Adlaw sa Pagpanimalos sa Diyos

SUMALA sa nakita nato sa miaging artikulo, adunay daghang katarongan nganong daotan nga kita magtinguha sa pagpanimalos. Daotan kini kay sa kataposan, kini walay masulbad. Daotan kini kay kini magpalungtad sa panagkaaway inay maghiusa sa bugkos sa pagkahigala. Ug daotan kini kay kini makadaot sa usa nga naghambin sa mapanimaslon nga mga hunahuna.

Hinuon, ang labing dakong katarongan nga daotan ang tawhanong pagpanimalos makita diha sa mga pulong ni Moises ngadto sa Israel: “Si Jehova nga imong Diyos maoy Diyos nga maluluy-on.” (Deuteronomio 4:31) Sanglit maluluy-on man ang Diyos, angay nga kita magmaluluy-on sama kaniya. Giingnan ni Jesus ang iyang mga sumusunod: “Magmaluluy-on kamo, maingon nga maluluy-on ang inyong Amahan.”​—Lucas 6:36.

Bisan pa niana, ang Bibliya nagbatbat usab kang Jehova ingong usa ka “Diyos sa mga buhat sa pagpanimalos.” (Salmo 94:1) Gihisgotan ni propetang Isaias ang bahin sa “tuig sa maayong kabubut-on sa bahin ni Jehova” ug usab “ang adlaw sa pagpanimalos sa bahin sa atong Diyos.” (Isaias 61:2) Sa unsang paagi ang Diyos samang maluluy-on ug mapanimaslon? Ug kon sundogon nato ang kaluoy sa Diyos, nganong dili nato siya sundogon sa pagpanimalos?

Sa pagtubag sa unang pangutana, ang Diyos maluluy-on kay gihigugma niya ang katawhan, ug mopasaylo siya kutob sa iyang mahimo sulod sa labing dugay nga siya makahimo aron ang mga tawo mahatagan ug kahigayonan sa pagtul-id sa ilang daotang gawi. Daghan, sama kang apostol Pablo, nagpahimulos sa maong kaluoy. Apan ang Diyos mapanimaslon usab​—sa kahulogan nga ipatuman ang hustisya—​kay ang maong kaluoy may kinutoban. Sa dihang ang pipila nagpadayag nga dili gayod sila mag-usab sa ilang gawi, ipatuman sa Diyos ang hukom panahon sa gitawag nga iyang adlaw sa pagpanimalos.

Ingong tubag sa ikaduhang pangutana, dili, kita dili makataronganon nga mahimong mapanimaslon tungod kay ang Diyos manimalos. Si Jehova hingpit sa hustisya. Ang mga tawo dili. Makita sa Diyos ang tanang bahin sa usa ka butang ug kanunay mohimo sa matarong nga paghukom. Dili kita masaligan nga mobuhat niana. Kana ang hinungdan mitambag si Pablo: “Ayaw kamo pagpanimalos, mga hinigugma, kondili hatagig luna ang kapungot; kay nahisulat: ‘Ako ang panimalos; ako mobalos, nagaingon si Jehova.’” (Roma 12:19) Sa atong kaayohan, kinahanglang itugyan nato ang pagpanimalos diha sa mga kamot ni Jehova.

Nganong Adunay Adlaw sa Pagpanimalos?

Bisan pa niana, sa daghang bahin ang Bibliya nagaila nga gikinahanglan ang pagsingil sa di-mahinulsolong mga mamumuhat ug daotan. Pananglitan, si apostol Pablo mitagna nga ang Diyos, pinaagi kang Jesus, magpahamtang sa “panimalos niadtong wala makaila sa Diyos ug niadtong wala magmasinugtanon sa maayong balita mahitungod sa atong Ginoo si Jesus.” (2 Tesalonica 1:8) Kita may maayong mga katarongan sa pag-isip nga ugdang sa maong mga pulong. Ngano?

Sa usa ka bahin, kay ang kinabag-an karong adlawa nagpadayon sa pagsalikway sa pagkasoberano sa Maglalalang, sila wala magsunod sa iyang matarong nga mga balaod. Kon sila nagaangkon nga nagtuo sa Diyos o wala, ang ilang pamatasan tin-awng nagapakita nga wala sila mobati nga may tulubagon sa atubangan sa Diyos. Mapadapat kanilang tanan ang mga pulong sa salmista: “Nganong ang daotan wala magtahod sa Diyos? Siya nagaingon diha sa iyang kasingkasing: ‘Ikaw dili maningil.’” (Salmo 10:13) Segurado, dili itugot ni Jehova nga siya pagabiaybiayon niining paagiha. Bisan tuod siya usa ka Diyos sa gugma, siya usab usa ka Diyos sa hustisya. Pamation niya ang mga pagpatuwaw niadtong tinuod nga mabalak-on sa hustisya: “Tumindog ka, Oh Jehova. Oh Diyos, bakyawa ang imong kamot. Ayaw hikalimti ang mga sinakit.”​—Salmo 10:12.

Dugang pa, ang katawhang wala magsunod sa balaod nagadaot sa yuta mismo nga atong gipuy-an. Gihugawan nila ang hangin, ang yuta, ug ang tubig; gipuno nila ang yuta sa inhustisya ug kapintasan. Ug gitumpok nila ang igong kemikal, nukleyar, ug ubang makapatayng armas nga nagpameligro sa paglahutay sa katawhan. Gikinahanglan nga mosalga ang Diyos aron matino ang seguradong kaugmaon sa masinugtanong katawhan. (Pinadayag 11:18) Ang maong pagsalga mao ang gitawag ni Isaias nga adlaw sa pagpanimalos.

Unsay Malampos sa Adlaw sa Pagpanimalos sa Diyos?

Sumala sa Vine’s Expository Dictionary of Old and New Testament Words, sa Gregong Kasulatan, ang pulong alang sa panimalos, sa gigamit maylabot sa Diyos, sa literal nagkahulogang “‘kanang nagsumikad sa hustisya,’ dili, nga sama kasagaran sa tawhanong panimalos, gumikan sa pagbati sa pagkamadinaoton o gumikan lamang sa kasuko.” Busa, ang pagpanimalos sa Diyos batok sa iyang mga kaaway dili unya usa ka panahon sa di-kontrolado nga pag-ula sa dugo, sama sa usa ka personal nga pagpanimalos. “Si Jehova nahibalo kon unsaon sa pagluwas sa mga tawong diyosnon gikan sa pagsulay, ug sa pagtagana sa mga tawong dili matarong alang sa paghukom aron pagaputlon,” nagatug-an kanato ang Bibliya.​—2 Pedro 2:9.

Ang mga alagad sa Diyos nagapanglantaw sa adlaw sa pagpanimalos sa Diyos ingong usa ka panahon sa dihang mabayaw ang matarong nga gawi ug ang mga matarong pagaluwason gikan sa pagdaogdaog sa mga daotan. Wala kini magkahulogan nga sila daotag tuyo o mapanimaslon. “Siya nga malipay sa katalagman sa lain dili mahigawas sa silot,” nagapasidaan ang Bibliya. (Proverbio 17:5) Sa kasukwahi, giugmad nila ang kaluoy ug kahangawa, nga nagatugyan sa mga desisyon mahitungod sa pagpanimalos ngadto sa Diyos.

Tinuod, dili sayon sa mga tawong nasuko ang paglihok niining paagiha. Apan posible kini, ug daghan ang naghimo niana. Pananglitan, si Pedro may masulob-ong panahon sa pagkabata pa ug sagad mabunalan sa iyang magulang nga lalaki. Mao nga sa pagkadako niya siya nahimong mapintason, nga nahimong suliran sa mga polis ug iyang gipanghimungtan ang iyang asawa ug mga anak. Sa kataposan, namati siya sa usa sa mga Saksi ni Jehova ug sa ulahi misugod sa pagtuon sa Bibliya. “Sa tabang ni Jehova,” siya miasoy, “ako nagbag-o, ug karon, inay makig-away sa mga tawo, gitabangan ko sila ingong usa ka Kristohanong ansiano.” Sa tabang sa Bibliya ug sa balaang espiritu, ang di-maihap nga uban pa susamang nagbag-o gikan sa pagkamapanimaslon ngadto sa pagpakitag gugma ug pailob sa uban.

Unsay Imong Buhaton?

Ang paghinumdom kanunay sa pag-abot sa adlaw sa pagpanimalos sa Diyos motabang nato sa pagpahimulos sa pailob ni Jehova. Apan ang higayon sa pagbuhat niana dili ingong way-kinutoban. Sa dili madugay moabot na ang maong adlaw. Gipakita ni apostol Pedro nganong kini wala pa moabot: “Si Jehova dili hinayan mahitungod sa iyang saad, sumala sa pag-isip sa pila ka tawo sa pagkahinayan, kondili siya mapailobon kaninyo tungod kay dili niya buot nga may malaglag kondili buot niyang ang tanan mahidangat sa paghinulsol.”​—2 Pedro 3:9.

Nan, dinalian ang pagpangandam karon alang sa adlaw sa pagsingil sa Diyos pinaagi sa pagtuon sa Kasulatan ug pagpadapat sa tambag niana. Kana motabang nato sa pagsunod sa mga pulong sa salmista: “Biyai ang kasuko ug pasagdi ang kapungot; ayaw ipakita nga ikaw nanginit aron sa pagbuhat ug daotan. Kay ang mga mamumuhat ug daotan pagaputlon, apan ang mga nagalaom kang Jehova mao ang magapanunod sa yuta.”​—Salmo 37:8, 9.

[Hulagway sa panid 7]

Human sa adlaw sa pagpanimalos sa Diyos, ‘ang mga nagalaom kang Jehova magapanunod sa yuta’