Miuswag nga mga Kalihokan Panahon sa Presensiya ni Kristo
“Unya ang hari magaingon kanilang anaa sa iyang tuo, ‘Umari kamo, kamong gipanalanginan sa akong Amahan, panunda ninyo ang gingharian nga naandam alang kaninyo sukad sa pagkatukod sa kalibotan.’”—MATEO 25:34.
1. Sa unsang paagi ang pa·rou·siʹa ni Kristo maoy sama gayod sa “mga adlaw ni Noe”?
PRESENSIYA ni Kristo—ang dugayng-gipaabot nga hitabo! Ang panahong sama “sa mga adlaw ni Noe,” nga gihisgotan ni Jesus may kalabotan sa “konklusyon sa sistema sa mga butang,” miabot sa tuig 1914. (Mateo 24:3, 37) Apan unsa ang kahulogan sa presensiya, o pa·rou·siʹa ni Kristo, alang sa dinihogang nahibilin sa “matinumanon ug maalamong ulipon”? (Mateo 24:45) Aw, nga sila sa mauswagon labi pang magmaaktibo ingong mga tigdala sa kahayag! Ang kahibulongang mga butang mahitabo pa! Ang walay-samang buluhaton sa pagpanigom hapit nang magsugod.
2. Unsang paghinlo ang nahitabo ingong katumanan sa Malakias 3:1-5?
2 Nahauna, hinunoa, kinahanglang mahinloan kining dinihogang mga Kristohanon. Sumala sa natagna sa Malakias 3:1-5, si Jehova nga Diyos ug ang iyang “sinugo sa pakigtugon,” si Jesu-Kristo, ming-abot sa pagsusi sa espirituwal nga templo sa tingpamulak sa 1918. Ang paghukom magsugod diha sa “balay sa Diyos.” (1 Pedro 4:17) Ang Malakias 3:3 mitagna: “Siya [Jehova] molingkod ingong usa ka mag-uulay ug maghihinlo sa salapi ug kinahanglang maghinlo sa mga anak ni Levi; ug kinahanglang sila iyang ulayon ingon sa bulawan ug ingon sa salapi.” Kadto usa ka yugto sa pag-ulay ug paghinlo.
3. Nganong kinahanglang mahitabo ang espirituwal nga paghinlo?
3 Sa paglabang sa maong paghukom, nga miabot sa tayuktok niadtong 1918, ang nahibilin sa ulipong matang nahinloan gikan sa kalibotanon ug relihiyosong kahugawan. Nganong si Jehova naghinlo man kanila? Tungod kay nalangkit ang iyang espirituwal nga templo. Kini mao ang samag-templong kahikayan sa pagsimba kang Jehova pinasukad sa magpasig-uling halad ni Jesu-Kristo. Gusto ni Jehova nga ang iyang templo anaa sa mahinlong kahimtang aron inigsulod didto sa daghang magsisimba nga may yutan-ong paglaom, ilang makaplagan ang usa ka dapit diin gitahod ang iyang unibersohanong pagkasoberano, diin gibalaan ang iyang balaang ngalan, ug diin gisugot ang iyang matarong nga mga balaod. Busa, makaapresyar sila kang Jehova ug mokuyog sa pagpahibalo sa iyang kahibulongang mga katuyoan.
Dugang nga mga Pribilehiyo
4, 5. (a) Sa unsang paagi ang usa ka pangutana ni Jesu-Kristo nagahagit sa ulipong matang karong adlawa? (b) Sa unsang mga paagi pagasabton ang mga ekspresyong “matinumanon ug maalamong ulipon” ug “iyang mga sulugoon”? (c) Unsang sugo ang gihatag ni Jesus ngadto sa ulipon?
4 Niadtong 1919 ang nahinloan nga ulipong matang nakapanan-aw na sa kanunay-mauswagong mga kalihokan. Balik sa 1914, si Jesu-Kristo, ang ilang Agalon, nakabaton sa usa ka langitnong Gingharian. Sa dihang mibalik siya sa mga magbubuhat sa iyang panimalay aron susihon ang iyang tanang “mga sulugoon sa panimalay,” nabestihan siya ug harianong kahalangdon, nga wala niya maangkon sa dinhi pa siya sa yuta. Unsa ang iyang nakaplagan? Ang ulipong matang ba puliking nagaatiman sa intereses sa Agalon? Sumala sa nahisulat sa Mateo 24:45-47, si Jesus misukna sa usa ka pangutanang nag-obligar sa matag dinihogang tinun-an sa pagsusi sa personal niyang debosyon ngadto sa Mesiyas ni Jehova: “Kinsa ba gayod ang matinumanon ug maalamong ulipon si kinsa gitudlo sa iyang agalon ibabaw sa iyang mga sulugoon, sa paghatag kanila sa ilang pagkaon sa hustong panahon? Malipayon ang maong ulipon kon inig-abot sa iyang agalon hikaplagan siyang nagabuhat sa ingon. Sa pagkamatuod ako magaingon kaninyo, Iyang igatudlo siya ibabaw sa tanan niyang kabtangan.”
5 Dayag, ang kabatbatan ni Jesus nianang matinumanong ulipon dili mohaom kang bisan kinsang tawo. Dili, apan kana nagbatbat sa matinumanon dinihogang kongregasyon ni Kristo ingong tibuok, ingong usa ka grupo. Ang mga sulugoon mao ang dinihogang mga sumusunod ni Kristo nga tinagsatagsa. Nasayod si Jesus nga iyang paliton ang maong mga dinihogan pinaagi sa iyang kaugalingong dugo, mao nga haom niyang ginganlan sila sa katibuk-an nga iyang ulipon. Ang 1 Corinto 7:23 nag-ingon mahitungod kanila: “Kamo [sa paghisgot sa katibuk-an] napalit sa usa ka bili; hunong na kamo pagkahimong mga ulipon sa mga tawo.” Gisugo ni Jesus ang iyang ulipong matang sa pagpasidlak sa ilang kahayag sa pagdani ug paghimog ubang mga tinun-an ug sa pagpakaon nga mauswagon sa iyang mga sulugoon pinaagi sa paghatag kanila sa ilang espirituwal nga pagkaon sa hustong panahon.
6. Sa unsang paagi ang ulipon nagantihan ingong resulta sa pagsusi ni Jesus?
6 Sukad sa pagsugod sa presensiya ni Kristo ug hangtod sa 1918, ang ulipong matang, bisan pa sa pagkadili-popular, paglutos, ug bisan sa pila ka kagubot, nagtinguha sa paghatag sa husto-sa-panahong pagkaon ngadto sa mga sulugoon. Kini ang nakaplagan sa Agalon sa pagsugod sa iyang pagsusi. Nahimuot ang Ginoong Jesus, ug niadtong 1919 iyang gipahayag nga malipayon ang maong matinumanon nauyonang ulipong matang. Unsa ang kahimut-anang ganti sa ulipon tungod sa pagbuhat kon unsay gitudlo kaniya sa iyang Agalon nga pagabuhaton? Usa ka promosyon! Oo, dagko pang mga responsabilidad ang gihatag sa pagpauswag sa intereses sa iyang Agalon. Sanglit ang Agalon sa maong panahon usa na ka langitnong Hari, nan, ang iyang yutan-ong mga kabtangan nahimong labaw pang bililhon.
7, 8. (a) Unsa ang ‘tanang kabtangan’ sa Agalon? (b) Unsay giobligar sa ulipon aron mabatonan ang pagbulot-an ibabaw sa maong mga kabtangan?
7 Busa, unsa ba “ang tanan niyang kabtangan”? Kini mao ang tanang espirituwal nga katigayonan sa yuta nga nahimong propiedad ni Kristo maykalabotan sa iyang awtoridad ingong langitnong Hari. Kini tinong naglakip sa sugo sa paghimog mga tinun-an ni Kristo, uban sa dakong pribilehiyo sa pagsilbing mga hawas sa natukod nga Gingharian sa Diyos ngadto sa tanang nasod sa kalibotan.
8 Ang maong promosyon sa pagdumala sa tanang kabtangan sa Agalon nag-obligar sa ulipong matang sa paghatag sa dugang panahon ug pagtagad sa pagpalampos sa Gingharianong buluhaton ug, oo, pagtukod ug mas dagkong mga pasilidad alang sa maong buluhaton. Kini karon adunay labi pang dakong kanataran nga pagatikaron—ang tibuok gipuy-ang yuta.
Pagpanigom sa mga Karnero
9. Unsay misangpot sa pag-uswag sa mga kalihokan sa ulipon?
9 Nan, sa masinugtanon ang matinumanon ug maalamong ulipong matang ni Kristo nagpauswag sa iyang mga kalihokan. Ang resulta? Ang kataposang mga membro sa dinihogang 144,000 natigom na. Unya ang panan-awon ni Juan sumala sa nahitala sa Pinadayag 7:9-17 nahimong makapaukyab, makapadasig nga kamatuoran. Ilabina sukad sa 1935 ang ulipong matang nagkahimuot sa pagtan-aw sa inanayng pagpadayag sa katumanan sa maong panan-awon. Gikan sa tibuok yuta, “ang usa ka dakong panon” nga karon minilyon na nagdasok sa dapit sa espirituwal nga templo ni Jehova ingong iyang mga magsisimba. Ang manulonda ni Jehova nagsulti kang Juan nga walay tawo ang makaihap sa maong dakong panon. Kana nagkahulogang walay gibutang nga limitasyon sa gidaghanon sa mga tawong tigomon sa ulipong matang ngadto sa espirituwal nga templo ni Jehova. Samtang bukas ang dalan, magpadayon ang buluhaton sa pagtigom kanila.
10. Sa unsang mahigugmaong kalihokan nalangkit ang ulipon karong adlawa?
10 Ang matinumanong ulipong matang adunay bug-at nga responsabilidad sa pag-atiman sa kanunay nagauswag nga gidaghanon sa “ubang mga karnero,” kay nasayod nga ang maong mga samag-karnero gikan sa tanang nasod minahal kaayo sa Agalon, si Jesus. Sa pagkatinuod sila maoy iyang panon. (Juan 10:16; Buhat 20:28; 1 Pedro 5:2-4) Busa tungod sa gugma alang sa Agalon ug sa mga karnero, ang ulipong matang malipayong nagaatiman sa espirituwal nga mga panginahanglan sa dakong panon.
11-13. Unsang angay nga komento ang gipahayag sa presidente kaniadto sa Watch Tower Society mahitungod sa kalihokan sa ulipon?
11 Oo, ang mas dakong bahin sa nagdala-sa-kahayag nga buluhaton sa ulipon naglangkit sa pagtigom niining yutan-ong mga ginsakpan sa Gingharian sa Diyos. Sa paghisgot sa kanunay-nagauswag nga mga kalihokan sa matinumanong ulipon, si F. W. Franz, niadto presidente sa Watch Tower Society, miingon una pa gayod sa iyang pagkamatay niadtong Disyembre 1992:
12 “Si Jesu-Kristo nagagamit sa organisasyon sa dugang ug dugang kahibulongang paagi sa tanang panahon, sumala sa akong 99 anyos nga kasinatian sa kinabuhi. Dili lamang tawo ang nagadumala sa organisasyon, apan mao gayod ang Ginoong Jesu-Kristo. Kay kini nagmalamposon nga labaw pang talagsaon ug kahibulongan kay sa atong gipalandong sukad. Karong adlawa kita adunay usa ka organisasyon nga nakakaylap sa tibuok kalibotan. Kini nagalihok sa Amihanang Hemispera ug sa Habagatang Hemispera, sa Sidlakan ug sa Kasadpan. Usa lamang ka persona ang mahimong responsable niining dalayegong pag-uswag—ang Anak sa Diyos, kinsa mao ang nagatultol sa matinumanon ug maalamong ulipon nga matang. Siya nagatuman sa iyang mga responsabilidad, ug kini ang hinungdan niining dakong pag-uswag nga atong nasaksihan.
13 “Kana dili mahimo sa usa ka tawo. Kita adunay usa ka organisasyon nga teokratikanhon, ug nagalihok kini sa teokratikanhong paagi, sa tinultolan-sa-Diyos nga paagi. Dili tawo, dili bisan ang magtutukod sa Watch Tower Bible and Tract Society, ang makaangkon o mapasidunggan sa responsabilidad sa kon unsay nalampos sa tibuok yuta. Kini yanong kahibulongan.” Dili ba kadtong sakop sa dakong panon sa bug-os kasingkasing uyon sa maong mga pagbati ni anhing Igsoong Franz? Oo, sa pagkatinuod, sila labing mapasalamaton tungod sa miuswag nga mga kalihokan sa matinumanong ulipon.
Mga Sakop sa Gingharian
14, 15. (a) Unsay gihulagway ni Jesus diha sa sambingay sa mga talento (Mateo 25:14-30)? (b) Sa kahaom, unsay misunod diha sa Mateo kapitulo 25?
14 Sa Mateo kapitulo 25, ang sambingay ni Jesus mahitungod sa mga karnero ug mga kanding nagbatbat niining dakong buluhaton sa pagtigom sa yutan-ong mga sakop sa Gingharian sa Diyos. Sa sambingay nga nauna niana, ang bahin sa mga talento, gihulagway ni Jesus nga ang dinihogang mga tinun-an nga naglaom nga maghari kauban niya sa iyang langitnong Gingharian kinahanglang magbuhat sa pagpauswag sa iyang yutan-ong mga kabtangan. Nan, haom gayod, sa mosunod nga sambingay, gihulagway ni Jesus kon unsay gikinahanglan niadtong buot mahimong mga sakop sa iyang langitnong Gingharian.
15 Matikdi ang iyang mga gipahayag sa Mateo 25:31-33: “Inig-abot sa Anak sa tawo diha sa iyang himaya, ug ang tanang manulonda uban kaniya, unya siya molingkod sa iyang mahimayaong trono. Ug ang tanang nasod pagatigomon sa iyang atubangan, ug iyang pagalainon ang katawhan gikan sa usag usa, sama sa paglain sa usa ka magbalantay sa mga karnero gikan sa mga kanding. Ug iyang igabutang ang mga karnero sa iyang tuong kamot, apan ang mga kanding sa iyang wala.”
16. Sa unsang paagi ang mga nasod natigom ug ang katawhan gilain?
16 Si Jesus miabot sa iyang himaya niadtong 1914. Nga nanguna sa paglihok, siya, kauban sa tanan niyang manulonda, miatake ug mipalagpot sa iyang demonyong mga kaaway gikan sa langit. Ang butang misunod diha sa iyang sambingay motabang nato sa pag-ila nga ang paglingkod ni Jesus diha sa mahimayaong trono naghawas sa katungdanan sa paghukom panahon sa iyang presensiya. Ang pagtigom sa tanang nasod sa iyang atubangan nagkahulogang si Jesus nagalihok maylabot sa kanasoran ingong iyang umaabot nga panon, sa masambingayong pagkasulti. Kini usa ka panon nga gilangkoban sa mga karnero ug mga kanding. Samtang mokabat tingalig bahin sa usa ka adlaw ang paglain sa mga karnero gikan sa mga kanding sa usa ka literal nga panon, ang tibuok-yutang paglain sa mga tawong may kagawasan sa pagpili sa matarong ug daotan mokabat sa mas taas pang panahon. Kini tungod kay ang paglain gibase sa binuhatan sa matag tawo.
17. Nganong ang kahimtang karong adlawa seryoso alang sa tanang katawhan?
17 Sa sambingay, ang Magbalantay-Hari nagabutang sa mga samag-karnero sa iyang tuong kamot ug sa mga samag-kanding sa iyang wala. Ang tuong-kamot nga kiliran mosangpot nga usa ka paghukom nga may maayong sangpotanan—ang kinabuhing walay kataposan. Ang walang-kamot nga kiliran naghawas sa dili-maayong paghukom—ang kalaglagan sa walay kataposan. Ang pagtino sa Hari bahin niana adunay seryosong mga sangpotanan.
18. Nganong ang pagkadili-makita sa Hari dili magpalingkawas kang bisan kinsa?
18 Ang pagkadili-makita sa nagaharing Anak sa tawo panahon sa iyang presensiya, o pa·rou·siʹa, dili makapalingkawas kang bisan kinsa. Dugang ug dugang nga mga samag-karnero karong adlawa nagaduyog sa ulipong matang sa pagwali sa maayong balita sa Gingharian sa Diyos sa tibuok kalibotan, nga nagapasidlak sa ilang kahayag. Sa pagkatinuod, ang ilang pagwali nakaabot na sa tanang bahin sa yuta.—Mateo 24:14.
19. Unsang mga hiyas sa matang karnerohon ang gihulagway diha sa sambingay sa mga karnero ug sa mga kanding?
19 Nganong ang Magbalantay-Hari magaganti sa sakop sa karnerong matang sa binulahang kaugmaon? Tungod sa ilang tibuok-kasingkasing nga pagpaluyo sa buluhatong pagwali sa Gingharian ug sa kalulot nga ilang gipakita ngadto sa iyang dinihogang mga igsoon, nga giisip ni Jesus ingong gibuhat ngadto kaniya mismo. Busa, ang harianong Anak sa tawo nag-ingon kanila: “Umari kamo, kamong gibulahan sa akong Amahan, panunda ninyo ang gingharian nga naandam alang kaninyo sukad sa pagkatukod sa kalibotan.”—Mateo 25:34; 28:19, 20.
Pagtabang sa Hari
20, 21. Unsang ebidensiya ang ginahatag sa mga karnero nga sila nagabarog sa kiliran sa Gingharian?
20 Matikdi nga sa dihang ang Hari nagadapit niining mga karnero sa pagpanunod sa yutan-ong dominyo sa Gingharian sa Diyos, sila nagpahayag ug katingala. Sila nangutana kaniya: ‘Ginoo, kanus-a ba nga gibuhat namo kining tanang butang alang kanimo?’ Siya mitubag: “Sa pagkatinuod magaingon ako kaninyo, Sa gidak-on nga inyo kining gibuhat sa usa sa labing gamay niining akong mga igsoon, inyo kining gibuhat kanako.” (Mateo 25:40) Sa nagpakita si Jesus kang Maria Magdalena sa adlaw sa iyang pagkabanhaw, siya naghisgot bahin sa iyang mga igsoon sa espirituwal sa miingon siya kaniya: “Lumakaw ka ngadto sa akong mga igsoon.” (Juan 20:17) Sa panahon sa iyang dili-makitang presensiya, si Jesus may diyutay na lamang nga nahibilin sa iyang 144,000 espirituwal nga mga igsoon nga buhi pa sa yuta.
21 Sanglit dili man makita si Jesus diha sa kalangitan, maoy sa dili-laktod lamang nga paagi nga ang samag-karnerong mga tawo nagbuhat niining mahigugmaong mga butang ngadto kaniya. Sila makakita kaniya diha sa iyang trono pinaagi lamang sa ilang mga mata sa pagtuo. Gipabilhan ni Jesus ang tanang kahago nga gibuhat nila sa pagtabang sa espirituwal niyang mga igsoon, nga mahimong iyang langitnong mga isigka-manununod. Ang ginabuhat ngadto sa iyang mga igsoon giisip niya nga ginabuhat kaniya sa personal. Ang mga samag-karnero tinuyong nagabuhat ug maayo ngadto sa mga igsoon ni Kristo tungod kay sila nakaila kanila sa ingon. Ilang giila nga ang espirituwal nga mga igsoon ni Jesus mao ang mga embahador sa Gingharian ni Jehova, ug gusto nilang mohatag ug tinong ebidensiya nga sila nagabarog uban kanila sa kiliran sa maong Gingharian.
22. Sa unsang paagi ang matang karnerohon gigantihan? (Itandi ang Pinadayag 7:14-17.)
22 Nakita daan ni Jehova nga kanang samag-karnerong matang motungha karong panahona sa presensiya sa iyang Anak, ug siya adunay kahibulongang ganti nga nagpaabot kanila! Panundon sa dakong panon ang mga panalangin sa pakigdait dinhi sa yuta sa panahon sa malipayong Milenyong Pagmando sa Hari ni Jehova, si Jesu-Kristo.
23. Sa unsang mga paagi ang mga karnero sa tinuyo nagatabang sa mga igsoon sa Hari?
23 Sa dihang hisgotan nato ang mga tagna sa Bibliya nga mapadapat sa panahon sa presensiya ni Kristo, uban sa sambingay ni Jesus mahitungod sa mga karnero ug sa mga kanding, unsay makita nato? Kini: Ang pagkahimong karnero sa usa ka tawo nga adunay matarong nga kahimtang sa atubangan sa Diyos ug sa iyang Hari dili mao ang dili-tinuyo ug sulagmang pagbuhat ug maayo ngadto sa usa sa espirituwal nga mga igsoon sa Hari. Kadtong sakop sa matang nga karnero nahibalo sa ilang ginabuhat, bisan pag wala sila makakita sa nagamandong Hari pinaagi sa literal nilang mga mata. Naningkamot sila sa pagtabang sa mga igsoon sa Hari dili lamang sa materyal nga paagi apan sa espirituwal nga paagi usab. Sa unsang paagi? Pinaagi sa pagtabang kanila sa pagwali sa maayong balita sa Gingharian sa Diyos ug sa pagdumalag mga pagtuon sa Bibliya sa paghimog mga tinun-an alang kang Kristo. Busa, karong adlawa adunay kapig upat ka milyong nagadala-sa-kahayag nga mga magmamantala sa Gingharian sa Diyos.
Miuswag nga mga Kalihokan
24. Unsang mahigugmaong mga pagbudlay ang naghimo sa ulipong matang nga labing malipayong katawhan sa yuta karong adlawa?
24 Nganlan nato ang pipila sa daghang maayong binuhatan sa matinumanong ulipong matang. Una, ang ulipong matang natudlo sa pag-atiman sa tanang kabtangan sa Agalon—ang intereses sa iyang Gingharian sa yuta—ug nagpadayon sa pag-uswag ang maong mga kabtangan. Ikaduha, ang maong matang nagapakaon ug espirituwal nga pagkaon dili lamang sa dinihogang mga sulugoon sa panimalay kondili sa kanunay-nagdaghan nga dakong panon sa ubang mga karnero. Ikatulo, ang ulipon nga matang mao ang nagapanguna sa pagsabwag sa kahayag sa Gingharian. Ikaupat, ang kinadak-ang pag-uswag sa mga kalihokan niini maoy diha sa pagtigom sa dakong panon sa ubang mga karnero, nga nagadala kanila nganha sa espirituwal nga templo ni Jehova. Ikalima, ang ulipon nga matang, uban sa tibuok-kasingkasing nga pagpaluyo sa mga karnerohon, nagataganag gipadak-ang mga pasilidad alang sa mga organisasyon sa sangang-buhatan sa tibuok yuta, ingon man sa hedkuwarter sa Tinipong Bansa. Ang maong mahigugmaong mga kabudlay naghimo sa ulipong matang nga labing malipayong katawhan sa yuta karong adlawa, ug naghimo usab sa minilyon pang ubang katawhan nga malipayon. Silang tanan nagpasalamat kang Jehova nga Diyos ug kang Jesu-Kristo, kinsa maoy nagtultol sa miuswag nga mga kalihokan sa maalamong ulipon!
25. Sa unsang paagi ang mga karnero makapadayon sa pagpaluyo sa ulipon nga matang, nga may unsang palaaboton?
25 Ang ulipong matang karon labaw pang nagakugi diha sa tinudlo-sa-Diyos nga mga katungdanan. Ang panahong nahibilin una mosilaob ang “dakong kasakitan” duol nang matapos! (Mateo 24:21) Pagkahinungdanon nga silang mga karnero sa Diyos magpabilin sa tuong kiliran nga may pabor sa iyang Magbalantay-Hari! Busa, magpadayon tang tanan sa pagpaluyo nga madasigon sa matinumanon ug maalamong ulipon. Maoy pinaagi lamang sa pagbuhat niana nga sa dili madugay may adlaw rang ang tanang samag-karnero makaarang sa pagkadungog nianang malipayong mga pulong: “Umari kamo, kamong gipanalanginan sa akong Amahan, panunda ninyo ang gingharian nga naandam alang kaninyo sukad sa pagkatukod sa kalibotan.”
Makatubag Ka Ba?
◻ Unsang unang paghukom ang misunod sa pagkaentrono sa Hari?
◻ Sa unsang paagi ang Mateo 24:45-47 nagbaton ug modernong-adlawng katumanan?
◻ Mahitungod sa miuswag nga mga kalihokan, tungod sa unsa nga ang ulipon nga matang ug ang dakong panon labing mapasalamaton?
◻ Sa unsang paagi ang Mateo 25:34-40 natuman panahon sa pa·rou·siʹa?
[Hulagway sa panid 16]
Ang agalon nagpiyal sa tanan niyang kabtangan ngadto sa matinumanong ulipon
[Hulagway sa panid 18]
Si Jesus milingkod sa iyang mahimayaong trono aron sa paghukom sa katawhan