Kinsa ba Gayod ang Adunay Langitnong Pagtawag?

SI Jehova nahigugma sa tawhanong katawhan. Aw, kini nga gugma dako kaayo nga iyang gihatag ang iyang bugtong Anak, si Jesu-Kristo, ingong usa ka lukat sa pagbakwi sa giwala sa atong katigulangang si Adan! Ug unsa man kadto? Ang walay kataposan, hingpit tawhanong kinabuhi uban ang tanang mga katungod ug mga palaaboton niini. (Juan 3:16) Ang lukat maoy kapahayagan usab sa gugma ni Jesus alang sa katawhan.​—Mateo 20:28.

Ang balaang gugma gipasundayag sa pagbukas sa duha ka hinatag-sa-Diyos nga paglaom nga gibase sa bili sa halad lukat ni Jesus. (1 Juan 2:1, 2) Sa wala pa mamatay si Jesus ingong usa ka tawo, ang paglaom lamang nga bukas niadtong nakabaton ug balaang pag-uyon mao ang kinabuhi sa yutan-ong paraiso. (Lucas 23:43) Human sa Pentekostes 33 K.P., hinunoa, si Jehova naghatag ug usa ka langitnong paglaom ngadto sa “gamayng panon.” (Lucas 12:32) Apan unsay nahitabo sa panahong dili pa dugay? Sukad sa 1931 ang balita sa Gingharian nagpunting sa labi pang dakong pagtagad diha sa “dakong panon,” ug gikan sa 1935 paunahan ang Diyos nagakuhag “usa ka dakong panon” sa maong samag-karnero nga mga tawo ngadto sa kaniya pinaagi kang Kristo. (Juan 10:16; Pinadayag 7:9) Diha sa ilang mga kasingkasing, gibutang sa Diyos ang paglaom sa kinabuhing walay kataposan diha sa usa ka yutan-ong paraiso. Buot nila nga mokaon sa hingpit nga pagkaon, makabaton ug mahigugmaong pagmando ibabaw sa mga mananap, ug makapahimulos sa pag-ubanay uban sa matarong nga mga isigkatawo sa walay kataposan.

Maluloy-ong mga Saserdote ug mga Hari

Sanglit ang gugma maoy nagpalihok kang Jesus sa paghatag sa iyang kinabuhi ingong usa ka lukat, siyempre siya mahimo unya nga usa ka mahigugmaon langitnong Hari. Bisan pa, si Jesus dili mag-inusara sa pagtuboy sa katawhan ngadto sa kahingpitan sa panahon sa iyang Usa ka Libo ka Tuig nga Pagmando. Si Jehova mihimog tagana alang sa uban pang malulutong mga hari sa langit. Oo, “sila mahimong mga saserdote sa Diyos ug kang Kristo, ug magmando ingong mga hari sulod sa usa ka libo ka tuig.”​—Pinadayag 20:1-6.

Pila ang mga isigkamagmamando uban kang Kristo, ug sa unsang paagi sila gipili alang sa maong kahibulongang pribilehiyo? Buweno, nakakita si apostol Juan ug 144,000 diha sa langitnong Bukid sa Sion uban ang Kordero, si Jesu-Kristo. Kay “gipalit gikan sa katawhan,” sila nahibalo kon unsay kahulogan sa pagsinatig mga pagsulay, sa paglahutay sa mga palas-anon sa pagkadili-hingpit, sa pag-antos, ug mamatay ingong mga tawo. (Pinadayag 14:1-5; Job 14:1) Busa, pagkamahigugmaon unya sila nga mga hari-ug-saserdote!

Ang Pamatuod sa Espiritu

Ang 144,000 “gidihogan na gikan sa usa nga balaan,” si Jehova. (1 Juan 2:20) Kini maoy pagdihog ngadto sa usa ka langitnong paglaom. Ang Diyos ‘nagbutang sa iyang marka diha kanila ug naghatag kanilag timaan sa moabot, nga mao, ang espiritu, diha sa ilang mga kasingkasing.’​—2 Corinto 1:21, 22.

Oo, kadtong adunay langitnong pagtawag adunay pamatuod sa espiritu sa Diyos nianang bahina. Mahitungod niini, si Pablo misulat diha sa Roma 8:15-17: “Kay wala kamo makadawat sa espiritu sa pagkaulipon aron mangahadlok na usab, hinunoa maoy nadawat ninyo ang espiritu sa pagkainanak, sa dihang managtuwaw kita sa pagpangamuyo nga nagaingong, ‘Abba, Amahan!’ Ang espiritu gayod mao ang magapamatuod uban sa atong espiritu nga kita mga anak sa Diyos. Nan, kon kita mga anak, mga manununod diay kita: mga manununod sa Diyos, ug mga isigkamanununod uban kang Kristo, kon moantos kita uban kaniya aron pagahimayaon usab kita uban kaniya.” Pinaagi sa balaang espiritu, o sa aktibong gahom sa Diyos, nga ang mga dinihogan nanagsinggit, “Abba, Amahan!”

Ang pangunang pamatuod nga gidihogan ang usa ka tawo alang sa langitnong pagtawag mao ang espiritu, o nangibabaw nga pagsabot, sa pagkainanak. (Galacia 4:6, 7) Ang maong indibiduwal bug-os nga nakaseguro nga siya inanak gayod sa Diyos ngadto sa espirituwal nga pagkaanak ingong usa sa 144,000 mga isigkamanununod sa langitnong Gingharian. Siya makapamatuod nga ang iyang langitnong paglaom dili iyang kinaugalingon naugmad nga tinguha o iyang handurawan; kondili, kini gikan kang Jehova ingong sangpotanan sa paglihok sa balaang espiritu sa Diyos diha kaniya.​—1 Pedro 1:3, 4.

Ubos sa pag-agak sa balaang espiritu sa Diyos, ang espiritu, o nangibabaw nga tinamdan, sa mga dinihogan molihok ingong usa ka panukmod nga puwersa. Kini nagapalibok kanila sa pagsanong nga positibo sa gipamulong sa Pulong sa Diyos mahitungod sa langitnong paglaom. Sila usab mosanong diha sa positibong paagi sa mga pakiglabot ni Jehova uban kanila pinaagi sa iyang balaang espiritu. Busa, sila segurado nga sila maoy espirituwal nga mga anak sa Diyos ug mga manununod.

Sa dihang mabasa sa mga dinihogan ang gipamulong sa Pulong sa Diyos mahitungod sa iyang espirituwal nga mga anak ug ang langitnong paglaom, ang ilang kinabubut-on nga kiling mao ang pag-ingon sulod sa ilang kaugalingon, ‘Kini nagpasabot kanako!’ Oo, sila malipayong mosanong sa dihang ang pulong sa ilang Amahan nagasaad ug usa ka langitnong ganti. Sila moingon, ‘Kana nagpasabot kanako!’ sa dihang ilang mabasa: “Mga hinigugma, kita karon maoy mga anak sa Diyos.” (1 Juan 3:2) Ug sa dihang ang mga dinihogan makabasa nga ang Diyos nagpatunghag katawhan nga “mahimong unang mga bunga sa iyang mga binuhat,” ang ilang panghunahuna mokiling sa pagsanong, ‘Oo, siya nagpatungha kanako alang sa maong katuyoan.’ (Santiago 1:18) Sila nahibalo nga sila “gibawtismohan ngadto kang Kristo Jesus” ug ngadto sa iyang kamatayon. (Roma 6:3) Busa sila adunay hugot nga pagtuo sa pagkahimong bahin sa espirituwal nga lawas ni Kristo ug giabiabi ang paglaom nga makaagig kamatayon sama kaniya ug pagabanhawon ngadto sa langitnong kinabuhi.

Aron makapanunod sa langitnong Gingharian, ang mga dinihogan kinahanglang ‘maningkamot nga himoon nga segurado ang ilang pagkatinawag ug pagkapili.’ (2 Pedro 1:5-11) Sila nagalakaw pinaagi sa pagtuo ug padayong nagauswag sa espirituwal, sama niadtong adunay yutan-ong paglaom. Busa, unsa pay anaa sa pamatuod sa espiritu?

Kon Nganong Sila Nakig-ambit

Ang dinihogang mga Kristohanon dili buot moadto sa langit tungod kay sila dili-kontento sa presenteng-adlaw nga kinabuhi sa yuta. (Itandi ang Judas 3, 4, 16.) Hinunoa, ang balaang espiritu nagpamatuod uban sa ilang espiritu nga sila maoy mga anak sa Diyos. Sila nakatino usab nga sila gidala ngadto sa bag-ong pakigtugon. Ang may kalabotan niini nga pakigtugon mao si Jehova nga Diyos ug ang espirituwal nga Israel. (Jeremias 31:31-34; Galacia 6:15, 16; Hebreohanon 12:22-24) Kini nga pakigtugon, nga gipalihok pinaagi sa giula nga dugo ni Jesus, nagakuha ug usa ka katawhan alang sa ngalan ni Jehova ug nagahimo niining dinihogang mga Kristohanon nga bahin sa “binhi” ni Abraham. (Galacia 3:26-29; Buhat 15:14) Ang bag-ong pakigtugon nagpabiling nagalihok hangtod ang tanang espirituwal nga mga Israelinhon mabanhaw ngadto sa walay-kataposang kinabuhi sa langit.

Dugang pa, sila nga tinuod nga tinawag alang sa langit sa walay duhaduha usab anaa sa pakigtugon alang sa langitnong Gingharian. Si Jesus nagpunting niini nga pakigtugon tali sa iyang kaugalingon ug sa iyang mga sumusunod sa dihang siya miingon: “Kamo ang nagpabilin uban kanako sa akong mga pagsulay; ug ako mohimog usa ka pakigtugon uban kaninyo, sama nga ang akong amahan mihimog pakigtugon uban kanako, alang sa usa ka gingharian, nga kamo managpangaon ug manag-inom sa akong lamesa diha sa akong gingharian, ug magalingkod sa mga trono sa paghukom sa napulog-duha ka tribo sa Israel.” (Lucas 22:28-30) Kini nga pakigtugon giinagurahan alang sa mga tinun-an ni Kristo pinaagi sa pagdihog kanila sa balaang espiritu sa adlaw sa Pentekostes 33 K.P. Kini nagpabiling nagalihok tali kang Kristo ug sa iyang kaubang mga hari sa walay kataposan.​—Pinadayag 22:5.

Kadtong adunay langitnong pagtawag positibo nga sila anaa sa bag-ong pakigtugon ug sa pakigtugon alang sa usa ka Gingharian. Busa, sila hustong makabahin sa simbolikong tinapay ug bino sa tinuig nga mga paghandom sa Panihapon sa Ginoo, o sa Memoryal sa kamatayon ni Jesu-Kristo. Ang walay lebadurang tinapay nagasimbolo sa walay sala nga tawhanong lawas ni Jesus, ug ang bino sa iyang hingpit nga dugo nga gibubo diha sa kamatayon ug naghimo sa bag-ong pakigtugon nga balido.​—1 Corinto 11:23-26.

Kon giugmad ni Jehova diha kanimo ang dili-ikalimod nga paglaom sa langitnong kinabuhi, ikaw nagalaom niana. Ang imong mga panalangin maoy kapahayagan sa maong paglaom. Kini maoy sentro sa imong pagtagad, ug dili nimo mapagawas kini sa imong sistema. Ikaw natuhop sa espirituwal nga mga tingusbawan. Apan kon ikaw nabahin ug nagduhaduha, nan tino ikaw dili gayod makig-ambit sa mga emblema sa Panihapon sa Ginoo.

Nganong Adunay Sayop nga mga Pagdahom?

Ang pipila tingali masayop sa pakig-ambit sa mga emblema sa Memoryal tungod kay sila gayod wala moila nga ang pagdihog “nagadepende, dili diha sa usa nga nagatinguha ni sa usa nga nangagpas, kondili diha sa Diyos.” (Roma 9:16) Dili iya sa indibiduwal ang paghukom nga siya buot pagadalhon ngadto sa bag-ong pakigtugon ug mahimong usa ka kaubang manununod uban kang Kristo sa langitnong Gingharian. Ang pagpili ni Jehova mao ang hinungdanon. Sa karaang Israel, ang Diyos ang nagpili sa mga tawo nga mag-alagad ingong iyang mga saserdote, ug iyang gipatay si Kore tungod sa mapangahasong pagtinguha sa pagkasaserdote nga balaanong gituga diha sa banay ni Aaron. (Exodo 28:1; Numeros 16:4-11, 31-35; 2 Cronicas 26:18; Hebreohanon 5:4, 5) Sa susama, dili makapahimuot kang Jehova kon itanyag sa usa ka tawo ang iyang kaugalingon ingong usa nga tinawag nga mahimong bahin sa langitnong mga hari ug mga saserdote kon ang Diyos wala mohatag kaniya sa maong pagtawag.​—Itandi ang 1 Timoteo 5:24, 25.

Ang usa ka tawo tingali masayop sa pagdahom nga siya adunay langitnong pagtawag tungod sa kusganong pagbati nga motungha tungod sa seryoso nga mga suliran. Ang kamatayon sa usa ka kapikas o sa laing trahedya tingalig mopahinabo sa pagkawala sa maong tawo sa interes sa kinabuhi sa yuta. O ang usa ka suod nga kaila hayan moangkon nga kauban sa mga dinihogan, ug ang maong tawo hayan magtinguha sa samang dulnganan. Ang maong mga hinungdan hayan mopabati kaniya nga ang kinabuhi sa langit maoy alang kaniya. Apan dili kini maoy paagi sa Diyos sa paghatag kang bisan kinsa sa espiritu sa pagkainanak. Kini maoy pagpakitag pagkadili mapasalamaton sa katuyoan sa Diyos may kalabotan sa yuta kon ang usa magtinguha sa pag-adto sa langit tungod sa dili-maayong mga kahimtang o sa emosyonal nga kaguol nga nalangkit sa kinabuhi sa yuta.

Ang relihiyosong mga hunahuna sa miagi tingali mopahinabo usab sa usa ka tawo sa sayop nga paghukom nga siya adunay langitnong pagtawag. Tingali siya nakig-uban niadto sa usa ka bakak nga relihiyon nga nagtuo sa langitnong kinabuhi ingong ang bugtong paglaom alang sa matinumanon. Busa, ang usa ka Kristohanon kinahanglang magbantay batok sa pagpadala sa emosyon ug sa miaging sayop nga mga hunahuna.

Hinungdanon ang Maampingong Pagsusi

Usa ka talagsaong punto ang gipahayag ni apostol Pablo sa dihang siya misulat: “Ang bisan kinsa nga mokaon sa tinapay o moinom sa bino sa Ginoo nga dili-takos makasala batok sa lawas ug dugo sa Ginoo. Busa kinahanglan ang matag usa magsusi sa iyang kaugalingon, ug busa pakan-a ug paimna sa bino. Kay siya nga mokaon ug moinom nagakaon ug nagainom sa paghukom batok sa iyang kaugalingon kon dili siya wala makaila sa lawas.” (1 Corinto 11:27-29) Busa, ang usa ka bawtismadong Kristohanon kinsa sa mga katuigang dili pa dugay misugod sa paghunahuna nga iyang nadawat ang langitnong pagtawag angay mohimog mainampingon ug mainampoon kaayong pagpamalandong.

Maayong pangutan-on sa maong tawo ang iyang kaugalingon: ‘Ang uban ba nakaimpluwensiya kanako sa pag-abiabi sa ideya sa langitnong kinabuhi?’ Kini dili husto, kay walay gihatagan ang Diyos ug buluhaton sa pagpili sa uban alang sa maong pribilehiyo. Ang kiling sa maong paghanduraw dili maoy timaan nga dinihogan sa Diyos, ug siya dili magdihog sa mga sumusunod sa Gingharian pinaagi sa pagpahinabo kanila nga makadungog ug mga tingog uban ang mga mensahe mahitungod niana.

Tingali maayong pangutan-on nila ang ilang kaugalingon: ‘Sa wala pa mahimong usa ka Kristohanon, ako ba nalangkit sa pag-abuso sa droga? Nagagamit ba ako ug mga tambal nga makaapektar sa emosyon? Nagpatambal ba ako alang sa mga sakit sa hunahuna o sa emosyon?’ Ang pipila nag-ingon nga nakig-away una sila batok sa ilang gihunahuna nga langitnong paglaom. Ang uban nag-ingon nga sa usa ka higayon gikuha sa Diyos ang ilang yutan-ong paglaom ug sa kataposan gihatagan sila ug langitnong paglaom. Apan ang maong paagi maoy sukwahi sa pagpakiglabot sa Diyos. Dugang pa, ang pagtuo tino; kini segurado.​—Hebreohanon 11:6.

Maayong pangutan-on usab sa usa ka tawo ang iyang kaugalingon: ‘Gitinguha ko ba nga mahimong inila? Ako ba ambisyoso alang sa usa ka posisyon sa awtoridad karon o ingong usa sa mga hari ug mga saserdote uban kang Kristo?’ Sa unang siglo K.P., sa dihang ang katibuk-ang pagdapit gihimo aron makasulod ngadto sa langitnong Gingharian, dili tanang dinihogang mga Kristohanon nakabatog mga posisyon sa responsabilidad ingong mga membro sa nagamandong lawas o ingong mga ansiano o ministeryal nga mga alagad. Daghan maoy mga babaye, ug sila walay linain nga awtoridad; ni ang pagdihog sa espiritu naghatag ug tagsaong pagsabot sa Pulong sa Diyos, kay nakita ni Pablo nga kinahanglang tudloan ug tambagan ang pipila sa maong mga dinihogan. (1 Corinto 3:1-3; Hebreohanon 5:11-14) Kadtong gitawag alang sa langit dili maglantaw sa ilang kaugalingon nga prominenteng mga indibiduwal, ug wala nila hatagig pasiugda ang ilang pagkadinihogan. Hinunoa, ilang gipasundayag ang pagkamapaubsanon nga angay dahomon niadtong nakabaton “sa hunahuna ni Kristo.” (1 Corinto 2:16) Sila usab makaamgo nga ang matarong nga mga kinahanglanon sa Diyos kinahanglang maabot sa tanang mga Kristohanon, malangitnon ug yutan-on man ang ilang paglaom.

Ang pag-angkon nga tinawag alang sa langit dili mohatag sa usa ka tawo ug linain nga kapadayagan. Ang Diyos adunay usa ka paagi sa komunikasyon nga pinaagi niana siya nagatagana ug espirituwal nga pagkaon alang sa iyang yutan-ong organisasyon. (Mateo 24:45-47) Busa angay nga walay maghunahuna nga ang iyang pagkahimong dinihogang Kristohanon naghatag kaniyag kaalam nga labaw sa “dakong panon” nga may yutan-ong paglaom. (Pinadayag 7:9) Ang pagkadinihogan sa espiritu wala ipaila pinaagi sa kahanas sa pagsangyaw, sa pagtubag sa mga pangutana sa Kasulatan, o sa paghatag ug mga pakigpulong sa Bibliya, kay ang mga Kristohanon nga adunay yutan-ong paglaom makabuhat usab ug maayo niining mga bahina. Sama sa mga dinihogan, sila usab nagkinabuhi ug maayong Kristohanong mga kinabuhi. Alang sa maong butang, si Samson ug ang uban sa una-Kristohanong panahon nakabaton sa espiritu sa Diyos ug napuno sa kasibot ug pagsabot. Bisan pa, walay usa sa maong ‘dakong panon sa mga Saksi’ ang adunay langitnong paglaom.​—Hebreohanon 11:32-38; 12:1; Exodo 35:30, 31; Maghuhukom 14:6, 19; 15:14; 1 Samuel 16:13; Ezekiel 2:2.

Hinumdomi ang Nagapili

Kon ang usa ka isigkamagtutuo mosukna bahin sa langitnong pagtawag, ang usa ka tinudlong ansiano o ang ubang hamtong nga Kristohanon makahisgot niana uban kaniya. Apan ang usa ka tawo dili makahimog desisyon alang sa uban, ug si Jehova mao ang nagapaabot sa langitnong paglaom. Ang usa ka indibiduwal nga tinuod nga tinawag alang sa langit dili na kinahanglang mangutana pa sa iyang kaubang mga Kristohanon kon siya aduna nianang maong paglaom. Ang mga dinihogan “gianak pag-usab, dili sa binhi nga madunot ra, kondili sa binhi nga walay pagkadunot pinaagi sa pulong sa buhi ug walay kataposang Diyos.” (1 Pedro 1:23) Pinaagi sa iyang espiritu ug Pulong, ang Diyos nagtanom ug “binhi” nga maghimo sa indibiduwal nga “usa ka bag-ong binuhat,” nga adunay langitnong paglaom. (2 Corinto 5:17) Oo, si Jehova ang nagahimog pagpili.

Busa, sa dihang magtuon sa Bibliya uban sa mga bag-ohan, dili maayong isugyot nga mosulay sila sa paghukom kon tinawag ba sila alang sa langit. Apan komosta kon ang dinihogang Kristohanon makita nga dili-matinumanon ug gikinahanglan ang usa ka kapuli? Nan makataronganon nga mohinapos nga ihatag sa Diyos ang pagkatinawag sa langit ngadto sa usa ka tawo nga maayong panig-ingnan sa paghatag ug matinumanong pag-alagad sa atong langitnong Amahan sa daghan na kaayong katuigan.

Karong adlawa, ang pangunang pasiugda sa mensahe sa Diyos dili aron ang mga tawo mahimong mga membro sa langitnong pangasaw-onon ni Kristo. Hinunoa, “ang espiritu ug ang pangasaw-onon nagpadayon sa pag-ingon: ‘Umari ka!’” Kini maoy pagdapit alang sa kinabuhi sa usa ka yutan-ong paraiso. (Pinadayag 22:1, 2, 17) Ingong mga dinihogan nga nagapanguna niining buluhatona, sila nagapasundayag sa “mapaubsanong hunahuna” ug nagabuhat ‘aron matino ang ilang pagkatinawag ug pagkapili.’​—Efeso 4:1-3; 2 Pedro 1:5-11.