Paghukom ni Jehova Batok sa Bakak nga mga Magtutudlo
“Sa mga manalagna sa Jerusalem nakita ko ang makalilisang nga mga butang, ang pagpanapaw ug paglakaw sa kabakakan . . . Alang kanako silang tanan ingon sa Sodoma, ug ang mga molupyo niini ingon sa Gomorra.”—JEREMIAS 23:14.
1. Nganong ang usa nga magahimo sa diyosnong pagtudlo magapas-an ug bug-at kaayong kaakohan?
SI BISAN kinsa nga magahimo sa diyosnong pagpanudlo magapas-an ug bug-at kaayong kaakohan. Ang Santiago 3:1 nagpasidaan: “Dili daghan kaninyo ang angay mahimong magtutudlo, akong mga igsoon, kay nahibalo nga kita modawat ug mas bug-at nga paghukom.” Oo, ang mga magtutudlo sa Pulong sa Diyos nailalom sa mas bug-at nga kaakohan nga mohatag ug dalawaton nga paghusay kay sa kasagarang mga Kristohanon. Unsay ipasabot niini alang niadtong mapamatud-ang bakak nga mga magtutudlo? Tan-awon nato ang kahimtang sa adlaw ni Jeremias. Tan-awon nato kon sa unsang paagi kini naglandong sa nagakahitabo karong adlawa.
2, 3. Unsang paghukom ang gipakanaog ni Jehova pinaagi ni Jeremias maylabot sa bakak nga mga magtutudlo sa Jerusalem?
2 Sa 647 W.K.P., ang ika-13ng tuig sa pagmando ni Haring Josias, si Jeremias gisugo ingong manalagna ni Jehova. Si Jehova may reklamo batok sa Juda, busa iyang gisugo si Jeremias aron ipahayag kana. Ang bakak nga mga manalagna, o mga magtutudlo sa Jerusalem, nagbuhat ug “makalilisang nga mga butang” sa mga mata sa Diyos. Hilabihan kaayo ang ilang pagkadaotan nga ang Diyos nagpanig-ingon sa Jerusalem ug Juda ngadto sa Sodoma ug Gomorra. Ang Jeremias kapitulo 23 nagsugid kanato mahitungod niini. Ang Jer 23 bersikulo 14 nag-ingon:
3 “Sa mga manalagna sa Jerusalem nakita ko ang makalilisang nga mga butang, ang pagpanapaw ug ang paglakaw sa kabakakan; ug ilang gipalig-on ang mga kamot sa mga mamumuhat ug daotan aron sila dili na mobalik, ang matag usa gikan sa iyang kaugalingong pagkadaotan. Alang kanako silang tanan ingon sa Sodoma, ug ang mga molupyo niini ingon sa Gomorra.”
4. Sa unsang paagi ang daotang panig-ingnan sa moral sa mga magtutudlo sa Jerusalem gitumbasan diha sa Kakristiyanohan karong adlawa?
4 Oo, kadtong mga manalagnaa, o mga magtutudloa, naghatag mismo ug labihan ka daotang mga panig-ingnan sa panggawi ug, sa tinuoray, nagdasig sa mga tawo nga buhaton ang sama. Tan-awa ang mga kahimtang diha sa Kakristiyanohan karong adlawa! Dili ba sila sama gayod niadtong sa adlaw ni Jeremias? Karong adlawa ang klero nagtugot sa mga mananapaw ug mga homoseksuwal nga magpabiling mga membro ug nagtugot pa gani kanila sa pagdumala sa mga serbisyo sa simbahan. Katingad-anan ba nga daghang nalista nga mga membro sa simbahan maoy mga imoral usab?
5. Nganong ang imoral nga kahimtang sa Kakristiyanohan molabaw pa sa iya sa Sodoma ug Gomorra?
5 Gipanig-ingon ni Jehova ang mga molupyo sa Jerusalem ngadto sa mga molupyo sa Sodoma ug Gomorra. Apan ang imoral nga kahimtang sa Kakristiyanohan grabe pa kay sa Sodoma ug Gomorra. Oo, kini labaw pang salawayon sa mga mata ni Jehova. Ang mga magtutudlo niini naglapas sa Kristohanong moral nga kalagdaan. Ug kini nagpatungha sa kahimtang sa moral nga kadaot diin adunay tanang matang sa malinglahong mga panghaylo sa pagbuhat ug daotan. Lukop kaayo ang maong moral nga kahimtang nga ang pagkadaotan giisip na karon nga normal.
“Paglakaw sa Kabakakan”
6. Unsay giingon ni Jeremias mahitungod sa pagkadaotan sa mga manalagna sa Jerusalem?
6 Karon matikdi kon unsay giingon sa Jer 23 bersikulo 14 mahitungod sa mga manalagna sa Jerusalem. Sila ‘naglakaw sa kabakakan.’ Ug ang ulahing bahin sa Jer 23 bersikulo 15 nag-ingon: “Gikan sa mga manalagna sa Jerusalem ang apostasiya milukop sa tibuok nga yuta.” Dayon ang Jer 23 bersikulo 16 midugang: “Mao kini ang giingon ni Jehova sa mga panon: ‘Ayaw pagpatalinghog sa mga pulong sa mga manalagna nga nagapanagna kaninyo. Sila nagahimo kaninyo nga mapasigarbohon. Ang panan-awon sa ilang kaugalingong kasingkasing mao ang ilang gipamulong—dili gikan sa baba ni Jehova.’”
7, 8. Nganong ang klero sa Kakristiyanohan nahisama sa bakak nga mga manalagna sa Jerusalem, ug sa unsang paagi nag-apektar kini sa mga magsisimba?
7 Sama sa bakak nga mga manalagna sa Jerusalem, ang klero sa Kakristiyanohan naglakaw usab sa kabakakan, nga nagasangyaw sa apostatang mga doktrina, nga mga pagtulon-an nga dili makaplagan sa Pulong sa Diyos. Unsa ang pipila niining bakak nga mga pagtulon-an? Ang imortalidad sa kalag, ang Trinidad, purgatoryo, ug usa ka impiyernong-kalayo aron pagasakiton ang mga tawo sa walay kataposan. Sila naggitik usab sa mga igdulongog sa ilang mga mamiminaw pinaagi sa pagwali kon unsay gustong pamation sa mga tawo. Sila sa balikbalik nagpahayag nga ang Kakristiyanohan wala magaatubang ug katalagman kay siya nagbaton sa kalinaw sa Diyos. Apan ang klero nagasulti sa “panan-awon sa ilang kaugalingong kasingkasing.” Kini bakak. Kadtong nagtuo sa maong kabakakan ginahiloan sa espirituwal nga paagi. Sila ginalimbongan ngadto sa ilang kalaglagan!
8 Tagda kon unsay giingon ni Jehova mahitungod niining bakak nga mga magtutudlo sa Jer 23 bersikulo 21: “Wala ako magpadala sa mga manalagna, apan sila mismo midalagan. Wala ako magsulti kanila, apan sila mismo nanagna.” Mao man usab karong adlawa, ang klero wala ipadala sa Diyos, ni sila nagtudlo sa iyang mga kamatuoran. Ang sangpotanan? Ang makalilisang nga pagkawalay-alamag sa Bibliya naglungtad taliwala sa mga magsisimba kay ang ilang mga ministro nagtudlo kanila sa kalibotanong mga pilosopiya.
9, 10. (a) Unsang matang sa mga damgo ang nabatonan sa bakak nga mga magtutudlo sa Jerusalem? (b) Sa unsang paagi ang klero sa Kakristiyanohan susamang nagtudlog “bakak nga mga damgo”?
9 Dugang pa, ang klero karong adlawa nagmantalag bakak nga mga paglaom. Matikdi ang Jer 23 bersikulo 25: “Nakadungog ako sa giingon sa mga manalagna nga nagapanagna ug kabakakan diha sa akong ngalan, nga nag-ingon, ‘Ako nagdamgo! Ako nagdamgo!’” Unsang matanga kana sa mga damgo? Ang Jer 23 bersikulo 32 nagsugid kanato: “‘Ania karon, ako batok sa mga manalagna sa mga damgo nga bakak,’ nagaingon si Jehova, ‘kinsa nag-asoy niini ug nagpahinabo sa akong katawhan nga mangahisalaag tungod sa ilang kabakakan ug tungod sa ilang pagpanghambog. Apan ako mismo wala magpadala kanila o magsugo kanila. Busa sila dili makahatag ug kaayohan niini nga katawhan,’ nagaingon si Jehova.”
10 Unsang bakak nga mga damgo, o mga paglaom, ang gitudlo sa klero? Aw, nga ang bugtong paglaom sa tawo alang sa kalinaw ug kasegurohan mao ang Hiniusang Kanasoran. Sa katuigang bag-o pa, sila nagtawag sa HK nga “ang kataposang paglaom sa panaghiusa ug kalinaw,” “ang kinalabwang katigoman sa kalinaw ug hustisya,” “ang pangunang yutan-ong paglaom alang sa kalinaw sa kalibotan.” Pagkadakong handurawan! Ang bugtong paglaom sa katawhan mao ang Gingharian sa Diyos. Apan ang klero wala magwali ug magtudlo sa kamatuoran mahitungod nianang langitnong kagamhanan, nga mao ang pangunang tema sa pagwali ni Jesus.
11. (a) Ang bakak nga mga magtutudlo sa Jerusalem may unsang daotang epekto diha sa ngalan mismo sa Diyos? (b) Kasukwahi sa Jeremias nga matang, unsay nahimo sa bakak nga mga magtutudlo sa relihiyon karong adlawa kon bahin sa balaang ngalan?
11 Ang Jer 23 bersikulo 27 nagsugid kanatog labaw pa. “Sila nagahunahuna sa paghimo sa akong katawhan nga makalimot sa akong ngalan pinaagi sa ilang mga damgo nga ginapadayon nila sa pag-asoy ang matag usa ngadto sa lain, maingon nga ang ilang mga amahan nakalimot sa akong ngalan pinaagi ni Baal.” Ang bakak nga mga manalagna sa Jerusalem nagpahinabo sa katawhan nga makalimot sa ngalan sa Diyos. Wala ba himoa ang sama sa bakak nga mga magtutudlo sa relihiyon? Daotan pa, ilang gitagoan ang ngalan sa Diyos, nga Jehova. Sila nagtudlo nga kana dili kinahanglan nga gamiton, ug ilang giwagtang kana gikan sa ilang mga hubad sa Bibliya. Kusganon nilang ginasupak si bisan kinsa nga nagtudlo sa katawhan nga ang ngalan sa Diyos maoy Jehova. Apan ang Jeremias nga matang, ang nahibilin sa dinihogan-sa-espiritung mga Kristohanon, duyog sa ilang mga kauban, nagbuhat sama sa gibuhat ni Jesus. Sila nagtudlo sa milyonmilyon mahitungod sa ngalan sa Diyos.—Juan 17:6.
Pagyagyag sa Ilang Pagkasalawayon
12. (a) Nganong adunay dakong pagkasad-an ug dugo sa bahin sa bakak nga mga magtutudlo sa relihiyon? (b) Unsa ang papel sa klero sa duha ka gubat sa kalibotan?
12 Ang Jeremias nga matang sa balikbalik nagyagyag sa klero ingong bakak nga mga magtutudlo nga nagapanguna sa ilang mga panon ubay sa haluag nga dalan ngadto sa kalaglagan. Oo, ang nahibilin nagtin-aw kon nganong ang maong mga magdadamgo takos sa daotang paghukom ni Jehova. Pananglitan, ang mga alagad ni Jehova sagad nagpunting sa Pinadayag 18:24, nga nag-ingon nga diha sa Dakong Babilonya nahikaplagan ang dugo sa “tanan nga gipamatay sa yuta.” Palandonga ang tanang gubat nga gibugno tungod sa mga kalainan sa relihiyon. Pagkadako ang pagkasad-an ug dugo sa bakak nga mga magtutudlo sa relihiyon! Ang ilang mga pagtulon-an nagpahinabog pagkabahinbahin ug nagpausbaw sa pagdinumtanay niadtong may lainlaing mga relihiyon ug mga nasod. Bahin sa Gubat sa Kalibotan I, ang librong Preachers Present Arms nag-ingon: “Ang clercs [mga klerigo] mihatag sa gubat ug mabinationg espirituwal nga kahulogan ug panukmod. . . . Sa ingon ang simbahan nalambigit gayod sa sistema sa gubat.” Tinuod usab kana sa Gubat sa Kalibotan II. Ang klero bug-os nagpaluyo sa nagbugnoayng mga nasod ug nagpanalangin sa ilang mga sundalo. Ang duha ka gubat sa kalibotan nagsugod diha sa Kakristiyanohan diin ang mga tawong magkauban ug relihiyon nagpinatyanay sa usag usa. Ang sekular ug relihiyosong mga grupo sulod sa Kakristiyanohan nagpadayon sa pag-ulag dugo hangtod niining panahona. Labihan ka makalilisang ang mga epekto sa ilang bakak nga mga pagtulon-an!
13. Sa unsang paagi ang Jeremias 23:22 nagpamatuod nga ang klero sa Kakristiyanohan walay relasyon kang Jehova?
13 Palihog matikdi ang Jeremias kapitulo 23, bersikulo 22: “Kon sila mitindog diha sa akong suod nga pundok, nan mapahimo unta nila ang akong katawhan nga magpatalinghog sa akong kaugalingong mga pulong, ug mapahinabo unta nila nga sila motalikod gikan sa ilang daotang dalan ug gikan sa kadaotan sa ilang mga pakiglabot.” Kon ang relihiyosong mga manalagna sa Kakristiyanohan nagtindog pa diha sa suod nga pundok ni Jehova, nga masanduroton kaniya ingon sa matinumanon ug maalamong alagad, nan sila magkinabuhi unta usab sumala sa mga sukdanan sa Diyos. Mapahimo usab unta nila ang mga katawhan sa Kakristiyanohan nga magpatalinghog sa mga pulong mismo sa Diyos. Sa kapulihay, ang modernong-adlawng bakak nga mga magtutudlo naghimo sa ilang mga sumusunod nga nabutaang mga alagad sa Kaaway sa Diyos, si Satanas nga Yawa.
14. Unsang kusganong pagyagyag sa klero sa Kakristiyanohan ang giluwatan niadtong 1958?
14 Ang pagyagyag sa kamatuoran bahin sa klero pinaagi sa Jeremias nga matang maoy kusganon. Pananglitan, sa 1958 Balaang Kabubut-ong Internasyonal nga Asembliya sa mga Saksi ni Jehova sa Siyudad sa New York, ang bise presidente sa Watch Tower Society militok sa usa ka pahayag nga sa bahin miingon: “Nga walay dobleng sinultihan o pagpanuko among ginapahayag nga kining lintunganayng hinungdan sa tanang krimen, delingkuwensiya, dinumtanay, panag-away, pagpihigpihig, . . . ug hingaping kagubot mao ang sayop nga relihiyon, ang bakak nga relihiyon; nga sa luyo niini mao ang dili-makitang kaaway sa tawo, si Satanas nga Yawa. Ang mga tawo nga labi pang may tulubagon alang sa kahimtang sa kalibotan mao ang relihiyosong mga instruktor ug mga pangulo; ug ang labing salawayon kanila mao ang relihiyosong klero sa Kakristiyanohan. . . . Human niining tanang katuigan sukad sa Gubat sa Kalibotan I, ang Kakristiyanohan nagbarog diha sa usa ka relasyon maylabot sa Diyos nga sama sa iya sa Israel sa adlaw ni Jeremias. Oo, ang Kakristiyanohan nag-atubang ug kalaglagan nga labi pang makahahadlok ug malaglagon kay sa nakita ni Jeremias nga nahitabo sa Jerusalem.”
Paghukom sa Bakak nga mga Magtutudlo
15. Unsang mga tagna sa pakigdait ang gihimo sa klero? Mamatuman ba kana sila?
15 Bisan pa niining pasidaana, unsay gibuhat sa klero sukad niadto? Ingon sa gitaho sa Jer 23 bersikulo 17: “Sila sa balikbalik nagaingon ngadto niadtong dili matinahoron kanako, ‘Si Jehova miingon: “Kamo makabaton ug pakigdait.”’ Ug sa tagsatagsa nga nagalakaw sa katig-a sa iyang kasingkasing sila miingon, ‘Walay katalagman nga modangat kaninyo.’” Tinuod ba kini? Dili! Iyagyag ni Jehova ang kabakakan sa maong mga tagna sa klero. Dili niya pagatumanon kon unsay ilang ginaingon diha sa iyang ngalan. Hinuon, ang bakak nga pagpasalig sa klero sa pakigdait uban sa Diyos malimbongon kaayo!
16. (a) Unsa ang moral nga kahimtang niining kalibotana, ug kinsa ang adunay bahin sa responsabilidad niini? (b) Unsay ginabuhat sa Jeremias nga matang mahitungod sa daotang mga panghunahuna sa moral niining kalibotana?
16 Nagahunahuna ka ba, ‘Unsa, ako malimbongan sa bakak nga mga pagtulon-an sa klero? Dili gayod!’ Aw, ayaw kaayo paneguro! Hinumdomi nga ang bakak nga mga pagtulon-an sa klero nagpasiugda sa malalangon, makalilisang nga kahimtang sa moral. Ang ilang matinugotong mga pagtulon-an nagpakamatarong sa halos bisan unsa, bisan unsa ka imoral. Ug kining daotang kahimtang sa moral maoy lukop sa tanang natad sa kalingawan, mga pelikula, TV, mga magasin, ug musika. Nan, kinahanglang kita mag-amping pag-ayo, basin kita mailalom sa impluwensiya niining daotan apan malinglahong makapadaning kahimtang sa moral. Ang mga batan-on mahimong malit-ag sa modaldal-sa-kadaotang mga video ug musika. Hinumdomi nga kining itugot-ang-bisan-unsa nga tinamdan sa mga tawo karong adlawa maoy laktud nga sangpotanan sa bakak nga mga pagtulon-an sa klero ug sa ilang pagkapakyas sa pagtuboy sa matarong nga mga sukdanan sa Diyos. Ang Jeremias nga matang nagapakigbugno niining imoral nga mga panghunahuna ug nagatabang sa mga alagad ni Jehova sa pagsalikway sa pagkadaotan nga milukop sa Kakristiyanohan.
17. (a) Sumala ni Jeremias, unsang paghukom ang modangat sa tuman ka daotang Jerusalem? (b) Unsay duol nang mahitabo sa Kakristiyanohan?
17 Unsang hukom ang pagadawaton sa bakak nga mga magtutudlo sa Kakristiyanohan gikan kang Jehova, ang dakong Maghuhukom? Ang mga Jer 23 bersikulo 19, 20, 39, ug Jer 23:40 nagtubag: “Tan-awa! Ang unos ni Jehova, ang kapungot mismo, mogula, bisan ang unos nga nagaalimpulos. Ibabaw sa ulo sa mga tuman ka daotan kini magaalimpulos. Ang kasuko ni Jehova dili mosibog hangtod nga iyang pagabuhaton ug hangtod ang mga ideya sa iyang kasingkasing iyang pagatumanon. . . . Ihatag ko kamo sa pagkapinasagdan, uban sa pagkatino, ug pagabiyaan ko kamo ug ang siyudad nga akong gihatag kaninyo ug sa inyong mga amahan—gikan sa akong atubangan. Ug ibutang ko ibabaw kanimo ang kaulawan hangtod sa panahong walay tino ug pagkatalamayon hangtod sa panahong walay tino, nga dili gayod mahikalimtan.” Kanang tanan nahitabo sa tuman ka daotang Jerusalem ug sa templo niini, ug karon ang samang katalagman duol nang mahitabo sa tuman ka daotang Kakristiyanohan!
Pagpahayag sa “Palas-anon ni Jehova”
18, 19. Unsang “palas-anon ni Jehova” ang gipahibalo ni Jeremias sa Juda, uban ang unsang mga kahulogan?
18 Busa, unsa ang responsabilidad sa Jeremias nga matang ug sa ilang mga kauban? Ang Jer 23 bersikulo 33 nagsulti kanato: “Sa diha nga kining katawhan o ang manalagna o saserdote mangutana kanimo, nga magaingon, ‘Unsa ang palas-anon ni Jehova?’ igaingon mo usab kanila, ‘“Kamong katawhan maoy—Oh unsa nga palas-anon! Ug ako gayod nga biyaan kamo,” nagaingon si Jehova.’”
19 Ang Hebreohanong pulong alang sa “palas-anon” adunay dobleng kahulogan. Kini mahimong magtumong sa usa ka hinungdanong balaang pahayag o sa butang nga makapabug-at ug makapakapoy sa usa. Dinhi ang mga pulong “palas-anon ni Jehova” nagtumong sa usa ka hinungdanong tagna—ang pahayag nga ang Jerusalem gihukman sa kalaglagan. Ang mga tawo ba miangay sa pagpatalinghog sa maong hinungdanong mga tagna nga sa balikbalik gilitok ni Jeremias gikan kang Jehova? Wala, ang mga tawo mibugalbugal kang Jeremias: ‘Unsang tagna (palas-anon) ang anaa kanimo karon? Kami nakatino nga ang imong tagna maoy laing makapakapoy nga palas-anon!’ Apan unsay gisulti ni Jehova kanila? Kini: “Kamo nga katawhan maoy—Oh unsa nga palas-anon! Ug pagabiyaan ko gayod kamo.” Oo, ang maong katawhan usa ka palas-anon kang Jehova, ug siya magwagtang kanila aron dili na mahimong palas-anon niya.
20. Unsa “ang palas-anon ni Jehova” karong adlawa?
20 Unsa “ang palas-anon ni Jehova” karong adlawa? Kini ang hinungdanong matagnaong mensahe gikan sa Pulong sa Diyos. Kini punog paghukom sa kalaglagan, nga nagapahayag sa haduol nga kalaglagan sa Kakristiyanohan. Mahitungod sa katawhan ni Jehova, kami adunay bug-at nga responsabilidad sa pagpahayag niining “palas-anon ni Jehova.” Samtang nagkaduol ang kataposan, kinahanglang isulti namo sa tanan nga ang masupilong katawhan sa Kakristiyanohan maoy usa ka “palas-anon,” oo, “Oh unsa nga palas-anon!” alang kang Jehova nga Diyos, ug duol na niyang wagtangon ang maong “palas-anon” pinaagi sa pagbiya sa Kakristiyanohan ngadto sa katalagman.
21. (a) Nganong ang Jerusalem gilaglag niadtong 607 W.K.P.? (b) Human sa kalaglagan sa Jerusalem, unsay nahitabo sa bakak nga mga manalagna ug sa matuod nga manalagna ni Jehova, nga nagahatag kanato sa unsang pasalig karong adlawa?
21 Ang paghukom ni Jehova gipatuman sa adlaw ni Jeremias sa dihang ang mga taga-Babilonya milaglag sa Jerusalem niadtong 607 W.K.P. Sumala sa gitagna, kadto ‘usa ka kaulawan ug pagtamay’ alang niadtong gahig-ulo, dili-matinumanong mga Israelinhon. (Jeremias 23:39, 40) Kadto nagpakita kanila nga si Jehova, kinsa sa balikbalik ilang gipakaulawan, sa kataposan mibiya kanila aron makaagom sa sangpotanan sa ilang pagkadaotan. Ang mga baba sa ilang mapangahasong bakak nga mga manalagna sa kataposan natak-om na. Bisan pa, ang baba ni Jeremias nagpadayon sa pagpanagna. Wala siya biyai ni Jehova. Sumala sa maong sumbanan, si Jehova dili magbiya sa Jeremias nga matang sa dihang ang iyang bug-at nga desisyon mosangpot sa paglaglag sa klero sa Kakristiyanohan ug niadtong nagtuo sa ilang kabakakan.
22. Sa unsang kahimtang nga ang Kakristiyanohan modangat tungod sa mga paghukom ni Jehova?
22 Oo, ang nalaglag, walay-nagpuyong kahimtang sa Jerusalem human sa 607 W.K.P. sa eksakto mao ang dagway unya sa relihiyosong Kakristiyanohan human siya mahikawan sa iyang katigayonan ug sa pagkamakauulaw iyagyag. Kini ang angay nga paghukom nga gihukom ni Jehova batok sa bakak nga mga magtutudlo. Dili mapakyas ang maong paghukom. Maingon nga ang tanang dinasig nga mga mensahe sa pasidaan ni Jeremias natuman sa nangagi, sila mamatuman diha sa ilang modernong-adlawng katumanan. Busa hinaot nga kita mahisama kang Jeremias. Sa walay-kahadlok atong ipahayag ang matagnaong palas-anon ni Jehova ngadto sa mga katawhan, aron sila mahibalo kon nganong ang bug-os nga sukod sa iyang matarong nga paghukom modangat sa tanang bakak nga mga magtutudlo sa relihiyon!
Mga Pangutana sa Pagsubli
◻ Unsa ka daotan ang karaang Jerusalem gikan sa panglantaw ni Jehova?
◻ Sa unsang mga paagi ang Kakristiyanohan ‘naglakaw sa kabakakan’?
◻ Sa unsang paagi nayagyag ang pagkasalawayon sa modernong-adlawng klero?
◻ Unsang “palas-anon ni Jehova” ang ginapahayag karon?
[Hulagway sa panid 8]
Ang mga manalagna sa Jerusalem nagbuhat ug “makalilisang nga mga butang”
[Hulagway sa panid 9]
“Ang panan-awon sa ilang kaugalingong kasingkasing mao ang ilang gipamulong”
[Hulagway sa panid 10]
Ang Jerusalem human sa iyang kalaglagan naghulagway sa kataposang dulnganan sa Kakristiyanohan