Gidawat Niya ang Balaang Direksiyon

PANANGLIT ang usa ka hingpit nga bata ipaatiman kanimo ug gidahom ka sa pagmatuto kaniya sa hustong paagi. Pagkalisod nga buluhaton! Sa unsang paagi kana himoon sa usa ka dili-hingpit nga tawo? Pinaagi lamang sa pagdawat sa balaang direksiyon ug pagpadapat niana sa matag adlaw nga pagkinabuhi.

Ang maong butang gihimo ni Jose, ang amaama ni Jesus. Sukwahi sa detalyadong apokripal nga mga tradisyon bahin kang Jose, ang Bibliya diyutayg ikasulti bahin sa iyang ubos nga papel sa sayong kinabuhi ni Jesus. Nasayod kita nga si Jose ug ang iyang asawa, si Maria, nagmatuto kang Jesus, upat ka ubang anak lalaki, ug mga anak babaye usab.​—Marcos 6:3.

Si Jose maoy kaliwat ni Haring David sa Israel agi sa linya ni Solomon. Siya maoy anak ni Jacob ug umagad ni Heli. (Mateo 1:16; Lucas 3:23) Ingong panday sa dakbayan sa Nazaret sa Galilea, si Jose kabos. (Mateo 13:55; Lucas 2:4, 24; itandi ang Levitico 12:8.) Apan siya dato sa espirituwal. (Proverbio 10:22) Sa walay duhaduha kini maoy tungod sa iyang pagdawat ug balaang direksiyon.

Sa walay duhaduha, si Jose usa ka maaghop ug mapaubsanong Hudiyo nga dunay pagtuo sa Diyos ug gustong mobuhat ug matarong. Ang pipila ka panghitabo sa iyang kinabuhi nga natala sa Kasulatan nagpakita nga siya kanunayng masinugtanon sa mga sugo ni Jehova. Tinuod kini kon kaha gikan kana sa Kasugoan o direkta kanang nadawat ni Jose pinaagi sa mga manulonda.

Usa ka Tawong Matarong nga Dunay mga Suliran

Unsay angayng himoon sa usa ka diyosnong tawo sa dihang nag-atubang sa dakong suliran? Aw, angay niyang ‘itugyan ang iyang palas-anon kang Jehova’ ug sundon ang balaang direksiyon! (Salmo 55:22) Mao kadto ang gihimo ni Jose. Samtang siya sinayoran kang Maria, “nakaplagan siya nga mabdos pinaagi sa balaang espiritu sa wala pa sila mahiusa.” Tungod kay si Jose ‘matarong ug dili buot nga himoon siyang usa ka talan-awon sa publiko, siya naglaraw sa pagdiborsiyo kaniya sa tago.’ Human mahunahuna pag-ayo ni Jose kining mga butanga, ang manulonda ni Jehova mipakita kaniya sa damgo ug miingon: “Jose, anak ni David, ayaw kahadlok nga dad-on sa inyo si Maria nga imong asawa, kay ang gisamkon diha kaniya maoy pinaagi sa balaang espiritu. Iyang ipahimugso ang usa ka anak nga lalaki, ug imong tawgon ang iyang ngalan nga Jesus, kay iyang luwason ang iyang katawhan gikan sa ilang kasal-anan.” Pagmata ni Jose, iyang gihimo “sumala sa gisugo kaniya sa anghel ni Jehova, ug iyang gidala sa ila ang iyang asawa. Apan wala siyay pakigsiping kang Maria hangtod nga napahimugso niya ang usa ka anak nga lalaki; ug siya nagtawag sa iyang ngalan nga Jesus.” (Mateo 1:18-25) Gidawat ni Jose ang balaang direksiyon.

Mimando si Agusto Cesar nga magparehistro ang mga tawo sa ilang kaugalingong mga dakbayan. Sa pagtuman, si Jose ug Maria miadto sa Betlehem sa Judea. Didto si Maria nanganak kang Jesus ug kinahanglang magbutang kaniya sa usa ka pasungan tungod kay walay laing kasak-an. Niadtong gabhiona ang mga magbalantay sa karnero nga nakadungog sa pahibalo sa manulonda bahin niining linaing pagkahimugso nangadto sa pagtan-aw sa masuso. Mga 40 ka adlaw sa ulahi, si Jose ug Maria mituman sa Kasugoan pinaagi sa pagpresentar kang Jesus sa templo sa Jerusalem uban sa usa ka halad. Silang duha nahibulong sa dihang ilang nadunggan ang matagnaong mga pulong sa tigulang nga si Simeon bahin sa dagkong mga butang nga pagahimoon ni Jesus.​—Lucas 2:1-33; itandi ang Levitico 12:2-4, 6-8.

Bisan tuod morag gipakita sa Lucas 2:39 nga nangadto sila si Jose ug Maria sa Nazaret pagkahuman gayod sa pagpresentar kang Jesus sa templo, kining maong teksto maoy bahin sa laktod nga asoy. Dayag nga dugaydugay pa human sa pagpresentar sa templo, nga ang taga-Sidlakang mga astrologo (mga Mago) miduaw kang Maria ug Jesus sa usa ka balay sa Betlehem. Ang balaang pagsalga mipugong niining maong pagduaw sa pagpahinabog kamatayon kang Jesus. Paglakaw sa mga mago, ang manulonda ni Jehova mipakita kang Jose sa usa ka damgo ug miingon kaniya: “Si Herodes mangita na sa bata aron laglagon kini.” Sama sa naandan, gipaminawan ni Jose ang balaang direksiyon ug gidala ang bata ug ang inahan niini sa Ehipto.​—Mateo 2:1-14.

Sa dihang namatay na si Herodes, usa ka manulonda ni Jehova mipakita kang Jose diha sa damgo didto sa Ehipto, nga nag-ingon: “Bangon, dad-a ang bata ug ang inahan niini ug adto sa yuta sa Israel.” Sa pagkadungog nga nagmando ang anak ni Herodes nga si Arquelao puli sa iyang amahan, nahadlok si Jose nga mobalik sa Judea. Sa pagpaminaw sa balaang pasidaan nga gihatag sa usa ka damgo, miadto siya sa teritoryo sa Galilea ug mipuyo sa dakbayan sa Nazaret.​—Mateo 2:15-23.

Usa ka Espirituwal nga Tawo

Gipaneguro ni Jose nga tumanon sa iyang pamilya ang balaang balaod ug mahimong himsog sa espirituwal. Matag tuig iyang dad-on ang iyang tibuok pamilya uban kaniya ngadto sa pagsaulog sa Paskwa sa Jerusalem. Sa usa niining mga higayona, si Jose ug Maria namauli sa Nazaret ug mga usa na ka adlaw nga panaw ang ilang gilay-on gikan sa Jerusalem sa dihang ilang nadiskobrehan nga dili nila kauban ang 12-anyos nga si Jesus. Sa pagbalik sa Jerusalem, sila nangitag maayo ug sa kataposan nakita siya sa templo, nga naminaw ug nangutana sa mga magtutudlo didto.​—Lucas 2:41-50.

Daw ingon ug gipasagdan ni Jose ang iyang asawa sa pagbuot sa pila ka butang. Pananglitan, sa dihang mibalik sila sa Jerusalem ug nakit-an si Jesus sa templo, si Maria ang nakigsulti sa iyang batan-ong anak bahin sa panghitabo. (Lucas 2:48, 49) Samtang nagtubo ingong “ang anak sa panday,” si Jesus nakadawat ug espirituwal nga instruksiyon. Gitudloan usab siya ni Jose ug pamanday, kay si Jesus gitawag ug “ang panday nga anak ni Maria.” (Mateo 13:55; Marcos 6:3) Ang diyosnong mga ginikanan karong adlawa kinahanglang mogamit sa bug-os sa susamang mga kahigayonan sa paghatag ug instruksiyon sa ilang mga anak, ilabina sa pagbansay kanila sa espirituwal nga mga butang.​—Efeso 6:4; 2 Timoteo 1:5; 3:14-16.

Mga Kalaoman ni Jose

Ang Kasulatan wala maghisgot bahin sa kamatayon ni Jose. Apan takos matikdan nga ang Marcos 6:3 nagtawag kang Jesus “ang anak ni Maria,” dili ni Jose. Kini nagpaila nga si Jose niadtong tungora patay na. Dugang pa, kon si Jose buhi hangtod sa 33 K.P., dili gayod itugyan sa gilansang nga si Jesus ang pag-atiman kang Maria ngadto kang apostol Juan.​—Juan 19:26, 27.

Nan, si Jose mahimong makauban niadtong mga patay nga makadungog sa tingog sa Anak sa tawo ug mabuhi sa pagkabanhaw. (Juan 5:28, 29) Kay nasayod sa tagana ni Jehova alang sa kinabuhing walay kataposan, sa walay duhaduha si Jose malipay sa pagpahimulos sa maong tagana ug mahimong masinugtanong sakop sa bantogang langitnong Hari, si Jesu-Kristo, maingon nga siya naminaw sa balaang direksiyon kapin na sa 1,900 ka tuig nga milabay.

[Hulagway sa panid 31]

Si Jose mihatag ug espirituwal nga instruksiyon kang Jesus ug nagtudlo usab kaniya ug pamanday