Maunongong Nagabuhat Uban Kang Jehova
“O Diyos, gitudloan mo ako sukad pa sa akong pagkabatan-on, ug hangtod karon ginapahayag ko ang imong katingalahang mga buhat.”—SALMO 71:17.
1. Nganong makaingon kita nga ang buluhaton maoy usa ka gasa gikan kang Jehova?
ANG trabaho maoy usa sa mga gasa sa Diyos sa tawo. Ngadto sa atong orihinal nga mga ginikanan, si Adan ug Eva, si Jehova miingon: “Pun-a ninyo ang yuta ug gamhi kini.” Kadto maoy usa ka mahagitong tinudlong-buluhaton apan buhaton kini sumala sa ilang mga katakos. Ang gikinahanglang paningkamot sa pisikal ug mental mopadako sa ilang kalipay sa pagkinabuhi, nga labaw sa bisan unsang maeksperyensiyahan sa mga hayop nga nakig-ambit sa ilang yutan-ong pinuy-anan.—Genesis 1:28.
2, 3. (a) Ang trabaho nahimong unsa alang sa daghan karong adlawa, ug ngano? (b) Unsang kahigayonan sa pagbuhat ug usa ka linaing buluhaton ang kinahanglan natong tagdon?
2 Bisan sa atong dili-hingpit nga kahimtang, ang “kuging pagtrabaho” nga moresultag “maayo” maoy “gasa sa Diyos,” ingon sa gisulat sa maalamon nga tawong si Solomon. (Ecclesiastes 3:13) Ang tawo sa gihapon angayng mogamit sa iyang mga kagahom sa hunahuna ug lawas. Ang pagkawalay trabaho makasubo. Ugaling, dili tanang trabaho maayo o mapuslanon. Alang sa daghan, ang trabaho makalaay, natawo gumikan sa panginahanglan sa pagbatog panginabuhian.
3 Ugaling, adunay usa ka tinuod magantihong buluhaton nga ang tanan gidapit sa pag-ambit. Apan adunay daghang mga pagsupak ug mga suliran nga buntogon alang niadtong nakigbahin niana. Nganong hinungdanon nga kita mahimong kuwalipikado alang niining buluhatona? Sa unsang paagi atong buhaton kini? Sa dili pa tubagon kining mga pangutanaha, tagdon una nato ang:
Alang Kang Kinsa nga Kita Nagatrabaho?
4. Unsang matanga sa buluhaton ang nagahatag ug kalipay ug katagbawan kang Jesus?
4 Si Jesu-Kristo nag-ingon: “Ang akong pagkaon mao ang pagbuhat sa kabubut-on niya nga nagpadala kanako ug sa pagtapos sa iyang buluhaton.” (Juan 4:34) Ang maunongong pagbuhat alang kang Jehova naghatag kang Jesus ug dakong kalipay ug katagbawan. Kini naghatag kaniya ug katuyoan sa kinabuhi, ug sa kataposan sa iyang tulo ug tunga ka tuig nga ministeryo, siya sa pagkamatinud-anon nakaingon sa iyang langitnong Amahan: “Gipasidunggan ko ikaw dinhi sa yuta, sanglit natuman ko man ang buhat nga gitugyan mo kanako nga pagabuhaton.” (Juan 17:4) Maingon nga ang pisikal nga pagkaon makapabaskog, mao man usab ang buluhaton nga may espirituwal nga sukod. Gipasiugda kini ni Jesus sa laing okasyon sa dihang siya nagtambag: “Hagoi, dili ang pakaon nga mawagtang ra, kondili ang pagkaon nga molungtad ngadto sa kinabuhing walay kataposan.” (Juan 6:27) Sa pagtandi, ang buluhaton nga sa espirituwal dili-mabungahon motultol ngadto sa kapakyasan ug kamatayon.
5. Kinsay misupak sa maayong buhat nga gihimo ni Jesus, ug ngano?
5 “Ang akong Amahan padayong nagabuhat hangtod karon, ug ako nagabuhat sa ingon man.” Gisulti ni Jesus kining pulonga ngadto sa mga Hudiyo kinsa nagsaway kaniya tungod kay sa adlawng Igpapahulay siya nag-ayo sa usa ka tawo nga may sakit sulod sa 38 ka tuig. (Juan 5:5-17) Bisag si Jesus nagabuhat sa buluhaton ni Jehova, ang relihiyosong mga magsusupak nagadumili sa pagdawat niana nga kamatuoran ug ilang gihimo ang tanan nilang mahimo sa pagpahunong kaniya. Ngano? Tungod kay sila gikan man sa ilang amahan, si Satanas nga Yawa, ang usa kinsa kanunayng nagasupak sa buluhaton ni Jehova. (Juan 8:44) Sanglit si Satanas makaarang sa ‘paghimo sa iyang kaugalingon ingong usa ka manulonda sa kahayag,’ nga mogamit sa “tanang dili-matarong nga panglimbong,” kita nagkinahanglan sa espirituwal nga pagsabot ug tin-aw nga panghunahuna sa pag-ila sa iyang mga buhat kon unsa man sila. Kay kon dili, hayan atong makita unya ang atong kaugalingon nga nagabuhat sa pagsupak kang Jehova.—2 Corinto 11:14; 2 Tesalonica 2:9, 10.
Mga Magsusupak Nagabuhat
6. Nganong ang mga apostata maoy “malimbongong mga magbubuhat”? Iilustrar.
6 Ang pipila, sama sa mga apostata karong adlawa, sa dili-pagkamaunongon nagabuhat ingong mga ahente ni Satanas aron pahuyangon ang pagtuo sa bag-ong nakig-ubang mga membro sa Kristohanong kongregasyon. (2 Corinto 11:13) Inay kay yanong gamiton ang Bibliya ingong basehanan alang sa matuod nga pagtulon-an, ilang gibug-os ang ilang hunahuna sa pagdaot sa New World Translation of the Holy Scriptures, ingon sa daw ang mga Saksi ni Jehova bug-os nga nagadepende niini alang sa pagpaluyo. Apan dili kana tinuod. Sa labing dakong bahin sa siglo, ang mga Saksi ilabinang migamit sa King James Version, ang Romano Katolikong Douay Version, o sa bisan unsang mga bersiyon nga mabatonan diha sa ilang pinulongan, sa pagkat-on sa kamatuoran mahitungod kang Jehova ug sa iyang mga katuyoan. Ug ilang gigamit kining karaang mga bersiyon sa pagmantala sa kamatuoran bahin sa kahimtang sa mga patay, sa relasyon sa Diyos ug sa iyang Anak, ug nganong diyutay nga panon lamang ang moadto sa langit. Ang nahibalo nga mga tawo nasayod usab nga ang mga Saksi ni Jehova padayong nagagamit sa daghang mga hubad sa Bibliya diha sa ilang tibuok-yutang pagmantala nga buluhaton. Sukad sa 1961, hinunoa, sila dugang nalipay sa paggamit sa New World Translation, uban sa iyang gibag-o, tukma nga hubad ug maayong pagbasa.
7. (a) Nganong wala ilha ni Jesus ang daghan nga nagaangkong nagtuo kaniya? (b) Nganong hinungdanon nga patalinghogan ang tambag sa 1 Juan 4:1?
7 Si Jesus miingon nga dili niya ilhon ang daghan kinsa nagaangkon nga may pagtuo kaniya. Gidawat niya nga sila mahimong managna, makapagulag mga demonyo, ug “magabuhat sa daghang gamhanang mga buhat” diha sa iyang ngalan. Sa gihapon, siya nagpaila kanila ingong mga buhat sa “pagkadaotan.” (Mateo 7:21-23) Ngano? Tungod kay sila wala magabuhat sa kabubut-on sa iyang langitnong Amahan ug walay bili kon bahin kang Jehova nga Diyos. Ang katingalahan, bisag daw milagroso, nga mga milagro karong adlawa mahimong nagagikan gihapon sa dakong-tiglimbong, si Satanas. Si apostol Juan, nagsulat sa iyang una katibuk-ang sulat kapin sa 60 ka tuig human sa kamatayon ug pagkabanhaw ni Jesus, nagtambag nga ang mga Kristohanon kinahanglang “dili motuo sa matag dinasig nga pulong, apan sulayan ang dinasig nga mga pulong sa pagtino kon sila ba nagagikan sa Diyos.” Kita angayng mobuhat ug sama.—1 Juan 4:1.
Dili-Magantihong mga Buhat
8. Unsay atong pagbati mahitungod sa mga buhat sa unod?
8 Bisan kon wala kita magbuhat sa dili-mabungahong espirituwal nga buhat, ang atong mga paghago walay kapuslanan kon sila padayon nga nagapatagbaw sa mga tinguha sa nahulog nga unod. Si apostol Pedro miingon nga kita dugay na nga nagabuhat “sa kabubut-on sa mga nasod . . . diha sa mga buhat sa haluag nga paggawi, kaulag, hubog-hubog, hudyaka-bahakhak, sinumsumay, ug sa gidiling pagsimba sa mga diyosdiyos.” (1 Pedro 4:3, 4) Kini wala magpasabot, siyempre, nga ang tanan karon nga dedikadong mga Kristohanon nagabuhat sa maong mga kalihokan, apan kini nagpasabot nga ang tinamdan niadtong kinsa nagabuhat sa ingon angay mausab dayon sa dihang ang ilang espirituwal nga panan-aw maugmad. Ang kalibotan mopasipala kanila tungod sa ilang pagbag-o; kana mao ang malaoman. Oo, sila kinahanglang mag-usab kon sila buot nga mahimong maunongong mga magbubuhat sa pag-alagad kang Jehova.—1 Corinto 6:9-11.
9. Unsay atong nakat-onan gikan sa eksperyensiya sa Saksi nga misugod sa pagbansay ingong usa ka mag-aawit sa opera?
9 Si Jehova naghatag kanato ug daghang mga gasa alang sa atong kalipay, ang musika maoy usa kanila. Apan, sanglit “ang tibuok kalibotan anaa sa gahom sa usa nga daotan,” si Satanas nga Yawa, dili ba apil niini ang kalibotan sa musika? (1 Juan 5:19) Oo, ang musika mahimong usa ka pinong lit-ag, ingon sa nadiskobrehan ni Sylvana. Siya may higayon nga mabansay sa Pransiya ingong usa ka mag-aawit sa opera. “Ako gihapon may kusganong tinguha sa pag-alagad kang Jehova,” siya miingon. “Nalipay ako sa pag-auxiliary payunir ug nagalaom nga magkaangay kining duha ka butang sa akong kinabuhi. Apan ang unang suliran nga kinahanglang akong atubangon sa pagpadayon sa akong karera mao ang imoralidad. Sa sinugdan, gilantaw ako sa akong mga kauban nga ignorante kay ako dili moapil sa ilang imoral nga panag-estoryahay ug panig-ingnan. Sa ulahi, ang daotang palibot misugod sa pagpahabol kanako, nagpahimo kanako nga matinuguton sa mga butang nga gidumtan ni Jehova. Usa sa akong mga magtutudlo kanunayng nag-agda kanako sa paghimo sa akong pag-awit nga relihiyon, ug ako gitudloan nga magmaagresibo diha sa entablado ug sa paghunahuna nga ako labaw sa tanan. Kining tanan nagpalisod kaayo kanako. Sa kataposan, ako nangandam alang sa usa ka linaing awdisyon. Ako nag-ampo kang Jehova sa paghimo niining matin-aw kanako kon unsang dalana ang akong subayon. Bisag maayo akong miawit ug mibatig pagsalig, ako wala maapil niadtong gipili. Unya, akong nasayran kon ngano—ang mga resulta dugay nang gitinong daan sa hilom sa wala pa ang bangga. Apan ako dihay tin-aw nga tubag sa akong pag-ampo ug mihukom sa pagbiya sa entablado sa opera aron sa pagtudlog awit diha sa balay.” Kining maong sister sa ulahi naminyo sa usa ka ansiano sa Kristohanong kongregasyon, diin silang duha karon nag-alagad nga maunongon sa pagpauswag sa mga intereses sa Gingharian.
10. Unsay imong ikahinapos gikan sa mga pulong ni Jesus sa Juan 3:19-21?
10 Si Jesus miingon: “Siya nga nagabuhat sa mangil-ad nga mga butang nagadumot sa kahayag ug dili moduol sa kahayag, aron dili masaway ang iyang mga buhat.” Sa laing bahin, “siya nga nagahimo sa matuod moduol sa kahayag, aron nga ang iyang mga buhat mapadayag nga gibuhat nga uyon sa Diyos.” (Juan 3:19-21) Pagkadakong panalangin nga magabuhat nga kaharmoniya uban sa kabubut-on ug sa katuyoan sa Diyos! Apan sa pagbuhat niana nga malamposon, kinahanglang atong tugotan nga matuki ang mga buhat sumala sa kahayag sa Pulong sa Diyos. Kita dili pa gayod tigulang kaayo ug dili pa ulahi kaayo sa pag-usab sa atong dalan sa kinabuhi ug sa pagdawat sa pagdapit nga buhaton ang hamili nga pag-alagad kang Jehova.
Pagbuhat ug “Maayong mga Buhat” Karong Adlawa
11. Unsay gipangagpas sa daghan ingong “maayong mga buhat,” ug nganong kana motultol ngadto sa kapakyasan?
11 Ang buluhaton nga hamili karong adlawa kinahanglang magpabanaag sa pagkadinalian sa atong mga panahon. Daghang sinserong mga tawo mouyon ug okupado sa ilang kaugalingon uban sa mga buhat nga kasagarang gihubit ingong “maayong mga buhat,” nga gibuhat alang sa kaayohan sa katawhan sa katibuk-an o alang sa usa ka espisipikong kawsa. Apan, pagkawalay katagbawan kining matanga sa buhat! Sa Britanya, ang CAFOD (Catholic Fund for Overseas Development), nga nagtaho sa iyang kampaniya sa pagpangayog hinabang alang sa kagutmanan, miingon: “Sa miaging tulo ka tuig . . . milyon-milyong libras ang gipatungha alang sa hinabang. Libo-libong mga kinabuhi ang naluwas. Karon kadtong mga kinabuhia nameligro na usab . . . Apan ngano? Unsay nahitabo?” Nagpadayon sa iyang pagsaysay, ang CAFOD Journal mipatin-aw nga ang layog-abot nga mga suliran wala gayod masulbad ug nga “ang mga kahinguhaan nga gikinahanglan pag-ayo alang sa tawhanong kaugmaran gigamit sa pagpalambo sa panagbangi [gubat sibil].” Piho, ikaw nakabati ug samang mga tinamdan nga gipalanog sa mga institusyon nga nagapangayog hinabang nga naghimog susamang mga buluhaton.
12. Unsa lamang ang bugtong sulbad sa mga suliran nga giatubang sa kalibotan karong adlawa?
12 Ang gutom maoy dinaliang suliran. Apan, kinsa ba ang nagpaila karong adlawa sa mga katalagman sa gutom ug gubat ingong katumanan sa tagna ni Jesu-Kristo, nga nagpunting sa kataposan sa presenting sistema sa mga butang? (Mateo 24:3, 7) Kinsa ang nagpatik sa mga ebidensiya nga naglangkit niining mga hitaboa uban sa pagsakay sa upat ka mangangabayo nga klarong gihulagway diha sa basahon sa Bibliya nga Pinadayag, kapitulo 6? Sa makanunayon, ang mga Saksi ni Jehova maunongong nagabuhat niana niining basahona. Ngano? Aron ipakita nga saylo na sa maabot sa tawo ang paghimog bisan unsang malungtarong solusyon. Kini wala magpasabot nga ang mga Kristohanon walay-pagtagad sa mga suliran sa kalibotan. Halayo gikan niana. Sila maluluy-on ug naningkamot sa pagbuhat kutob sa ilang mahimo sa pag-alibyo sa pag-antos. Sa gihapon, realistikanhong giatubang nila ang kamatuoran nga kon dili mangilabot ang Diyos, ang mga suliran sa kalibotan dili gayod masulbad. Sama sa mga kabos, kining mga sulirana magpabilin samtang si Satanas gitugotang magpadayon ingong magmamando niining kalibotana.—Marcos 14:7; Juan 12:31.
Ang Buluhaton nga Labing Bililhon
13. Unsa ang labing dinaliang buluhaton karong adlawa, ug kinsa ang nagabuhat niana?
13 Ang labing dinaliang panginahanglan karong adlawa mao ang pagsangyaw sa maayong balita nga ang Gingharian ni Jehova nga Diyos sa dili madugay mopuli sa tanang mga kagamhanan sa kalibotan ug mohatag ug kahupayan nga gipangandoy sa mga tawong mahadlokon sa Diyos. (Daniel 2:44; Mateo 24:14) Gihimo ni Jesu-Kristo ang pagsangyaw sa langitnong Gingharian nga iyang pangunang katuyoan sa kinabuhi, bisag ang iyang pagsangyaw limitado lamang diha sa kayutaan sa Palestina. Karong adlawa, ang gilapdon niini nga pagsangyaw maoy tibuok-yuta, sama sa giingon ni Jesus nga maoy mahitabo. (Juan 14:12; Buhat 1:8) Aron makabahin, bisag gamay, diha sa buluhaton sa Diyos, maoy usa ka pribilehiyo nga dili matumbasan. Ang mga lalaki ug mga babaye, mga tigulang ug mga batan-on, kinsa kas-a wala magdahom nga mahimong mga magsasangyaw sa maayong balita nanguna sa pag-ebanghelyong buluhatong nga gihimo sa mga Saksi ni Jehova karong adlawa. Sama kang Noe ug iyang pamilya, sila maunongong nagabuhat sa buluhaton sa Diyos ubos sa pagkasinugo gikan Kaniya, ug busa pinaagi sa Iyang kusog, ingong pasiuna sa kataposan niining sistema sa mga butang.—Filipos 4:13; Hebreohanon 11:7.
14. Sa unsang paagi ang pagsangyaw nagaluwas-kinabuhi ug sa samang panahon usa ka panalipod?
14 Ang buluhatong pagsangyaw sa mga Saksi ni Jehova niining kataposang mga adlaw makaluwas ug kinabuhi alang niadtong kinsa magapatalinghog ug molihok diha sa maayong balita nga ilang madungog. (Roma 10:11-15) Kini usab maoy usa ka panalipod alang niadtong nagasangyaw. Kay tim-os maikagon sa pagtabang sa mga tawo kinsa adunay mga suliran nga mas dako pa kay sa atong suliran, kita hayan dili mahimong sobra ka mabalak-on sa atong mga suliran. Kita nahibalo nga kining kalibotana nga nagakaus-os ang mga sukdanan buot nga kita mopahiuyon sa mga dalan niini. Busa ang pagpuno sa atong mga hunahuna uban sa mga hunahuna sa Diyos sa panahon sa atong pagsangyaw maoy labaw pa nga makapalig-on sa pagtuo; kini maoy alang sa atong mga kaayohan. Sama sa giingon sa usa ka Saksi: “Kon dili ko mosulay sa pagpausab sa mga tawo nga akong ikahibalag, sila ang makausab kanako!”—Itandi ang 2 Pedro 2:7-9.
Magabuhat Uban sa Kongregasyon
15. Unsang mga responsabilidad ang gitugyan diha sa katabang nga mga magbalantay karong adlawa, ug unsay angay bation sa lalaking mga membro sa kongregasyon bahin sa 1 Timoteo 3:1?
15 Sa dihang ang interesadong mga bag-ohan moanha sa kongregasyon, sila mailalom sa pag-atiman sa Dakong Magbalantay, si Jehova nga Diyos, ug sa iyang Maayong Magbalantay, si Jesu-Kristo. (Salmo 23:1; Juan 10:11) Kining langitnong mga Magbalantay gihawasan dinhi sa yuta pinaagi sa maunongong katabang nga mga magbalantay sa panon, ang mga lalaking gitudlo sulod sa mga kongregasyon. (1 Pedro 5:2, 3) Ang pagbaton niana nga katungdanan maoy usa ka hamiling pribilehiyo niining kataposang mga adlaw. Ang buluhaton sa mga magbalantay maoy usa ka mabug-at nga buluhaton, lakip dili lamang ang pagpanguna sa pagtudlo diha sa kongregasyon ug sa pag-ebanghelyo kondili sa pagpanalipod usab sa panon gikan sa espirituwal nga mga manunukob ug sa mga pagdabodabo sa samag-bagyo nga atmospera sa kalibotan nga atong gipuy-an. Walay laing mas hamiling buluhaton nga diin angay kab-oton sa lalaking mga membro sa kongregasyon kay sa pagtabang sa pag-timan sa espirituwal nga kaayohan sa mga membro sa nagadakong Kristohanong kongregasyon.—1 Timoteo 3:1; itandi ang Isaias 32:1, 2.
16. Sa unsang mga paagi ang Kristohanong mga magbalantay nagasangkap sa usa ug usa?
16 Kinahanglang dili nato kalimtan, hinunoa, nga ang maong mga magbalantay mga tawo lamang, nga dunay nagkalainlaing mga personalidad ug mga kahuyangan sama sa nahibilin sa panon. Samtang ang usa tingali maayo sa usa ka bahin sa pagkamagbalantay, ang mga gasa sa uban makabenepisyo sa kongregasyon gikan sa lahi nga anggulo. Ang ilang buluhaton ingong Kristohanong mga ansiano mosangkap sa usa ug usa sa pagpalig-on sa kongregasyon. (1 Corinto 12:4, 5) Dili gayod angay nga mosulod taliwala kanila ang espiritu sa pag-indigay. Sa tingob sila nagabuhat sa pagpanalipod ug sa pagpauswag sa mga intereses sa Gingharian, nga “managbayaw sa maunongong mga kamot” diha sa pag-ampo kang Jehova, nga nagapangayo sa iyang panalangin ug paggiya diha sa tanan nilang mga pagtimbangtimbang ug mga desisyon.—1 Timoteo 2:8.
17. (a) Unsay atong obligasyon? (b) Unsang mga butang ang kinahanglan natong likayan aron atong mabuhat ang atong obligasyon sa husto?
17 Ang buluhaton sa pagsangyaw karon mas dinalian samtang ang kataposan sa imperyo ni Satanas haduol na. Kay nakabaton sa kamatuoran sa Pulong ni Jehova nga Diyos, ingong iyang mga Saksi, kita adunay obligasyon sa pagpakaylap sa maayong balita sa tanang higayon. Ang buluhaton karon igo na sa paghimo kanatong okupado, hangtod sa kataposan. Dili gayod nato tugotan ang atong kaugalingon nga malinga sa hedonistiko, imoral nga pagpangitag kalingawan o mabug-atan sa materyalismo. Kita dili gayod magpalangkit sa pagpamanabana nga kaisipan, makiglantugi bahin sa mga pulong, kay kini dili mapuslanon ug pag-usik lamag panahon. (2 Timoteo 2:14; Tito 1:10; 3:9) Sa dihang ang mga disipulo nangutana kang Jesus, “Ginoo, ipasig-uli ba nimo ang gingharian sa Israel niining panahona?” Gipunting sa laing direksiyon ni Jesus ang ilang hunahuna ngadto sa hinungdanong buluhaton, nga miingon: “Kamo mahimong akong mga Saksi sa Jerusalem ug sa tibuok Judea ug sa Samaria ug hangtod sa kinatumyang bahin sa yuta.” Kanang sugoa padayon gihapon hangtod niining adlawa.—Buhat 1:6-8.
18. Nganong ang pagbuhat uban kang Jehova magantihon kaayo?
18 Ang pagbuhat uban kang Jehova, nagasangyaw uban sa iyang tibuok-yutang kongregasyon karong adlawa, nagahatag kalipay, katagbawan, ug tinuod nga katuyoan sa atong mga kinabuhi. Kini maoy higayon alang sa tanan nga nahigugma kang Jehova sa pagpasundayag sa debosyon ug pagkamaunongon kaniya. Kining buluhatona uban sa iyang daghang mga bahin dili na gayod masubli. Uban sa palaabutong kinabuhing walay kataposan nga tin-aw sa unahan, hinaot nga kita maunongong magpadayon sa “paghatag sa Diyos ug balaang pag-alagad uban ang diyosnong kahadlok ug kataha,” alang sa iyang kadayegan ug alang sa atong kaugalingong kaluwasan.—Hebreohanon 12:28.
Unsay Imong Tubag?
◻ Gikan sa unsang buluhaton nga nakabaton ug kalipay ug katagbawan si Jesus?
◻ Kinsa ang nagasupak sa buluhaton ni Jehova, ug ngano?
◻ Sa unsang paagi ang kalibotanong “maayong mga buhat” ug ang pagsangyaw sa maayong balita sa Gingharian sa Diyos ikatandi?
[Hulagway sa panid 18]
Si Jesus nagsugo sa iyang mga disipulo sa pagsangyaw