Pagbatog Kaayohan Gikan sa Pagbasa sa Bibliya sa Adlaw-Adlaw
“Malipayon ang tawo . . . [kansang] kahimuot anaa sa balaod ni Jehova, ug sa iyang balaod siya nagbasa sa ubos nga tingog sa adlaw ug gabii.”—SALMO 1:1, 2.
1. (a) Unsang iladong paskil ang makita sa usa ka kiliran sa usa ka imprentahan sa hedkuwarter sa tibuok kalibotan sa Watch Tower Society? (b) Sa unsang paagi kita makabatog kaayohan kon sa personal atong ibutang sa kasingkasing ang tambag?
“BASAHA ANG PULONG SA DIYOS ANG BALAANG BIBLIYA SA ADLAW-ADLAW.” Sa dagkong mga letra sa Iningles, kanang mga pulonga makita sa kiliran sa usa ka tinukod nga imprentahan sa Brooklyn, New York, diin ang mga Bibliya ug mga basahon sa Bibliya gipatik sa Watchtower Bible and Tract Society. Kanang tambaga wala larawa alang lamang sa mga tawo sa kalibotan nga makakita sa paskil. Nahibalo ang mga Saksi ni Jehova nga kinahanglan usab nga sila magbutang niana sa kasingkasing. Kadtong regular nga nagbasa sa Bibliya ug nagpadapat nga personal niana makabatog kaayohan gikan sa pagtudlo, pagbadlong, pagtul-id, ug pagdisiplina sa pagkamatarong nga gitagana niini.—2 Timoteo 3:16, 17.
2. Giunsa pagpasiugda ni Brader Russell ang kahinungdanon sa pagbasa sa Bibliya?
2 Gipabilhan ug dako sa mga Saksi ni Jehova ang ilang mga tabang sa pagtuon sa Bibliya, lakip Ang Bantayanang Torre, ug regular nilang gigamit kini sila. Apan nasayod sila nga walay usa niana ang makapuli sa Bibliya mismo. Niadto pang 1909, si Charles Taze Russell, ang unang presidente sa Watch Tower Bible and Tract Society, misulat sa mga magbabasa sa Bantayanang Torre nga magasin: “Ayawg kalimot nga ang Bibliya mao ang atong Sukdanan ug bisan unsa ka hinatag-sa-Diyos tingali ang atong mga tabang kini sila ‘mga tabang’ ug dili mga kapuli sa Bibliya.”
3. (a) Unsa ang epekto sa “pulong sa Diyos” diha niadtong nasinati niini? (b) Unsa ka subsob nga ang mga taga-Berea nagbasa ug nagtuon sa Kasulatan?
3 Ang dinasig nga Kasulatan adunay giladmon ug puwersa nga wala mabatoni sa ubang basahon. “Ang pulong sa Diyos buhi ug gamhanang nagalihok ug mas hait kay sa bisan unsang espada nga duhay-sulab ug modulot bisan pa hangtod sa pagbahin sa kalag ug espiritu, ug sa mga lutahan ug sa ilang uyok, ug arang makaila sa mga hunahuna ug mga tuyo sa kasingkasing.” (Hebreohanon 4:12) Ang disipulong si Lucas tim-os nga nagdayeg sa katawhan sa Berea, nga nagtawag kanilang “mas hamilig-hunahuna.” Dili lamang maikagon nilang gidawat ang pulong ingon nga giwali ni apostol Pablo ug sa iyang kaubang si Silas kondili ‘mainampingong nag-usisa sa Kasulatan sa adlaw-adlaw’ usab sa pagtino sa Kasulatanhong pasikaranan sa gitudlo.—Buhat 17:11.
Pagbasa Niini sa Adlaw-Adlaw
4. Unsay gipaila sa Kasulatan bahin sa kon unsa ka subsob angay nga magbasa kita sa Bibliya?
4 Ang Bibliya wala magpahayag sa tino kon unsa ka subsob kinahanglang basahon nato kana. Bisan pa niana, nagtala kini sa tambag ni Jehova ngadto kang Josue nga ‘basaha ang basahon sa balaod sa ubos nga tingog sa adlaw ug gabii’ aron siya makalihok nga maalamon ug magmalamposon sa pagtuman sa iyang hinatag-sa-Diyos nga asaynment. (Josue 1:8) Kini nagtug-an kanato nga si bisan kinsa nga nagmando ingong hari ibabaw sa karaang Israel kinahanglang magbasa sa Kasulatan “sa tanang adlaw sa iyang kinabuhi.” (Deuteronomio 17:19) Kini dugang nag-ingon: “Malipayon ang tawo nga wala magalakaw diha sa tambag sa mga tuman-kadaotan . . . Apan ang iyang kahimuot anaa sa balaod ni Jehova, ug sa iyang balaod siya nagbasa sa ubos nga tingog sa adlaw ug gabii.” (Salmo 1:1, 2) Usab, ang Ebanghelyo nga gitala ni Mateo nagtug-an kanato nga sa dihang gisalikway ni Jesu-Kristo ang mga paningkamot ni Satanas sa pagtental Kaniya, Siya mikutlo gikan sa dinasig nga Hebreohanong Kasulatan, nga nag-ingon: “Kini nahisulat, ‘Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.’” (Mateo 4:4) Unsa ka subsob nga kita nagkinahanglag pisikal nga pagkaon? Kada adlaw! Ang pagkaon ug espirituwal nga pagkaon sa adlaw-adlaw labi pang hinungdanon tungod kay ang atong kalaoman sa kinabuhing dayon apektado niini.—Deuteronomio 8:3; Juan 17:3.
5. Sa unsang paagi ang pagbasa sa Bibliya adlaw-adlaw makatabang kanato sa “paglakaw nga takos kang Jehova” sa dihang ang mga pagsulay sa pagtuo gihandos kanato?
5 Ang matag usa kanato kinahanglang mapalig-on sa adlaw-adlaw sa Pulong sa Diyos. Kada adlaw—sa balay, sa trabaho, sa eskuylahan, sa kadalanan, sa dihang mamalit, sa atong ministeryo—ang mga hagit sa atong pagtuo gihandos kanato. Unsaon nato pagsagubang kini sila? Ang mga sugo ug mga prinsipyo sa Bibliya mosantop ba dayon sa alimpatakan? Inay magdasig sa pagbati sa pagsalig-sa-kaugalingon, ang Bibliya nagpahimatngon: “Siya nga nagahunahunang siya nagabarog pabantaya nga dili siya matumba.” (1 Corinto 10:12) Ang pagbasa sa Bibliya sa adlaw-adlaw motabang kanato sa “paglakaw nga takos kang Jehova sa katuyoan nga pahimut-an siya sa bug-os” inay nga tugotan ang kalibotan sa pagpiga kanato aron mohaom kita sa hulmahan niini.—Colosas 1:9, 10; Roma 12:2.
Ang Panginahanglan nga Balikbalikon Pagbasa ang Bibliya
6. Nganong mapuslanon ang pagbalikbalik pagbasa sa Bibliya?
6 Ang pagbasa sa Bibliya lahi kaayo sa pagbasag usa ka libro sa piksiyon o sugilambong. Ang kadaghanang popular nga piksiyon gidesinyo alang sa kas-ang pagbasa; sa dihang masayran sa usa ka tawo ang estorya ug kon sa unsang paagi matapos kini, kutob lang niana. Sa kasukwahi, bisan ka pila nato basahon ang Bibliya, makabaton kitag dakong kaayohan pinaagi sa pagbasa niana pag-usab. (Proverbio 9:9) Alang sa usa ka tawong mailahon, ang Kasulatan kanunayng may bag-ong kahulogan. Ang mga tagna mahitungod sa kataposang mga adlaw mahimong labi pang makahuloganon alang kaniya sa kahayag sa iyang nakit-an, nabatian, ug nasinati sa personal sa bag-o pang mga bulan. (Daniel 12:4) Samtang iyang mapadako ang iyang kaugalingong kasinatian sa kinabuhi ug masagubang ang mga suliran, ang mailahong magbabasa sa Bibliya mas bug-os nga makapabili sa tambag nga tingali sa nangagi nabasa lamang niyang dili ugdang. (Proverbio 4:18) Kon siya makaagom ug grabeng sakit, ang mga saad sa Bibliya bahin sa pagwagtang sa kaul-ol ug pagpasig-uli sa maayong panglawas makabatog mas lalom nga kahulogan alang kaniya kay sukad masukad. Sa dihang mamatay ang suod nga mga higala ug mga membro sa pamilya, ang saad sa pagkabanhaw mahimong labi pang bililhon.
7. Unsay makatabang kanato sa dihang atong batonan ang bag-ong responsabilidad sa kinabuhi, ug ngano?
7 Tingali nakabasa ka sa personal sa Bibliya ug nagpadapat sa tambag niini latas sa usa ka yugto sa katuigan. Apan tingali ikaw karon nakabaton ug bag-ong mga responsabilidad sa kinabuhi. Nagaplano ka ba nga magminyo? Hapit ka na bang mahimong ginikanan? Gisangonan ka ba ug responsabilidad sa kongregasyon ingong usa ka ansiano o ministeryal nga alagad? Nahimo ka bang bug-os-panahong magwawali, uban ang dugang kahigayonan sa pagwali ug pagtudlo? Pagkamapuslanon ang pagbasa pag-usab sa enterong Bibliya uban nianang bag-ong mga responsabilidad sa hunahuna!—Efeso 5:24, 25; 6:4; 2 Timoteo 4:1, 2.
8. Sa unsang paagi ang nausab nga mga kahimtang tingali magpadayag sa panginahanglan nga makakat-on ug dugang bahin sa mga butang nga sa atong hunahuna ato nang nahibaloan?
8 Sa nangagi tingali maayo kag nahimo sa pagpasundayag sa mga bunga sa espiritu. (Galacia 5:22, 23) Apan tungod sa bag-ong mga kahimtang tingali giatubang nimo ang panginahanglan nga dugang pang makakat-on nianang diyosnong mga hiyas. (Itandi ang Hebreohanon 5:8.) Usa ka kanhing nagapanawng magtatan-aw nga mihukom sa pagbiya sa iyang espesyal nga pag-alagad aron pag-atiman sa iyang tigulang nang mga ginikanan miingon: “Kaniadto ako naghunahuna nga maayoayo ang akong nahimo sa pagpasundayag sa mga bunga sa espiritu. Karon akong gibati nga samag ako nagasugod na usab.” Sa susama, ang mga bana ug mga asawa kansang mga kapikas sa kaminyoon nag-antos ug grabeng pisikal o emosyonal nga sakit tingali makadiskobre nga sa pagtaganag personal nga pag-atiman, ang kapit-os usahay mopatunghag mga sanong nga makapaluya kanila. Ang regular nga pagbasa sa Bibliya maoy tinubdan sa dakong kahupayan ug tabang.
Kon Kanus-a Himoon ang Pagbasa sa Bibliya
9. (a) Unsay makatabang sa usa ka tawong puliki kaayo sa pagkaplag ug panahon alang sa adlaw-adlaw nga pagbasa sa Bibliya? (b) Nganong ang pagbasa sa Pulong sa Diyos ilabinang hinungdanon alang sa mga ansiano?
9 Siyempre, alang sa mga tawo nga puliki na kaayo, ang pagkaplag ug panahon sa pagbuhat nga regular sa dugang nga butang maoy usa ka hagit. Hinuon, makabenepisyo kita gikan sa panig-ingnan ni Jehova. Ang Bibliya nagpadayag nga siya nagabuhat sa mga butang sa ‘tinudlong mga panahon.’ (Genesis 21:2; Exodo 9:5; Lucas 21:24; Galacia 4:4) Ang pagpabili sa kahinungdanon sa pagbasang regular sa Pulong sa Diyos makatabang kanato sa pagtudlog usa ka panahon alang niana diha sa atong adlaw-adlaw nga eskedyul. (Efeso 5:15-17) Ang mga ansiano ilabina nagkinahanglang mogahin ug panahon alang sa regular nga pagbasa sa Bibliya aron ang tambag nga ilang ihatag tinong mapasukad sa mga prinsipyo sa Bibliya ug aron ang espiritu nga ilang ipadayag mopabanaag sa “kaalam gikan sa itaas.”—Santiago 3:17; Tito 1:9.
10. Kanus-a kadtong adlaw-adlaw nga mga magbabasa sa Bibliya nakakaplag ug panahon sa pagbasa?
10 Daghan nga milampos sa usa ka programa sa personal nga pagbasa sa Bibliya naghimo sa ilang pagbasa sayo sa buntag una pa sila mosugod sa mga kalihokan sa adlaw. Nadiskobrehan sa uban nga mas maarangan nila ang pagbuhat niana nga padayon sa laing panahon. Ang mga audiocassette sa Bibliya (kon anaa) motabang sa mga tigbiyahe sa pagpahimulos ug maayo sa panahon sa biyahe, ug ang pila ka Saksi mamati niana samtang nagaatiman sa naandang mga trabaho sa panimalay. Ang mga programa nga milampos alang sa lainlaing mga Saksi sa Uropa, Aprika, Amerika del Norte, Amerika del Sur, ug sa Oriente gipakita sa mga panid 20 ug 21, sa artikulong “Kon Kanus-a Nila Ginabasa Kini ug sa Unsang Paagi Sila Nakabenepisyo.”
11. Sa unsang paagi ang pagbasa sa Bibliya sa adlaw-adlaw malampos bisan pag diyutay ra ang panahong mabatonan?
11 Ang labing hinungdanon dili mao ang gidaghanon sa panahong gigahin sa imong pagbasa sa Bibliya sa bisan unsang usa ka okasyon kondili ang pagkaregular sa pagbuhat niini. Tingali imong hisayrang magantihon ang pagbasa sulod sa usa ka oras o kapin pa sa usa ka higayon, nga nagahimog dugang nga panukiduki ug bug-os nga nagahatag ug pagtagad sa ginabasa. Apan ang imong eskedyul nagtugot ba niana sa regular nga paagi? Inay sa pagtugot nga molabay ang mga adlaw nga walay pagbasa sa Bibliya, dili ba mas maayo ang pagbasa kada adlaw sulod sa 15 minutos o bisan sa 5 minutos? Himoa nga imong hukom ang paghimog adlaw-adlaw nga pagbasa sa Bibliya. Unya abagi ang maong pagbasa sa mas lalom nga pagdukiduki kon mahimo.
Nagkadaiyang mga Paagi sa Pagbasa sa Bibliya
12. Unsang programa sa pagbasa sa Bibliya ang nabatonan sa bag-ong mga membro sa pamilyang Bethel ug sa mga estudyante sa Gilead?
12 Adunay daghang paagi nga mahimong basahon ang Bibliya. Mapuslanon ang pagbasa gikan sa Genesis hangtod Pinadayag. Ang tanang membro sa tibuok-yutang pamilyang Bethel nga nag-alagad sa hedkuwarter sa tibuok kalibotan o sa usa sa mga sanga sa Sosyedad giobligar sa pagbasa sa tibuok Bibliya sulod sa unang tuig sa ilang pag-alagad sa Bethel. (Kana sagad naglangkit sa pagbasag tulo ngadto lima ka kapitulo, depende sa ilang gitas-on, o upat ngadto lima ka panid, kada adlaw.) Ang mga estudyante sa Watchtower Bible School of Gilead kinahanglang magbasa usab sa Bibliya sa kabug-osan sa dili pa sila mograduwar. Gilaomang kini motabang kanila sa paghimo sa adlaw-adlaw nga pagbasa sa Bibliya nga usa ka bahin sa ilang mga kinabuhi.
13. Unsang tumong ang gisugyot alang sa bag-ong nabawtismohang mga Saksi?
13 Mapuslanon nga ang bag-ong nabawtismohang mga Saksi magbutang sa ilang atubangan sa tumong sa pagbasa sa enterong Bibliya. Niadtong 1975, sa panahon sa iyang pagpangandam alang sa bawtismo, usa ka batan-ong lalaki sa Pransiya ang gisukna sa usa ka ansiano kon siya may tino bang programa sa pagbasa sa Bibliya. Sukad gayod niadto iyang mabasa ang enterong Bibliya kada tuig, nga sagad nagabuhat sa iyang pagbasa sa buntag una pa siya moadto sa trabaho. Kon bahin sa mga resulta, siya nag-ingon: “Ako labi pang nasinati kang Jehova. Akong masabtan nga ang tanang ginabuhat niya nalangkit sa iyang katuyoan ug kon unsaon niya pagsanong sa dihang motungha ang kababagan. Akong masabtan nga si Jehova, sa samang panahon, maoy matarong ug maayo sa tanan niyang mga lihok.”
14. (a) Aron makasugod sa usa ka programa sa personal nga pagbasa sa Bibliya nga mopadayon, unsay gikinahanglan? (b) Unsa ang tingali makatabang kanato sa paghinumdom sa katibuk-ang laraw sa matag basahon sa Bibliya samtang gibasa nato kana?
14 Nakabasa ka na ba sa enterong Bibliya? Kon wala pa, karon mao ang maayong panahon sa pagsugod. Han-aya ang usa ka tinong programa, ug unya sunda kana. Tinoa kon pila ka panid o kon pila ka kapitulo ang imong basahon kada adlaw, o yanong tinoa kon pila ang panahong imong gugolon ug kon kanus-a. Dili ang tanan ang makakompleto sa Bibliya sa usa ka tuig, apan ang hinungdanong butang mao ang pagbasang regular sa Pulong sa Diyos, nga magabuhat niana sa adlaw-adlaw kon mahimo. Samtang ginabasa nimo ang tibuok Bibliya, imong masayrang ang paggamit sa pila ka reperensiyang mga libro makatabang sa pagsilsil diha sa imong hunahuna sa katibuk-ang laraw sa materyal. Kon adunay Insight on the Scriptures sa imong pinulongan, nan sa dili ka pa mosugod pagbasa sa usa ka linaing basahon sa Bibliya, sublia ang mubong laraw sa mga dagkong punto niana sumala sa gihatag diha sa Insight.a Matikdi ilabina ang mga ulohan nga bagag letra sa laraw. O gamitang susama ang mas bug-os nga sumaryo nga gitagana diha sa librong “Ang Tibuok Kasulatan Dinasig sa Diyos ug Mapuslanon.”*
15. (a) Unsang mga sugyot nga gihatag sa mga panid 16 ug 17 ang makatabang sa pagpauswag sa imong pagbasa sa Bibliya? (b) Inay sa paghimo sa pagbasag tinong gidaghanon sa mga panid nga usa ka rituwal, unsang hinungdanong butang ang angayng hatagan natog mas dakong pagtagad?
15 Ang abanid nga pagbasa sa Bibliya mapuslanon, apan ayaw pagkahimong usa ka yanong rituwal nga magbabasa. Ayaw pagbasa ug tinong gidaghanon sa mga panid kada adlaw aron lamang makaingon ka nga imong nabasa sa katibuk-an ang Bibliya kada tuig. Sumala sa gipakita sa kahong “Mga Sugyot sa Pagpauswag sa Imong Pagbasa sa Bibliya” (mga panid 16 ug 17), adunay daghang paagi nga ikaw makabasa ug makapahimulos sa Bibliya. Bisan kon unsang metodoha ang imong gamiton, seguroa nga imong ginapakaon ang imong kaisipan ug imong kasingkasing.
Sabta ang Imong Gibasa
16. Nganong hinungdanon ang paggahin ug panahon sa pagpamalandong sa atong gibasa?
16 Sa dihang nagtudlo sa iyang mga tinun-an, gipasiugda ni Jesus ang kahinungdanon sa ilang pagsabot sa iyang gipamulong. Ang bililhon mao, dili ang yanong pagsabot sa utok, kondili ang ilang pagkabaton sa “pagsabot niana uban sa ilang mga kasingkasing” aron ikapadapat nila kana diha sa ilang mga kinabuhi. (Mateo 13:14, 15, 19, 23) Kon unsa ang tinuod nga pagkatawo sa sulod mao ang bililhon sa Diyos, ug kini ang gihawasan sa kasingkasing. (1 Samuel 16:7; Proverbio 4:23) Busa, dugang pa sa pagpaneguro nga atong nasabtan kon unsay giingon sa mga teksto sa Bibliya, kinahanglang atong pamalandongon kana, nga hunahunaon ang ilang mga kahulogan diha sa atong mga kinabuhi mismo.—Salmo 48:9; 1 Timoteo 4:15.
17. Unsa ang pila ka anggulo nga niana kita tingali makapamalandong sa atong gibasa diha sa Kasulatan?
17 Paningkamot sa pag-ila sa nagpahiping mga prinsipyo diha sa mga asoy sa Bibliya aron imong ikapadapat kini sa mga kahimtang nga imong giatubang. (Itandi ang Mateo 9:13; 19:3-6.) Samtang magbasa ka ug mamalandong sa kahibulongang mga hiyas ni Jehova, gamita ang maong higayon sa pagpalig-on sa imong personal nga relasyon kaniya, sa pag-ugmad sa imong kaugalingon sa kusganong pagsabot sa diyosnong pagkamahinalaron. Inigkabasa nimog mga pahayag bahin sa katuyoan ni Jehova, palandonga kon unsay imong mahimo aron makabuhat nga nahiuyon niini nila. Inigkabasa nimog direktang tambag, inay sa yanong pag-ingon sa imong kaugalingon, ‘Nahibalo ako niana,’ pangutana, ‘Ginabuhat ko ba kon unsay giingon niini?’ Kon mao, pangutan-a ang imong kaugalingon, ‘Sa unsang mga paagi ako makabuhat niini nga “mas bug-os pa?”’ (1 Tesalonica 4:1) Samtang makat-onan nimo ang mga kinahanglanon sa Diyos, matikdi usab ang tinuod-kinabuhing mga panig-ingnan sa Bibliya niadtong nagkinabuhi nga nahiuyon sa maong mga kinahanglanon ug niadtong wala. Palandonga kon nganong gisubay nila ang dalan nga ilang gisubay ug kon unsa ang sangpotanan. (Roma 15:4; 1 Corinto 10:11) Inigkabasa nimo bahin sa kinabuhi ni Jesu-Kristo, hinumdomi nga si Jesus mao ang usang gisaligan ni Jehova sa pagkahari ibabaw sa tibuok yuta; gamita ang higayon sa pagpalig-on sa imong kaugalingon sa pangandoy alang sa bag-ong kalibotan sa Diyos. Dugang pa, analisaha ang mga paagi diin ikaw mas bug-os nga makasundog sa Anak sa Diyos.—1 Pedro 2:21.
18. Sa unsang paagi atong matimbang ang pagbasa sa Bibliya uban sa atong paggamit sa materyal nga tun-anan nga gitagana sa “matinumanon ug maalamong ulipon”?
18 Siyempre, ang pagbasa sa Bibliya angay nga dili magpuli sa imong paggamit sa ekselenteng materyal nga tun-anan nga gitagana pinaagi sa “matinumanon ug maalamong ulipon.” Kana usab maoy usa ka bahin sa tagana ni Jehova—usa nga bililhon kaayo. (Mateo 24:45-47) Tinoa nga ang regular nga pagbasa sa Pulong sa Diyos mismo adunay usa ka prominenteng bahin sa imong kinabuhi. Kon mahimo gayod, “BASAHA ANG PULONG SA DIYOS ANG BALAANG BIBLIYA SA ADLAW-ADLAW.”
[Footnote]
a Gipatik sa Watchtower Bible and Tract Society of New York, Inc.
Unsay Imong Tubag?
◻ Nganong mapuslanon ang pagbasa sa Bibliya kada adlaw?
◻ Nganong gikinahanglan nga balikbalikon nato pagbasa ang Bibliya?
◻ Sa imong kaugalingong eskedyul, unsa ang maayong panahon alang sa adlaw-adlaw nga pagbasa sa Bibliya?
◻ Samtang balikbalikon nimo pagbasa ang Bibliya, unsay makadugang ug pagkadaiya sa imong programa?
◻ Nganong hinungdanon kaayo ang pagpamalandong sa atong gibasa?
[Kahon sa panid 16, 17]
Mga sugyot sa pagpauswag sa imong pagbasa sa Bibliya
(1) Daghang tawo mobasa sa mga basahon sa Bibliya sa han-ay nga sila naandang gipatik, gikan sa Genesis ngadto sa Pinadayag. Makabasa ka usab niini sa han-ay nga sila orihinal nga gisulat. Hinumdomi nga ang Bibliya maoy koleksiyon sa 66 ka inspiradong mga basahon, usa ka diyosnong librarya. Sa pagpalain, tingali buot nimong basahon ang pipila ka basahon nga naghisgot sa kasaysayan, unya ang pipila nga kasagaran matagnaon ang unod, sundan sa pipila nga maoy mga sulat sa pagtambag, inay yanong sundon ang han-ay sa panid. Timan-i ang imong nabasa, ug tinoa nga mabasa ang enterong Bibliya.
(2) Human nimo mabasa ang usa ka bahin sa Kasulatan, pangutan-a ang imong kaugalingon kon unsay gitug-an niini bahin kang Jehova, sa iyang katuyoan, sa iyang paagi sa pagbuhat sa mga butang; kon sa unsang paagi kini angay nga mag-apektar sa imong kaugalingong kinabuhi; kon unsaon nimo paggamit kini sa pagtabang sa laing tawo.
(3) Nga nagagamit ingong giya sa tsart nga “Pangunang mga Hitabo sa Yutan-ong Kinabuhi ni Jesus” nga gipatik ubos sa ulohang “Jesu-Kristo” diha sa Insight on the Scriptures (maingon man sa “Ang Tibuok Kasulatan Dinasig sa Diyos ug Mapuslanon”), basaha ang susamang mga asoy sa matag bahin sa mga Ebanghelyo, nga sunodsunod. Dugangi kini pinaagi sa pagtagad sa tukmang mga seksiyon sa librong Ang Labing Bantogang Tawo nga Nabuhi Sukad.
(4) Sa dihang basahon nimo gikan sa Mga Buhat sa mga Apostol ang asoy sa kinabuhi ug ministeryo ni Pablo, basaha usab ang may-kalabotang dinasig nga mga sulat. Busa, sa dihang hisgotan ang lainlaing mga siyudad o mga dapit nga gisangyawan ni Pablo, hunong ug basaha ang mga sulat nga iyang gisulat sa ulahi sa isigka-Kristohanon niadtong mga dapita. Makatabang usab ang pagsunod sa iyang mga biyahe diha sa mapa, sama sa usa nga gipakita sa sulod sa hapin sa likod sa Bag-ong Kalibotang Hubad.
(5) Duyog sa imong pagbasa sa Exodo hangtod sa Deuteronomio, basaha ang sulat ngadto sa mga Hebreohanon sa pagkuhag katin-awan sa daghang propetikanhong mga sumbanan. Ilalom sa “Law” sa Insight on the Scriptures, tan-awa ang tsart nga “Some Features of the Law Covenant.”
(6) Sa dihang nagabasa sa matagnaong mga basahon, mag-eskedyul ug panahon sa pagsubli sa may-kalabotang makasaysayanhong kagikan diha sa Bibliya. Pananglitan, sa dihang nagabasa sa basahon ni Isaias, sublia kon unsay giingon sa laing bahin mahitungod sa mga haring si Uzzias, Jotham, Ahaz, ug Ezekias, nga gihisgotan sa Isaias 1:1. (2 Hari, mga kapitulo 15-20; 2 Cronicas, mga kapitulo 26-32) O sa dihang nagabasa sa Hageo ug Zacarias, paggahin ug panahon sa pagsubli kon unsay makaplagan sa basahon ni Esdras.
(7) Pagpili ug usa ka basahon sa Bibliya, basaha ang usa ka bahin niana (tingali usa ka kapitulo), unya panukiduki, nga nagagamit sa Watch Tower Publications Index o sa kompiyuterisadong Watchtower Library kon mabatonan sa inyong pinulongan. Ipadapat ang materyal sa imong kaugalingong kinabuhi. Gamita kana sa mga pakigpulong ug sa pagsangyaw sa kanataran. Unya basaha ang laing seksiyon.
(8) Kon adunay usa ka publikasyon sa Watch Tower nga nagtagana ug usa ka komentaryo bahin sa usa ka basahon sa Bibliya o sa usa ka bahin niana, susiha kini kanunay samtang ikaw nagabasa nianang bahina sa Bibliya. (Pananglitan: bahin sa Awit ni Solomon, Ang Bantayanang Torre, Oktubre 15, 1958, mga panid 621-37; bahin sa Ezekiel, “The Nations Shall Know That I Am Jehovah”—How?; bahin sa Daniel, “Ang Imong Kabubut-on Matuman sa Yuta” o ang Our Incoming World Government—God’s Kingdom; bahin sa Hageo ug Zacarias, Paradise Restored to Mankind—By Theocracy!; bahin sa Pinadayag, Pinadayag—Hingpit nga Sangkoanan Niini Haduol Na!)
(9) Samtang ikaw nagabasa, tan-awa ang pipila sa mga cross-reference. Matikdi ang 320 ka teksto gikan sa Hebreohanong Kasulatan nga direktang gikutlo sa Kristohanong Gregong Kasulatan ug ang ginatos ka ubang teksto nga gihisgotan, maingon man ang gihatag nga kapadapatan. Ang mga cross-reference nagpunting ngadto sa mga katumanan sa tagna nga narekord sa Bibliya, ngadto sa biyograpikanhon ug geograpikanhong mga detalye, ug sa managsamang mga ideya nga mahimong mopatin-aw sa mga pahayag nga tingali lisod nimong sabton.
(10) Nga nagagamit sa Reference Edition sa New World Translation, kon mabatonan sa imong pinulongan, susiha ang mga potnot ug mga artikulo sa apendise nga may kalabotan sa imong gibasa. Kini nagpakita sa basehanan sa mga hubad nga gigamit ug sa ubang mga paagi diin ang hinungdanong mga pahayag mahimong hubaron. Tingali gusto nimong itandi ang hubad sa pipila ka bersikulo sa ubang mga hubad sa Bibliya.
(11) Human nimo mabasa ang matag kapitulo, isulat ang mubo kaayo nga sumaryo sa pangunang ideya sa maong kapitulo. Gamita kana ingong basehanan sa pagsubli ug pagpalandong sa ulahi.
(12) Samtang gibasa nimo ang Bibliya, timan-i ang piniling mga teksto nga ilabinang buot nimong mahinumdoman, o isulat kini diha sa mga kard ug ibutang kini sa dapit diin makita nimo kini matag adlaw. Memoryaha kini; palandonga kini; gamita kini. Ayawg sulayi pagmemorya ug daghan kaayo sa usa ka panahon, tingali usa o duha lamang matag semana; unya pagpili ug dugang pa sa sunod panahon nga mobasa ka sa Bibliya.
[Mga hulagway sa panid 15]
Nagabasa ka ba sa Bibliya o nagapamati sa mga rekording niana sa kada adlaw?