Lakaw Ingon nga Gitudloan sa Diyos
“Manungas kita sa bukid ni Jehova . . . , ug siya magatudlo kanato sa iyang mga dalan, ug kita magalakaw sa iyang mga alagianan.”—MIQUEAS 4:2.
1. Sumala kang Miqueas, unsay pagahimoon sa Diyos alang sa iyang katawhan sa kataposang mga adlaw?
SI Miqueas nga propeta sa Diyos mitagna nga “sa kataposang mga adlaw,” sa atong panahon, daghang tawo ang aktibong mangita sa Diyos, aron simbahon siya. Kini sila magdinasigay sa usag usa, nga magaingon: “Manungas kita sa bukid ni Jehova . . . , ug siya magatudlo kanato sa iyang mga dalan, ug kita magalakaw sa iyang mga alagianan.”—Miqueas 4:1, 2.
2, 3. Sa unsang paagi nagakatuman karong adlawa ang tagna ni Pablo labot sa mga tawo nga mahimong mga mahigugmaon sa salapi?
2 Ang atong pagtuon sa 2 Timoteo 3:1-5 makatabang kanato sa pagkakita sa mga sangpotanan sa pagkatinudloan sa Diyos niining “kataposang mga adlaw.” Sa nag-unang artikulo, kita misugod pinaagi sa paghisgot sa mga kaayohan nga nabatonan niadtong nagpatalinghog sa pasidaan ni Pablo nga dili mahimong “mga mahigugmaon sa ilang kaugalingon.” Si Pablo nagdugang nga sa atong panahon ang mga tawo mahimo usab nga “mga mahigugmaon sa salapi.”
3 Dili na kinahanglan nga graduwado ang usa sa modernong kasaysayan aron masabtan kon unsa gayod kahaom kining mga pulonga sa atong panahon. Wala ka ba makabasa mahitungod sa mga kapitalista ug mga pangulo sa dagkong korporasyon nga wala matagbaw sa minilyong kita matag tuig? Kining mga mahigugmaon sa salapi gusto pa ug dugang, bisan sa ilegal nga paagi. Ang mga pulong ni Pablo haom usab sa daghang tawo karon kinsa, bisag dili dato, sama ra ka maibogon, nga walay katagbawan. Tingali may nailhan kang ingon niana nga mga tawo sa inyong dapit.
4-6. Sa unsang paagi ang Bibliya nagatabang sa mga Kristohanon aron malikayan nga mahimong mga mahigugmaon sa salapi?
4 Ang gihisgotan ba ni Pablo usa lamang ka dili-kalikayan nga bahin sa tawhanong kinaiya? Dili sumala sa Awtor sa Bibliya, kinsa dugay nang nagpahayag niining maong kamatuoran: “Ang gugma sa salapi maoy usa ka gamot sa tanang matang sa makadaot nga mga butang, ug sa pagpangab-ot niini nga gugma ang pipila napahisalaag gikan sa pagtuo ug lukop nga nagtusaktusak sa ilang kaugalingon sa daghang kasakit.” Matikdi, ang Diyos wala mag-ingon, ‘Ang salapi maoy usa ka gamot sa tanang matang sa makadaot nga mga butang.’ Siya nag-ingon nga kadto maoy “ang gugma sa salapi.”—1 Timoteo 6:10.
5 Makaiikag, ang konteksto sa mga pulong ni Pablo miila nga ang pipila ka maayong mga Kristohanon sa unang siglo adunahan sa presenteng sistema sa mga butang, napanunod man o hinagoan. (1 Timoteo 6:17) Nan, dayag nga bisan unsa pay atong pinansiyal nga pagkabutang, ang Bibliya nagpasidaan kanato sa kapeligrohan sa pagkahimong mahigugmaon sa salapi. Aduna bay dugang instruksiyon ang Bibliya sa paglikay niining grabe ug kaylap nga depekto? Oo aduna, sama sa Wali ni Jesus sa Bukid. Ang kaalam niini nabantog sa tibuok kalibotan. Matikdi, pananglitan, ang giingon ni Jesus sa Mateo 6:26-33.
6 Sumala sa natala sa Lucas 12:15-21, si Jesus nag-asoy bahin sa usa ka tawong dato nga nagsigeg tigom ug dugang bahandi apan kalit lang nga namatay. Unsa ang buot ipasabot ni Jesus? Siya miingon: “Pagbantay batok sa tanang matang sa hakog nga kaibog, tungod kay bisag adunay kadagaya ang usa ka tawo ang iyang kinabuhi wala magagikan sa mga butang nga iyang gipanag-iya.” Uban sa paghatag sa maong tambag, ang Bibliya nagsaway sa kataspokan ug nagpasiugda sa bili sa matinud-anong pagkugi. (1 Tesalonica 4:11, 12) Aw, ang pipila tingali motutol nga kining maong mga pagtulon-an dili na aplikado sa atong panahon—apan kini aplikado gayod, ug kini mosaler.
Gitudloan ug Nakabenepisyo
7. Unsay atong katarongan sa pagsalig nga kita malamposong makapadapat sa tambag sa Bibliya bahin sa mga bahandi?
7 Diha sa nagkalainlaing nasod, makakaplag kag tinuod-kinabuhing mga pananglitan sa mga lalaki ug mga babaye gikan sa tanang sosyal ug ekonomikanhong pagkabutang nga nagapadapat sa diyosnong mga prinsipyo labot sa salapi. Sila ug ang ilang mga pamilya nakabenepisyo, ingon sa makita sa mga tagagawas. Pananglitan, diha sa librong Religious Movements in Contemporary America, gikan sa magpapatik sa Princeton University, usa ka antropologo ang nagsulat: “Diha sa mga publikasyon [sa mga Saksi] ug sa mga pakigpulong sa kongregasyon sila gipahinumdoman nga sila dili magadepende sa bag-ong mga kotse, mahalong mga sapot, o mapatuyangong pagkinabuhi alang sa ilang pagkabutang. Sa samang panahon ang usa ka Saksi magtrabaho sa husto alang sa iyang amo [ug kinahanglan] nga magmatinud-anon gayod . . . Ang maong mga kinaiya mopahimo bisan sa usa ka tawo nga walay kahanas nga usa ka mapuslanong empliyado, ug ang pipila ka Saksi sa North Philadelphia [T.B.A.] miasenso sa mga posisyon nga adunay dakong kaakohan sa trabaho.” Dayag, ang mga tawo nga midawat sa instruksiyon gikan sa Diyos pinaagi sa iyang Pulong napasidan-an sa mga tinamdan nga makapalisod sa pagsagubang sa presenteng mga kahimtang. Ang ilang kasinatian nagpamatuod nga ang instruksiyon sa Bibliya motultol ug usa ka mas maayo, mas malipayon nga kinabuhi.
8. Nganong ang “mapasiatabon-sa-kaugalingon,” “mapahitas-on,” ug “mga tigpasipala” mahimong nalangkit, ug unsay kahulogan niining tulo ka termino?
8 Mahimo natong ilangkit ang sunod tulo ka butang nga gitala ni Pablo. Sa kataposang mga adlaw, ang mga tawo mahimong “mapasiatabon-sa-kaugalingon, mapahitas-on, mga tigpasipala.” Kining tulo dili managsama, apan ang tanan may kalabotan sa garbo. Ang una maoy “mapasiatabon-sa-kaugalingon.” Usa ka diksiyunaryo nag-ingon nga ang paninugdang Gregong pulong dinhi nagkahulogang: “‘Usa nga naghimo sa iyang kaugalingon nga labaw pa kay sa gipamatud-an sa kamatuoran,’ o ‘nagasaad ug labaw kay sa iyang mahimo.’” Imong masabtan kon nganong ang pila ka Bibliya migamit sa terminong “hambogiro.” Sunod ang “mapahitas-on,” o sa literal “nagapakita-nga-labaw.” Ang kataposan maoy, “mga tigpasipala.” Ang pipila tingali maghunahuna sa mga tigpasipala ingong mga tawo nga mosulti nga walay pagtahod sa Diyos, apan ang sukaranong termino naglakip sa makadaot, makapaulaw, o mapanamastamasong pulong batok sa mga tawo. Busa si Pablo naghisgot sa pasipala nga gitumong batok sa Diyos ug sa tawo.
9. Lahi sa nangibabaw makadaot nga mga tinamdan, unsang mga tinamdan ang gidasig sa Bibliya nga ugmaron sa mga tawo?
9 Unsay imong bation sa dihang kauban nimo ang mga tawo nga mihaom sa gihubit ni Pablo, kauban man sila sa trabaho, kaeskuyla, o mga paryente? Kana ba mas nagpasayon sa imong kinabuhi? O kadto bang mga tawhana nagpakomplikar sa imong kinabuhi, nga nagpalisod kanimo sa pagsagubang sa atong panahon? Hinuon, ang Pulong sa Diyos nagtudlo kanato sa pagsalikway niining maong mga tinamdan, nga naghatag ug instruksiyon sama nianang makita sa 1 Corinto 4:7; Colosas 3:12, 13; ug Efeso 4:29.
10. Unsay nagpaila nga ang katawhan ni Jehova nakabenepisyo sa pagdawat sa Biblikanhong instruksiyon?
10 Bisan tuod ang mga Kristohanon dili hingpit, ang ilang pagpadapat niining maayong instruksiyon nakatabang kanila ug dako niining malisod nga mga panahon. Ang Italyanhong basahon nga La Civiltà Cattolica nag-ingon nga ang usa ka katarongan kon nganong ang mga Saksi ni Jehova padayong nagtubo “mao nga ang organisasyon naghatag sa mga sakop niini ug usa ka tino ug malig-ong personalidad.” Apan, bahin sa “malig-ong personalidad,” ang magsusulat ba nagpasabot sa “mapasiatabon-sa-kaugalingon, mapahitas-on, mga tigpasipala”? Sa kasukwahi, ang Heswitang magasin nagpahayag nga ang kalihokan “naghatag sa mga sakop niini ug usa ka tino ug malig-ong personalidad, ug kini maoy usa ka dapit alang kanila diin sila giabiabi uban ang kainit ug pagbati sa panag-igsoonay ug panaghiusa.” Dili ba kini pamatuod nga ang mga butang nga gitudlo sa mga Saksi nagatabang kanila?
Ang Instruksiyon Nagahatag Kaayohan sa mga Sakop sa Pamilya
11, 12. Sa unsang paagi tukmang gipaila ni Pablo kon sama sa unsa ang mga kahimtang sa daghang pamilya?
11 Mahimo natong pundokon ang sunod upat ka butang, nga daw may kalangkitan sa usag usa. Gitagna ni Pablo nga sulod sa kataposang mga adlaw, daghan ang mahimong “dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati.” Nahibalo ka nga duha niining depektoha—ang pagkadili-mapasalamaton ug pagkadili-maunongon—kaylap sa atong palibot. Bisan pa, masabtan dayon nato kon nganong kini gibutang ni Pablo sa tunga sa “dili masinugtanon sa ginikanan,” ug “walay kinaiyanhong pagbati.” Ang upat nalambigit.
12 Halos ang tanang tawong mabinantayon, bata man o tigulang, modawat nga daghan ang dili masinugtanon sa mga ginikanan, ug kini misamot pa. Daghang ginikanan ang nagreklamo nga ang mga batan-on daw dili-mapasalamaton sa tanang butang nga gihimo alang kanila. Daghang batan-on ang nagreklamo nga ang ilang mga ginikanan dili gayod maunongon kanila (o sa pamilya sa kinatibuk-an) apan nalinga sa ilang mga trabaho, mga kalingawan, o sa ilang kaugalingon. Inay susihon kon kinsa ang sad-an, tan-awa ang mga sangpotanan. Ang paglinay-anay tali sa mga hamtong ug mga batan-on sagad moagak sa mga tin-edyer sa paghimo sa ilang kaugalingong sukdanan sa moralidad, o imoralidad. Unsa ang resulta? Ang pagtaas sa gidaghanon sa mga pagmabdos sa tin-edyer, mga aborsiyon, ug mga sakit nga mapasa pinaagi sa sekso. Kasagaran, ang kakulang sa kinaiyanhong pagbati diha sa panimalay moresulta ug kapintasan. Tingali makaasoy ka ug mga pananglitan gikan sa imong dapit, pamatuod nga ang kinaiyanhong pagbati nagakahanaw.
13, 14. (a) Atubangan sa pagkadaot sa daghang pamilya, nganong atong hatagag pagtagad ang Bibliya? (b) Unsang matang sa maalamong tambag ang gihatag sa Diyos bahin sa pamilyahanong kinabuhi?
13 Mao kini ang hinungdan kon nganong dugang ug dugang tawo nagabatok niadtong kas-a daw bahin sa ilang dako nga pamilya, sa samang banay, tribo, o pundok. Hinuon, timan-i nga kining maong mga butang wala nato hisgoti aron ipasiugda ang mga negatibo sa kinabuhi karon. Ang atong duha ka pangunang interes mao: Ang mga pagtulon-an ba sa Bibliya makatabang kanato aron malikayan ang pag-antos gikan sa mga kasaypanan nga gilista ni Pablo, ug makabenepisyo kaha kita gikan sa pagpadapat sa mga pagtulon-an sa Bibliya sa atong mga kinabuhi? Ang mga tubag mahimong oo, ingon sa makita may kalabotan sa upat ka mga punto diha sa talaan ni Pablo.
14 Ang pangatibuk-ang pahayag makataronganon gayod: Walay pagtulon-an ang molabaw kay nianang gikan sa Bibliya sa pagpatunghag panimalaynong kinabuhi nga makapalipay sa kasingkasing ug adunay maayong kalamposan. Kana mapamatud-an pinaagi sa pagpadapat lamang sa tambag niini nga makatabang sa mga sakop sa pamilya dili lamang sa paglikay sa mga lit-ag kondili aron molampos. Maayong pagkailustrar kini sa Colosas 3:18-21, bisan pag adunay daghang ubang maayo ug praktikal nga mga teksto nga gitumong sa mga bana, mga asawa, ug mga anak. Kini nga instruksiyon mosaler sa atong adlaw. Tinuod, bisan sa mga pamilya sa tinuod nga mga Kristohanon, adunay mga komplikasyon ug mga hagit. Bisan pa, ang kinatibuk-an nga mga resulta nagpamatuod nga ang Bibliya naghatag ug makatabang kaayong pagtulon-an alang sa mga pamilya.
15, 16. Unsang kahimtang ang nakaplagan sa usa ka tigdukiduki sa dihang gitun-an ang mga Saksi ni Jehova sa Zambia?
15 Sa usa ug tunga ka tuig, gitun-an sa usa ka tigdukiduki sa University of Lethbridge, Canada, ang sosyal nga kinabuhi sa Zambia. Siya nakahinapos: “Ang mga Saksi ni Jehova mas dako ug kalamposan kay sa mga sakop sa ubang denominasyon sa pagbaton ug malig-ong mga kaminyoon. . . . Ang ilang kalamposan naghawas sa bag-ong relasyon tali sa bana ug asawa, kinsa, diha sa ilang bag-ong nakaplagan, walay-panghulga, binuligay nga mga paningkamot, magapanubag sa ilang pagtratar sa usag usa ngadto sa usa ka bag-ong pangulo, ang Diyos. . . . Ang bana nga Saksi ni Jehova gitudloan sa pagpangabaga sa responsabilidad alang sa kaayohan sa iyang asawa ug mga anak. . . . Ang bana ug asawa ginadasig nga mahimong mga tawo nga adunay integridad . . . Kining naglungtad nga kinahanglanong integridad nagalig-on sa kaminyoon.”
16 Kanang pagtuona gipasukad sa daghang tinuod nga mga kasinatian. Pananglitan, kini nga tigdukiduki nag-ingon nga lahi sa naandang batasan, ang “lalaking mga Saksi ni Jehova sagad nga makit-an nga nagtabang sa ilang mga asawa diha sa mga tanaman, dili lamang sa panahon sa pag-andam sa tanaman, kondili usab sa pagtanom ug sa pagkalot.” Dayag gayod nga ang dili maihap nga mga kasinatian sa tibuok yuta nagpakita nga ang instruksiyon sa Bibliya nagaapektar sa mga kinabuhi.
17, 18. Unsang makapakurat nga mga resulta ang nakaplagan sa usa ka pagtuon labot sa relihiyosong kagikan ug pakigsekso nga wala pay kasal?
17 Ang nag-unang artikulo naghisgot sa mga nakaplagan sa Journal for the Scientific Study of Religion. Niadtong 1991 kini naundan ug artikulo nga nag-ulohang “Relihiyosong Kabilin ug Pakigsekso nga Wala pay Kasal: Pamatuod Gikan sa Usa ka Nasodnong Pagtuki sa Batan-ong mga Hamtong.” Tingali nasayod ka kon unsa ka kaylap ang pakigsekso nga wala pay kasal. Sa linghod nga edad daghan ang nagpadaog sa pangibog sa unod, ug daghang tin-edyer adunay daghang seksuwal nga kaparis. Ang pagtulon-an ba sa Bibliya makausab niining naandang paagi?
18 Ang tulo ka kaubang propesor nga nagtuon sa isyu naglaom nga makakaplag ‘nga ang linghod nga batan-on ug batan-ong mga hamtong nga gimatuto sa mas konserbatibo Kristohanong tradisyon wala kaayoy posibilidad nga makigsekso nga wala pay kasal.’ Apan unsay gipakita sa mga kamatuoran? Sa kinatibuk-an, tali sa 70 porsiento ug 82 porsiento ang nakigsekso nga wala pay kasal. Alang sa pipila “ang pundamentalistang kabilin [nagpakunhod] sa posibilidad sa pagpakigsekso nga wala pay kasal, apan dili sa kaso sa ‘pakigsekso sa tin-edyer nga wala pay kasal.’” Ang mga tigdukiduki mikomento bahin sa mga batan-on gikan sa daw relihiyosong mga pamilya kinsa “nagpakitag mas dako nga posibilidad nga makigsekso nga wala pay kasal kon itandi sa tradisyonal nga mga Protestante.”—Italiko amoa.
19, 20. Sa unsang paagi nakatabang ug nanalipod ang instruksiyon sa Diyos sa daghang batan-on taliwala sa mga Saksi ni Jehova?
19 Nakaplagan sa mga propesor ang kaatbang gayod taliwala sa mga batan-on sa mga Saksi ni Jehova, nga usa “sa mga grupo nga lahi kaayo sa uban.” Ngano? “Ang sukod sa kaakohan ug kalangkitan sa katilingban nga ginapalambo sa mga kasinatian, mga pagdahom, ug pagkalangkit . . . sa kinatibuk-an makamugna ug hataas nga sukod sa pagsunod sa mga prinsipyo sa pagtuo.” Sila midugang: “Ginapaabot nga tumanon sa mga Saksi ang pangmisyonaryong mga buluhaton ingong linghod nga mga batan-on ug batan-ong mga hamtong.”
20 Busa ang instruksiyon sa Bibliya nakaimpluwensiya sa mga Saksi ni Jehova alang sa kaayohan pinaagi sa pagtabang kanila nga makalikay sa imoralidad. Kana nagkahulogag proteksiyon batok sa mga sakit nga mapasa sa sekso, ang pila niini dili matambalan ug ang uban makamatay. Kini nagkahulogan nga walay pagpit-os aron ihulog ang gisabak, nga gitudlo sa Bibliya nga sama ra sa pagpatay. Kini nagkahulogan usab nga ang batan-ong mga hamtong makasulod sa kaminyoon nga adunay hinlo nga mga tanlag. Kana nagkahulogag mga kaminyoon nga natukod sa mas lig-on nga pundasyon. Ang maong mga pagtulon-an makatabang kanato sa pagsagubang, nga mahimong mas himsog, mas malipayon.
Positibong Instruksiyon
21. Unsang mga butang ang tukmang gitagna ni Pablo sa atong panahon?
21 Karon balik ngadto sa 2 Timoteo 3:3, 4, ug timan-i kon unsa pa ang giingon ni Pablo nga magpahimo sa atong panahon nga lisod sagubangon alang sa daghan—apan dili alang sa tanan: “[Ang mga tawo mahimong] dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, [ug] mga mahigugmaon sa kalipayan inay nga mga mahigugmaon sa Diyos.” Pagkatukma! Bisan pa niana, ang instruksiyon gikan sa Bibliya magapanalipod kanato ug magasangkap kanato sa pagsagubang, sa paglampos.
22, 23. Uban sa unsang positibong tambag gitapos ni Pablo ang iyang talaan, ug unsay importansiya niini?
22 Gitapos ni apostol Pablo ang iyang talaan uban sa positibong tambag. Iyang gihimo ang ulahing bahin ingong usa ka diyosnong sugo nga mohatag usab kanato ug dili masukod nga kaayohan. Gihisgotan ni Pablo kadtong nanagbaton ug “dagway sa diyosnong pagkamahinalaron apan nagapanghimakak sa gahom niini; ug gikan niini nila magpahilayo ka.” Hinumdomi nga mas daghang batan-on sa pipila ka simbahan sa pagkatinuod ang nakigsekso nga wala pay kasal kay sa kasagaran. Aw, bisan pa kon ang imoralidad niadtong maong mga magsisimba maoy kasarangang sukod lamang, dili ba pamatuod kana nga ang ilang matang sa pagsimba walay gahom? Dugang pa, ang relihiyosong mga pagtulon-an ba makausab sa paagi sa tawo sa pagnegosyo, kon sa unsang paagi sila nakiglabot sa ilang mga sakop, o kon unsay ilang pagtratar sa mga paryente?
23 Ang mga pulong ni Pablo nagpakita nga kinahanglan natong ipadapat kon unsay atong nakat-onan gikan sa Pulong sa Diyos, nga magbaton ug paagi sa pagsimba nga magpasundayag sa tinuod nga gahom sa Kristiyanidad. Mahitungod niadtong kansang porma sa pagsimba walay gahom, si Pablo nagsulti kanato: ‘Gikan niini magpahilayo kamo.’ Kana tin-aw nga sugo, usa nga mohatag kanato ug tino nga mga kaayohan.
24. Sa unsang paagi ang tambag sa Pinadayag kapitulo 18 kaamgid sa tambag ni Pablo?
24 Sa unsang paagi? Buweno, gilarawan sa kataposang basahon sa Bibliya ang usa ka mahulagwayong babaye, usa ka bigaon, nga gitawag ug Babilonyang Bantogan. Gipakita sa ebidensiya nga ang Babilonyang Bantogan naghawas sa tibuok kalibotang empiryo sa bakak nga relihiyon, nga gisusi ug gisalikway ni Jehova nga Diyos. Apan, kita dili kinahanglang malakip niana. Ang Pinadayag 18:4 nagtambag kanato: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.” Dili ba kana samang mensahe nga gipaabot ni Pablo, ‘gikan niini magpahilayo kamo’? Ang atong pagsunod maoy laing paagi diin kita makabenepisyo gikan sa instruksiyon sa Diyos.
25, 26. Unsang umaabot ang naghulat alang niadtong kinsa karon midawat ug mipadapat sa instruksiyon gikan kang Jehova nga Diyos?
25 Sa dili madugay ang Diyos mismo mangilabot sa tawhanong mga kalihokan. Iyang wagtangon ang tanang bakak nga relihiyon ug ang nahibilin sa presenteng daotang sistema. Hinungdan unya kana sa pagkalipay, ingon sa gipaila sa Pinadayag 19:1, 2. Sa yuta kadtong modawat ug mosunod sa instruksiyon sa Diyos tugotan sa padayong pagsunod sa iyang mga pagtulon-an sa dihang ang mga babag niining malisod nga mga panahon moagi na.—Pinadayag 21:3, 4.
26 Ang pagkinabuhi nianang napasig-uli yutan-ong Paraiso makalilipay gayod kaayo nga dili nato mahanduraw. Ang Diyos nagsaad nga posible kini alang kanato, ug kita bug-os nga makasalig kaniya. Busa siya nagahatag kanato ug daghang katarongan sa pagdawat ug pagsunod sa iyang makatabang nga pagtulon-an. Kanus-a? Atong sundon ang iyang mga instruksiyon karon sa atong malisod nga mga panahon ug ngadto sa Paraiso nga iyang gisaad.—Miqueas 4:3, 4.
Mga Punto nga Pamalandongon
◻ Sa unsang paagi nakabenepisyo ang katawhan ni Jehova gikan sa iyang tambag bahin sa mga bahandi?
◻ Unsang maayong mga resultang nadawat sa mga alagad sa Diyos tungod sa pagpadapat sa iyang Pulong ang gipamatud-an sa usa ka Heswitang magasin?
◻ Unsang mga benepisyo ang nadawat sa mga pamilya nga nagpadapat sa balaang instruksiyon ang gipakita sa usa ka pagtuon sa Zambia?
◻ Unsang panalipod sa mga batan-on ang gihatag sa balaang instruksiyon?
[Kahon sa panid 15]
PAGKAMAKALILISANG NGA SANGPOTANAN!
“Ang mga tin-edyer nagaatubang ug dakong kapeligrohang matakdan sa AIDS tungod kay gusto sila nga moeksperimento sa sekso ug sa mga droga, mangarisgar ug maglipaylipay sa makadiyut, ug tungod kay sila nagtuo nga dili sila mamatay ug dili motuo sa awtoridad,” matud pa sa usa ka taho nga gipresentar diha sa usa ka komperensiya bahin AIDS ug sa mga tin-edyer.—New York Daily News, Dominggo, Marso 7, 1993.
“Ang aktibo sa sekso nga mga tin-edyer nga mga babaye mopatim-aw nga mao ang sunod nga ‘magapanguna’ sa epidemiya sa AIDS, nga maoy nadiskobrehan sa usa ka pagtuon sa Hiniusang Kanasoran sa Uropa, Aprika ug Habagatan-sidlakang Asia.”—The New York Times, Biyernes, Hulyo 30, 1993.
[Mga hulagway sa panid 16, 17]
Ang instruksiyon sa Bibliya nakahatag kaayohan sa mga Saksi ni Jehova diha sa kongregasyon ug sa balay