Pagbuka sa mga Mata Alang sa Maayong Balita

“DILI mausab ang pagkaasul sa langit tungod lamang kay ang buta dili makakita niana,” matud sa panultihong Danes. Apan sa puliki natong pagkinabuhi matag adlaw, nakita ba nato nga asul ang langit, pagaingnon pa? Kita ba naglantaw sa umaabot nga masaligon? Nagtuo ba gayod kita sa gipahayag nga maayong balita sa Pulong sa Diyos, ang Bibliya?

Sa nag-una nga artikulo, atong gitagad ang mga bahin sa literal nga pagkabuta. Karon susihon nato ang matang sa panan-aw nga mas labawng importante. Kini naglangkit sa atong walay kataposang kalipay ingon man sa palaaboton sa atong mga minahal.

Walay duhaduha, kita nagaatubang sa “makuyaw nga mga panahong lisod sagubangon.” (2 Timoteo 3:1) Unsay mahitabo samtang ang mga tawo nangamas sa pagpangitag kabuhian, nga nag-antos sa mga suliran sa panglawas ug mga suliran sa pamilya ug nagsagubang sa sosyal nga inhustisya ug kawalay gugma? Ikasubo, nakaplagan sa daghan nga nagakahanaw ang ilang pagsalig sa ilang isigkatawo, sa relihiyon, ug sa kagamhanan. Kay nakasabot nga walay makitang sulbad, ang uban nakahinapos nga dili na gayod masulbad ang ilang mga suliran sa normal nga paagi. Diha sa mantalaang Jornal da Tarde sa Brazil, si Jacob Pinheiro Goldberg miingon: “Ang mga tawo, atubangan sa mapintas nga kamatuoran, mobatig tumang kalagot sa mga sayop nga sila dili na makapangatarongan sa husto, ug sila mosalig sa makapahigawad nga mistisismo.” Apan, bisan gani ug dili na magkadimao ang mga butang, buot natong gamiton ang maayong panghunahuna, dili ba?

Handurawa kadiyut nga nagkinahanglan kag balay alang sa imong pamilya, ug niining bahina dili suliran ang salapi. Tingali mangita ka ug motan-aw sa nagkadaiyang balay sa lainlaing kasilinganan. Bisan tuod naningkamot ang mga ahente sa balay-ug-yuta nga matagbaw ang imong mga kagustohan, ang balay nga anaa sa imong hunahuna wala nimo makita. Apan, tungod kay nalangkit ang katagbawan ug kaayohan sa imong pamilya, dili ka moangka, dili ba? Karon handurawa ang kalipay sa dihang sa kataposan imong nakaplagan ang gidamgo nimong balay.

Maingon nga mogugol kag panahon sa pagpangitag bag-ong balay, nganong dili susihon ang Bibliya sa pagpangitag sulbad sa imong mga suliran? Maingon nga kinahanglang timbangon nato ang mga butang sa dihang maghimo kitag desisyon labot sa balay, sa ingon kinahanglang mangatarongan kitag husto labot sa atong mabasa diha sa Pulong sa Diyos. Ug ang labaw pang maayo kay sa pagkaplag ug balay mao ang atong pagkakita ug pagdawat sa kamatuoran bahin kang Jehova nga Diyos ug kang Jesu-Kristo. Si Jesus nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Apan kon ang mensahe sa Bibliya bililhon kaayo, nganong daghan kaayo ang nagpabiling buta sa maayong balita niini? Usa ka katarongan mao, ug tingali makapakurat kini sa daghan, “ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Ingong resulta, si Satanas nga Yawa “nagbuta sa mga hunahuna sa mga dili-magtutuo, aron nga ang banwag sa mahimayaong maayong balita bahin sa Kristo, kinsa mao ang larawan sa Diyos, dili makalapos paglamdag.” (2 Corinto 4:4) Bisan tuod makakita kita pinaagi sa atong mga mata, ang utok maoy nagaanalisar sa atong makita. Busa, ang pagkabuta gihubit usab ingong “dili-makahimo o dili-buot mosabot o mohukom.” Makapahinumdom kini sa usa ka popular nga panultihon nga nagaingon: “Walay sama ka buta ingon niadtong dili gustong makakita.”

Ang tawong buta dili makakita kon unsay anaa sa iyang atubangan, busa siya mameligro nga masamad. Ang literal nga pagkabuta sa daghan karon dili na maayo, apan walay usa ang obligadong magpabiling buta sa espirituwal.

Pagbuntog sa Espirituwal nga Pagkabuta

Maingon nga ang kakulang sa kahinlo makapahanap sa panan-aw, ang mahilayon nga palibot makadugang sa pagkabuta sa moral. Lain pa, si Jesu-Kristo nagpasidaan batok sa hinimog-tawong mga doktrina ug mga tradisyon. Iyang gipatin-aw nga ang relihiyosong mga pangulo kaniadto nagpahisalaag sa ilang panon: “Mga buta nga manggigiya sila. Nan, kon ang usa ka tawong buta magagiya sa usa ka tawong buta, mangahulog sa gahong silang duha.”​—Mateo 15:14.

Inay magpalimbong sa mga pangulong buta, pagkadako sa kalipay niadtong nagbuka sa ilang mga mata sa maayong balita bahin sa Gingharian sa Diyos! Si Jesus miingon: “Kay niini nga paghukom ako mianhi niining kalibotana: aron nga kadtong dili makakita managpakakita.” (Juan 9:39) Apan, sa unsang paagi makakita ang mga buta sa espirituwal? Buweno, ipadayon nato pagtagad ang literal nga pagkabuta.

Lainlaing mga pamaagi ang mabatonan karon sa mga tawong daot ug panan-aw. Dili ingon niini kanunay ang kahimtang kaniadto. Walay seryosong paningkamot ang gihimo sa pagtabang sa buta una pa gitukod ni Valentin Haüy ang espesyal nga tunghaan alang sa mga buta niadtong 1784. Sa ulahi, si Louis Braille nag-imbento ug sistema nga gitawag sa iyang ngalan; iya kining gihimo aron matabangan ang daot ug panan-aw nga makabasa.

Komosta ang mga buta sa espirituwal? Niining bag-o pang katuigan dihay gihimong seryosong paningkamot aron ipahayag ang maayong balita bisan sa kinahilitang mga bahin sa yuta. (Mateo 24:14) Ang mga Saksi ni Jehova malipay sa pagdalag paglaom alang sa mga buta sa espirituwal ug sa literal.

Usa ka taga-Brazil nga babaye nagsulat: “Gusto kong ipahibalo nga bisan pa sa akong pisikal nga depekto, makakita ako​—sa espirituwal nga paagi. Pagkakahibulongang Diyos! Kita malipay sa pagkasayod nga ‘si Jehova magabukhad sa iyang kamot ug magatagbaw sa tinguha sa tanang buhi nga butang.’” (Salmo 145:16) Ug si Jorge, nga usa ka buta sa pisikal, nahinumdom: “Ang akong kinabuhi mahimo gayong bahinon sa duha: sa wala pa ug human sa mga Saksi. . . . Pinaagi kanila, misugod ako sa pagkakita sa kalibotan uban sa katin-aw ug kahayag niini. Gitagamtam ko ang maayong relasyon sa tanan diha sa kongregasyon.” Sama nga makapalipay niana mao, nga ang Bibliya nagpasalig kanato nga sa dili magdugay wala na unyay buta ibabaw sa yuta​—sa literal man o sa espirituwal. Sa unsang paagi kana mahitabo? Sa unsang paagi kini mahitabo sa tibuok yuta nga “si Jehova nagabuka sa mga mata sa mga buta”?​—Salmo 146:8.

Ang Bugtong Permanenteng Sulbad​—Gingharian sa Diyos

Bisan pa sa miuswag nga kahibalo sa medisina, daghang sakit ang padayong nagapahinabog pagkabuta, sakit, ug kamatayon. Nan, unsa man ang gikinahanglan aron mawagtang ang malnutrisyon, dili maayong mga kahimtang sa kahinlo, ug ang mga kalisod nga nagakuha sa panan-aw ug sa kalipay sa kinabuhi? Ang pag-ayo ni Jesus sa buta ug sa uban pa maoy usa ka gamayng-sukod nga sumbanan sa umaabot. Makalilipay, ang iyang buluhatong pagpanudlo ug pagpang-ayo naglandong sa mga panalangin nga ipadangat sa yuta ubos sa kagamhanan sa Gingharian sa Diyos.

Ang pagpang-ayo sa tibuok kalibotang sukod haduol na.a Kining programa sa diyosnong pagpang-ayo matahom nga pagkailustrar ni apostol Juan: “Iyang gipakita kanako ang usa ka suba sa tubig sa kinabuhi, ingon katin-aw sa kristal, nga nagadagayday gikan sa trono sa Diyos ug sa Kordero latas sa taliwala sa lapad nga dalan niini. Ug dinhing daplina sa suba ug dinhang daplina dihay mga kahoy sa kinabuhi nga nagapatungha ug napulog-duha ka abot nga bunga, nagahatag sa ilang mga bunga matag bulan. Ug ang mga dahon sa mga kahoy maoy alang sa pag-ayo sa kanasoran.”​—Pinadayag 22:1, 2.

Ang mga ekspresyon sama sa “tubig sa kinabuhi” ug “mga kahoy sa kinabuhi” nag-ilustrar nga inigkatapos niining daotang sistema karon, ang makaayo nga mga tagana sa Gingharian sa Diyos sa inanay magtuboy sa katawhan ngadto sa kahingpitan. Sa pagkamatuod, ang mga kaayohan sa halad lukat ni Jesus (lakip sa bug-os nga kapasayloan sa mga sala), duyog sa kahibalo bahin kang Jesu-Kristo ug sa iyang Amahan, mopatunghag hingpit nga panglawas ug kinabuhing walay kataposan.​—Juan 3:16.

Kalipay Diha sa Bag-ong Kalibotan sa Diyos

Nan, handurawa ang yuta nga walay krimen, polusyon, o kakabos. Handurawa ang imong pamilya nga nagkinabuhi nga malinawon sa napasig-uling Paraiso. (Isaias 32:17, 18) Pagkamakapalipay nga magtan-aw sa nagkadaiyang kolor uban sa hingpit nga hunahuna ug mga igbalati!

“Ang kinaiyanhong kahimtang alang sa tawo mao ang pagpuyo diha sa kanunay nagabag-ong palibot​—sa kahayag, kolor, ug mga porma. Walay makapuol nga palibot diha sa kinaiyahan,” matud ni Faber Birren. “Ang kolor maoy usa sa kinaiyanhong tinubdan sa kalipay niining kalibotana. Diha sa kinaiyahan ang kolor kasagaran, ug ang usa ka malipayong kinabuhi nagadepende niana.”

Pagkabililhong gasa ang panan-aw! Pagkamakapalipay unya sa dihang ang mga mata nga kanhi buta​—sa literal o espirituwal​—makakita!

Oo, sa umaabot nga napasig-uling Paraiso, ang pagkabuta ug ubang mga depekto dili na mopahinabog kasub-anan! Wala nay mapahisalaag. Sanglit motigbabaw ang tiunay nga gugma, ang tanan malamdagan sa espirituwal. Kana, ug daghan pa, mahitabo sa haduol nga umaabot, apan karon mismo maoy panahon sa pagpaningkamot nga mahimong inuyonan sa Usa kinsa magatuman sa iyang matagnaong saad: “Nianang panahona ang mga mata sa mga buta mangabuka”!​—Isaias 35:5.

[Footnote]

[Hulagway sa panid 7]

Nianang panahona ang mga mata sa mga buta mangabuka!