Tawhanong “Bag-ong Kahikayan sa Kalibotan” Haduol Na?
1. Sa unsang paagi ang pangandoy alang sa dugang politikal nga kagawasan gipadayag sa ulahing mga katuigan?
KARONG adlawa, minilyon sa katawhan nabilanggo sa bakak nga relihiyon, ug daghan mipili sa pagpabilin nianang paagiha. Sa samang panahon, dugang ug dugang nagpangita ug politikal nga kagawasan. Ang tagsaong panghitabo sa milabayng pipila ka tuig sa Sidlakang Uropa, ug sa laing dapit nagpasundayag nga ang mga tawo gusto ug mas gawasnong mga porma sa kagamhanan. Ingong sangpotanan, daghan ang nagasulti nga ang usa ka bag-ong yugto sa kagawasan haduol na. Ang presidente sa Tinipong Bansa nagtawag niini nga “usa ka bag-ong kahikayan sa kalibotan.” Sa pagkatinuod, ang mga pangulo sa kalibotan sa tanang dapit nagsulti nga ang Bugnawng Gubat ug ang lumba sa armas natapos na ug usa ka bag-ong yugto sa kalinaw miabot sa katawhan.—Itandi ang 1 Tesalonica 5:3.
2, 3. Unsang mga kahimtang ang nagalihok batok sa tinuod nga kagawasan?
2 Apan, bisan pag ang tawhanong mga paningkamot mosangpot sa diyutay nga mga armas ug mas libreng mga porma sa pagmando, ang tinuod bang kagawasan molungtad gayod? Dili, tungod sa makalilisang nga mga suliran nga nagalungtad diha sa tanang kanasoran, lakip ang mga demokratiko, diin ang gidaghanon sa mga kabos nagausbaw ug minilyon nagkinabuhi nga kakha-tuka. Usa ka taho sa Hiniusang Kanasoran nagabatbat nga bisan pa sa mga kauswagan sa siyensiya ug medisina, matag adlaw sa tibuok kalibotan ang aberids nga 40,000 ka mga bata mamatay gumikan sa dili hustong pagkaon o masanta unta nga mga sakit. Usa ka batid dinhing natara nag-ingon: “Ang kawalad-on nagabaton ug mga kinaiyahan nga magpameligro sa kaugmaon sa katawhan.”
3 Dugang pa, mas daghang tawo kaysa kaniadto ang nabiktima sa mga krimen nga dugang ug dugang nga nagkadaotan. Ang rasanhon, politikal, ug relihiyosong mga pagdumot nagabungkag sa daghang mga nasod. Sa pila ka mga dapit ang kahimtang dili layo gikan nianang umaabot nga panahon nga gihubit sa Zacarias 14:13, sa dihang ang katawhan “nalibog ug nahadlok kaayo nga ang matag-usa mosakmit ug moatake sa tawo nga duol kaniya.” (Today’s English Version) Ang pag-abuso sa droga ug mga sakit nga napasa sa pakigsekso maoy kaylap kaayo. Minilyon sa katawhan ang natakdan sa AIDS; sa Tinipong Bansa lamang, kapin sa 120,000 ang namatay gumikan niana.
Pagkabilanggo sa Sala ug Kamatayon
4, 5. Walay sapayan sa mga kagawasan nga nagalungtad karong adlawa, unsang matang sa pagkabilanggo ang nagkupot sa tanan sa iyang kamot?
4 Hinoon, bisan pag walay naglungtad nianang daotang mga kahimtang, ang katawhan sa gihapon walay tinuod nga kagawasan. Ang tanan sa gihapon binilanggo. Nganong ingon man niini? Sa pag-ilustrar: Unsa man kon ang usa ka diktador mag-ulipon sa matag tawo sa yuta ug patyon silang tanan? Sa pagkatinuod, kana ang nahitabo sa katawhan sa dihang ang atong unang mga ginikanan mirebelde batok sa Diyos ug naulipon sa madaogdaogong pagmando sa Yawa.—2 Corinto 4:4.
5 Sa dihang gilalang sa Diyos ang mga tawo, iyang katuyoan nga sila mabuhi sa walay kataposan sa yuta sa kahingpitan, sa usa ka paraiso, sama sa gipakita sa Genesis kapitulo 1 ug 2. Apan tungod sa pagrebelde sa atong unang amahan nga si Adan batok sa Diyos, tanan kita napailalom sa silot sa kamatayon gikan sa yugto nga kita gisamkon: “Pinaagi sa usa ka tawo [si Adan, ulo sa tawhanong pamilya] ang sala misulod sa kalibotan ug ang kamatayon pinaagi sa sala, ug busa ang kamatayon mikuyanap ngadto sa tanang tawo.” Sama sa ginaingon sa Bibliya, “ang kamatayon nagmando ingong hari.” (Roma 5:12, 14) Busa walay sapayan kon unsa ka dako sa kagawasan ang tingali sa personal atong nabatonan, tanan kita nabilanggo sa sala ug kamatayon.
6. Nganong diyutay lang ang kauswagan sa gitas-on sa kinabuhi sukad ang Salmo 90:10 gisulat?
6 Dugang pa, ang kinabuhi nga atong nabatonan karon limitado kaayo. Gani alang sa mga bulahan, kini mao lamay mga pipila ka dekada. Alang sa alaot, pipila lamang ka tuig, o ubos pa. Ug usa ka bag-ong pagtuon nag-ingon: “Ang siyensiya ug medisina nakatulod sa gitas-on sa kinabuhi sa tawo ngadto sa iyang kinaiyanhong kinutoban.” Kini mao tungod kay ang atong sistema henetiko dili hingpit ug ang kamatayon natukod nganha niana ingong sangpotanan sa sala ni Adan. Pagkamakasubo nga kon kita mabuhi hangtod 70 o 80, sa dihang kita unta nahimong mas maalamon ug labawng makaarang sa pagtagamtam sa kinabuhi, ang atong kalawasan magkadaot ug kita mosangko ingong abog!—Salmo 90:10.
7. Nganong ang mga tawo dili gayod mahimong tinubdan sa tinuod nga mga kagawasan nga atong gusto ug gikinahanglan?
7 Unsang matanga sa tawhanong pagmando ang makapugong niining pagkaulipon sa sala ug kamatayon? Walay mausa. Walay opisyales sa kagamhanan, siyentipiko, o doktor bisag asa ang makapahigawas kanato gikan sa tunglo sa sakit, pagkatigulang, ug kamatayon, ni si bisan kinsa makawala sa kawalay-seguridad, inhustisya, krimen, gutom, ug kawalad-on. (Salmo 89:48) Bisag unsa tingali ka maayog-katuyoan ang mga tawo, imposible nga sila mahimong tinubdan sa tinuod nga mga kagawasan nga atong gusto ug gikinahanglan.—Salmo 146:3.
Dili Hustong Paggamit sa Kaugalingong Pagbuot
8, 9. Unsa ang nagbutang sa katawhan sa iyang presenteng masulob-ong kahimtang?
8 Ang tawhanong pamilya anaa ning masulob-ong kahimtang tungod kay si Adan ug si Eva migamit sa dili husto sa ilang kaugalingong pagbuot. Ang 1 Pedro 2:16 nag-ingon, sumala sa The Jerusalem Bible: “Paggawi sama sa mga tawong may kagawasan, ug ayaw gayod gamita ang inyong kagawasan ingong pasangil alang sa pagkadaotan.” Busa, tataw nga ang Diyos wala magtuyo nga ang tawhanong kagawasan walay kinutoban. Kini pagagamiton sulod sa mga utlanan sa mga balaod sa Diyos, nga maoy matarong ug magapahinabog kaayohan sa tanan. Ug kadtong mga utlanan may igong gilapdon sa pagtugot sa daghang personal nga kagawasan sa pagpili, mao nga ang pagmando sa Diyos dili gayod mahimong mapit-oson.—Deuteronomio 32:4.
9 Ugaling, ang atong unang mga ginikanan mipili sa paghukom alang sa ilang kaugalingon kon unsay husto ug kon unsay sayop. Sanglit sa tinuyo sila migawas sa pagmando sa Diyos, iyang gibakwi ang iyang pag-alima kanila. (Genesis 3:17-19) Sa ingon sila nahimong dili hingpit, uban sa sakit ug kamatayon nga misangpot. Inay sa kagawasan, ang katawhan naulipon sa sala ug kamatayon. Sila usab napailalom sa kapritso sa dili-hingpit ug, subsob, mapintas tawhanong mga magmamando.—Deuteronomio 32:5.
10. Sa unsang paagi si Jehova sa kamahigugmaon midumala sa mga butang?
10 Ang Diyos nagtugot sa katawhan niining eksperimento sa kunohay bug-os nga kagawasan alang lamang sa limitadong yugto sa panahon. Siya nahibalo nga ang mga sangpotanan magpasundayag nga dili na kaduhaduhaan nga ang tawhanong pagmando nga independente gikan sa Diyos dili molampos. Sanglit ang kaugalingong pagbuot, kon husto ang pagkagamit, maoy usa ka bahandi, ang Diyos sa iyang gugma nagtugot sa temporaryo sa nahitabo inay kay bawion ang gasa sa kaugalingong pagbuot.
‘Ang Tawo Dili Makatultol sa Iyang Lakang’
11. Sa unsang paagi ang kasaysayan nagpamatuod sa katukma sa Bibliya?
11 Ang talaan sa kasaysayan nagpakita sa katukma sa Jeremias kapitulo 10, mga bersikulo 23 ug 24, nga nagaingon: “Wala sa tawo nga nagalakaw ang bisan pagtultol sa iyang lakang. Sawaya ako, O Jehova.” Ang kasaysayan nagpakita usab sa katukma sa Ecclesiastes 8:9, nga nagapahayag: “Ang tawo nagagahom sa tawo sa iyang kadaotan.” Pagkatinuod! Ang tawhanong pamilya nakasinati sa sunodsunod nga kalamidad, nga ang kataposan sa tanan mao ang lubnganan. Ang apostol nga si Pablo sa way sipyat naghubit sa kahimtang sa dihang siya nag-ingon, sama sa natala sa Roma 8:22: “Nahibalo kita nga ang tibuok kabuhatan nanagduyog sa pag-agulo ug may kasakitan hangtod karon.” Oo, ang pagkaindependente gikan sa mga balaod sa Diyos malaglagon.
12. Unsa ang gikasulti sa pipila ka sekular nga mga tinubdan mahitungod sa bug-os nga kagawasan?
12 Ang librong Inquisition and Liberty mikomento bahin sa kagawasan niining paagiha: “Ang pagkaindependente, sa iyang kaugalingon, dili kinahanglan nagpasabot sa kaayo: kini dili butang nga ikapasigarbo nga walay dugang kinutoban sa kahulogan. Sa pagkatinuod, kini lagmit, sa yano usa sa pinakaubos nga mga porma sa kadalo . . . Ang tawo dili, ug dili gani makapangandoy nga walay pagkabinuang, nga mahimong bug-os independente nga linalang.” Ug si Prinsipe Philip sa Inglaterra kas-a miingon: “Ang kagawasan sa pagpatuyang sa bisan unsa nga kapritso ug kinaiyanhong kiling tingali madanihon, apan ang kasinatian nagatudlo kanato usab ug usab, nga ang kagawasan nga walay pagpugong sa kaugalingon . . . ug panggawi nga walay pagtagad sa uban mao ang labing tino nga paagi sa paglaglag sa kalidad sa kinabuhi sa usa ka katilingban, bisag unsa pa ang bahandi niini.”
Kinsa ang Labawng Nahibalo?
13, 14. Kinsa lamang ang makatagana ug tinuod nga kagawasan alang sa tawhanong pamilya?
13 Kinsay nahibalog maayo kon sa unsang paagi ang panimalay angay nga organisahon—ang mahigugmaon, may katakos, sinati nga mga ginikanan o batan-ong mga anak? Ang tubag maoy dayag. Sa susama, ang Maglalalang sa katawhan, ang atong langitnong Amahan, nahibalo kon unsay maayo alang kanato. Siya nahibalo kon sa unsang paagi ang tawhanong kapunongan angay nga organisahon ug mandoan. Siya nahibalo kon sa unsang paagi ang kaugalingong pagbuot angay nga latiran sa pagdalag mga kaayohan sa tinuod nga kagawasan alang sa tanan. Ang labing gamhanan lamang nga Diyos, si Jehova, ang nahibalo kon sa unsang paagi ipalingkawas ang tawhanong pamilya sa iyang pagkabilanggo ug itagana ang tinuod nga kagawasan alang sa tanan.—Isaias 48:17-19.
14 Diha sa iyang Pulong, sa Roma 8:21, si Jehova naghimo ning makapadasig nga saad: “Ang kalalangan mismo usab mahimong mapahigawas gikan sa kaulipnan sa pagkadunot ug magbaton sa mahimayaong kagawasan sa mga anak sa Diyos.” Oo, ang Diyos nagsaad sa pagpahigawas sa bug-os sa tawhanong pamilya gikan sa iyang presenteng alaot nga kahimtang. Ang mosunod nga artikulo mohisgot kon sa unsang paagi kini mahitabo.
Sa Unsang Paagi Nimo Tubagon?
(Pagsubli sa mga panid 3 hangtod sa 8)
◻ Nganong ang mga tawo gusto kaayo ug kagawasan?
◻ Sa unsang mga paagi ang mga tawo nahimong ulipon sa tibuok kasaysayan?
◻ Nganong si Jehova nagtugot sa dili hustong paggamit sa kaugalingong pagbuot sa ingon kataas nga panahon?
◻ Kinsa lamang ang makadala ug tinuod nga kagawasan sa katawhan, ug ngano?
[Hulagway sa panid 7]
Ang gitas-on sa kinabuhi sa tawo sama ra sa gisaysay mga 3,500 ka tuig nga miagi sa Salmo 90:10
[Credit Line]
Kortesiya sa The British Museum