Ang Bantayanang Torre ug Pagmata!—Tukma-sa-Panahong mga Mantalaan sa Kamatuoran

“Ikaw nagtubos kanako, Oh Jehova ang Diyos sa kamatuoran.”​—SALMO 31:5.

 1, 2. (a) Unsay gibati sa usa ka sister bahin sa butang nga iyang nabasa sa Ang Bantayanang Torre? (b) Unsang mga pangutana ang gisukna mahitungod sa atong mga magasin?

“DAGHAN kaayong salamat,” usa ka Kristohanong sister misulat, “tungod sa kahibulongang impormasyon diha sa artikulo sa Bantayanang Torre nga ‘Ikaw Makakaplag ug Kahumpayan sa mga Panahon sa Kagul-anan.’a Ang daghan kaayong punto nga gihisgotan ninyo sa eksakto mao ang mga pagbati nga gisagubang gayod nako; kadtong artikuloha morag gisulat nga sa laktud gitumong kanako. Sa unang higayon nga gibasa ko kadto, nanglugmaw ang mga luha sa akong mga mata. Kahibulongan kaayo nga makaamgo nga may laing nasayod kon unsay akong gibati! Mapasalamaton gayod ako nga nahimong usa sa mga Saksi ni Jehova. Asa pa ba kita makakaplag ug mga saad sa kinabuhing walay kataposan diha sa Paraiso sa duol nga umaabot ug, karon, panghupay pa alang sa atong mga kalag! Salamat. Salamat sa milyong beses.”

² Mibati ka ba niana sukad? May panahon bang morag may gisulat diha sa Ang Bantayanang Torre o sa kauban niining magasin, ang Pagmata!, nga sa linain alang kanimo? Unsay anaa sa atong mga magasin nga makabihag sa mga kasingkasing sa mga tawo? Sa unsang paagi makatabang kita sa uban aron makapahimulos sa nagaluwas-kinabuhing mensahe nga unod niini?​—1 Timoteo 4:16.

Mga Magasin nga Nagtuboy sa Kamatuoran

 3. Tungod sa unsang maayong katarongan ang mga magasing Bantayanang Torre ug Pagmata! nakatandog sa mga kasingkasing sa daghang magbabasa?

³ Si Jehova mao “ang Diyos sa kamatuoran.” (Salmo 31:5) Ang iyang Pulong, ang Bibliya, maoy usa ka basahon sa kamatuoran. (Juan 17:17) Ang mga tawong matinud-anon ug kasingkasing mosanong sa kamatuoran. (Itandi sa Juan 4:23, 24.) Usa ka katarongan nga Ang Bantayanang Torre ug Pagmata! nakatandog sa mga kasingkasing sa minilyong magbabasa mao nga sila maoy mga mantalaan nga may integridad ug kamatuoran. Sa pagkamatuod, maoy tungod sa isyu sa pagkamaunongon sa kamatuoran sa Bibliya nga gisugdan pagpatik Ang Bantayanang Torre.

 4, 5. (a) Unsa ang mga kahimtang nga mitultol sa pagpatik ni C. T. Russell sa Watch Tower? (b) Sa unsang paagi gigamit ang magasing Bantayanang Torre sa “ang matinumanon ug maalamong ulipon”?

⁴ Niadtong 1876, si Charles T. Russell nakig-anib kang Nelson H. Barbour, sa Rochester, New York. Si Russell mitaganag salapi aron magpadayon ang pagpatik sa relihiyosong mantalaan ni Barbour nga Herald of the Morning, nga si Barbour ang pangunang editor ug si Russell ang luyoluyong editor. Ugaling, mga usa ka tuig ug tunga sa ulahi, sa Agosto 1878 nga isyu sa Herald, si Barbour misulat ug artikulo nga nagsalikway sa pangtubos nga bili sa kamatayon ni Kristo. Si Russell, kinsa hapit 30 anyos nga mas bata kay kang Barbour, mitubag pinaagi sa usa ka artikulo sa sunod gayong isyu nga naglaban sa lukat, nga nagtawag niana ingong “usa sa labing hinungdanong mga pagtulon-an sa Pulong sa Diyos.” (Mateo 20:28) Human sa balikbalik nga paningkamot nga mangatarongan kang Barbour sa Kasulatanhong paagi, sa kataposan si Russell mihukom nga mobulag sa hingpit sa Herald. Sugod sa Hunyo 1879 nga isyu sa maong mantalaan, ang ngalan ni Russell dili na makita ingong luyoluyong editor. Usa ka bulan sa ulahi, ang 27-anyos nga Russell misugod pagpatik sa Zion’s Watch Tower and Herald of Christ’s Presence (karon nailhan nga Ang Bantayanang Torre Nagapahayag sa Gingharian ni Jehova), nga sukad sa sinugdanan nagtuboy sa Kasulatanhong kamatuoran, sama sa lukat.

⁵ Sulod sa miaging 114 ka tuig, Ang Bantayanang Torre, samag banggiitang abogado, nagtukod sa kaugalingon ingong manlalaban sa kamatuoran ug sa doktrina sa Bibliya. Sa lakat niini, nakaangkon kini sa pagsalig sa milyonmilyon nga mapabilhong mga magbabasa. Kusganon gihapon kining nagpaluyo sa lukat. (Tan-awa, pananglitan, ang isyu sa Pebrero 15, 1991.) Ug kini nagpadayong pangunang galamiton sa “ang matinumanon ug maalamong ulipon” ug sa Nagamandong Lawas niini aron ipahayag ang natukod nang Gingharian ni Jehova ug ihatag ang espirituwal nga pagkaon “sa hustong panahon.”​—Mateo 24:14, 15.

 6, 7. Unsa ang gipahayag nga tumong sa The Golden Age, ug unsay nagpakita nga ang mga tawong naghunahuna misanong sa mensahe niini?

⁶ Komosta man ang Pagmata! nga magasin? Sukad sa pagsugod niini, ang Pagmata! nagtuboy usab sa kamatuoran. Sa sinugdanan gitawag The Golden Age, gilaraw kining magasina nga ipanagtag sa publiko. Mahitungod sa tumong niini, ang unang isyu, nga pinetsahag Oktubre 1, 1919, mipahayag: “Ang katuyoan niini maoy aron ipatin-aw ang tinuod nga kahulogan sa dagkong mga panghitabo karong adlawa sa kahayag sa Diyosnong kaalam ug aron sa pagpamatuod sa naghunahunang mga kaisipan pinaagi sa ebidensiyang dili malalis ug makapakombinsir nga duol na karon ang panahon sa dakong pagpanalangin sa katawhan.” Ang mga tawong naghunahuna misanong sa mensahe sa The Golden Age. Sa ubay-ubayng katuigan, ang sirkulasyon niini mas daghan pa kay sa iya sa Ang Bantayanang Torre.b

⁷ Hinuon, ang pangdani sa Ang Bantayanang Torre ug Pagmata!, mosaylo pa sa kamatuoran nga kini sila nagpatik sa doktrinal nga kamatuoran ug nagsaysay sa kahulogan sa gitagnang mga kahimtang sa kalibotan. Ilabina sa miaging usa o duha ka dekada, ang atong mga magasin nakabihag sa mga kasingkasing sa mga tawo tungod usab sa laing katarongan.

Tukma-sa-Panahong mga Artikulo nga Nagtandog sa Kinabuhi sa mga Tawo

 8.Unsay pagpasibo sa pagsulat ang gihimo ni Judas, nga nag-awhag sa iyang mga magbabasa sa pagsukol sa unsang mga impluwensiya sulod sa kongregasyon?

⁸ Mga 30 ka tuig human sa pagkamatay ug pagkabanhaw ni Jesu-Kristo, giatubang sa magsusulat sa Bibliya nga si Judas ang mahagitong kahimtang. Ang imoral, mananapong mga tawo nakayuhot taliwala sa mga Kristohanon. Maoy katuyoan ni Judas nga sulatan ang isigka-Kristohanon mahitungod sa usa ka doktrinal nga ulohan​—ang kaluwasan nga samang nabatonan sa dinihogang mga Kristohanon. Sa kapulihay, nga tinultolan sa balaang espiritu, gihukom niya nga kinahanglang awhagon ang iyang mga magbabasa sa pagsukol sa makadaot nga mga impluwensiya sulod sa kongregasyon. (Judas 3, 4, 19-23) Si Judas mipahiuyon sa kahimtang ug mihatag ug tukma-sa-panahong tambag nga mitagana sa mga panginahanglan sa iyang Kristohanong mga igsoon.

 9. Unsay nalangkit sa pagtaganag tukma-sa-panahong mga artikulo alang sa atong mga magasin?

⁹ Sa susama, ang pag-andam ug tukma-sa-panahong mga artikulo alang sa atong mga mantalaan maoy mahagitong responsabilidad. Ang mga panahon mausob, ug mao usab ang mga tawo​—ang ilang mga panginahanglan ug ilang intereses lahi na sa usa o duha ka dekadang miagi. Usa ka nagapanawng magtatan-aw karong bag-o mipahayag: “Sa dihang ako nahimong Saksi niadtong katuigang 1950, ang among paagi sa pagtuon sa Bibliya uban sa mga tawo sa panguna maoy bahin sa doktrina​—pagtudlo kanila sa kamatuoran mahitungod sa Trinidad, kalayong-impiyerno, ang kalag, ug uban pa. Apan karon, maorag adunay daghan kaayong suliran ug kalisdanan sa kinabuhi sa mga tawo nga kinahanglang tudloan nato sila kon unsaon pagkinabuhi.” Nganong matuod man kini?

10. Nganong dili kita angay matingala nga may inanay nga pagkadaot sa tawhanong kahikayan sukad sa 1914?

¹⁰ Mahitungod sa “ang kataposang mga adlaw,” ang Bibliya mitagna: “Ang mga tawong daotan ug mga impostor mosamot sa pagkadaotan, nga magalimbong ug malimbongan.” (2 Timoteo 3:1, 13) Busa, dili kita angayng matingala nga may inanayng pagkadaot sa tawhanong kahikayan sukad sa pagsugod sa panahon sa kataposan niadtong 1914. Si Satanas, kansang nahibiling panahon hamubo na kaayo, nagapahungaw sa iyang kasuko diha sa tawhanong katilingban nga walay ingon sukad masukad. (Pinadayag 12:9, 12) Ingong sangpotanan, ang mga panggawi ug mga sukdanan sa pamilya lahi kaayo kay sa 30 o 40 ka tuig lang kanhi. Ang katawhan sa kinatibuk-an dili hilig ug relihiyon kay sa nangaging mga dekada. Ang krimen tuman ka lapnag nga ang mga tawo nagahimog mga panagana nga wala igdungog 20 o 30 ka tuig lang nga miagi.​—Mateo 24:12.

11. (a) Unsang mga matang sa ulohan ang anaa sa kaisipan sa mga tawo, ug sa unsang paagi ang matinumanon ug maalamong ulipon nga matang misanong sa mga panginahanglan? (b) Paghatag ug pananglitan sa usa ka artikulo sa Bantayanang Torre o Pagmata! nga nakatandog sa imong kinabuhi.

¹¹ Nan, dili katingad-an nga ang emosyonal, sosyal, ug pamilyahanong mga isyu anaa sa kaisipan sa daghang tawo. Ang matinumanon ug maalamong ulipon nga matang maisogong misanong diha sa Ang Bantayanang Torre ug Pagmata! pinaagi sa pagpatik ug tukma-sa-panahong mga artikulo nga naghisgot sa tinuod nga mga panginahanglan sa mga tawo ug nakatandog gayod sa ilang mga kinabuhi. Tagda ang pila ka pananglitan:

12. (a) Nganong ang mga artikulo bahin sa usag-ginikanang mga pamilya giandam alang sa Ang Bantayanang Torre niadtong 1980? (b) Giunsa pagpahayag sa usa ka sister ang iyang apresasyon sa mga artikulo bahin sa usag-ginikanan nga mga pamilya?

¹² Pamilyahanong mga isyu. Sa dihang ang tibuok-kalibotang mga taho nagpakitag kusog nga pag-uswag sa gidaghanon sa mga pamilya nga usa rag ginikanan, ang kinaunahang mga artikulo bahin sa temang “Usag-Ginikanang mga Pamilya​—Pagsagubang sa mga Suliran” giandam alang sa Marso 15, 1981 nga isyu sa Ang Bantayanang Torre. Ang mga artikulo may duhag-pilong katuyoan: (1) pagtabang sa nag-inusarang mga ginikanan nga makasagubang sa linaing mga suliran nga ilang giatubang ug (2) pagtabang sa uban nga mas maalam aron sila makapakitag “pagkamabination” ug sa tiunay “mag-atiman” sa usag-ginikanang mga pamilya. (1 Pedro 3:8; Santiago 1:27) Daghang magbabasa misulat nga nagpahayag ug apresasyon sa mga artikulo. “Ang mga luha nanglugmaw gayod sa akong mga mata sa pagkakita nako sa hapin,” misulat ang usa ka nag-inusarang ginikanan, “ug sa gibuksan ko ang magasin ug gibasa ang impormasyon, ang akong kasingkasing nag-awas sa pagpasalamat kang Jehova tungod sa pagtagana sa maong impormasyon sa panahon nga gikinahanglan.”

13. Unsang matugkarong paghisgot sa depresyon ang gipatik sa Pagmata! niadtong 1981, ug unsay giingon sa usa ka magbabasa bahin niana?

¹³ Emosyonal nga mga isyu. Ang ulohang depresyon gihisgotan sa Ang Bantayanang Torre ug Pagmata! sukad sa katuigang 1960. (1 Tesalonica 5:14) Apan ang bag-o ug positibong panglantaw sa ulohan gihisgotan sa seryeng panghapin nga “Ikaw Makabuntog sa Depresyon!” sa Pebrero 8, 1982, Pagmata! Ang mga sulat sa apresasyon sa wala madugay nangabot sa Watch Tower Society gikan sa tibuok kalibotan. “Sa unsang paagi ikapahayag nako nga sinulat ang mga gibati sa akong kasingkasing?” misulat ang usa ka sister. “Ako 24 anyos, ug sa miaging napulo ka tuig, ako may daghang yugto sa depresyon. Apan karon gibati ko nga mas suod kang Jehova ug mapasalamaton nga siya misanong sa mga panginahanglan sa mga tawo nga nagmagul-anon pinaagi niining mahigugmaong mga artikulo, ug buot ko nga isulti kana kaninyo.”

14, 15. (a) Sa unsang paagi gihisgotan ang ulohan bahin sa pag-abuso sa bata diha sa atong mga magasin? (b) Unsang mga artikulo sa magasin ang nakapahibulong sa usa ka hinete sa Australia?

¹⁴ Sosyal nga mga isyu. Ang Bibliya mitagna nga sa “ang kataposang mga adlaw” ang mga tawo mahimong “mga mahigugmaon sa ilang kaugalingon, . . . walay gugma nga kinaiya, . . . walay pagpugong-sa-kaugalingon, mabangis, walay gugma sa pagkamaayo.” (2 Timoteo 3:1-3) Busa, dili kita angay matingala nga ang pag-abuso sa bata gihimo sa dakong sukod karong adlawa. Kining ulohana prangka nga gihisgotan sa artikulong “Tabang Alang sa mga Biktima sa Pag-unay” diha sa Ang Bantayanang Torre sa Abril 1, 1984. Walo ka tuig sa ulahi, ang seryeng panghapin nga “Pag-alim sa mga Kasakit sa Pag-abuso sa Bata” diha sa Oktubre 8, 1991, Pagmata! mainampingong giandam aron itagana ang pagsabot ug paglaom sa mga biktima ingon man paglamdag sa uban aron sila makahatag ug tabang. Kining seryeha sa mga artikulo mipatunghag kinadaghanang sanong sa magbabasa sa kasaysayan sa atong mga mantalaan. Usa ka magbabasa misulat: “Ang may kinadak-ang epekto sa akong pagkaayo mao ang makahupayng mga panghunahuna ug Kasulatanhong mga reperensiya sa maong mga artikulo. Ang pagkahibalo nga si Jehova wala mag-isip kanakong menos maoy dako kaayong kahupayan. Ang pagkahibalo nga wala ako mag-inusara samang nakapahupay.”

¹⁵ Usa ka hinete sa Melbourne, Australia, ang mihimog long-distance nga tawag sa telepono ngadto sa opisina sa Watch Tower Society sa Sydney, nga nagpahayag sa iyang kalagot sa palibot sa karera sa kabayo. Siya miingon nga siya bag-o pang nakabasa sa Marso 8, 1993, nga Pagmata! bahin sa “Panglugos​—Makalilisang nga Kaagi sa Usa ka Babaye” ug dili makatuo nga naglungtad ang ingon ka bililhong magasin. Daghan ang iyang gipangutana sulod sa mga 30 minutos ug nalipay sa pagkadungog sa mga tubag nga gipahayag.

16. Sa unsang mga paagi imong ikapasundayag ang imong apresasyon sa atong mga magasin?

¹⁶ Komosta ka man? Natandog na ba ang imong kinabuhi sa usa ka linaing artikulo nga gipatik diha sa Ang Bantayanang Torre o Pagmata!? Kon mao, sa walay duhaduha gibati mo ang halalom nga pasalamat sa atong mga mantalaan. Sa unsang paagi makapasundayag ka sa imong apresasyon? Tinong pinaagi sa pagbasa sa matag isyu sa imong kaugalingon. Makaambit ka usab sa paghatag ug kinadak-ang posibleng sirkulasyon niining bililhong mga basahon. Sa unsang paagi mahimo kini?

Ipaambit Kini sa Uban!

17. Unsay mahimo sa mga kongregasyon aron mapauswag ang pagpanagtag ug magasin?

¹⁷ Nahauna, adunay usa ka butang nga mahimo sa matag kongregasyon. Ang Oktubre 1952 nga isyu sa Informant (karon Atong Ministeryo sa Gingharian) miingon: “Ang labing epektibong paagi sa pagpanagtag sa mga magasin maoy gikan sa balay ngadto sa balay ug gikan sa tindahan ngadto sa tindahan. Busa ang Sosyedad nagsugyot nga kining mga paagiha sa pagpanagtag ug magasin mahimong regular nga bahin sa kalihokan sa Adlaw sa Magasin.” Kanang tambaga angay gihapon karong adlawa. Ang mga kongregasyon mahimong mag-eskedyul ug regular nga Adlaw sa Magasin, usa ka adlaw nga gigahin alang ilabina sa pagsangyaw pinaagig magasin. Alang sa kadaghanang kongregasyon, ang tinong mga Sabado pihong usa ka maayong panahon. Oo, ang matag kongregasyon angay mogahin ug espesyal nga mga adlaw o mga gabii alang sa pagsangyaw pinaagig magasin​—gikan sa balay ngadto sa balay, gikan sa tindahan ngadto sa tindahan, sa buluhaton sa mga dalan, ug sa mga ruta sa magasin. Dugang pa, unsay imong mahimo, ang magmamantala sa Gingharian, sa pagtabang nga mapauswag ang pagpanagtag sa magasin?

18, 19. (a) Sa unsang paagi ang pagkamahunahunaon sa Bantayanang Torre ug Pagmata! makatabang kanimo sa pagpahimutang ug mga magasin? (b) Unsay bentaha sa mubo, deretso-sa-puntong presentasyon sa dihang magtanyag ug mga magasin? (c) Unsay nagpakita sa kabililhon nga makasulod ang mga magasin sa mga balay sa mga tawo?

¹⁸ Ang pagkahimong mahunahunaon sa “Bantayanang Torre” ug “Pagmata!” maoy unang lakang. Basahang abante ang mga magasin. Samtang basahon mo ang matag artikulo, suknaa ang imong kaugalingon, ‘Kinsay mainteres niining artikuloha?’ Hunahunaa ang pila ka pulong nga imong ikasulti aron makapukaw ug interes sa artikulo. Gawas sa pagsuportar sa regular nga Adlaw sa Magasin, nganong dili magdalag mga kopya aron makapahimulos ka sa matag higayon sa pagpaambit niana sa uban​—sa dihang magbiyahe o mamalit ug sa dihang makigsulti sa mga kauban sa trabaho, mga silingan, mga eskolmet, o mga magtutudlo?

¹⁹ Ang paghimong yano sa imong presentasyon mao ang ikaduhang sugyot. Ang Disyembre 1, 1956, Watchtower mipahayag: “Ang mubo, deretso-sa-puntong pagtanyag maoy labing maayo sa dihang magtanyag ug mga magasin. Ang tumong mao ang pagpahimutang ug daghang kopya. Kana sila mao nay ‘mosulti.’” Nakaplagan sa pila ka magmamantala nga epektibo ang pagpilig usa ka ideya gikan sa usa ka artikulo, ipahayag kana sa pila ka pulong, ug itanyag ang mga magasin. Sa dihang makasulod na sa balay, ang mga magasin mahimong “mosulti” ngadto sa uban gawas pa sa tawong nagdawat kanila gikan kanimo. Sa Irlandia usa ka batan-ong estudyante sa unibersidad nagbasa sa Septiyembre 1, 1991, nga isyu sa Ang Bantayanang Torre, nga gidawat sa iyang amahan gikan sa usa ka Saksi. Ang mga artikulo bahin sa komunikasyon ug ubang ulohan nakapukaw sa iyang interes. Sa dihang nabasa niya ang magasin, giteleponohan niya ang mga Saksi, nga gitawag ang numerong nalista sa talaan sa telepono. Usa ka pagtuon sa Bibliya ang nasugdan sa wala madugay, ug ang batan-ong babaye nabawtismohan panahon sa “Diyosnong Pagtulon-an” Distritong Kombensiyon sa Hulyo 1993. Sa walay duhaduha, ipasulod gayod nato ang mga magasin sa mga balay, diin sila mahimong “mosulti” sa mga tawo! Usa ka nagapanawng magtatan-aw mitanyag ug laing yanong sugyot: “Ipagawas ang mga magasin sa imong sudlanan ug libro.” Sa tinuoray, kon ang imong gisulti dili makadani sa interes sa tagbalay, nan tingali ang matahom nga mga ilustrasyon niini sa hapin basin maoy magpahimutang sa mga magasin puli nimo.

20, 21. (a) Sa unsang paagi ikaw mahimong mapailin-ilinon sa dihang moapil sa buluhaton sa magasin? (b) Unsa ang mahimo nimong buhaton aron makapahimutang ug daghang magasin kada bulan?

²⁰ Ang ikatulong sugyot mao nga mahimong mapailin-ilinon. (Itandi sa 1 Corinto 9:19-23.) Pag-andam ug pila ka mugbong tanyag. Batoni sa hunahuna ang usa ka artikulo nga makadani sa mga lalaki, lain sa mga babaye. Alang sa mga batan-on, tingali imong gamiton ang “Mga Batan-on Nangutana . . .” nga artikulo. Magmapailin-ilinon, usab, kon bahin sa kon kanus-a moapil sa buluhaton sa magasin. Gawas pa sa Adlaw sa Magasin, basin imong masayran nga ang pagsangyaw sa gabii mohatag ug labing maayong higayon sa pagtanyag ug mga magasin gikan sa balay ngadto sa balay.

²¹ Ang ikaupat nga sugyot mao ang pagbutang ug personal nga tumong. Ang insert nga “Mga Magasin nga Nagapunting sa Dalan sa Kinabuhi,” nga migula sa Atong Ministeryo sa Gingharian sa Mayo 1984, mipahayag: “Ingong sugyot, ang mga magmamantala mahimong magbaton ug tumong, pananglitan, 10 ka magasin sa matag bulan, depende sa ilang mga kahimtang; ang mga payunir makapaningkamot ug 90. Hinuon, ang pila ka magmamantala tingali makaarang pagpahimutang ug mas daghang magasin matag bulan ug busa magbutang ug mas taas nga personal nga tumong. Bisan pa niana, tungod sa dili-maayong panglawas, matang sa teritoryo, o ubang maayong mga hinungdan, ang tumong sa uban tingali mas ubos. Apan ang ilang pag-alagad kang Jehova sama ra ka mapuslanon. (Mat. 13:23; Lucas 21:3, 4) Ang importanteng butang mao ang pagbaton ug personal nga tumong.”

22. Sa unsang paagi kita makapakita nga kita mapasalamaton kang Jehova tungod sa atong tukma-sa-panahong mga magasin sa kamatuoran?

²² Pagkamapasalamaton nato nga si Jehova, “ang Diyos sa kamatuoran,” nakagamit sa matinumanon ug maalamong ulipon nga matang ug sa Nagamandong Lawas niini sa pagtagana kanato niining tukma-sa-panahong mga mantalaan! (Salmo 31:5) Samtang maoy kabubut-on ni Jehova, kining mga magasina mopadayon sa paghisgot sa tinuod nga mga panginahanglan sa mga tawo. Kini mopadayon sa pagtuboy sa hataas nga mga sukdanan sa moralidad ni Jehova. Kini sila dili mohunong sa pagpasiugda sa hustong doktrina. Ug kini sila mopadayon sa pag-awhag sa pagtagad nganha sa katumanan sa tagna nga nagtimaan sa atong mga adlaw ingong ang panahon sa dihang ang Gingharian sa Diyos nagamando ug ang kabubut-on sa Diyos ginatuman sa yuta nga walay ingon sukad masukad sa nagauswag nga gidaghanon sa matuod nga mga magsisimba ni Jehova. (Mateo 6:10; Pinadayag 11:15) Pagkadakong bahandi ang atong nabatonan diha sa Ang Bantayanang Torre ug Pagmata! Pahimuslan nato ang tanang higayon nga ipaambit sa mga tawo nga maaghop ug kasingkasing kining hinungdanong mga basahon nga nagtandog sa kinabuhi sa mga tawo ug naglaban sa mga kamatuoran sa Gingharian.

[Mga footnote]

Unsay Imong Tubag?

◻ Unsay nagpakita nga Ang Bantayanang Torre ug Pagmata! maoy mga magasin sa kamatuoran?

◻ Sa unsang paagi Ang Bantayanang Torre ug Pagmata! nakatandog sa mga kinabuhi sa katawhan?

◻ Unsay mahimo sa mga kongregasyon aron mapauswag ang pagpanagtag ug magasin?

◻ Unsang mga sugyot ang makatabang kanimo sa pagpahimutang ug dugang mga magasin?

[Kahon sa panid 22]

Pila ka Artikulo nga Nakatandog sa Kinabuhi sa mga Tawo

Latas sa katuigan daghang magbabasa ang misulat nga nagpahayag ug pagpabili sa tinong mga artikulo nga napatik diha sa Ang Bantayanang Torre ug Pagmata! Gilista sa ubos ang pipila lamang sa daghang ulohan nga nakatandog sa among mga magbabasa. Kini ba o ang laing artikulo nakausab sa imong kinabuhi?

Ang Bantayanang Torre

“Dawata ang Tabang sa Diyos sa Pagbuntog sa Tagong Kasal-anan” (Oktubre 15, 1985)

“Pagbansay sa Diyosnong Debosyon Bahin sa Tigulang nga mga Ginikanan” (Hunyo 1, 1987)

“Edukasyon nga May Usa ka Katuyoan” (Nobyembre 1, 1992)

Pagmata!

“Ikaw Makabuntog sa Depresyon!” (Pebrero 8, 1982)

“Kon ang Usa sa Imong Minahal Mamatay . . .” (Oktubre 22, 1985)

“Panalipdi ang Inyong mga Bata!” (Oktubre 8, 1993)

[Hulagway sa panid 23]

Sa Canada​—pagsangyaw uban sa mga magasin

[Hulagway sa panid 24]

Sa Myanmar​—pagtanyag sa mga magasin nga nagpunting sa dalan sa kinabuhi