Gipabilhan ba Nimo ang Nahimo sa Diyos?
“Kon adunay buot mosunod kanako, kinahanglang magdumili siya sa iyang kaugalingon ug magpas-an sa iyang kahoy sa pagsakit matag adlaw ug magasunod kanako sa kanunay.”—LUCAS 9:23.
1. Unsa ang pipila sa kahibulongang mga gasa nga gitagana sa Diyos?
NAUTANG nato sa Diyos ang atong mga kinabuhi. Kon wala pa siya maglalang sa mga tawo, dili gayod unta kita mangatawo. Apan labaw pa sa kinabuhi ang gilalang sa Diyos. Kita iyang gibuhat aron magkalipay kita sa daghang butang: ang kalami sa pagkaon, ang kainit sa kahayag sa adlaw, ang tingog sa musika, ang kalab-as sa usa ka adlaw sa tingpamulak, ang kalumo sa gugma. Labaw pa gayod, gihatagan kita sa Diyos sa kaisipan ug sa tinguhang makakat-on bahin kaniya. Siya nag-inspirar sa Bibliya, nga nagahatag kanatog maayong giya, nga nagapakita kanato kon unsaon sa pagkinabuhi sa labi pang malipayong mga kinabuhi, ug gitagana ang paglaom nga mabuhing walay kataposan diha sa iyang matarong nga bag-ong kalibotan. Gitagana usab sa Diyos ang iyang balaang espiritu, pagpaluyo sa lokal nga kongregasyon, ug mahigugmaong tigulang mga lalaki ug mga babaye nga makatabang nato sa pagpabiling lig-on diha sa iyang pag-alagad.—Genesis 1:1, 26-28; 2 Timoteo 3:15-17; Hebreohanon 10:24, 25; Santiago 5:14, 15.
2. (a) Unsa ang labing talagsaong butang ang nahimo sa Diyos alang kanato? (b) Mahagoan ba nato ang kaluwasan pinaagi sa mga binuhatan?
2 Dugang pa nianang tanan, gipadala sa Diyos ang bugtong niyang panganay nga Anak aron isugilon ang dugang pa kon unsay gidahom kanato sa Amahan ug sa pagtagana sa “kagawasan pinaagi sa lukat” alang sa tanan nga modawat niini. (Efeso 1:7; Roma 5:18) Ang maong anak, si Jesu-Kristo, miingon: “Gihigugma pag-ayo sa Diyos ang kalibotan, nga iyang gihatag ang iyang bugtong nga Anak, aron nga si bisan kinsa nga motuo kaniya dili mamatay, kondili makabaton ug kinabuhing walay kataposan.” (Juan 3:16, King James Version) Ang kaluwasan nga naposible tungod sa maong lukat may kinalabwang bili nga bug-os walay paagi nga si bisan kinsa may mahimo aron mahagoan kana, tinong dili pinaagig mga buhat nga sa nangagi gibuhat ubos sa Moisesnong Kasugoan. Busa, si Pablo misulat: “Ang usa ka tawo gipahayag nga matarong, dili tungod sa mga buhat sa kasugoan, apan pinaagi lamang sa pagtuo kang Kristo Jesus.”—Galacia 2:16; Roma 3:20-24.
Pagtuo ug mga Binuhatan
3. Unsay giingon ni Santiago mahitungod sa pagtuo ug sa mga binuhatan?
3 Ang kaluwasan moabot pinaagi sa pagtuo, apan ang pagtuo ug pagpabili sa tanan nga nahimo sa Diyos magadasig nato sa paglihok. Kini magadasig kanato sa pagbuhat sa mga butang nga nagapadayag sa atong pagtuo. Ang igsoon ni Jesus sa inahan nga si Santiago misulat: “Ang pagtuo, kon kini walay mga binuhatan, patay sa kaugalingon.” Siya dugang miingon: “Ipakita kanako ang imong pagtuo nga walay mga binuhatan, ug ipakita ko kanimo ang akong pagtuo pinaagi sa akong mga binuhatan.” Mipunting si Santiago nga bisan ang mga demonyo “nagtuo ug nagapangurog,” apan dayag ang mga demonyo wala magbuhat sa diyosnong mga binuhatan. Si Abraham, sa laing bahin, may pagtuo ug mga binuhatan. “Ang iyang pagtuo miduyog sa iyang mga binuhatan ug pinaagi sa iyang mga binuhatan ang iyang pagtuo nahingpit.” Si Santiago misubli: “Ang pagtuo nga walay mga binuhatan maoy patay.”—Santiago 2:17-26.
4. Unsay giingon ni Jesus nga pagabuhaton niadtong buot mosunod kaniya?
4 Gipakita usab ni Jesus ang kahinungdanon sa matarong nga mga binuhatan, nga miingon: “Ipasidlak ninyo ang inyong kahayag sa atubangan sa mga tawo, aron sila makakita sa inyong maayong mga binuhatan ug magahatag ug himaya sa inyong Amahan nga anaa sa mga langit.” “Kon adunay buot mosunod kanako, kinahanglang magdumili siya sa iyang kaugalingon ug magapas-an sa iyang kahoy sa pagsakit sa matag adlaw ug magasunod kanako sa kanunay.”a Kon kita “magadumili” sa atong kaugalingon, atong biyaan ang daghan sa atong personal nga mga gusto. Giila nato nga nautang nato ang tanang butang sa Diyos, mao nga ginatugyan nato ang atong kaugalingon ngadto kaniya ingong iyang mga ulipon, nga matinguhaon sa pagkat-on ug pagbuhat sa iyang kabubut-on, sama sa gibuhat ni Jesus.—Mateo 5:16; Lucas 9:23; Juan 6:38.
Apektado ang mga Kinabuhi
5. (a) Unsay gipakita ni Pedro nga angay mag-apektar sa atong tibuok nga dalan sa kinabuhi? (b) Unsang maayong mga binuhatan ang iyang girekomendar?
5 Si Pedro mipunting nga ang “bililhong dugo” ni Kristo, nga gihatag alang kanato, may kinalabwang bili nga ang atong pagpabili niini angay madayag sa tibuok natong dalan sa kinabuhi. Gilista sa apostol ang daghang butang nga pagabuhaton nato tungod sa atong pagpabili. Siya mitambag: “Ihiklin ninyo ang tanang pagkadaotan.” “Ugmara ninyo ang pangandoy alang sa gatas nga walay sambog nga iya sa pulong.” “Ipahayag sa halayo ang mga kahalangdon sa usa nga nagtawag kaninyo gikan sa kangitngitan ngadto sa iyang kahibulongang kahayag.” “Magpahilayo kamo sa daotan ug buhata ang maayo.” “Himoa ninyo ang pagpanalipod atubangan sa matag usa nga mangayo kaninyo sa katarongan tungod sa paglaom nga anaa kaninyo.” “Pagkinabuhi kamo sa nahibilin [ninyong] panahon diha sa unod, dili na alang sa mga pangibog sa mga tawo, kondili alang sa kabubut-on sa Diyos.”—1 Pedro 1:19; 2:1, 2, 9; 3:11, 15; 4:2.
6. (a) Giunsa sa pagpasundayag sa unang-siglong mga Kristohanon ang ilang pagtuo? (b) Unsang panig-ingnan ang ginahatag niini alang kanato?
6 Ang unang-siglong mga Kristohanon nagkinabuhi sa ilang pagtuo. Kadto nagbag-o sa ilang panglantaw ug ilang mga personalidad, nga nagpalihok kanila nga ipahiuyon ang ilang mga kinabuhi sa kabubut-on sa Diyos. Naagoman nila ang pagkadistiyero, mga pagbato, mga pagbunal, pagkabilanggo, ug bisan kamatayon inay lapason ang ilang pagtuo. (Buhat 7:58-60; 8:1; 14:19; 16:22; 1 Corinto 6:9-11; Efeso 4:22-24; Colosas 4:3; Filemon 9, 10) Ang iladong Romanong historyano si Tacitus, nga natawo sa mga 56 K.P., nag-ingon nga ang mga Kristohanon “gihukman ngadto sa mga kalayo ug gisunog, sa pagsilbing suga sa magabii, sa dihang ang kahayag sa adlaw nahanaw.” Bisan pa niana sila wala matarog!—The Annals, Basahon XV, parapo 44.
7. Sa unsang kahimtang nahimutang ang pipila ka tawo?
7 Sa pila ka kongregasyon inyo tingaling makaplagan ang mga tawo nga nagtambong sa mga tigom sa daghang katuigan. Sila nakaangay sa organisasyon ni Jehova, naghunahuna nga ang iyang katawhan mao ang labing maayong mga tawo nga sukad ilang nahibalag, nagapahayag ug maayong mga komento sa kamatuoran, ug nagalaban sa kamatuoran atubangan sa mga tagagawas. Apan may nakababag kanila, butang nga nagapugong kanila. Wala gayod sila mohimo sa maayong lakang nga gihimo sa 3,000 sa adlaw sa Pentekostes, nga gisukna sa matinuohon nga Etiopianhon, o giaghat ni Ananias nga himoon ni Saulo sa dihang naamgohan nianang kanhing maglulutos nga si Jesus mao gayod ang Mesiyas. (Buhat 2:41; 8:36; 22:16) Unsay nakulang sa maong mga tawo karong adlawa? Nganong wala sila mokuha sa lakang nga ginatawag sa Bibliya “ang hangyo nga pagahimoon ngadto sa Diyos alang sa usa ka mahinlong tanlag”? (1 Pedro 3:21) Kon ikaw anaa niining kahimtanga—nahibalo sa kamatuoran apan nagapanuko nga may buhaton bahin niini—isipa kining artikuloha ingong giandam tungod sa espesyal nga gugma alang kaninyo.
Pagbuntog sa mga Kababagan sa Bawtismo
8. Kon ikaw dili maayong tigtuon, unsang maalamong dalan ang pagasundon karon?
8 Unsay nakababag kanimo? Gipakita sa nag-unang artikulo nga ang pipila tingali malisdan sa personal nga pagtuon. Ang Diyos naghatag kanatog kahibulongang mga kaisipan, ug siya nagadahom nga atong gamiton kini sa pag-alagad kaniya. Ang pila ka tawo nga wala gani makakat-on sa pagbasa nagkugi sa pagtuon sa pagbasa aron makakat-on ug dugang bahin sa Diyos ug sa iyang mga katuyoan. Komosta ka ba? Kon ikaw mahibalo nang mobasa, ikaw ba tinuod nga nagatuon, sama sa gihimo sa mga taga-Berea, “nga nagasusi nga mabinantayon sa Kasulatan sa matag adlaw” sa pagsusi kon matuod ba kining mga butanga? Nakatugkad ka ba sa “gibag-on ug gitas-on ug gihabogon ug giladmon” sa kamatuoran? Nakakutkot ka ba nga may igong kalalom sa Pulong sa Diyos? Nadiskobrehan mo ba kon unsa ka makapaukyab kini? Nakaugmad ka ba sa tinuod nga tinguha sa pagkahibalo sa kabubut-on sa Diyos? Ikaw ba may tinuod nga kagutom sa kamatuoran?—Buhat 17:10, 11; Efeso 3:18.
9. Unsang matarong butang nga buhaton kon ikaw may problema batok sa lain diha sa kongregasyon?
9 Usahay ang mga tawo nagapugong tungod sa tinuod o gihanduraw nga problemang ilang nabatonan batok sa usa diha sa kongregasyon. May nakapasilo ba kanimo nga grabe? Nan sunda ang lagda nga gipaila sa mga pulong ni Jesus: “Lakaw ug ipadayag ang iyang sayop tali kanimo ug kaniya lamang.” (Mateo 18:15) Tingali ikaw mahingangha sa pagkadiskobreng ang tawo basin wala gani masayod nga ikaw nasilo. Apan bisan pag siya nasayod, basin imo gihapong ‘maangkon ang imong igsoon,’ sumala sa giingon ni Jesus. Tingali imo pa siyang matabangan sa paglikay sa pagpandol sa lain. Dugang pa, sa diha nga ikaw mamalandong niana, kinsa ba diay ang tinuod mong gialagaran—kanang tawhana o ang Diyos? Ang imo bang gugma sa Diyos gamay kaayo nga itugot nimong ang sayop sa dili-hingpit nga tawo mobalda sa imong paghigugma Kaniya?
10, 11. Unsay angay nimong buhaton kon ang usa ka tinagoang sala nagapugong kanimo?
10 Ang tinagoang sala basin magapugong sa usa ka tawo sa pagpabawtismo. Kini mahimong butang nga nahitabo sa nangagi, o basin kini nagapadayon nga daotang sumbanan. Kon kini usa ka suliran alang kanimo, dili ba panahon sa pagtul-id niana? (1 Corinto 7:29-31) Daghan sa katawhan ni Jehova ang kinahanglang mohimog mga kausaban sa ilang mga kinabuhi. Ang Bibliya nagaingon: “Busa, paghinulsol kamo ug pagbag-o aron ang inyong mga sala mapapas, aron ang mga panahon sa kahayahay moabot gikan kang Jehova.”—Buhat 3:19.
11 Bisan pag unsay imong nahimo sa nangagi, ikaw makahinulsol, makabag-o, ug makapangayo sa kapasayloan sa Diyos. “Busa, patya ninyo ang mga sangkap sa inyong lawas nga anaa sa yuta kon bahin sa pakighilawas, kahugawan, gana sa sekso, daotang pangibog . . . Hukasa ninyo ang daang pagkatawo, uban sa mga batasan niini, ug sul-obi ninyo ang inyong kaugalingon sa bag-ong pagkatawo, nga pinaagi sa tukmang kahibalo ginabag-o sumala sa dagway sa Usang naglalang niini.” Ikapahiuyon nimo ang imong kinabuhi sa iyang mga dalan, mapahimuslan ang mahinlong konsensiya, ug magbaton sa paglaom sa kinabuhing walay kataposan diha sa iyang matarong nga bag-ong kalibotan. Dili ba kana takos sa bisan unsang paningkamot nga kinahanglanon niana?—Colosas 3:5-10; Isaias 1:16, 18; 1 Corinto 6:9-11; Hebreohanon 9:14.
12. Unsay imong pagabuhaton kon ang tabako, pag-abusar sa alkohol, o makagiyang mga droga nagababag kanimo ug sa mahinlong konsensiya?
12 Ang paggamit ba sa tabako, pag-abusar sa alkohol, o pagkagiyan sa mga droga nagababag kanimo ug sa mahinlong konsensiya? Dili ba kanang makapameligro-sa-kinabuhi nga mga bisyo nagapakitag kawalay-pagtahod sa kahibulongang gasa sa Diyos nga kinabuhi? Kon ang maong mga bisyo nagababag kanimo, tinong panahon na sa pagtul-id niana. Ang mao bang mga bisyo takos sa imong kinabuhi? Matud ni Pablo: “Atong hinloan ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” Igo ba ang imong pagpabili sa mahinlo ug matarong nga mga paagi sa Diyos aron buhaton kana?b—2 Corinto 7:1.
Materyal nga mga Butang
13, 14. (a) Unsay ginaingon sa Kasulatan mahitungod sa materyal nga mga tumong? (b) Nganong hinungdanon ang pag-una sa langitnong mga butang?
13 Ang kalibotan karong adlawa nagabutang pag-una sa kalamposan ug “sa mapagawalong pasundayag sa pangabuhian sa usa” sa halos tanang ubang butang. Apan gipanag-ing ni Jesus “ang mga kabalaka niining kahikayan sa mga butang ug ang mga malimbongong gahom sa bahandi” ngadto sa “mga tunok” nga nagatuok sa pulong sa Diyos. Siya nangutana usab: “Unsay kapuslanan kon maangkon sa usa ka tawo ang tibuok nga kalibotan apan mawad-an sa iyang kalag?”—1 Juan 2:16; Marcos 4:2-8, 18, 19; Mateo 16:26.
14 Si Jesus mipunting nga gihikay sa Diyos nga ang mga langgam makakitag pagkaon ug ang mga liryo mamulak sa matahom kaayong kabulakan. Dayon siya nangutana: “Dili ba labaw pa gayod kamog bili kay sa mga langgam? . . . Unsa ka labaw pa nga kamo pagabistehan [sa Diyos]!” Sa maalamon, giingnan kita ni Jesus nga “hunong na kamo sa pagkabalaka” sa materyal nga mga butang. Siya miingon: “Ipadayon ninyo ang pagpangita sa gingharian [sa Diyos], ug kining mga butanga igadugang ra kaninyo.” Iyang gipunting nga angay nga ibutang nato ang langitnong mga butang nga una tungod kay ‘kon diin ang atong bahandi, atua didto usab ang atong kasingkasing.’—Lucas 12:22-31; Mateo 6:20, 21.
Diyosnong Pag-alagad Uban sa Tabang sa Diyos
15. Unsang maayong pagdasig ang ginahatag kanato sa panig-ingnan sa unang-siglong mga Kristohanon?
15 Ang pagsangyaw ba ngadto sa uban daw nahimong problema nimo? Ang kamaulawon nagapugong ba kanimo? Kon mao, hinungdanon ang paghinumdom nga ang unang-siglong mga Kristohanon nagbaton sa samang matang sa mga pagbati sama sa atoa karong adlawa. Wala pilia sa Diyos ang daghang mga makinaadmanon ug mga gamhanan, apan gipili niya “ang maluyang mga butang sa kalibotan, aron iyang kapakaulawan ang mga butang kusgan.” (1 Corinto 1:26-29) Ang gamhanang relihiyosong mga pangulo misupak niadtong “ordinaryong” mga tawo ug nagmando nga sila mohunong sa pagsangyaw. Unsay gibuhat sa mga Kristohanon? Sila miampo. Nangayo sila sa Diyos sa pagkamaisogon, ug iyang gihatag kadto kanila. Ingong sangpotanan, ang ilang mensahe mipuno sa Jerusalem ug sa ulahi nakapagubot sa tibuok nga kalibotan!—Buhat 4:1-4, 13, 17, 23, 24, 29-31; 5:28, 29; Colosas 1:23.
16. Unsay atong makat-onan gikan sa mabagang “panganod sa mga Saksi” nga gibatbat diha sa Hebreohanon kapitulo 11?
16 Busa, ang kahadlok sa mga tawo angay dili magbabag kanato ug sa pag-alagad sa Diyos. Ang Hebreohanon kapitulo 11 nagasugilon bahin sa usa ka dakong “panganod sa mga saksi” nga nahadlok, dili sa mga tawo, kondili sa Diyos. Angay nga ipakita nato ang susamang pagtuo. Misulat ang apostol: “Tungod kay kita gilibotan sa mabagang panganod sa mga saksi, ato usab nga iwakli ang tanang kabug-at ug ang sala nga daling magagapos kanato, ug dalaganon nato nga malahutayon ang lumba nga gibutang sa atong atubangan.”—Hebreohanon 12:1.
17. Unsang pagdasig ang gihatag sa Diyos pinaagi ni Isaias?
17 Ang Diyos makataganag dako kaayong panabang sa iyang mga alagad. Ang Maglalalang sa uniberso nagsulti kang Isaias: “Kadtong nagalaom kang Jehova mapasig-ulian sa kusog. Sila manlupad pinaagi sa mga pako ingon sa mga agila. Sila manalagan ug dili mangaluya; sila manlakaw ug dili makapoyan.”—Isaias 40:31.
18. Sa unsang paagi mabuntog nimo ang kamaulawon aron makaambit sa pagsangyaw sa Gingharian?
18 Ang maisogon ug malipayong mga Saksi nga imong makita diha sa lokal nga kongregasyon maoy gamay rang bahin sa kapin sa tulog tunga ka milyon nga madasigong mga alagad sa tibuok nga kalibotan. Nagakalipay sila nga makaambit sa buluhatong gitagna mismo ni Jesu-Kristo niining mga pulonga: “Kining maayong balita sa gingharian igawali sa tibuok nga gipuy-ang yuta alang sa usa ka pamatuod sa tanang nasod; ug unya ang kataposan moabot.” Kon ang pag-apil sa pagsangyaw sa Gingharian usa ka problema alang kanimo bisan pag ikaw kuwalipikado nang mohimo niana, nganong dili mohangyo sa usa ka Saksi nga hanas sa ministeryo nga ikaw makakuyog kaniya sa pag-apil sa buluhatong pagsangyaw? Ang Diyos nagatagana gayod sa “gahom nga labaw sa kasagaran,” ug basin ikaw matingala sa pagdiskobre nga makalipay gayod kining diyosnong pag-alagad.—Mateo 24:14; 2 Corinto 4:7; tan-awa usab ang Salmo 56:11; Mateo 5:11, 12; Filipos 4:13.
19. Unsang buluhatong pagpanudlo ang gisugo ni Jesus nga buhaton sa iyang mga sumusunod?
19 Si Jesus nagalaom nga kadtong nagapabili sa mensahe sa Gingharian molihok pinasukad niana. Siya miingon: “Busa panlakaw kamo ug himoang mga tinun-an ang mga tawo sa tanang nasod, nga magabawtismo kanila diha sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang nga akong gisugo kaninyo.”—Mateo 28:19, 20.
20. Kon ikaw nagauswag sa espirituwal, unsang pangutana ang mahiangay sa dili na madugay?
20 Ang imo bang pagpabili sa mga panalangin sa Diyos, sa “bililhong dugo” ni Jesus, ug sa kahibulongang paglaom sa kinabuhing walay kataposan modasig kanimo sa paglihok? (1 Pedro 1:19) Gipahiuyon na ba nimo ang imong kinabuhi sa matarong nga mga kinahanglanon sa Diyos? Regular ka bang nagapakigbahin sa paghimog mga tinun-an? Gidumilian ba nimo ang imong kaugalingon ug gipahinungod ang imong kinabuhi ngadto sa Diyos? Kon ang tubag niining tanang pangutanaha maoy tinong oo, basin panahon na sa pagsukna sa usa sa mga ansiano diha sa kongregasyon nga imong gitambongan sa samang pangutana nga gisukna sa matinuohong Etiopianhon kang Felipe: “Unsay nagapugong nga ako mabawtismohan?”—Buhat 8:36.
[Mga footnote]
a Ang The Jerusalem Bible nagahubad niini nga “magasalikway sa kaugalingon.” Ang bersiyon ni J. B. Phillips nagaingong “magatugyan sa tanang katungod sa iyang kaugalingon.” Ang The New English Bible nagaingong “magabiya sa kaugalingon.”
b Alang sa impormasyon bahin sa pagbiya sa maong mga bisyo, tan-awa ang Ang Bantayanang Torre, Agosto 1, 1981, mga panid 3-13; Disyembre 1, 1973, mga panid 720-727; ug Pagmata!, Disyembre 8, 1982, mga panid 3-14; Septiyembre 22, 1981, mga panid 3-11. Kini basin anaa sa librarya sa lokal nga Kingdom Hall of Jehovah’s Witnesses.
Nahinumdom Ka Ba?
◻ Unsang espesyal nga mga hinungdan ang atong nabatonan nga magmapasalamaton sa Diyos?
◻ Ang pagtuo ug apresasyon magadasig kanato sa pagbuhat sa unsa?
◻ Unsang mga problema ang basin nagababag kanato ug sa pagkamasinugtanon ngadto sa Diyos, ug unsay atong mahimo bahin kanila?
◻ Unsang mga pangutana ang tingali isukna sa ilang kaugalingon sa mga tawo nga wala pa mabawtismohi?
[Kahon sa panid 18]
‘Unsang matanga ba ako sa “yuta”?’
Si Jesus misugid sa usa ka sambingay sa usa ka tawo nga nagsabod ug binhi. Ang pila ka binhi nahulog sa daplin sa dalan ug gituka sa mga langgam. Ang uban nahulog sa batoong mga dapit nga dili daghan ug yuta. Kini migitib, apan sa pagsilang sa adlaw, kini nalawos ug nangamatay. Ang uban pang binhi nahulog taliwala sa kasampinitan ug nalumos. Si Jesus miingon nga kining tulo ka pundok naghawas: nahauna, ang tawo nga “nakabati sa pulong sa gingharian apan wala makasabot niini”; ikaduha, usa nga nagadawat sa pulong apan magpahilayo tungod sa kainit sa “kasakitan o pagpanglutos”; ug ikatulo, ang tawo nga alang kaniya “ang kabalaka niining kahikayan sa mga butang ug malimbongong gahom sa bahandi nagalumos sa pulong.”
Apan si Jesus misugid usab bahin sa ubang binhi nga nahulog sa maayong yuta. Siya miingon: “Kini mao ang nakabati sa pulong ug nakasabot niini, nga nagapamunga gayod.”—Mateo 13:3-8, 18-23.
Maayong atong suknaon ang atong kaugalingon: ‘Unsang matanga ba ako sa “yuta”?’
[Kahon sa panid 19]
Sila nagpakamatay tungod sa ilang pagtuo
May nailhan ka ba nga mopalabing mamatay inay molapas sa iyang pagtuo? Libolibong Saksi ni Jehova naghimo niana. Diha sa The Nazi State and the New Religions: Five Case Studies in Non-Conformity, si Dr. Christine E. King misulat: “Usa sa matag duha ka Alemang Saksi ang napriso, usa sa upat ang nawad-an sa ilang kinabuhi.”
Sa dihang sa kataposan natapos na ang mga kalisang sa mga kampo niadtong 1945, “ang gidaghanon sa mga Saksi miuswag ug walay mga pakigkompromiso ang nahimo.” Diha sa The Nazi Persecution of the Churches, si J. S. Conway misulat mahitungod sa mga Saksi: “Walay laing sekta ang nagpakita sa samang determinasyon atubangan sa bug-os nga puwersa sa terorismo sa Gestapo.”
Ang mga Saksi ni Jehova wala lutosa tungod sa politika o rasa. Hinunoa, nag-antos sila tungod lamang sa ilang gugma sa Diyos ug ilang pagdumili sa paglapas sa ilang gibansay-sa-Bibliya nga mga konsensiya.