Sila Mapuangorong Nagaatiman sa Nating mga Karnero
SA TANANG mga hayop nga anad sa tawo, walay ingon ka maaghop kay sa binuhi nga karnero. Ang kadaghanang hayop may kusog ug mga kinaiyahan nga gikinahanglan sa pagpangitag pagkaon ug sa paglikay sa mga mananap nga motukob kanila, apan lahi ang karnero. Kini dali ra kaayong matukob sa mga manunukob, nga walay katakos sa pagdepensa sa kaugalingon. Kon walay magbalantay, ang karnero mahadlokon ug walay ikasarang. Kon mabulag gikan sa panon, dali kining mawala. Busa ang masunoron nga karnero adunay dakong katarongan nga mobati ug kasuod sa ilang magbalantay. Kon wala siya diyutay ra silag higayon nga mabuhi. Tungod niining mga kinaiyaha, mahulagwayong gigamit sa Bibliya ang karnero sa paglarawan ug inosente, dinagmalan, o walay depensa nga katawhan.
Sa pagkatinuod, ang suhol sa usa ka magbalantay hinagoan gayod. Ang iyang kinabuhi dili sayon. Siya maladlad sa kainit ug katugnaw, ug antoson niya ang mga gabiing walay katulog. Iyang panalipdan ang panon gikan sa mga manunukob, kasagaran sa iyang kaugalingong kadaot. Sanglit huptan man sa magbalantay nga dili magkabulag-bulag ang panon, ang dakong bahin sa iyang panahon magamit sa pagpangita sa karnero nga nahisalaag ug nawala. Iyang tambalan pa ang masakiton ug nasamdan. Ang kulang ug kalagsik o maluyahong mga nating karnero kinahanglang sakwaton. Anaa kanunay ang kabalaka bahin sa igong suplay sa pagkaon ug tubig. Kasagaran na sa usa ka magbalantay nga matulog sa tibuok gabii diha sa sibsibanan aron huptang luwas ang panon. Busa, ang pagkamagbalantay maoy malisod nga kinabuhi nga nagkinahanglan sa mga pag-alagad sa usa ka tawo nga maisog, kugihan, ug makalakihon. Labaw sa tanan, siya adunay katakos sa pagpakitag tinuod nga kabalaka alang sa panon nga gisalig diha kaniya.
Pagbantay sa Panon sa Diyos
Gilarawan sa Bibliya ang katawhan sa Diyos ingong masunorong mga karnero ug ang nagadumala kanila ingong mga magbalantay. Si Jehova mismo mao ‘ang magbalantay ug magtatan-aw sa atong mga kalag.’ (1 Pedro 2:25) Si Jesu-Kristo, “ang maayong magbalantay,” nagpahayag sa iyang tinguha nga ang mga karnero makadawat unta ug maluloy-ong pag-atiman sa dihang iyang giingnan si apostol Pedro: ‘Pakan-a ang akong nating mga karnero, tagda ang akong nating mga karnero, pakan-a ang akong nating mga karnero.’ (Juan 10:11; 21:15-17) Ang Kristohanong mga magtatan-aw gihatagag buluhaton sa ‘pagtagad sa kongregasyon sa Diyos.’ (Buhat 20:28) Ug ang ilang buluhaton ingong espirituwal nga mga magbalantay nagkinahanglan sa mga hiyas sa usa ka maayong literal nga magbalantay—pagkamaisogon, pagkamakugihon, pagkamakalakihon, ug, labaw sa tanan, kinasingkasing nga kabalaka alang sa kaayohan sa panon.
Sa mga adlaw sa propeta sa Diyos nga si Ezekiel, ang kadaghanan sa mga magbalantay nga gitudlo sa pag-atiman sa mga panginahanglan sa katawhan ni Jehova sa Israel napakyas sa pagtuman sa ilang mga katungdanan. Nag-antos sa hilabihan ang panon sa Diyos, ang kadaghanan sa panon mibulag sa matuod nga pagsimba. (Ezekiel 34:1-10) Karong adlawa, ang mga klero sa Kakristiyanohan nagpakita sa ilang kaugalingon nga mga magbalantay sa ginaingon nga Kristohanong kongregasyon, apan ang pagkamasakiton niini sa espirituwal nagpamatuod nga ang mga klero sama sa daotang mga tigpakaaron-ingnon nga nagpasagad ug nag-abuso sa katawhan sa dinhi pa si Jesus sa yuta. Ang mga lider sa relihiyon sa Kakristiyanohan sama sa “tawong sinuholan” nga “wala magtagad sa mga karnero.” (Juan 10:12, 13) Sila dili andam, makaarang, o takos sa pagbantay sa panon sa Diyos.
Mga Magbalantay nga Tinuod nga Nagatagad
Naghatag si Jesus ug hingpit nga panig-ingnan alang sa tanan nga magaatiman sa panon ni Jehova. Sa tanang paagi siya mahigugmaon, maluloton, maluluy-on, ug matinabangon sa iyang mga tinun-an. Siya nanguna sa pagpangita niadtong nanginahanglan. Bisag si Jesus puliki ug sa kasagaran lapoy, migahin gayod siya ug panahon sa pagpamati sa ilang mga problema ug sa paghatag kanila ug pagdasig. Ang iyang kaandam sa pagtugyan sa iyang kalag alang kanila mao ang kinadak-an nga pagpadayag sa gugma.—Juan 15:13.
Karong adlawa, ang tanang tinudlong mga ansiano sa kongregasyon, ingon man usab ang mga ministeryal nga alagad, nakig-ambit niini nga kaakohan ngadto sa panon. Busa, bisan ang materyal nga mga bentaha nga ila untang mabatonan sa ubang nasod wala makaaghat sa kadaghanan niining responsableng mga tawo sa pagbalhin ug sa ingon biyaan ang mga kongregasyon nga walay igong tabang ug pagdumala. Kay nagkinabuhi niining “kritikal nga mga panahon nga malisod sagubangon,” ang panon nagkinahanglag pagdasig ug giya. (2 Timoteo 3:1-5) Anaa kanunay ang kapeligrohan nga ang uban mabiktima ni Satanas, nga “sama sa nagangulob nga liyon, nga nangitag tukbonon.” (1 Pedro 5:8) Karon sukad masukad, hinungdanon nga ang Kristohanong mga magbalantay “magamaymay sa mga badlongon, magadasig sa mga nawad-ag paglaom, tabangan ang mahuyang.” (1 Tesalonica 5:14) Ang kanunay nga pagtukaw hinungdanon kon buot nilang panalipdan ang mga mahuyang nga mabulag sa panon.—1 Timoteo 4:1.
Sa unsang paagi matino sa magbalantay nga nanginahanglag tabang ang usa ka karnero? Ang pipila sa dayag nga mga timaan mao ang dili pagtambong sa Kristohanong mga tigom, dili regular nga pagpakig-ambit sa pag-alagad sa kanataran, ug ang kiling sa paglikay sa suod nga panag-ubanay. Ang mga kahuyangan mamatikdan usab pinaagi sa mainampingong pag-alinggat sa tinamdan sa karnero ug ang kiling sa ilang mga panag-estoryahay. Sila tingali may pagkahinawayon sa uban, tingali mopahayag ug mga pagbati sa kasuko. Ang ilang hisgotan lamang mao ang sobrang mga pangagpas sa materyal inay kay sa espirituwal nga mga tumong. Ang katibuk-ang kakulang ug kadasig, pagkamalaomon, ug kalipay mahimong magpasabot nga ang ilang pagtuo naluya. Ang masulob-ong panagway mahimong timaan nga sila ginapit-os sa supak nga mga paryente o kalibotanong mga higala. Sa dihang makamatikod niini nga mga timaan, ang magbalantay molihok sa pagtino kon unsang matanga sa tabang ang gikinahanglan.
Sa dihang moduaw sa pagtabang sa isigkamagtutuo, kinahanglang hinumdoman sa Kristohanong mga magbalantay ang ilang pangunang tumong. Dili lamang kini usa ka sosyal nga pagduaw nga mag-estoryahanay ug mga butang nga dili kaayo hinungdanon. Ang tumong ni apostol Pablo sa pagduaw sa mga igsoon mao ‘ang pagpaambit sa pipila ka espirituwal nga gasa ngadto kanila aron mapalig-on sila ug magdinasigay sa usag usa.’ (Roma 1:11, 12) Aron mahimo kini, ang abanteng pagpangandam gikinahanglan.
Una, timbangtimbanga ang indibiduwal, ug tinoa ang iyang kahimtang sa espirituwal. Human niana, palandonga kon unsang matanga sa pagtultol, pagdasig, o tambag ang labing mapuslanon. Ang Pulong sa Diyos, ang Bibliya, angay nga mao ang pangunang tinubdan sa impormasyon tungod kay kini “nagahatag ug gahom.” (Hebreohanon 4:12) Ang mga magasing Bantayanang Torre ug Pagmata! mahimong susihon alang sa mga artikulo nga naghisgot bahin sa espesipikong mga panginahanglan sa karnero nga adunay linaing mga suliran. Ang makapalipay ug makapahayahay nga mga eksperyensiya makaplagan diha sa Yearbook of Jehovah’s Witnesses. Ang tumong mao ang pagpaambit sa espirituwal nga ‘maayo alang sa paglig-on sa tawo.’—Roma 15:2.
Pagbantay nga Makapalig-on
Ang usa ka magbalantay sa panon sa literal nga karnero nahibalo nga sila nagadepende kaniya alang sa panalipod ug pag-atiman. Ang labing komong mga kapeligrohan mao ang pagkahisalaag, balatian, kaluya, pagkasamad, ug mga manunukob. Sa samang paagi kinahanglang ilhon ug pakiglabotan sa espirituwal nga magbalantay ang samang mga kapeligrohan nga nagapameligro sa kaayohan sa panon. Ang mosunod mao ang pipila ka kasagarang mga suliran ug pipila ka sugyot kon unsay isulti aron mapaambit ang makapalig-on sa espirituwal nga impormasyon.
(1) Sama sa dili-mabinantayong karnero, ang pipila ka Kristohanon mahisalaag gikan sa panon sa Diyos tungod kay sila nahaylo sa daw maayo ug makapahimuot nga mga pangdani. Sila tingali malinga ug kaha mapadpad tungod sa pagpangagpas sa mga tumong nga nalangkit sa materyalismo, lulinghayaw, ug kalingawan. (Hebreohanon 2:1) Ang maong mga indibiduwal mahimong pahinumdoman sa pagkadinalian sa panahon, sa panginahanglan nga magpabiling suod sa makitang organisasyon ni Jehova, ug sa pagkahinungdanon sa pagbutang sa mga intereses sa Gingharian nga una diha sa kinabuhi. (Mateo 6:25-33; Lucas 21:34-36; 1 Timoteo 6:8-10) Ang makatabang nga tambag makita diha sa artikulong “Hupti ang Imong Pagkatimbang—Sa Unsang Paagi?” diha sa The Watchtower sa Mayo 15, 1984, panid 8-11.
(2) Ang usa ka magbalantay kinahanglang motagana ug tambal alang sa karnero nga adunay balatian. Sa susama, ang espirituwal nga mga magbalantay kinahanglang motabang sa mga Kristohanon nga nagmasakiton sa espirituwal tungod sa dili maayong mga kahimtang sa ilang mga kinabuhi. (Santiago 5:14, 15) Sila tingali walay trabaho, may grabeng suliran sa panglawas, o tingali nagaagom ug mga kalisod sa ilang pamilyahanong kinabuhi. Ang maong mga tawo tingali wala kaayoy gana sa espirituwal nga pagkaon o sa pagpakig-uban sa katawhan sa Diyos. Kini sa baylo moresulta sa pagpalain ug pagkawala sa kadasig. Sila kinahanglang pasaligan nga si Jehova nagatagad kanila ug magasapnay kanila latas sa malisod nga mga panahon. (Salmo 55:22; Mateo 18:12-14; 2 Corinto 4:16-18; 1 Pedro 1:6, 7; 5:6, 7) Makatabang usab ang pagrepaso sa artikulong “Tan-aw sa Unahan Ingon nga Kristohanon,” nga makita diha sa Ang Bantayanang Torre Disyembre 1, 1980, panid 8-12.
(3) Ang magbalantay kinahanglang magtan-aw usab sa karnero nga gikapoy na. Ang pipila nakalahutay nga matinumanon sa pag-alagad kang Jehova latas sa daghang katuigan. Sila nakapakigbisog sa daghang tentasyon ug mga pagsulay. Karon sila nagpakita ug mga timaan nga gikapoy na ug tingali nagduhaduha sa gikinahanglang makugihon nga kalihokan sa pagsangyaw. Kinahanglang buhion pag-usab ang ilang espiritu, bag-ohon ang ilang pagpabili alang sa mga kalipay ug sa mga panalangin nga motungha tungod sa bug-os nga kasingkasing sa pag-alagad sa Diyos sa pagsundog kang Jesu-Kristo. (Galacia 6:9, 10; Hebreohanon 12:1-3) Tingali sila matabangan sa pagkakita nga gipabilhan ni Jehova ang ilang maunongong pag-alagad ug makapalig-on kanila alang sa umaabot nga mga kalihokan sa iyang kadayeganan. (Isaias 40:29, 30; Hebreohanon 6:10-12) Tingali maayong ambitan ang mga hunahuna gikan sa artikulong “Ayaw Kamo Pagkataka sa Pagbuhat ug Maayo,” nga migula diha sa Ang Bantayanang Torre sa Hulyo 15, 1988, panid 9-14.
(4) Sama sa karnero nga nasamdan, ang ubang mga Kristohanon masilo nianang ilang gisabot nga dili maayo nga paggawi. Bisan pa, kon kita mapinasayloon sa uban, pasayloon kita sa atong langitnong Amahan. (Colosas 3:12-14; 1 Pedro 4:8) Ang ubang mga igsoong lalaki ug babaye tingali gibadlong o gidisiplina nga gituohan nilang dili makataronganon. Bisan pa, kitang tanan makabatog kaayohan gikan sa espirituwal nga pagbadlong ug disiplina, ug makapalipayng masayod nga si Jehova nagadisiplina niadtong iyang gihigugma. (Hebreohanon 12:4-11) Tungod kay sila wala hatagi sa pribilehiyo sa pag-alagad nga gibati nilang sila kuwalipikado, gitugotan sa uban nga ang kasuko makamugnag di-pagsinabtanay tali kanila ug sa kongregasyon. Apan kon kita magpalayo sa organisasyon ni Jehova, wala nay laing dapit nga kaadtoan alang sa kaluwasan ug sa matuod nga kalipay. (Itandi ang Juan 6:66-69.) Ang makatabang nga impormasyon bahin niini makita diha sa artikulong “Padayong Paghupot sa Atong Kristohanong Pagkausa,” nga makita diha sa Ang Bantayanang Torre sa Agosto 15, 1988, panid 28-30.
(5) Ang karnero kinahanglang panalipdan gikan sa mga manunukob. Diha sa ikatanding paagi, ang pipila tingali gisupak o gihadlok sa dili magtutuong mga paryente o mga kauban sa trabaho. Ang ilang integridad tingali maatake sa dihang gamiton ang mga pagpit-os aron masanta sila sa ilang pag-alagad sa Diyos o mohunong na sa ilang pagpakigbahin sa Kristohanong ministeryo. Apan, sila mapalig-on kon sila tabangan nga makaamgo nga ang pagsupak maoy mapaabot ug usa gayod kini sa mga pamatuod nga kita ang tinuod nga mga tinun-an ni Jesu-Kristo. (Mateo 5:11, 12; 10:32-39; 24:9; 2 Timoteo 3:12) Tingali maayong ipasiugda nga kon sila matinumanon, sila dili gayod biyaan ni Jehova ug gantihan ang ilang pagkamalahutayon. (2 Corinto 4:7-9; Santiago 1:2-4, 12; 1 Pedro 5:8-10) Ang artikulo nga nag-ulohang “Pag-antos nga Malipayon Bisan pa sa mga Paglutos” diha sa Ang Bantayanang Torre sa Oktubre 15, 1982, panid 19-26, mohatag ug dugang pagdasig.
Mga Magbalantay—Tumana ang Inyong mga Kaakohan
Daghan ang panginahanglan sa panon sa Diyos, ug ang hustong pag-atiman maoy hagong buluhaton. Busa ang Kristohanong mga magbalantay kinahanglang mapuangoron, tinuod nga mabalak-on, ug interesado nga makatabang. Ang pailob ug pagsabot hinungdanon. Samtang ang ubang indibiduwal nagkinahanglag pagbadlong ug tambag, dakong kaayohan ang mabatonan sa uban gikan sa pagdasig. Ang pipila ka personal nga pagduaw tingali igo na sa pipila ka higayon, samtang sa uban ang regular nga pagtuon sa Bibliya tingali gikinahanglan. Sa matag kahimtang ang pangunang tumong mao ang pagpaambit sa makapalig-on sa espirituwal nga pagtultol o mahigugmaong tambag nga mopalihok sa indibiduwal sa pagsugod ug maayong mga batasan sa pagtuon, nga mahimo o magpadayon sa regular nga pagtambong sa mga tigom sa kongregasyon, ug kalipayan ang aktibong pagpakigbahin diha sa Kristohanong ministeryo. Kini mao ang pangunang mga paagi sa pagtabang sa isigkamagtutuo ug buligan sila nga mabuksan ang dalan alang sa libreng pag-agos sa balaang espiritu ni Jehova.
Ang mga magbalantay nga nagahatag ug ingon nianang matanga sa malulotong pagpaluyo nagahimo sa labing hinungdanong pag-alagad alang sa panon sa Diyos. (Tan-awa ang Pagmata! sa Agosto 8, 1986, panid 25-28.) Ang ginahimo sa espirituwal nga mga magbalantay gipabilhan pag-ayo sa panon. Human nga nadawat ang maong tabang, usa ka ulo sa pamilya miingon: ‘Human nga kami nakadangat ug 22 anyos sa kamatuoran, kami nadala sa kalibotan tungod sa materyalismo. Gusto kaayo kaming motambong sa mga tigom, apan ingon sa daw kami dili makahimo niana. Wala gayod kami mohaom sa sistema ni Satanas, busa bug-os kami nga nabulag, nahilain. Tungod niini nawad-an kami ug kadasig ug naguol. Gikinahanglan namo ang mga pulong sa pagdasig. Sa dihang giduaw kami sa usa ka ansiano, malipayon namong gidawat ang tagana sa usa ka pagtuon sa Bibliya diha sa among balay. Karon kaming tanan nakabalik na sa luwas nga organisasyon ni Jehova. Dili ko mabatbat ang kalipay nga akong gibati!’
Adunay katarongan alang sa dako nga kalipay sa dihang ang atong nahisalaag o nawad-ag kadasig nga mga igsoong lalaki ug babaye mahibalik ug mahimong aktibo pag-usab sa espirituwal. (Lucas 15:4-7) Ang katuyoan ni Jehova alang sa iyang katawhan matuman sa dihang sila mahiusa “sama sa usa ka panon diha sa toril.” (Miqueas 2:12) Niining luwas nga dalangpanan, sila ‘nakakaplag ug pahulay sa ilang mga kalag’ uban sa tabang sa Maayong Magbalantay, si Jesu-Kristo. (Mateo 11:28-30) Ang nahiusa tibuok-kalibotang panon makadawat ug paggiya, paglipay, ug proteksiyon uban sa dagayang espirituwal nga pagkaon.
Karon, pinaagi niining kalihokan sa pag-atiman isip magbalantay, ginapatuman ni Jehova ang mahigugmaong buluhaton nga nahiuyon sa iyang karaang saad: “Pangitaon ko ang akong mga karnero ug magaatiman kanila. . . . Luwason ko sila gikan sa tanang mga dapit diin sila nagkatibulaag . . . Diha sa maayong sibsibanan pasibsibon ko sila . . . Pangitaon ko ang usa nga nawala, . . . ug bugkosan ko ang nabalian ug palig-onon ko ang usa nga nagmasakiton.” (Ezekiel 34:11-16) Pagkadakong kalipay nga masayod nga si Jehova mao ang atong Magbalantay!—Salmo 23:1-4.
Tungod sa diyosnong mga tagana sa pagbantay sa panon sa Diyos, ingong mga alagad ni Jehova kita makaambit sa mga pagbati ni David, kinsa miingon: “Sa pakigdait magahigda ako ug magakatulog, kay ikaw lamang, Oh Jehova, ang nagapapuyo kanako sa kasegurohan.” (Salmo 4:8) Oo, gibati sa katawhan ni Jehova ang kasegurohan sa iyang mahigugmaong pag-atiman ug mapasalamaton nga ang Kristohanong mga ansiano mapuangorong nagaatiman sa nating mga karnero.
[Picture Credit Line sa panid 20, 21]
Potter’s Complete Bible Encyclopedia