Sila Gigantihan Tungod sa Paglakaw nga Walay-Ikasaway

SI Jehova nagapanalangin ug nagaganti sa iyang matinumanong mga alagad. Sila tingali kinahanglang magpaabot ug pipila pa ka panahon aron makita ang katumanan sa mga katuyoan sa Diyos, apan pagkadako sa kalipay sa dihang matagamtaman ang iyang panalangin!

Giilustrar kinig maayo sa mga duha ka libo ka tuig kanhi sa kahimtang sa Hudiyohanong saserdote nga si Zacarias ug sa iyang asawa, si Elisabet, nga mga kaliwat ni Aaron. Ang Diyos misaad nga panalanginan ug anak ang mga Israelinhon kon sila moalagad kaniya nga matinumanon. Siya miingon nga ang mga bata maoy usa ka ganti. (Levitico 26:9; Salmo 127:3) Apan, si Zacarias ug si Elisabet walay anak ug mga tigulang na.​—Lucas 1:1-7.

Ang Kasulatan nag-ingon nga si Zacarias ug Elisabet “pareho nga matarong atubangan sa Diyos tungod sa paglakaw nga walay-ikasaway uyon sa tanang sugo ug legal nga mga kinahanglanon ni Jehova.” (Lucas 1:6) Gihigugma gayod nila ang Diyos nga dili palas-anon alang kanila ang pagpadayon sa matarong nga dalan ug ang pagtuman sa iyang kasugoan.​—1 Juan 5:3.

Wala-Damhang mga Panalangin

Mobalik kita sa hinapos nga tinghunlak o sa sayong ting-init sa tuig 3 W.K.P. Si Herodes nga Bantogan nagmando ingong hari sa Judea. Usa ka adlaw, ang saserdoteng si Zacarias misulod sa Balaang bahin sa templo sa Jerusalem. Samtang ang katawhan nagkatigom sa pag-ampo sa gawas sa sangtuwaryo, siya nagsunog ug insenso diha sa bulawang halaran. Hayan giisip nga mao ang labing dungganon sa adlaw-adlaw nga mga pag-alagad, himoon kini human nga ikatanyag ang halad. Malagmit usa ka saserdote ang makapribilehiyo niini kas-a lamang sa iyang tibuok-kinabuhi.

Dili makatuo si Zacarias sa iyang nakita. Aw, ang manulonda ni Jehova nagbarog sa tuong bahin sa halaran sa insenso! Ang tigulang nga saserdote wala-mahimutang ug nahadlok. Apan ang manulonda miingon: “Ayawg kahadlok, Zacarias, tungod kay ang imong pangamuyo gidungog na nga may pabor, ug ang imong asawa nga si Elisabet mahimong inahan sa usa ka anak nga lalaki nganha kanimo, ug pagatawgon mo ang iyang ngalan nga Juan.” Oo, gitubag ni Jehova ang tim-os nga mga pag-ampo ni Elisabet ug Zacarias.​—Lucas 1:8-13.

Ang manulonda midugang: “Imong mabatonan ang kangaya ug dakong kasaya, ug daghan ang magamaya sa iyang pagkahimugso; kay siya mahimong bantogan atubangan kang Jehova. Apan dili gayod siya magainom ug bino ug isog nga ilimnon, ug siya mapuno sa balaang espiritu gikan pa sa tagoangkan sa iyang inahan.” Si Juan mahimong usa ka Nasareo sa tibuok nga kinabuhi nga napuno sa balaang espiritu sa Diyos. Ang manulonda nagpadayon: “Daghan sa mga anak ni Israel ang iyang pabalikon ngadto kang Jehova nga ilang Diyos. Usab, siya magauna kaniya uban ang espiritu ug gahom ni Elias, aron ipabalik ang mga kasingkasing sa mga amahan ngadto sa mga anak ug ang mga dili-masinugtanon ngadto sa praktikal nga kaalam sa mga matarong, aron andamon alang kang Jehova ang usa ka inandam nga katawhan.”​—Lucas 1:14-17.

Si Zacarias nangutana: “Unsaon ko pagseguro niini? Kay ako tigulang na ug ang akong asawa taas na ug panuigon.” Ang manulonda mitubag: “Ako si Gabriel, nga nagbarog sa atubangan sa Diyos, ug ako gipadala aron makigsulti kanimo ug ipahayag kanimo ang maayong balita niining mga butanga. Apan, tan-awa! ikaw maghilom ug dili makahimo sa pagsulti hangtod sa adlaw nga kining mga butanga mahitabo, tungod kay ikaw wala motuo sa akong mga pulong, nga matuman sa ilang tinudlong panahon.” Sa dihang si Zacarias migula gikan sa sangtuwaryo, siya dili makasulti, ug nasabot sa mga tawo nga siya nakakita ug labaw-kinaiyanhon nga talan-awon sulod sa sangtuwaryo. Ang mahimo na lamang niya mao ang pagsinyas, nga migamit ug mga pangompas sa kamot aron ipaabot ang iyang mga hunahuna. Sa dihang ang mga adlaw sa iyang publikong pag-alagad natapos, siya mipauli sa iyang balay.​—Lucas 1:18-23.

Hinungdan sa Pagkalipay

Ingon sa gisaad, si Elisabet sa dili madugay may hinungdan sa pagkalipay. Siya nagmabdos, nagwagtang sa kaulaw sa pagkaapuli. Ang iyang paryenteng si Maria nalipay usab, kay ang samang manulonda, si Gabriel, nagsulti kaniya: “Tan-awa! ikaw magasamkon sulod sa imong tagoangkan ug magpahimugsog anak nga lalaki, ug imong pagatawgon ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag ni Jehova nga Diyos kaniya ang trono ni David nga iyang amahan.” Si Maria andam nga modula sa papel sa “ulipong babaye ni Jehova.”​—Lucas 1:24-38.

Si Maria nagdali sa pag-adto sa balay ni Zacarias ug Elisabet sa bukirong kayutaan sa Juda. Sa pagkadungog sa pangomosta ni Maria, miigpot ang bata sulod sa tagoangkan ni Elisabet. Ubos sa impluwensiya sa balaang espiritu sa Diyos, si Elisabet mipatugbaw sa makusog nga tingog: “Bulahan ikaw sa mga kababayen-an, ug bulahan ang bunga sa imong tagoangkan! Unsa bang pagkahitaboa nga kini nga pribilehiyo naako man, nga mianhi kanako ang inahan sa akong Ginoo? Kay, tan-awa! sa dihang ang tingog sa imong pangomosta miabot sa akong igdulungog, ang bata sa akong tagoangkan miigpot sa dakong kasaya. Malipayon usab siya nga mituo, tungod kay mahitabo ang bug-os nga paghimo niadtong mga butang nga gipamulong kaniya gikan kang Jehova.” Si Maria misanong nga may dakong kalipay. Nagpabilin siya uban kang Elisabet sa mga tulo ka bulan.​—Lucas 1:39-56.

Natawo si Juan

Sa pag-abot sa panahon usa ka anak nga lalaki ang natawo sa tigulang nga Elisabet ug Zacarias. Sa ikawalong adlaw, gituli ang bata. Buot sa mga paryente nga nganlan ang bata ug Zacarias, apan si Elisabet miingon: “Dili gayod! apan siya pagatawgon nga Juan.” Mouyon ba kaha ang iyang naamang nga bana? Diha sa usa ka papan iyang gisulat: “Juan ang ngalan niini.” Dihadiha, ang iyang baba nabuka, ug ang iyang dila naluag ug siya misugod sa pagsulti, nga nagabulahan kang Jehova.​—Lucas 1:57-66.

Napuno sa balaang espiritu, ang malipayong saserdote nanagna. Siya nagsulti ingon sa daw ang gisaad nga Manluluwas​—‘ang sungay sa kaluwasan sa balay ni David’​—gibangon na uyon sa Abrahamikong pakigtugon bahin sa usa ka Binhi nga magapanalangin sa tanang kanasoran. (Genesis 22:15-18) Ingong mag-uuna sa Mesiyas, ang kaugalingong anak ni Zacarias nga natawong milagroso ‘magauna sa atubangan ni Jehova sa paghatag sa katawhan ug kahibalo sa kaluwasan.’ Sa milabay ang katuigan, si Juan padayong nagtubo ug nagkakusgan sa espiritu.​—Lucas 1:67-80.

Dagayang Gigantihan

Si Zacarias ug Elisabet maoy maayong mga panig-ingnan sa pagtuo ug pagpailob. Sila nagpadayon sa pag-alagad kang Jehova nga matinumanon bisan pag sila naghulat sa Diyos, ug ang ilang kinadak-ang mga panalangin miabot lamang sa dihang sila mga tigulang na.

Bisan pa, pagkadako sa mga panalangin ang natagamtam ni Elisabet ug Zacarias! Ubos sa impluwensiya sa espiritu sa Diyos, silang duha nanagna. Sila nakapribilehiyo sa pagkahimong mga ginikanan ug mga magtutudlo sa mag-uuna sa Mesiyas, si Juan Bawtista. Dugang pa, gilantaw sila sa Diyos ingong matarong. Ingon man usab, kadtong kinsa karong adlawa nagapadayon sa diyosnong dalan makabaton sa matarong nga baroganan uban sa Diyos ug makadawat ug daghang bulahang mga ganti tungod sa paglakaw nga walay-ikasaway sumala sa kasugoan ni Jehova.