busa karong adlawa, kon ang dalan ginababagan sa usa ka teritoryo, ang mga Saksi ni Jehova mosangyaw sa laing dapit, masaligon nga ang espiritu sa Diyos maoy motultol kanila ngadto sa mga tawong samag-karnero.
4. Unsay pagsanong sa panan-awon ni Pablo maylabot sa usa ka tawong taga Macedonia nga nangayog tabang?
4 Dayon si Pablo ug ang iyang mga kauban ‘miagi sa’ Mysia, usa ka rehiyon sa Asia Minor, ingong misyonaryo nga natad. Diha sa usa ka panan-awon, hinunoa, nakakita si Pablo ug tawo nga taga Macedonia nga nangayog tabang. Busa ang mga misyonaryo miadto dayon sa Macedonia, usa ka rehiyon sa Balkan Peninsula. Sa susama, daghang mga Saksi gitultolan sa balaang espiritu sa pag-alagad karon sa dapit nga dako ang panginahanglan sa mga magmamantala sa Gingharian.
5. (a) Nganong ikaingon nga ang pulong ni Jehova nagmadaogon sa Filipos? (b) Sa unsang paagi ang daghang presenteng-adlawng mga Saksi nahisama kang Lydia?
5 Ang pulong ni Jehova nagmadaogon sa Macedonia. (16:11-15) Ang Filipos, nga usa ka koloniya diin ang kadaghanan sa mga molupyo mga Romanhong lungsoranon, gipuy-an sa pipila lamang ka mga Hudiyo ug walay sinagoga. Busa ang mga igsoon miadto sa “usa ka dapit nga ampoanan” sa daplin sa suba sa gawas sa siyudad. Usa kanila nga nakit-an didto mao si Lydia, tingali usa ka Hudiyohanong kinabig nga gikan sa Tiatira, nga usa ka siyudad sa Asia Minor nga nabantog sa industriya sa pagtinag panapton. Siya namaligyag purporang tina o mga panapton ug mga besti nga gitina niana. Human nga si Lydia ug ang iyang tibuok nga panimalay gibawtismohan, siya mainiton kaayo sa pag-abiabi nga tungod niana si Lucas misulat: “Iya kaming gidapit.” Kita mapasalamaton sa mga igsoong babaye nga sama niana.
Usa ka Magbalantay sa Bilanggoan Nahimong Magtutuo
6. Sa unsang paagi ang kalihokan sa demonyo miresultag pagkabilanggo ni Pablo ug Silas sa Filipos?
6 Dayag nga nasuko si Satanas sa espirituwal nga mga kaugmaran sa Filipos, tungod kay ang demonyohanong kalihokan didto maoy nakaingon sa pagkabilanggo ni Pablo ug Silas. (16:16-24) Sulod sa daghang mga adlaw gisunod-sunod sila sa usa ka dalagita nga adunay “usa ka demonyo sa pagpanag-an” (sa literal, “usa ka espiritu sa python o sawa”). Gisundog tingali sa demonyo ang Pythianhon nga Apollo, usa ka diyos nga ginaingong maoy mipatay sa bitin nga ginganlag pyʹthon. Ang dalagita hingsapian pag-ayo sa iyang mga agalon pinaagi sa pagpanag-an. Malagmit iya pang gisultihan ang mga mag-uuma kon kanus-a mananom, ang mga dalaga kon kanus-a mamana, ug mga tigmina kon asa mangalot ug bulawan! Iyang gisunod-sunod kanunay ang mga igsoon nga nagsinggit: “Kining mga tawhana maoy mga ulipon sa Labing Hataas nga Diyos, nga kaninyo nagamantala sa dalan sa kaluwasan.” Tingali gisugo siya sa demonyo sa pagsulti niini aron mopatim-aw nga ang iyang mga pagpanagna maoy dinasig sa Diyos, apan ang mga demonyo walay katungod sa paghimog mga proklamasyon mahitungod kang Jehova ug sa iyang tagana alang sa kaluwasan. Sa dihang gisamokan na si Pablo, iyang gipagawas ang demonyo pinaagi sa ngalan ni Jesus. Ang ilang negosyo nadaot, gitaral sa mga agalon sa dalagita si Pablo ug Silas ngadto sa taboanan, diin didto gibunalan sila. (2 Corinto 11:25) Dayon sila gibanlod sa bilanggoan ug ang ilang mga tiil gibutang diha sa mga sipohan. Kining mga gamita mapaangay aron malugos sa pagbika ang mga tiil, nga mohatag ug grabe nga kasakit.
7. Alang kang kinsa ug sa unsang paagi ang pagkabilanggo ni Pablo ug Silas sa Filipos misangpot ug mga panalangin?
7 Kini nga pagkabilanggo misangpot ug mga panalangin alang sa magbalantay sa bilanggoan ug sa tibuok niyang panimalay. (16:25-40) Sa pagkatungang-gabii si Pablo ug Silas nag-ampo ug nanagdayeg sa Diyos pinaagi sa alawiton, masaligon nga siya nagauban kanila. (Salmo 42:8) Sa kalit, naabli sa linog ang mga pultahan ug nangatangtang ang mga talikala sa dihang naibot ang mga sagbayan o mga bungbong. Ang magbalantay sa bilanggoan nahadlok sa pag-antos sa silot nga kamatayon tungod kay ang iyang mga binilanggo nakabuhi. Maghikog na unta siya apan si Pablo misinggit: “Ayaw buhatig daotan ang imong kaugalingon, kay ania ra kaming tanan!” Gidala si Pablo ug Silas sa gawas, ang magbalantay sa bilanggoan karon nangutana kon unsay buhaton niya aron maluwas. “Tumuo ka sa Ginoong Jesus,” mao ang tubag. Sa dihang nakadungog sa pulong ni Jehova, “siya ug ang iyang tibuok panimalay gibawtismohan nga walay langan.” Pagkadakong kalipay ang misangpot niadto!
8. Unsay gihimo sa sibil nga mga maghuhukom sa Filipos, ug unsa may lagmit makab-ot kon sila midawat pa sa ilang sala atubangan sa katilingban?
8 Sa pagkasunod adlaw, ang sibil nga mga maghuhukom nagpasugo sa pagbuhi kang Pablo ug Silas. Apan si Pablo miingon: ‘Kami nga mga tawong Romanhon, sa wala lamay husay, ilang gibunalan ug gibanlod sa bilanggoan. Ug karon ila ba lamang diay kaming buhian sa tago? Paanhia sila sa pagpagula kanamo.’ Kon dawaton sa mga maghuhukom nga nasayop sila sa atubangan sa katilingban, basin mosupak sila nga bunalan ug bilanggoon ang ubang mga Kristohanon. Wala makapagawas sa mga lungsoranong Romanhon, ang mga maghuhukom miabot ug mihangyo sa mga igsoon sa paggawas, apan migawas sila human nga nakadasig sa kaubang mga magtutuo. Ang maong interes karon maoy nagapalihok sa mga sakop sa Nagamandong Lawas ug sa ubang nagapanawng mga hawas sa pagduaw ug sa pagdasig sa katawhan sa Diyos sa tibuok yuta.
Ang Pulong ni Jehova Nagmadaogon sa Tesalonica ug Berea
9. Pinaagi sa unsang metodo, nga gigamit gihapon sa mga Saksi ni Jehova, nga si Pablo ‘nagpatin-aw ug nagpamatuod’ nga ang Mesiyas kinahanglang mag-antos ug mabanhaw gikan sa mga patay?
9 Ang pulong sa Diyos sunod nga nagmadaogon sa Tesalonica, ang kaulohan sa Macedonia ug mao ang labing dakong dunggoanan. (17:1-9) Didto si Pablo nangatarongan sa mga Hudiyo, “nagpatin-aw ug nagpamatuod” nga ang Mesiyas kinahanglang mag-antos ug mabanhaw gikan sa mga patay. (Kini gihimo ni Pablo pinaagi sa pagtandi sa mga tagna uban sa mga hitabo nga natuman, sama sa gihimo sa mga Saksi ni Jehova.) Busa, ang ubang mga Hudiyo, daghang mga kinabig, ug uban nangahimong mga magtutuo. Sa dihang ang nangasinang mga Hudiyo nagpormag maggubtanong mga panon ug kay wala makakita kang Pablo ug Silas, ilang gidala si Jason ug ubang mga igsoon ngadto sa mga punoan sa siyudad ug gipasakaan silag sumbong nga sedisyon, usa ka bakak nga sumbong nga gipunting batok sa mga katawhan ni Jehova. Apan, ang mga igsoon gibuhian human hatagi ug “igong piyansa.”
10. Sa unsa nga diwa nga ang mga Hudiyo sa Berea ‘mainampingong nagsusi’ sa Kasulatan?
10 Si Pablo ug Silas sunod miadto sa siyudad sa Berea. (17:10-15) Didto ang mga Hudiyo ‘mainampingong nagsusi’ sa Kasulatan, nga maoy ginadasig sa mga Saksi ni Jehova nga buhaton sa mga tawo karong adlawa. Kadto nga mga taga Berea wala magduhaduha kang Pablo apan misusi aron mapamatud-an nga si Jesus mao ang Mesiyas. Ang resulta? Daghang mga Hudiyo ug pipila ka Gresyanhon (tingali mga kinabig) nangahimong mga magtutuo. Sa dihang gisibaan sa mga Hudiyo nga gikan sa Tesalonica ang mga tawo, si Pablo giubanan sa mga igsoon sa paglakaw paingon sa dagat, diin ang uban niyang mga kauban tingali misakay ug barko padulong sa Piraeus (modernong-adlawng Piraiévs), ang dunggoanang siyudad sa Atenas.
Ang Pulong ni Jehova Nagmadaogon sa Atenas
11. (a) Sa unsang paagi nagpamatuod nga maisogon si Pablo sa Atenas, apan kinsa ang nakiglantugi kaniya? (b) Unsay gipasabot sa uban sa dihang naghisgot sila kang Pablo nga “tabian”?
11 Usa ka maisogong pagpamatuod ang gihatag sa Atenas. (17:16-21) Tungod sa mga pulong ni Pablo mahitungod kang Jesus ug sa pagkabanhaw, ang mga pilosopo nakiglantugi kaniya. Ang pipila maoy mga Epicureo, kinsa nagpasiugda sa kalingawan. Ang ubang maoy mga Stoico, nga nagpasiugda sa pagdisiplina sa kaugalingon. ‘Unsa man kahay isulti niining tawo nga tabian?’ nangutana ang uban. Ang “tawo nga tabian” (sa literal, “tigtuka ug liso”) nagkahulogan nga si Pablo sama rag usa ka langgam nga nagapamunit ug mga liso ug naghatag ug ginagmay nga kahibalo apan kulang sa kaalam. Ang uban miingon: “Kini siya daw usa ka tigmantalag mga diyos nga dumuloong.” Seryoso kini, kay si Socrates napildihan sa iyang kinabuhi tungod sa maong sumbong. Wala magdugay si Pablo gidala ngadto sa Areopago (Mars’ Hill), tingali sa hukmanan nga anaa sa gawas sa natad magtigom duol sa Acropolis.
12. (a) Unsang mga bahin sa maayong pakigpulong sa publiko ang matin-aw diha sa pakigpulong ni Pablo sa Areopago? (b) Unsang mga punto ang gipahayag ni Pablo mahitungod sa Diyos, ug unsa ang mga resulta?
12 Ang pakigpulong ni Pablo sa Areopago maoy maayo kaayong pananglitan sa pagkaadunay epektibong introduksiyon, lohikong kahan-ayan, ug makapakombinsir nga argumento—sumala sa ginatudlo diha sa Tunghaan sa Teokratikanhong Ministeryo sa mga Saksi ni Jehova. (17:22-34) Siya miingon ang mga taga Atenas mas relihiyoso kay sa uban. Gani, sila adunay usa ka halaran “Alang sa Diyos nga Wala-hiilhi,” tingali aron dili masilo ang mga diyos! Mihatag ug pakigpulong si Pablo bahin sa Maglalalang nga “nagbuhat sa tanang nasod sa katawhan” ug “nagtakda ug tinudlong panahon ug nagbutang ug mga utlanan sa mga dapit nga gipuy-an sa mga tawo,” sama sa kon kanus-a lukaon ang mga Canaanhon. (Genesis 15:13-21; Daniel 2:21; 7:12) Kini nga Diyos makaplagan, “kay kita iyang mga kaliwat,” miingon si Pablo, nga naghisgot sa paglalang ni Jehova sa tawo ug nagkutlo sa ilang mga magbabalak nga si Aratus ug Cleanthes. Ingong kaliwat sa Diyos, dili gayod kita angay maghunahuna nga ang hingpit nga Maglalalang maoy sama sa usa ka idolo nga hinimo sa dili-hingpit nga tawo. Gipalabay sa Diyos kas-a ang pagkawalay-hibangkaagan apan karon nagsugo sa mga tawo sa paghinulsol, kay siya nakatakda na ug adlaw sa paghukom sa mga tawo pinaagi sa iyang Tinudlo. Sanglit si Pablo “nagamantala sa maayong balita mahitungod kang Jesus,” ang iyang mga mamiminaw nahibalo nga si Kristo mao ang iyang gipasabot nga mao ang Maghuhukom. (Buhat 17:18; Juan 5:22, 30) Nasuko ang mga Epicureo sa dihang gihisgotan ang paghinulsol, ug ang mga pilosopong Gresyanhon modawat ug mga pahayag bahin sa pagkadili-mamatay apan dili bahin sa kamatayon ug pagkabanhaw. Tingali, sama sa kadaghanan karon nga dili interesado sa maayong balita, ang uban miingon: ‘Maminaw ra kami kanimo sa sunod higayon.’ Apan ang maghuhukom nga si Dionisio ug ang uban nahimong mga magtutuo.
Ang Pulong sa Diyos Nagmadaogon sa Corinto
13. Sa unsang paagi gisustentohan ni Pablo ang iyang kaugalingon diha sa ministeryo, ug unsang modernong-adlawng kasamahan ang atong makaplagan?
13 Si Pablo miadto sa Corinto, ang kaulohan sa lalawigan sa Acaya. (18:1-11) Didto iyang gikahibalag si Aquila ug Priscila, kinsa miadto didto sa dihang gimandoan ni Claudio Cesar ang mga Hudiyo nga dili mga Romanhong lungsoranon sa pagpahawa sa Roma. Aron masustentohan ang iyang kaugalingon diha sa ministeryo, si Pablo namuhat ug mga tolda uban niining Kristohanong magtiayon. (1 Corinto 16:19; 2 Corinto 11:9) Mabudlay ang trabaho sa pagtabas ug pagtahi sa gahi nga panapton sa may balhibong panit sa kanding. Sa susama, ang mga Saksi ni Jehova nagatagana sa ilang materyal nga mga panginahanglan pinaagi sa sekular nga trabaho, apan ang ilang bokasyon mao ang ministeryo.
14. (a) Nag-atubang kanunay ug pagbatok sa mga Hudiyo sa Corinto, unsay gibuhat ni Pablo? (b) Sa unsang paagi gipasaligan si Pablo nga siya kinahanglang magpabilin sa Corinto, apan sa unsang paagi ang mga katawhan ni Jehova gitultolan karong adlawa?
14 Ang mga Hudiyo sa Corinto nagsige ug pasipala samtang gimantala ni Pablo ang Pagka-Mesiyas ni Jesus. Busa iyang giyabyab ang iyang sapot aron siya walay responsabilidad kanila ug gisugdan ang mga tigom diha sa balay ni Ticio Justo, nga tingali usa ka Romano. Daghan (apil ang nagadumalang punoan niadto sa sinagoga nga si Crispo ug ang tibuok niyang panimalay) nahimong bawtismadong mga magtutuo. Kon ang pagbatok sa Hudiyo nakapaduhaduha kang Pablo sa pagpabilin sa Corinto, ang pagduhaduha nawala sa dihang gisultihan siya sa Ginoo diha sa panan-awon: ‘Ayaw kahadlok. Padayon sa pagsulti, kay ako magauban kanimo ug walay tawo ang modaot kanimo. Kay daghan ang akong mga tawo niining siyudara.’ Busa si Pablo mipadayon sa pagtudlo sa pulong sa Diyos didto, sulod sa usa ka tuig ug unom ka bulan. Bisag ang mga katawhan ni Jehova wala nay madawat nga mga panan-awon, ang pag-ampo ug pagtultol pinaagi sa balaang espiritu nagatabang kanila sa paghimog samang maalamong mga desisyon may labot sa intereses sa Gingharian.
15. Unsay nahitabo sa dihang gidala si Pablo sa atubangan ni Gobernador Gallio?
15 Gidala sa mga Hudiyo si Pablo sa Gobernador nga si Junius Gallio. (18:12-17) Sila naghisgot nga nagapangabig si Pablo nga supak sa balaod—usa ka bakak nga sumbong nga gihimo karon sa mga klerigo batok sa mga Saksi ni Jehova. Si Gallio nahibalo nga dili sad-an si Pablo sa pagkatampalasan ug nga ang mga Hudiyo walay pagtagad sa kaayohan sa Roma ug sa mga balaod niini, busa iyang giabog sila. Sa dihang gibunalan sa mga tumatan-aw si Sostenes, ang bag-ong nagadumalang opisyal sa sinagoga, si Gallio wala mangilabot, tingali naghunahuna nga ang lider sa pagpukaw sa mga tawo sa kasuko batok kang Pablo nakadawat sa balos nga angay kaniya.
16. Nganong walay daotan sa pagpaputol ni Pablo sa iyang buhok may kalabotan sa usa ka panaad?
16 Milawig si Pablo gikan sa Aegeanhong dunggoanan sa Cencrea ngadto sa Efeso, usa ka siyudad sa Asia Minor. (18:18-22) Una pa niadtong biyahea ‘iyang giputlan ang iyang buhok, tungod sa usa ka panaad.’ Wala ipadayag kon si Pablo mihimo bag panaad sa wala pa mahimong sumusunod ni Jesus o kon kini ba maoy pagsugod o kataposan sa yugto sa panaad. Ang mga Kristohanon wala mailalom sa Kasugoan, apan kadto maoy hinatag-sa-Diyos ug balaan, ug walay daotan bahin niadto nga panaad. (Roma 6:14; 7:6, 12; Galacia 5:18) Diha sa Efeso, nangatarongan si Pablo uban sa mga Hudiyo, nagsaad nga mobalik kon kabubut-on sa Diyos. (Kana nga saad natuman sa ulahi.) Ang iyang pagbalik sa Antioquia sa Syria maoy nagtapos sa iyang ikaduhang misyonaryong panaw.
Ang Pulong ni Jehova Nagmadaogon sa Efeso
17. Mahitungod sa bawtismo, unsang instruksiyon ang gikinahanglan ni Apolo ug sa uban?
17 Wala magdugay gisugdan ni Pablo ang iyang ikatulong misyonaryong panaw (s. 52-56 K.P.). (18:23–19:7) Kasamtangan sa Efeso, si Apolos nagtudlo mahitungod kang Jesus apan nahibalo lamang bahin sa bawtismo ni Juan ingong simbolo sa paghinulsol sa mga kasal-anan batok sa pakigtugon sa Kasugoan. Si Priscila ug Aquila maoy “misaysay sa dalan sa Diyos sa labi pang sibo gayod,” tingali nagpatin-aw nga ang pagkahimong bawtismado sama kang Jesus nag-apil sa pagpatuslob sa tawo sa tubig ug sa pagdawat sa pagbubo sa balaang espiritu. Human nga nabawtismohan sa balaang espiritu nga nahitabo sa Pentekostes 33 K.P., ang bisan kinsa nga nabawtismohan sa bawtismo ni Juan nagkinahanglan nga bawtismohan pag-usab pinaagi sa ngalan ni Jesus. (Mateo 3:11, 16; Buhat 2:38) Sa ulahi didto sa Efeso, hapit 12 ka Hudiyohanong mga lalaki nga gibawtismohan sa bawtismo ni Juan “nagpabawtismo sa ngalan sa Ginoong Jesus” diha sa bugtong pagbawtismo pag-usab nga narekord sa Kasulatan. Sa dihang gipandongan sila sa mga kamot ni Pablo, sila nakadawat sa balaang espiritu ug duha ka milagrosong mga timailhan sa langitnong pagdawat—nanagpanulti sa laing mga pinulongan ug nanaghimog mga propesiya.
18. Diin nagpamatuod si Pablo samtang didto sa Efeso, ug uban sa unsang mga resulta?
18 Si Pablo dayag nga puliki kaayo sa Efeso, usa ka siyudad adunay duolan sa 300,000 ka molupyo. (19:8-10) Ang templo niini sa diyosa nga si Artemis maoy usa sa pito ka katingalahan sa karaang kalibotan, ug ang teyatro niini makapalingkod ug 25,000. Diha sa sinagoga, si Pablo ‘migamit ug kusog nga pagkabig’ pinaagi sa pagpresentar ug makapakombinsir nga mga argumento apan mibiya sa dihang may mipasipala bahin sa Ang Dalan, o paagi sa kinabuhi pinasukad sa pagtuo kang Kristo. Sulod sa duha ka tuig, si Pablo nagpakigpulong sa adlaw-adlaw diha sa awditoryom sa eskuylahan sa Tirano, ug “ang pulong” mikaylap sa tibuok distrito sa Asia.
19. Unsay nahitabo sa Efeso nga nagpahinabo nga ang ‘pulong ni Jehova mikaylap ug nagmadaogon’ didto?
19 Ang Diyos nagpakitag pag-uyon sa kalihokan ni Pablo pinaagi sa paghimo kaniya sa pag-ayo sa sakit ug sa pagpagawas ug mga demonyo. (19:11-20) Apan ang pito ka anak sa labawng saserdote nga si Esceva wala makapagawas ug demonyo pinaagi sa paggamit sa ngalan ni Jesus tungod kay sila wala maghawas sa Diyos ug kang Kristo. Sila gisamaran pa gani sa tawo nga gidemonyohan! Kini nakapahadlok sa mga tawo, ug “ang ngalan sa Ginoong Jesus nabayaw.” Daghan sa nangahimong mga magtutuo misalikway sa mga buhat sa okulto ug gisunog nila sa atubangan sa publiko ang mga libro nga tingali may mga orasyon ug madyik nga mga pormula. “Busa,” misulat si Lucas, “sa gamhanang paagi ang pulong ni Jehova mikaylap ug nagmadaogon.” Karong adlawa, usab, ang mga alagad sa Diyos nagatabang sa pagpagawas sa mga tawo gikan sa demonismo.—Deuteronomio 18:10-12.
Relihiyosong Pagpihig Dili Molampos
20. Nganong ang mga platiro sa Efeso nagpukaw ug kagubot, ug sa unsang paagi kini gitapos?
20 Ang mga Saksi ni Jehova kanunay nagaatubang ug maggubtanong mga panon, ug maingon man ang mga Kristohanon sa Efeso. (19:21-41) Sa midaghan ang mga magtutuo, migamay ang kita ni Demetrio ug ubang mga platiro tungod kay diyutay na lamang ang nagdala sa ilang platang mga halaran sa daghag-suso nga diyosa sa pertilidad nga si Artemis. Gihulhogan ni Demetrio, gitaral sa maggubtanong mga panon ang mga kauban ni Pablo nga si Gayo ug Aristarco ngadto sa teyatro, apan wala tugoti sa mga tinu-an si Pablo sa pagsulod. Bisan ang ubang mga tinugyanan sa mga piyesta ug sa mga dula mihangyo nga dili siya angay mangarisgo. Sulod sa duha ka oras, ang maggubtanong mga panon nanagsinggit: “Dako si Artemis sa mga taga Efeso!” Sa kataposan, ang tigsulat sa siyudad (nga maoy nangulo sa munisipal nga kagamhanan) miingon nga ang mga mananalsal makapasaka ug mga sumbong diha sa gobernador sa lalawigan, nga awtorisado sa pagpakanaog ug hukom, o ang ilang kaso mahimong deisyonan diha sa “nabatasang katigoman” sa mga lungsoranon. Kay kon dili, ang Roma makapasakag sumbong batok niining wala-mabatasanng katigoman ug panggubot. Ug niana, iyang gipapauli ang mga tawo.
21. Sa unsang paagi gipanalanginan sa Diyos ang buluhaton ni Pablo, ug sa unsang paagi iyang gipanalanginan ang mga Saksi ni Jehova karong adlawa?
21 Gitabangan sa Diyos si Pablo sa pag-atubang ug nagkalainlaing mga pagsulay ug gipanalanginan ang iyang mga paningkamot sa pagtabang sa mga tawo sa pagsalikway sa relihiyosong kasaypanan ug sa pagdawat sa kamatuoran. (Itandi ang Jeremias 1:9, 10.) Pagkadako sa atong pasalamat nga ang atong langitnong Amahan sa susama nagapanalangin sa atong buluhaton! Busa, karon sama sa unang siglo, ‘ang pulong ni Jehova mikaylap ug nagmadaogon.’
Unsaon Nimo sa Pagtubag?
◻ Unsang pananglitan ang gihatag ni Pablo sa pagdawat sa pagtultol sa balaang espiritu?
◻ Pinaagi sa unsang metodo, nga gigamit gihapon sa mga alagad ni Jehova, nga si Pablo ‘nagpatin-aw ug nagpamatuod’ sa mga butang?
◻ Unsang kasamahan ang makita diha sa mga pagsanong sa pakigpulong ni Pablo sa Areopago ug sa pagsangyaw sa mga Saksi ni Jehova?
◻ Sa unsang paagi gisustentohan ni Pablo ang iyang kaugalingon diha sa ministeryo, ug unsang modernong-adlawng kasamahan niini?
◻ Sama sa iyang gihimo sa buluhaton ni Pablo, sa unsang paagi gipanalanginan sa Diyos ang buluhaton sa mga Saksi ni Jehova karong adlawa?
[Mga hulagway sa panid 16, 17]
Ang pulong ni Jehova nagmadaogon sa
1. Filipos
2. ug 3. Atenas
4. ug 6. Efeso
5. Roma
[Credit Line]
Photo No. 4: Manley Studios