Pagluwas sa Yuta Gikan sa Kalaglagan

KAS-A kanhi sa kasaysayan sa tawo, ang yuta giluwas sa Diyos gikan sa pagkalaglag diha sa mga kamot sa mga tawo. Iyang gihimo kana pinaagig tibuok-yutang lunop sa mga adlaw ni Noe. Kita walay rekord nga gilaglag sa mga tawo ang pisikal nga silinganan niadto. Apan ang yuta gilaglag sa hilabihan sa laing paagi nga gibati sa Diyos ang panginahanglan sa paglihok uban sa tumang kabangis.

Ang Bibliya nagtaho: “Ang yuta nadaot sa panan-aw sa matuod nga Diyos ug ang yuta napuno sa kabangisan. Busa nakita sa Diyos ang yuta ug, tan-awa! kana nadaot, kay ang tanan nga unod nagdaot sa iyang dalan sa ibabaw sa yuta.” (Genesis 6:4, 11, 12) Oo, sa adlaw ni Noe giisip sa Diyos ang yuta ingong nadaot tungod sa kabangisan ug pagkadaotan sa katawhan.

Sa susama, sa misugod ang Israel sa pagsakop sa Yutang Saad, ang Diyos nagpasidaan: “Dili ninyo paghugawan ang yuta nga inyong gipuy-an; tungod kay ang dugo mao ang nagahugaw sa yuta . . . ug dili ninyo pagahugawan ang yuta.” (Numeros 35:33, 34) Busa, ang Canaan nahugawan tungod sa pagkasad-an sa dugo sa mga pumuluyo niini. Ang usa ka makalilisang nga pananglitan niini mao ang ilang batasan sa paghalad sa ilang mga anak ngadto sa ilang mga diyos.

Ang mga Canaanhon hilabihan ka mahilayon, ug kini nakaapektar usab sa pag-isip sa Diyos sa yuta. Mipasidaan siya sa Israel: “Ayaw himoa ang inyong kaugalingon nga mahugaw tungod sa bisan hain sa maong [mahilayong mga buhat], tungod kay niining tanan nga butang ang kanasoran nga akong ginapapahawa gikan sa inyong atubangan naghimo sa ilang kaugalingon nga mahugaw. Busa ang yuta mahugaw, ug . . . igasuka sa yuta ang iyang mga pumuluyo.” (Levitico 18:24, 25) Ang kahilayan o imoralidad ug pag-ulag dugo nagdaot sa Canaan sa hilabihan nga gilaglag sa Diyos ang Canaanhong mga nasod.

Ang Paglaglag sa Yuta

Komosta man karong adlawa? Wala ba usab kita magpuyo sa usa ka panahon sa dili-mapugngang kabangisan, pag-ulag-dugo, ug imoralidad? Bisan kon unsay ginabuhat sa tawo sa pagsulay sa pagtul-id sa kadaotan nga iyang nabuhat sa pisikal nga yuta, siya dili gayod makapasig-uli sa kinabuhi sa gikalkulong usa ka gatos ka milyon nga nangamatay sa iyang mga gubat niining sigloha; ni siya makapasig-uli sa minilyong gipatay sa mga kriminal o sa dimaihap makapasubong mga biktima nga namatay sa gutom. Sa pagkamatuod, dili siya makapasig-uli sa gikalkulong 40 ngadto 60 milyong wala-pa-matawong mga bata kansang mga kinabuhi gitapos sa aborsiyon kada tuig. Makaduhaduha ba kita nga ang yuta ginalaglag sa panan-aw sa Diyos sa maong mga butang—nga dili hisgotan ang kahilayan nga kaylap kaayo karong adlawa?

Ang salabotan nagatug-an kanato nga ang Diyos molihok na sa dili madugay sa pagluwas sa yuta gikan sa malaglagong mga kalihokan sa tawo, ug ang tagna sa Bibliya nagapamatuod niini. Apan unsay iyang pagabuhaton? Ang Bibliya nagaingon nga iyang “pagalaglagon kadtong nagalaglag sa yuta.” (Pinadayag 11:18; itandi ang Mateo 24:3-14.) Maingon nga ang usa ka tag-iyag-balay magpalagpot sa usa ka nag-abang nga madaoton, busa ang Diyos “magpalagpot” niadtong nagalaglag sa iyang matahom nga linalang, ang yuta.

Ang Bibliya nagaingon: “Mahitungod sa mga daotan, sila pagaputlon gikan sa yuta mismo; mahitungod sa mga maluibon, sila pagalangkaton gikan niini.” (Proverbio 2:22) Kining umaabot balaang aksiyon ginatawag sa Bibliya nga Armageddon. (Pinadayag 16:16) Gitawag usab kini ni Jesus “dakong kasakitan nga wala pa sukad mahitabo sukad sa sinugdanan sa kalibotan hangtod karon, dili, ni mahitabo pa kini pag-usab.” (Mateo 24:21) Kini unya mas dako pa kay sa Lunop.

Kini ba hinobra o dimakataronganong solusyon? Dili, ang Diyos, ingong Maglalalang sa yuta, may katungod sa paghukom kon kinsay mopuyo niini. Siya may katungod usab nga papanubagon ang tawo sa iyang mga lihok. Dugang pa, kon tugotan sa Diyos nga magpadayon ang tawo sa iyang dalan nga dili masumpo, ang yuta malaglag alang sa tanan, ug ang kinabuhi mahimong dili na maantos. Sa laing bahin, pinaagi sa ‘paglaglag niadtong nagalaglag sa yuta,’ preserbahon sa Diyos ang atong yutan-ong kabilin alang sa mga mapabilhon. Ang Bibliya nagasaad: “Kay ang mga matarong mao ang mopuyo sa yuta, ug ang mga walay-ikasaway mao ang magapabilin ibabaw niini.”—Proverbio 2:21.

Uban sa tabang sa Diyos, ang minilyon nakakaplag sa kusog sa pagpakita nga sila walay ikasaway tungod kay buot nilang mabilin aron pahimuslan ang kalalangan sa Diyos. Nagasunod usab sila sa hataas moral nga mga sukdanan sa Diyos ug nagalikay sa kabangisan ug pagkasad-an sa dugo bisan sa dili laktud nga paagi. Busa, sila dili mga manlalaglag sa yuta niining hinungdanong diwa.

Usa ka Yuta nga Naluwas Gikan sa Kalaglagan

Ang maong mga tawo karon may makalipayng kalaoman nga makitang ang yuta mabalhin gikan sa daot nga kahimtang niini karon ngadto sa usa ka makapahimsog nga paraiso. Aw, bisan ang ilang mga lawas magmahinlo, nga malimpiyohan sa makadaot nga mga epekto sa sala. Ang kataposang basahon sa Bibliya nagabatbat sa tagana sa Diyos sa paghimo niining tanan nga posible ingong simbolikong “suba sa tubig sa kinabuhi.” Sa matag kiliran niining subaa, “adunay mga kahoy sa kinabuhi nga nagabunga sa napulog-duha ka abot sa bunga, nga nagahatag sa ilang bunga sa matag bulan. Ug ang mga dahon sa kakahoyan maoy alang sa pagpang-ayo sa kanasoran.”—Pinadayag 22:1, 2.

Kining dinasig nga panan-awon maoy usa ka garantiya nga luwason sa Diyos ang yuta ug ang tawo ibabaw niini gikan sa kalaglagan. Ang ubang mga tagna nagahatag abanteng pagtan-aw sa maong napasig-uling yuta. Tagda, pananglitan ang balaknong abanteng paglantaw: “Ang kamingawan ug ang mamalang yuta magmasadya, ug ang desyertong kapatagan magmaya ug mamulak sama sa rosas. Sa walay pakyas kini mamulak, ug kini magsadya gayod uban ang kasadya ug pag-awit.” (Isaias 35:1, 2) Sa maong panahon wala na unyay nahugawang kadagatan, nadaot nga ibabaw nga yuta, o nahiloang atmospera.

Labing hinungdanon, ang yuta dili malaglag pinaagi sa kabangisan, pag-ulag dugo, o imoralidad. Kadto lamang nagatahod sa Diyos, sa iyang mga sukdanan, ug iyang kalalangan ang atua unya didto. (Pinadayag 21:7, 8) Pamati karon sa mahimayaong mga sangpotanan niining tanan nga butang: “[Ang Diyos] magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na. . . . ‘Tan-awa! Ginabag-o ko ang tanang butang.’”—Pinadayag 21:4, 5.

Pagkamalipayong sangpotanan! Pagkamalipayon nato nga ang Diyos sa dili madugay “magalaglag niadtong nagalaglag sa yuta”! Ug matandog kaayo kita sa maong dinasig nga mga saad sa pagtinguha nga moalagad sa Diyos nga magaluwas sa yuta gikan sa kalaglagan ug himoon kining usa ka paraisonhong puy-anan alang sa matarong-ug-kasingkasing nga katawhan!

[Blurb sa panid 6]

Ang Bibliya nagaingon nga ang Diyos “magalaglag niadtong nagalaglag sa yuta.”—Pinadayag 11:18