Ang Kangaya ni Jehova Maoy Atong Kuta

“Kining adlawa balaan alang sa atong Ginoo, ug ayaw kamo panagsubo, kay ang kangaya ni Jehova maoy inyong kuta.”​—NEHEMIAS 8:10.

1, 2. (a) Unsa ang usa ka kuta? (b) Sa unsang paagi gipakita ni David nga siya midangop kang Jehova?

SI Jehova maoy dili-ikatandi nga kuta. Ug unsa ang usa ka kuta? Kini maoy usa ka gipalig-ong dapit, usa ka dapit sa kasegurohan o kaluwasan. Giisip ni David sa karaang Israel ang Diyos nga iyang kuta. Pananglitan, tagda ang awit nga gipahinungod ni David ngadto sa Labing Hataas “sa adlaw nga si Jehova nagluwas kaniya gikan sa kamot sa tanan niyang mga kaaway ug gikan sa kamot ni Saul,” ang hari sa Israel.​—Salmo 18, superskripsiyon.

² Si David nagsugod sa maong makapatandog nga awit uban sa mga pulong: “Gihigugma ko ikaw, Oh Jehova ang akong kusog. Si Jehova mao ang akong bato ug akong kuta ug ang akong Manluluwas. Ang akong Diyos maoy akong bato. Ako modangop kaniya, akong taming ug akong sungay sa kaluwasan, akong hataas nga dapit sa kasegurohan.” (Salmo 18:1, 2) Nga sa pagkadili-matarong ginukod sa balaod ug gipangita ni Haring Saul, ang matarong nga si David midangop kang Jehova, sama sa usa ka tawo nga modangop ngadto sa usa ka gipalig-ong dapit aron maluwas sa katalagman.

 3. Nganong ang mga Hudiyo sa adlaw ni Esdras nakatagamtam ug “dakong kangaya”?

³ Ang kangaya nga ihatag ni Jehova maoy dili-mapakyas nga kuta alang niadtong nagalakaw diha sa iyang dalan ingong mga maghuhupot sa integridad. (Proverbio 2:6-8; 10:29) Aron mabatonan ang hinatag-sa-Diyos nga kangaya, hinunoa, kinahanglang buhaton sa mga tawo ang balaang kabubut-on. Mahitungod niini, palandonga ang nahitabo sa Jerusalem niadtong 468 W.K.P. Ang tigkopya nga si Esdras ug ang uban nagpaambit sa kahibalo pinaagi sa makahuloganong pagbasa sa Kasugoan. Dayon ang mga tawo giagda: “Lakaw, kan-a ang matambok nga mga butang ug imna ang matam-is nga mga butang, ug ipadala ang uban niadtong wala gayoy giandam; kay kining adlawa balaan alang sa atong Ginoo, ug ayaw kamo panagsubo, kay ang kangaya ni Jehova maoy inyong kuta.” Misangpot ang “dakong kangaya” samtang gipadapat sa mga Hudiyo ang kahibalo nga nabatonan nila ug mihimog usa ka malipayong Pangilin sa mga Balongbalong. (Nehemias 8:1-12) Kadtong kinsa nakabaton sa ‘kangaya ni Jehova ingong ilang kuta’ nakabatog kusog alang sa iyang pagsimba ug pag-alagad. Sanglit ang kangaya ni Jehova maoy ilang kuta, angayng dahomon nato nga ang katawhan sa Diyos karong adlawa magmangayaon usab. Nan, unsa ang pipila sa ilang presenteng-adlawng mga hinungdan sa kangaya?

“Magmangayaon Gayod”

 4. Unsa ang usa ka dakong tuboran sa kangaya alang sa katawhan ni Jehova?

⁴ Usa ka dakong katarongan sa kangaya mao ang tagana nga ginahimo ni Jehova alang sa tingob nga panagkatigom. Ang mga asembliya ug mga kombensiyon sa mga Saksi ni Jehova nagahatag kanilag kangaya karong adlawa, sama sa tinuig nga mga pangilin nga gihimo sa mga Israelinhon nga nakahatag kangaya sa ilang mga kasingkasing. Ang katawhan sa Israel gisultihan: “Saulogon ninyo sulod sa pito ka adlaw ang pangilin [sa mga balongbalong] alang kang Jehova nga inyong Diyos diha sa dapit nga pagapilion ni Jehova, tungod kay si Jehova nga inyong Diyos magapanalangin kaninyo sa tanan ninyong abot ug sa tanang buhat sa inyong kamot, ug kamo magmangayaon gayod.” (Deuteronomio 16:13-15) Oo, buot sa Diyos nga sila “magmangayaon gayod.” Tinuod usab kana sa mga Kristohanon, kay giagda ni apostol Pablo ang mga isigkamagtutuo: “Pagmaya kanunay diha sa Ginoo. Sa makausa pa ako magaingon, Pagmaya!”​—Filipos 4:4.

 5. (a) Unsa ang kangaya, ug sa unsang paagi makabaton niana ang mga Kristohanon? (b) Sa unsang paagi mabatonan nato ang kangaya bisan pa sa mga pagsulay?

⁵ Sanglit buot ni Jehova nga kita magmangayaon, siya nagahatag kanatog kangaya ingong usa sa mga bunga sa iyang balaang espiritu. (Galacia 5:22, 23) Ug unsa ang kangaya? Kini maoy makalilipay nga emosyon nga gipahinabo pinaagig pagdahom o pagbatog kaayohan. Ang kangaya maoy usa ka kahimtang sa tinuod nga kalipay, bisan kasadya. Kining bunga sa balaang espiritu sa Diyos nagapalig-on kanato ilalom sa pagsulay. “Tungod sa kangaya nga gibutang atubangan kaniya [Jesus] siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.” (Hebreohanon 12:2) Ang tinun-ang si Santiago misulat: “Isipa ingong bug-os kangaya, akong mga igsoon, dihang makahibalag kamo ug nagkadaiyang mga pagsulay, kay kamo nahibalo man nga kining sinulayang kalidad sa inyong pagtuo nagapatunghag pag-agwanta.” Apan unsa man kon kita wala mahibalo kon unsay buhaton labot sa usa ka dayag nga pagsulay? Nan kita masaligong makaampo alang sa kaalam aron makasagubang niana. Ang paglihok nga uyon sa langitnong kaalam makapaarang kanato sa pagsulbad sa mga suliran o sa pagsagubang sa mapinadayonong mga pagsulay nga dili mawad-an sa kangaya ni Jehova.​—Santiago 1:2-8.

 6. Unsang relasyon ang anaa tali sa kangaya ug matuod nga pagsimba?

⁶ Ang kangaya nga ihatag ni Jehova nagapalig-on kanato sa pagpalambo sa tinuod nga pagsimba. Kana ang nahitabo sa mga adlaw ni Nehemias ug Esdras. Ang mga Hudiyo niadtong panahona nga may kangaya ni Jehova ingong ilang kuta napalig-on alang sa pagpauswag sa mga intereses sa tinuod nga pagsimba. Ug samtang gipalambo nila ang pagsimba kang Jehova, nag-uswag ang ilang kangaya. Tinuod usab kana karong adlawa. Ingong mga magsisimba ni Jehova, kita adunay mga pasikaranan alang sa dakong kangaya. Atong tagdon karon ang pipila pa sa atong daghang mga hinungdan sa kangaya.

Relasyon sa Diyos Pinaagi ni Kristo

 7. Mahitungod kang Jehova, adunay unsang katarongan ang mga Kristohanon alang sa kangaya?

⁷ Ang atong suod nga relasyon uban kang Jehova nagahimo kanatong labing malipayong mga tawo sa yuta. Sa wala pa mahimong mga Kristohanon, bahin kita sa dili-matarong tawhanong katilingban nga ‘anaa sa kangitngit sa kaisipan ug nahimulag gikan sa kinabuhi nga iya sa Diyos.’ (Efeso 4:18) Pagkadako sa atong kangaya nga kita wala na mahimulag gikan ni Jehova! Siyempre, nagkinahanglag paningkamot nga magpabilin sa iyang pag-uyon. Kita kinahanglang “magapadayon diha sa pagtuo, nga gitukod ibabaw sa patukoranan ug malig-on ug wala mapahilayo gikan sa paglaom nianang maayong balita.” (Colosas 1:21-23) Kita malipay nga si Jehova nagkabig kanato ngadto sa iyang Anak nga uyon sa kaugalingong mga pulong ni Jesus: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Kon tinuod gayod natong ginapabilhan ang atong bililhong relasyon sa Diyos pinaagi ni Kristo, kita magbantay batok sa tanang butang nga magdaot niana.

 8. Sa unsang paagi si Jesus nakadugang sa atong mangayaong kahimtang?

⁸ Ang kapasayloan sa mga sala pinaagi sa pagtuo sa halad lukat ni Jesus maoy usa ka dakong hinungdan sa kangaya tungod kay kini ang nakahimo sa atong pakigrelasyon sa Diyos nga posible. Tungod sa iyang kinabubut-ong dalan sa sala, ang atong katigulangang si Adan nagdala sa kamatayon ibabaw sa tanang katawhan. Bisan pa niana, si apostol Pablo nag-ingon: “Nagarekomendar ang Diyos sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” Si Pablo misulat usab: “Ingon nga pinaagi sa usa ka paglapas ang resulta nganha sa tanang matang sa tawo mao ang pagkahinusgahan, sa ingon usab pinaagi sa usa ka buhat sa pagmatarong ang resulta nganha sa tanang matang sa tawo mao ang usa ka pagpahayag kanila nga matarong alang sa kinabuhi. Kay maingon nga pinaagi sa pagkadili-masinugtanon sa usa ka tawo daghan ang nahimong makasasala, sa ingon usab pinaagi sa pagkamasinugtanon sa usa ka persona daghan ang mahimong matarong.” (Roma 5:8, 18, 19) Pagkamangayaon gayod nato nga si Jehova nga Diyos nahimuot sa paglukat niadtong kaliwat ni Adan kinsa magpahimulos nianang mahigugmaong tagana!

Relihiyosong Kagawasan ug Pagkanalamdagan

 9. Nganong kita magmangayaon gikan sa relihiyosong panglantaw?

⁹ Ang kagawasan gikan sa Dakong Babilonya, ang empiryo sa bakak nga relihiyon sa tibuok kalibotan, maoy laing katarongan nga magmangayaon. Ang balaang kamatuoran ang nagpahigawas kanato. (Juan 8:32) Ug ang kagawasan gikan niining relihiyosong bigaon magpasabot nga kita dili makig-ambit sa iyang mga sala, makaagom sa iyang mga hampak, ug malaglag uban kaniya. (Pinadayag 18:1-8) Dili gayod ikasubo nga maluwas kita nianang tanan!

10. Unsang kalamdagan ang atong ginatagamtam ingong katawhan ni Jehova?

¹⁰ Ang pagkasabot ug pagpadapat sa Pulong sa Diyos diha sa kinabuhi maoy mga hinungdan sa dakong kangaya. Kay nahigawas gikan sa impluwensiya sa bakak nga relihiyon, kita nagatagamtam sa mas nagakatin-aw espirituwal nga pagsabot nga gitagana sa atong langitnong Amahan pinaagi “sa kasaligan ug mabuot nga ulipon.” (Mateo 24:45-47) Sa tanang katawhan nga nagkinabuhi sa yuta, kadtong bug-os debotado lamang kang Jehova ang makabaton sa iyang balaang espiritu ug sa gipanalanginang pagsabot sa iyang Pulong ug kabubut-on. Kini sama sa giingon ni Pablo: “Nganhi kanato gipadayag sa Diyos kini sila [ang mga butang nga iyang giandam alang niadtong kinsa nahigugma kaniya] pinaagi sa iyang espiritu, kay ginasusi sa espiritu ang tanang butang, bisan ang lawom nga mga butang sa Diyos.” (1 Corinto 2:9, 10) Kita magmapasalamaton ug magmangayaon nga kita nagatagamtam sa nagauswag nga pagsabot nga gipaila diha sa mga pulong sa Proverbio 4:18: “Ang alagianan sa mga matarong sama sa masanag nga kahayag nga nagapadan-ag pa sa kahayag ngadto sa pagkahingpit sa adlaw.”

Paglaom sa Gingharian ug Kinabuhing Walay Kataposan

11. Sa unsang paagi gipakig-ambit sa uban ang mangayaong paglaom sa Gingharian?

¹¹ Ang atong paglaom sa Gingharian makahimo usab kanatong mangayaon. (Mateo 6:9, 10) Ingong mga Saksi ni Jehova, dugay na natong gimantala nga ang Gingharian sa Diyos mao ang bugtong paglaom sa tanang katawhan. Pananglitan, palandonga ang tuig 1931, sa dihang gisagop nato ang ngalang mga Saksi ni Jehova pinaagig resolusyon nga malipayong giabiba diha sa 51 ka kombensiyon sa tibuok kalibotan. (Isaias 43:10-12) Kana nga resolusyon ug ang talagsaong pakigpulong sa kombensiyon ni J. F. Rutherford (presidente niadto sa Watch Tower Society) gipatik diha sa bokletang The Kingdom, the Hope of the World. Gilakip diha niana mao ang laing resolusyon nga gisagop sa maong kombensiyon, usa nga nagsaway sa Kakristiyanohan tungod sa iyang apostasiya ug sa pagtagad nga mabiaybiayon sa tambag ni Jehova. Kini usab nagmantala: “Ang paglaom sa kalibotan mao ang Gingharian sa Diyos, ug walay laing paglaom.” Sulod sa pipila ka bulan, giapod-apod sa mga Saksi ni Jehova ang kapin sa lima ka milyong kopya niini nga bokleta sa tanang bahin sa yuta. Sukad niadto kanunay natong gipamatud-an nga ang Gingharian maoy bugtong paglaom sa katawhan.

12. Unsang mangayaong palaaboton sa kinabuhi ang gipahimutang atubangan niadtong nagaalagad kang Jehova?

¹² Kita malipayon, usab, sa palaabotong kinabuhing walay kataposan ubos sa pagmando sa Gingharian. Ang “gamayng panon” sa dinihogang mga Kristohanon may mangayaon langitnong paglaom. “Bulahan ang Diyos ug Amahan sa atong Ginoong Jesu-Kristo,” misulat si apostol Pedro, “kay sumala sa iyang dakong kaluoy siya mihatag kanato ug usa ka bag-ong pagkahimugso ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulundon. Gitagana kini didto sa mga langit alang kaninyo.” (Lucas 12:32; 1 Pedro 1:3, 4) Karong adlawa, ang kinabag-an sa mga Saksi ni Jehova mahinamong nagapaabot sa kinabuhing walay kataposan sa Paraiso sulod sa dominyo sa Gingharian. (Lucas 23:43; Juan 17:3) Walay laing katawhan sa yuta ang adunay bisan unsa nga ikatandi sa atong malipayong palaaboton. Ato gayod kining mahalon!

Usa ka Gipanalanginang Panag-igsoonay

13. Unsay angay natong panglantaw sa atong internasyonal nga panag-igsoonay?

¹³ Ang pagkahimong bahin sa bugtong inuyonan-sa-Diyos internasyonal nga panag-igsoonay maoy tuboran usab sa dakong kangaya. Makalilipay, kita adunay labing tilinguhaong mga kaubanan sa yuta. Si Jehova nga Diyos mismo nagpunting sa atong adlaw ug miingon: “Uyogon ko ang tanang nasod, ug ang tilinguhaong mga butang sa tanang nasod kinahanglang mosulod; ug pun-on ko kining balaya sa himaya.” (Haggeo 2:7) Tinuod, ang tanang Kristohanon dili hingpit. Bisan pa niana, si Jehova nagkabig sa maong mga indibiduwal ngadto kaniya mismo pinaagi ni Jesu-Kristo. (Juan 14:6) Sanglit gikabig ni Jehova ngadto kaniya mismo ang mga tawong giisip niyang tilinguhaon, ang atong kangaya modagaya kon pakitaan nato sila sa atong inigsoong gugma, pasidunggan sila, makigtambayayong kanila diha sa diyosnong mga kalihokan, tabangan sila sa ilang mga pagsulay, ug mag-ampo alang kanila.

14. Unsang pagdasig ang atong mapupo gikan sa 1 Pedro 5:5-11?

¹⁴ Kining tanan magdugang sa atong kangaya. Sa pagkatinuod, ang kangaya ni Jehova mao ang kuta sa atong espirituwal nga panag-igsoonay sa tibuok yuta. Oo, kitang tanan mag-antos sa mga paglutos ug ubang mga kalisod. Apan kini angayng magbugkos kanato ug maghatag kanatog diwa sa panaghiusa ingong bahin sa usa ka tinuod nga organisasyon sa Diyos sa yuta. Ingon sa gisulti ni Pedro, angay kitang magpaubos sa atong kaugalingon ilalom sa gamhanang kamot sa Diyos, nga ginatugyan ang tanan natong mga kabalaka diha kaniya kay nahibalo nga siya may kahangawa kanato. Kita kinahanglang magmabinantayon tungod kay ang Yawa nagatinguha sa pagtukob kanato, apan niini kita wala mag-inusara, kay si Pedro midugang: “Bumarog kamo batok kaniya, nga lig-on diha sa pagtuo, kay nahibalo nga ang samang mga butang maylabot sa mga pag-antos ginapahinabo diha sa tibuok kapunongan sa inyong mga igsoon dinhi sa kalibotan.” Ug kining malipayong internasyonal nga panag-igsoonay dili gayod mabungkag, kay kita adunay pasalig nga ‘human kita makaantos sa makadiyot, ang Diyos magahuman sa atong pagbansay ug magpalig-on ug magpakusgan kanato.’ (1 Pedro 5:5-11) Palandonga kana. Ang atong mangayaong panag-igsoonay mohangtod sa walay kataposan!

Usa ka Kinabuhi nga May Katuyoan

15. Nganong ikaingon nga ang mga Saksi ni Jehova adunay kinabuhi nga may katuyoan?

¹⁵ Ang kangaya maatoa niining masamok nga kalibotan tungod kay kita adunay kinabuhi nga may katuyoan. Kita gisaligan sa usa ka ministeryo nga maghimo kanato ug sa uban nga malipayon. (Roma 10:10) Sa pagkatinuod usa gayod ka malipayong pribilehiyo nga mahimong mga isigkamagbubuhat sa Diyos. Mahitungod niini, si Pablo miingon: “Unsa . . . si Apolos? Oo, unsa ba si Pablo? Mga ministro pinaagi kang kinsa kamo nahimong mga magtutuo, ingon gayod sa gihatag sa Ginoo sa matag usa. Nagtanom ako, gibisibisan ni Apolos, apan padayong gipatubo kini sa Diyos; mao nga dili siya nga nagatanom ang hinungdanon ni siya nga nagabisibis, kundili ang Diyos nga maoy nagapatubo niini. Karon siya nga nagatanom ug siya nga nagabisibis usa ra, apan ang matag tawo magadawat sa iyang kaugalingong ganti sumala sa iyang kaugalingong kahago. Kay kami mga isigkamagbubuhat sa Diyos. Kamo mao ang uma sa Diyos ilalom sa pagtikad, ang tinukod sa Diyos.”​—1 Corinto 3:5-9.

16, 17. Unsang mga pananglitan ang ikapunting aron pamatud-an nga ang katawhan ni Jehova adunay mangayaong mga kinabuhi nga may katuyoan?

¹⁶ Daghang pananglitan ang ikapunting aron ipakita nga ang pag-alagad kang Jehova nga matinumanon mosangpot sa usa ka kinabuhi nga may katuyoan nga magpatugob kanato sa kangaya. Sagad kining mga pulonga: “Gitan-aw ko ang puno nga palibot sa Kingdom Hall [sa adlaw sa programa sa dedikasyon niini] ug nakita ko nga mitambong ang walo ka membro sa akong pamilya, lakip kanako ug ang akong asawa ug tulo sa among mga anak ug sa ilang mga kapikas. . . . Ako ug ang akong asawa tinuod gayod nga may malipayon, may katuyoan nga kinabuhi diha sa pag-alagad sa Diyos.”

¹⁷ Makapalipay usab nga masayod nga bisan pilay edad sa usa ka tawo makasugod siya sa usa ka malipayong kinabuhi nga may tinuod nga katuyoan diha sa pag-alagad ni Jehova. Pananglitan, usa ka babaye nga nakakat-on sa kamatuoran sa Bibliya diha sa balayng amumahan gibawtismohan ingong usa sa mga Saksi ni Jehova sa panuigong 102. Sa ingon natapos niya ang iyang kinabuhi nga may mangayaong katuyoan, ‘nahadlok sa matuod nga Diyos ug nagbantay sa iyang mga sugo.’​—Ecclesiastes 12:13.

Usa ka Dili-Mapakyas nga Kuta

18. Unsay angayng buhaton aron mabuntog ang pagkawala sa kadasig ug mapauswag ang atong kangaya?

¹⁸ Ang kangaya ni Jehova maoy dili-mapakyas nga kuta alang sa mga matinumanon. Hinuon, ang pagbaton niini nga kangaya wala magpasabot nga kita wala na gayoy mga oras sa kasub-anan sama niadtong nakatukmod kang Jesus sa pagpahayag sa Getsemane: “Dulot nga naguol ang akong kalag, bisan hangtod sa kamatayon.” (Marcos 14:32-34) Pananglitan kon ang pagkawala sa kadasig miresulta sa atong pagpahiuyon sa hakog nga mga pangagpas. Nan atong usbon ang atong paagi sa kinabuhi. Kon ang atong kangaya nagakamenos tungod kay kita mahakogong nagpas-an sa mabug-at nga luwan sa Kasulatanhong mga kaakohan, tingali makahimo kitag mga kausaban nga magpagaan sa kabug-at ug ipasig-uli ang atong mangayaong espiritu. Dugang pa, panalanginan kita ni Jehova ug kangaya kon atong ginatinguha nga pahimut-an siya pinaagi sa kusganong pagsukol sa makasasalang unod, sa daotang kalibotan, ug sa Yawa.​—Galacia 5:24; 6:14; Santiago 4:7.

19. Unsay angay natong panglantaw sa bisan unsang mga pribilehiyo nga atong nabatonan diha sa organisasyon sa Diyos?

¹⁹ Tungod sa mga katarongan nga atong nahisgotan, ug sa daghan pang uban, nabatonan nato ang dakong kangaya. Magmamantala man kita sa kongregasyon o nakig-ambit sa pipila ka matang sa bug-os-panahong pag-alagad, ang tanan kanato adunay daghang mahimo diha sa buluhaton sa Ginoo, ug kini seguradong magdugang sa atong kangaya. (1 Corinto 15:58) Bisag unsa nga pribilehiyo ang atong nabatonan sa organisasyon ni Jehova, kita magmapasalamaton niini ug sa kamasadyaon magpadayon sa pagtanyag ug balaang pag-alagad ngadto sa atong mahigugmaon, malipayong Diyos.​—1 Timoteo 1:11.

20. Unsa ang atong labing dakong pribilehiyo, ug bahin sa unsa nga kita makatino?

²⁰ Ilabina nga kita adunay katarongan nga magmalipayon diha sa atong pribilehiyo sa pagdala sa bantogang ngalan ni Jehova ingong iyang mga Saksi. Oo, kita dili-hingpit ug nagaatubang sa daghang mga pagsulay, apan atong ibutang sa hunahuna ang atong kahibulongang mga panalangin ingong mga Saksi ni Jehova. Ug hinumdomi, ang atong minahal langitnong Amahan dili gayod magpakyas kanato. Kita makaseguro nga kita kanunayng panalanginan kon ang kangaya ni Jehova maoy atong kuta.

Unsaon Nimo Pagtubag?

◻ Unsa ang “kangaya ni Jehova”?

◻ Sa unsang paagi mabatonan sa mga Kristohanon ang matuod nga kangaya?

◻ Unsa ang pipila ka mga hinungdan kon nganong ang mga Saksi ni Jehova mangayaon?

◻ Nganong ang kangaya ni Jehova usa ka dili-mapakyas nga kuta?