“Siyang Nagapatalinghog Paingna: ‘Umari Ka!’”

Sa tibuok umaabot nga tuig, ang mga Saksi ni Jehova sa kapin sa 200 ka kayutaan sa tibuok-yuta mogugol unya sa ilang kaugalingon nga kaharmoniya sa ilang tinuig nga teksto sa 1991: “SIYANG NAGAPATALINGHOG PAINGNA: ‘UMARI KA!’”

“Ang espiritu ug ang pangasaw-onon nagpadayon sa pag-ingon: ‘Umari ka!’ Ug siyang nagapatalinghog paingna: ‘Umari ka!’ Ug siyang giuhaw paanhia; ang nagatinguha paimna sa walay bayad nga tubig sa kinabuhi.”—PINADAYAG 22:17.

1. Ngadto sa unsang “tubig” nga kita gidapit nga “umari ka!”?

IKAW gidapit nga “umari ka!” Moanha alang sa unsa? Aw, moari aron tagbawon ang imong kauhaw sa tubig. Kini dili ordinaryong tubig kondili parehong tubig nga gihisgotan ni Jesu-Kristo sa dihang siya miingon sa Samaritanhong babaye diha sa atabay: “Ang bisan kinsa nga moinom sa tubig nga akong igahatag kaniya dili na gayod pagauhawon, apan ang tubig nga akong igahatag kaniya diha sa sulod niya mahimong usa ka tubod sa tubig nga nagabukal sa paghatag kaniya ug kinabuhing dayon.” (Juan 4:14) Diin kuhaa ni Jesus kini nga “tubig”?

2. Unsay tinubdan sa “tubig,” ug tapos lamang sa unsang hitabo nga kini miagos?

² Si apostol Juan nakapribilehiyo sa pagkakita diha sa panan-awon bahin sa tinubdan niini nga “tubig”, sama sa iyang giingon sa itaas sa Pinadayag 22:1: “Iyang gipakita kanako ang usa ka suba sa tubig sa kinabuhi, nga samag kristal ang katin-aw, nga nagaagay gikan sa trono sa Diyos ug sa Kordero.” Oo, ang tuboran niining samag-kristal nga tubig uban sa mga elemento nga nagahatag-kinabuhi walay lain kondili ang Maghahatag-Kinabuhi, si Jehova mismo, nga naghimo niining mabatonan pinaagi sa Kordero, si Jesu-Kristo. (Itandi ang Pinadayag 21:6.) Sanglit gihisgotan “ang trono sa Diyos ug sa Kordero”, kini tapos gayod sa pagkatukod sa Mesiyanikong Gingharian niadtong 1914, sa ato pa, human nga misugod ang adlaw sa Ginoo, nga ang tubig sa kinabuhi misugod sa pag-agos.—Pinadayag 1:10.

3, 4. Unsay gihawasan sa “tubig”, ug alang kang kinsa kini mahimong mabatonan?

³ Unsay gilarawanan niini nga tubig sa kinabuhi? Kini naglarawan sa tagana sa Diyos sa kapasig-ulian sa hingpit tawhanong kinabuhi, walay kataposang kinabuhi sa kahingpitan sa yuta nga nabag-o ngadto sa usa ka paraiso. Ang tubig sa kinabuhi nagahawas sa tanang mga tagana alang sa kinabuhi pinaagi ni Jesu-Kristo. Kining tanan ba mabatonan karon? Dili, dili tanan niini kay angayng hanawon una sa Diyos ang presente daotang sistema sa mga butang uban sa dili-makitang magmamando niini, si Satanas nga Yawa. Apan mainom nato ang bisan unsa nga mabatonan niini nga “tubig” karon pinaagi sa pagpatalinghog ug pagsunod sa maayong balita sa Gingharian ug pagpahiuyon sa atong mga kinabuhi diha niana.—Juan 3:16; Roma 12:2.

⁴ Busa, human pakitai si Juan sa ‘suba sa kinabuhi,’ gisultihan ni Jesus si Juan bahin sa Iyang katuyoan sa pagpadala sa Iyang manulonda uban sa panan-awon. Unya nadungog ni Juan ang proklamasyon: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug siyang nagapatalinghog paingna: ‘Umari ka!’ Ug siyang giuhaw paanhia; ang nagatinguha paimna sa walay bayad nga tubig sa kinabuhi.” (Pinadayag 22:17) Busa, ang mga alagad sa Diyos nagpaabot ug pagdapit ngadto sa mga giuhaw nga mosugod na sa pag-inom sa mga tagana sa Diyos aron makabaton ug kinabuhing dayon dinhi sa yuta pinaagi sa Kordero sa Diyos.—Juan 1:29.

Mitungha ang Panginahanglan sa mga Tubig sa Kinabuhi

5. Sa unsang paagi ang katawhan nanginahanglan niining balaang tagana?

⁵ Ikasubo, ang unang mga ginikanan sa tawhanong pamilya wala mosubay sa dalan sa kinabuhing mohatag sa ilang mga anak sa kahigayonan sa pagpahimulos sa hingpit tawhanong kinabuhi nga walay kataposan diha sa usa ka paraisong pinuy-anan. Ang kinabuhing walay kataposan alang sa katawhan nagkinahanglag maalamong pagpili sa bahin ni Adan sa pag-alagad sa iyang Maglalalang nga masinundanon. Ubos sa impluwensiya sa usa ka rebelyoso espiritung linalang, gisugdan ni Eva ang paglihok nga misangpot sa kamatayon ngadto sa katawhan, ug si Adan, ang iyang hingpit nga bana, mipalabi sa pagduyog kaniya diha sa makamatay nga kurso. Busa, ingong maghahatag sa natural nga kinabuhi ngadto sa umaabot nga mga kaliwatan sa katawhan, si Adan mismo ang nagpasulod sa kamatayon sa tibuok tawhanong pamilya. Busa sa ingon niini ang Bibliya miingon: “Pinaagi sa usa ka tawo ang sala misulod nganhi sa kalibotan ug ang kamatayon pinaagi sa sala, ug sa ingon ang kamatayon mikuyanap ngadto sa tanang mga tawo tungod kay silang tanan nakasala man.” (Roma 5:12) Kadto human nga si Adan ug Eva nahulog sa sala nga sila misugod sa pagdugang ug bag-ong mga membro sa tawhanong pamilya.—Salmo 51:5.

6. Nganong gihikay ni Jehova nga kini nga “tubig” mabatonan?

⁶ Ang Diyos ba sa walay kataposan mababagan sa pagtuman sa iyang katuyoan sa usa ka paraisong yuta nga puno sa hingpit nga katawhan? Ang tubag sa Bibliya, siyempre, dili! Bisan pa niana, aron matuman ang iyang katuyoan, gihimo ni Jehova ang usa ka mahigugmaong tagana nga mosanta sa malaglagong kapakyasan ni Adan ug bisan pa bug-os nga kaharmoniya sa hustisya ug pagkamatarong, nga Siya mao ang kompleto ug kataposang kapahayagan. Iyang himoon kini pinaagi sa “suba sa tubig sa kinabuhi.” Tungod niini, iyang ipasig-uli ang hingpit tawhanong kinabuhi ngadto sa masinundanong katawhan, kansang kahigayonan sa pagduol sa Tuboran sa kinabuhi nawala. Kini nga tubig moagos sa bug-os nga diwa niini sa panahon sa Usa ka Libo ka Tuig nga Pagmando ni Jesu-Kristo. Busa, sa tibuok Milenyong Pagmando ni Kristo, ang katawhan, apil niadtong gibanhaw gikan sa patay, kinahanglang moinom sa “suba sa tubig sa kinabuhi.”—Itandi ang Ezekiel 47:1-10; Buhat 24:15.

7. Diha sa unsang basehanan ang maong tagana sa “tubig” gihimo?

⁷ Si Jehova nahimuot sa iyang kaugalingong kinabuhi, ug siya usab mahimuot sa paghatag ug pribilehiyo sa intelihenting kinabuhi diha sa pipila sa iyang mga linalang. Ang basehanan ni Jehova sa nagahatag-kinabuhing mga tagana mao ang halad lukat ni Jesus. (Marcos 10:45; 1 Juan 4:9, 10) Naapil usab ang Pulong sa Diyos, nga ang Bibliya usahay giterminohang “tubig.” (Efeso 5:26) Si Jehova nga Diyos may kagawasang moingon, “umari ka!” ngadto sa tawhanong mga linalang, nga nag-antos sa pagkawala sa orihinal nga mga tagana nga gihimo sa Diyos alang sa hingpit tawhanong paris, si Adan ug si Eva.

Ang Pangasaw-onong Matang Nagpaabot sa Pagdapit, “Umari ka!”

8. Alang kang kinsa ug kanus-a unang gitagana kining “tubiga”?

⁸ Ang unang nagpaabot ug pagdapit nga “umari ka!” mao kadtong naglangkob sa malarawanong pangasaw-onon sa Kordero, ang panganay sa espirituwal nga Anak ni Jehova. (Pinadayag 14:1, 4; 21:9) Ang espirituwal nga pangasaw-onon ni Kristo wala magaingon, “Umari ka!” ngadto sa iyang kaugalingon, sa ato pa, ngadto niadtong kansa pagatigomon pa ni Jehova nga Diyos ingong bahin sa pangasaw-onong matang aron himoon kining malig-ong 144,000. Kadtong mga pulonga sa pagdapit gipaabot sa mga tawo nga nagalaom nga makabaton sa hingpit tawhanong kinabuhi sa yuta human sa Armageddon. (Pinadayag 16:14, 16) Sa panahon niining konklusyon sa sistema sa mga butang sukad sa 1914, atong nadunggan ang pagdapit nga gipaabot sa “pangasaw-onon,” sa pagbuligay uban sa balaang espiritu sa Diyos.

9. Sa unsang paagi atong mahibaloan nga kini dili lamang sa gamay nga grupo?

⁹ Sa kaukyab, ang kataposang basahon sa Bibliya nagpakita nga ‘usa ka dakong panon, nga walay tawong makaihap,’ mosanong sa proklamasyon sa maayong balita sa Gingharian sa Diyos ug sa kalig-on nagpahimutang sa ilang kaugalingon diha sa kiliran nianang harianong kagamhanan. (Pinadayag 7:9, 10, 16, 17) Usa ka ba sa dakong panon? Nan, “siyang nagapatalinghog paingna: ‘Umari ka!’”

Ang Espiritu ug ang Pangasaw-onon Nagaingon, “Umari ka!”

10. Diin angayng magagikan ang simbolikong tubig, ug ngano?

¹⁰ Apan nganong ang Diyos ug ang malarawanong Pamanhonon wala hisgoti sa Pinadayag 22:17? Una, matikdi nga ang bersikulo wala maghisgot ilalom ni kinsang direksiyon nagalihok ang espiritu. Apan, ang gipasabot sa espiritu nagpunting sa atong pagtagad ngadto kang Jehova nga Diyos mismo. Wala ipahigawas ang Amahan sa hulagway, sanglit siya mao ang Tinubdan sa balaang espiritu. Ikaduha, ang Anak bug-os nga mipaluyo uban sa iyang Amahan, sama sa iyang giingon mismo: “Ang Anak walay mahimong bisan unsa sa iyang kaugalingong kabubut-on, gawas lamang sa iyang nakita nga ginabuhat sa Amahan.” (Juan 5:19) Dugang pa, sanglit kini nga pagdapit maoy usa ka dinasig nga pahayag nga nagagikan gayod kang Jehova nga Diyos, ang mga tawo makadawat sa balaang direksiyon, o “dinasig nga kapahayagan,” pinaagi ni Jesu-Kristo, “ang Pulong.” (Pinadayag 22:6; usab Pin 22:17, Reference Bible, potnot; Juan 1:1) Nan, sa tukma makig-uban kita kang Kristo, ang Pamanhonon, uban niini nga pagdapit. Oo, makaseguro kita nga si Jehova nga Diyos, ang Amahan sa Pamanhonon, ug si Jesu-Kristo, ang Pamanhonon, nakig-uban sa “pangasaw-onon” pinaagi sa balaang espiritu sa pag-ingon, “Umari ka!”

11, 12. (a) Adunay unsang unang timailhan nga ang pagdapit sa pag-inom ipakaylap? (b) Sa unsang paagi ang maong butang nagakatin-aw sa pag-aginod sa katuigan?

¹¹ Sulod sa mga dekada kini nga pagdapit nga “umari ka!” nakaabot ngadto sa mga tawong giuhaw alang sa “tubig sa kinabuhi.” Bisan balik pa niadtong 1918, ang pangasaw-onong matang misugod sa pagsangyaw sa usa ka mensahe nga sa partikular naglangkit niadtong kinsa malagmit mabuhi sa yuta. Kadto mao ang pahayag publiko nga nag-ulohang “Minilyon nga Buhi Karon Dili na Gayod Mamatay.” Kini nagtanyag ug usa ka paglaom nga daghan ang maluwas sa Armageddon ug human niana makabaton ug kinabuhing dayon diha sa Paraisong yuta ubos sa Mesiyanikong Gingharian sa Diyos. Apan kana nga mensahe sa tino wala magpakita ug dalan alang niini nga pribilehiyo sa kaluwasan, gawas sa pagkamatarong sa katibuk-an.

¹² Aron maabot ang dugang mga tawo sa pagdapit, “Umari ka!” niadtong 1922 ang mensahe gipaabot sa tanang kinsa mga interesado sa pag-alagad sa Diyos: “Imantala ang Hari ug ang Gingharian.” Niadtong 1923 ang pangasaw-onong matang nakasabot nga ang “mga karnero” ug “mga kanding” sa sambingay ni Jesus sa Mateo 25:31-46 mapadayag una pa ang Armageddon. Dayon, sa 1929, ang The Watch Tower sa Marso 15 nagpatik sa artikulong “Gracious Invitation” o mahigalaong pagdapit. Ang pangunang teksto niini mao ang Pinadayag 22:17, ug kini nagpasiugda sa kaakohan sa pangasaw-onong matang sa pagpaabot ug pagdapit, “Umari ka!”—Mga panid 87-9.a

Ang Ubang Karnero Miduyog sa Pag-ingon, “Umari ka!”

13, 14. Sa katuigang 1930, unsay dugang katin-awan ang gitagana nga ang uban moinom sa malarawanong tubig?

¹³ Dugang pa, ingon ka sayo sa 1932, ang The Watchtower nagpunting na sa kaakohan sa “ubang karnero,” sa ilang bahin, sa pag-ingon, “umari ka!” (Juan 10:36) Sa isyu niini sa Agosto 1, panid 232, ang parapo 29, miingon: “Ang mga Saksi ni Jehova karon may kasibot nga sama niadtong kay Jehu ug angay nilang dasigon ang Jehonadab nga matang [ubang karnero] nga moduyog kanila ug makigbahin sa pagmantala ngadto sa uban nga ang gingharian sa Diyos haduol na.” Unya, human kutloa ang Pinadayag 22:17, ang parapo miingon: “Awhaga ang mga dinihogan sa pagdasig sa tanan nga makigbahin sa pagmantala sa maayong balita sa gingharian. Sila dili na angayng pagadihogan pa sa Ginoo aron imantala ang mensahe sa Ginoo. Usa ka dakong kalipay alang sa mga Saksi ni Jehova nga karon nahibalo nga sila gitugotan sa pagdala sa mga tubig sa kinabuhi ngadto sa usa ka matang sa mga tawo nga mahimong makalabang sa armageddon ug hatagan sa kinabuhing walay kataposan sa yuta tungod sa kadaya sa pagkamaayo ni Jehova.”b

¹⁴ Gikan sa 1934 paunahan, ang dinihogang nahibilin nagpunting nga kining dakong panon angayng magapahinungod na karon sa ilang kaugalingon ngadto sa Diyos ug simbolohan kini nga pagpahinungod pinaagi sa bawtismo sa tubig ug unya moduyog sa pangasaw-onong matang sa pag-ingon, “Umari ka!” ngadto sa giuhaw pang uban. Busa, karon aduna nay tinong pagdapit nga gipaabot sa pangasaw-onong matang sa pagtigom nga hiusa niining giuhaw nga ubang karnero ngadto sa “usa ka panon” ubos sa “usa ka magbalantay,” si Jesu-Kristo. (Juan 10:16) Sa 1935 ang dinihogang nahibilin gidasig sa pagkat-on sa ilang katibuk-ang kombensiyon nianang tuiga nga ang samag-karnerong matang sa mga tawo nga ilang gidapit, “Umari ka!” mao sa pagkatinuod ang “dakong panon” sa Pinadayag 7:9-17. Kini naghatag ug talagsaong kasibot sa buluhatong pagdapit.

15. Sa unsang paagi “ang espiritu” nalangkit diha sa pagdapit, “Umari ka”?

¹⁵ Sa pag-ingon, “Umari ka!” ang pangasaw-onong matang maoy kaharmoniya uban sa espiritu sa Diyos. Pinaagi sa iyang espiritu sa pagbukas sa kahulogan sa mga tagna sa iyang sinulat nga Pulong, iyang gipahinabong ang nahibilin sa pangasaw-onong matang magapaabot sa pagdapit. Kining mga tagnaa diin gipasukad ang ilang pagdapit dinasig sa espiritu sa Diyos. Busa kadto, sa ingon, ang espiritu sa Diyos miagos pinaagi ni Kristo ug sa iyang pangasaw-onon nga miingon ngadto sa dakong panon sa samag-karnerong mga tawo, “Umari ka!”—Pinadayag 19:10.

16. Sa unsang paagi ang espiritu ug ang pangasaw-onon nahiusa diha sa pagdapit karong adlawa?

¹⁶ Hangtod karong adlawa ang espiritu ug ang pangasaw-onon, nga gihawasan sa nahibilin, “nagpadayon sa pag-ingon: ‘Umari ka!’” Ang nahibilin miingon niining ubang mga karnero nga modapit pa sa uban nga “umari ka!” Dili nila angayng huptan ang “tubig sa kinabuhi,” ingon sa mabatonan karong adlawa, sa ilang kaugalingon. Sila angayng mosunod sa mando sa “espiritu ug sa pangasaw-onon,” sa ato pa: “Siyang nagapatalinghog paingna: ‘Umari ka!’” Ang tanang natagbaw sa ilang kauhaw angay nga mopakaylap sa pagdapit. Ilang ipaabot kini ngadto sa tanan walay sapayan sa rasa, nasyonalidad, pinulongan, o ilang relihiyon karon—ang matag usa bisan diin! Kon unsay mabatonang “tubig sa kinabuhi” sa presenteng panahon mao ang gidapit sa mga Saksi ni Jehova ug sa pagtabang sa tanang mga tawo sa pag-inom, Libre!

17. Unsang matanga sa “tubig” ang mabatonan karong adlawa?

¹⁷ Sa tibuok yuta, ang Kordero, si Jesu-Kristo, sa pagkamatuod nagatultol sa dakong panon “ngadto sa mga tuboran sa mga tubig sa kinabuhi.” (Pinadayag 7:17) Dili kini hugaw nga tubig, apan tin-aw, bugnaw, maayo nga tubig nga gikan gayod sa Tuboran niini. Kining malarawanong mga tubig nagkahulogan nga labaw pa kay sa mga tubig diha sa diwa sa pagsabot sa kamatuoran sa Bibliya; sila nagpasabot sa tanang mga tagana sa Diyos pinaagi ni Jesu-Kristo nga nagsugod bisan karon sa pagpahimutang sa dakong panon diha sa dalan sa pagbaton sa kinabuhing walay kataposan sa hingpit nga kinabuhi sa kalipay.

Duyog Karon sa Pagmantala

18. Unsa ka masangkaron ang pagdapit sa atong panahon?

¹⁸ Karon, kining dakong panon maihap na sa minilyon. Sila sa masiboton nagpadayon sa pagmantala sa maayong balita sa Gingharian diha sa tanang ginapuy-ang yuta. Sila sa regular nagataho sa ilang mga kalihokan sa kanataran diha sa pagsangyaw sa maayong balita sa Gingharian, nga karon miabot na daghang kayutaan. Hangtod motugot ang panahon niining konklusyon sa sistema sa mga butang, ang pagdapit magapadayon sumala sa pailob ug pagkamapuangoron ni Jehova nga Diyos, ang Dakong Magtatakna. Siya nahibalo kon kanus-a matapos ang panahon ug kon kanus-a ang kritikal nga yugto alang niya nga magpaila sa iyang kaugalingon ngadto sa tanan ingong si Jehova, sama sa iyang gisaad nga buhaton sumala sa gibalik-balik nga mga pulong diha sa tagna sa Bibliya.—Ezekiel 36:23; 38:21-23; 39:7.

19. Nganong kita makaingon nga kini nga “tubig” gitanyag nga libre?

¹⁹ Busa, samtang aduna pay panahon ang mga membro sa dakong panon sa pagkamalipayon moduyog sa dinihogan sa pangasaw-onong mga kauban sa pag-ingon: ‘Umari ka ug inom sa walay bayad nga mga tubig sa kinabuhi!’ Ang mga tigmantala niining nagaluwas sa kinabuhing maayong balita sa libre nagamantala, wala mangolekta ug bayad sa mga serbisyo nga ilang gihimo samtang ilang gipakaylap ang mensahe sa Gingharian sa tibuok nga kalibotan.

20. Unsay moresulta tungod kay kini nga “tubig” mabatonan?

²⁰ Ang mga tubig sa kinabuhi karon mabatonan sa tibuok globo, aron ang mga tawo nga buot moinom makainom sa bug-os nga katagbaw uban ang nagaluwas sa kinabuhing mga resulta. Ang gilukat nga katawhan makapahimulos sa kinabuhing dayon dinhi mismo sa yuta, nga bag-ohon ngadto sa usa ka paraiso, sa pagbayaw sa bililhong katuyoan ni Jehova. Ang atong Maglalalang naglalang sa yuta nga dili makawang kondili aron mahimong usa ka nagalibot-yutang tanaman sa Eden, o Paraiso sa kalipay, pagapuy-an sa hingpit tawhanong mga linalang diha sa dagway ug kaamgid sa Diyos.

21. Sa unsang paagi pagatumanon ang katuyoan sa Diyos alang sa yuta?

²¹ Tino, kini unya mahimong dili-ikatukib talagsaong pribilehiyo ug kalipay nga maanaa diha sa usa ka bag-ong kalibotan! Dayon ang tahas nga gihatag sa Diyos ngadto sa unang tawhanong magtiayon sa Genesis 1:27, 28 sa kadaya mamatuman na unya. Salamat sa mahanasong paagi sa pag-atiman ni Jehova sa kadaotan nga midangat sa tawhanong pamilya, ang yuta pagagamhan unya ngadto sa gilapdon nga mahimong usa ka paraiso ug pagapun-on uban sa hingpit tawhanong rasa. Oo, makita unya sa Diyos ang tanang iyang nahimo, ug, tan-awa, kini unya maayo kaayo. Ikaw ba unya maatua didto? Kon mao, nan ikaw karon sa mapabilhon mosugod na sa pag-inom sa walay bayad nga tubig sa kinabuhi. “Umari ka!” ug inom sa gusto mo ug tagbawa ang imong kauhaw uban sa tubig sa kinabuhi nga misugod na sa pag-agay karon ug moagos pa sa bug-os sa umaabot nga Milenyo. Ug awhaga siyang nagapatalinghog niining matam-is nga pagdapit sa pag-ingon: “Umari ka!”

[Mga footnote]

Unsay Imong Tubag?

◻ Unsa nga “tubig” ang gipasabot sa Pinadayag 22:17?

◻ Unsa ang tinubdan sa “tubig”?

◻ Nganong ang “tubig” gikinahanglan, ug kanus-a lamang kini misugod sa pag-agos?

◻ Diha sa atong teksto, unsay gipaila sa pagpunting sa “espiritu”, ug sa unsang paagi ang “pangasaw-onon” nalangkit?

◻ Kinsay makainom sa “tubig,” ug uban sa unsang resulta?