Mga Magmamando sa Espirituhanong Kalibotan

KINSAY nagmando sa kalibotan? Aduna bay usa ka matang sa labaw-tawhanong pagdumala? O gipasagdan ba sa Diyos ang mga tawo sa pag-atiman sa ilang kaugalingon? Aron makita ang mga tubag niining mga pangutanaha, atong hisgotan una ang usa ka hitabo nga nahitabo sa panahon sa pagministeryo ni Jesu-Kristo sa yuta.

Wala magdugay human sa iyang bawtismo, gitental si Jesus sa usa ka dili makitang espirituhanong linalang nga gitawag nga Satanas nga Yawa. Naghisgot bahin sa usa sa mga tentasyon, ang Bibliya nag-ingon: “Gidala sa Yawa [si Jesus] sa usa ka bukid nga talagsaon kahabog, ug gipakita kaniya ang tanang gingharian sa kalibotan ug ang ilang himaya.” (Mateo 4:8) Unya gisultihan ni Satanas si Jesus: “Akong ihatag kanimo kining tanan nga awtoridad ug ang ilang himaya, tungod kay gikatugyan na kini kanako, ug ngadto kang bisan kinsa nga buot ko akong ihatag kini. Busa, ikaw, kon mohimo ka ug usa ka buhat sa pagsimba atubangan kanako, maimo kining tanan.”​—Lucas 4:6, 7.

Si Satanas nangangkon nga mao ang may awtoridad ibabaw sa tanang mga gingharian, o mga kagamhanan, niining kalibotana. Gilimod ba ni Jesus kini nga pangangkon? Wala. Sa pagkatinuod, iyang gipamatud-an kini sa laing higayon pinaagi sa pagtawag kang Satanas nga mao “ang magmamando sa kalibotan.”​—Juan 14:30.

Sumala sa Bibliya, si Satanas maoy usa ka daotang manulonda nga adunay dakong gahom. Gilanggikit sa Kristohanong apostol Pablo si Satanas sa “tuman-kadaotang mga puwersa nga espirituhanon” ug naghisgot bahin kanila ingon nga mao “ang mga magmamando sa kalibotan niini nga kangitngit.” (Efeso 6:11, 12) Usa pa, si apostol Juan miingon nga “ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Ang basahon sa Bibliya nga Pinadayag nag-ingon nga si Satanas “nagpahisalaag sa tibuok gipuy-ang yuta.” (Pinadayag 12:9) Sa simbolikong mga termino, gilarawan usab sa Pinadayag si Satanas ingong usa ka dragon nga maoy naghatag sa politikanhong sistema niining kalibotana sa ‘gahom niini ug sa trono niini ug dakong awtoridad.’​—Pinadayag 13:2.

Ang mga hitabo sa kalibotan nagpamatuod usab nga adunay usa ka daotang gahom nga naglihok, nga nagmaneobra sa mga tawo alang sa ilang kadaot. Unsa pa may ubang katarongan nga napakyas ang tawhanong mga kagamhanan sa pagpalambo sa pakigdait? Unsa pa may nagtukmod sa mga tawo sa pagdumot ug sa pagpatay sa usag usa? Nalisang sa pagpamatay ug sa nangamatay sa usa ka sibil nga gubat, usa ka nakasaksi mismo niini miingon: “Wala ako mahibalo kon nganong nahitabo kini. Labaw pa kini kay sa pagdumot. Usa ka daotang espiritu ang nagagamit niining mga tawhana sa paglaglag sa usag usa.”

Usa ka Tinuod nga Persona nga Nagabatok sa Diyos

Daghan karon ang dili motuo nga naglungtad si Satanas nga Yawa. Bisan pa, siya dili kay usa lamang ka prinsipyo nga daotan diha sa katawhan, ingon sa gituohan sa pipila. Ang Bibliya ug ang mga hitabo sa kalibotan nagpakita nga siya maoy usa ka tinuod nga persona. Dugang pa, si Satanas nagabatok gayod kang Jehova nga Diyos. Siyempre, si Satanas dili katupong sa Diyos. Sanglit si Jehova mao ang gamhanan-sa-tanan nga Maglalalang, siya mao ang tinuod nga Magmamando ibabaw sa tanang kalalangan.​—Pinadayag 4:11.

Ang Diyos wala maglalang ug daotan nga linalang sa pagbatok kaniya mismo. Hinunoa, usa sa manulonda nga “mga anak sa Diyos” natugkan ug hakog nga tinguha sa pag-agaw alang sa iyang kaugalingon sa pagsimba nga angay nga iya lamang ni Jehova. (Job 38:7; Santiago 1:14, 15) Kini nga pangibog miagak kaniya sa paglansad ug usa ka dalan sa pagrebelde batok sa Diyos. Pinaagi sa pagrebelde, kining espirituhanon nga linalang naghimo sa iyang kaugalingon nga Satanas (nagkahulogang “magsusupak”) ug Yawa (nagkahulogang “tigbutangbutang”). Tungod niining tanan, ikaw tingali nahibulong kon nganong si Satanas gitugotan sa pagmando sa kalibotan.

Kon Nganong Gitugotan si Satanas sa Pagmando

Nahinumdom ka ba kon unsay gisulti ni Satanas kang Jesus bahin sa pagmando sa tibuok yuta? “Akong igahatag kanimo kining tanan nga awtoridad . . . tungod kay gikatugyan na kini kanako,” miingon si Satanas. (Lucas 4:6) Kanang mga pulonga nagpakita nga si Satanas nga Yawa adunay gahom tungod lamang sa pagtugot sa Diyos. Apan nganong gitugotan sa Diyos si Satanas?

Ang tubag niana nga pangutana nalangkit sa mga hitabo sa tanaman sa Eden, diin didto gisugdan ni Satanas ang iyang karera ingong magmamando sa kalibotan. Didto nagpasumbingay si Satanas nga ang Diyos nagmando sa daotang paagi pinaagi sa paghikaw ug usa ka butang nga maayo gikan sa unang lalaki ug babaye, si Adan ug Eva. Sumala pa ni Satanas, kon sila mokaon sa bunga nga gidili sa Diyos, sila makabatog kagawasan. Si Adan ug Eva mahimong libre ug independente na kang Jehova. Sila mahisama na unya sa Diyos mismo!​—Genesis 2:16, 17; 3:1-5.

Pinaagi sa pagpamakak niining paagiha ug sa paghaylo kang Eva ug pinaagi kaniya nagdaldal kang Adan sa paglapas sa balaod sa Diyos, gidala ni Satanas ang unang tawhanong paris ilalom sa iyang pagmando ug paggahom. Ang Yawa sa ingon nahimong ilang diyos, usa nga kabatok ni Jehova. Apan, imbes kagawasan, si Adan ug Eva nailalom sa pagkaulipon ni Satanas, sa sala, ug sa kamatayon.​—Roma 6:16; Hebreohanon 2:14, 15.

Sumala sa iyang hingpit nga hustisya, si Jehova makahimo unta sa paglaglag dihadiha kang Satanas ug sa iyang duha ka bag-ong mga sumusunod. (Deuteronomio 32:4) Ugaling, may moral nga isyu ang nalangkit. Gihagit ni Satanas ang pagkamatarong sa paagi ni Jehova sa pagmando. Sa iyang kaalam, gitugotan sa Diyos ang panahon sa paglabay aron mapamatud-an nga ang pagbulag gikan kaniya mosangpot ug katalagman. Gitugotan ni Jehova ang mga rebelde sa pagpadayon sa pagkinabuhi sa makadiyot, nga naghatag kang Adan ug Eva ug panahon sa pagpanganak.​—Genesis 3:14-19.

Bisan tuod ang kadaghanan sa mga anak ni Adan wala magpasakop sa pagmando ni Jehova, ang mga pakiglabot sa Diyos sa Iyang mga magsisimba nagpasundayag sa pagkalabaw niini. Ang hustong pag-ila sa awtoridad ni Jehova mohatag ug kalipay ug tinuod nga kasegurohan. Sa laing bahin, ang kaguol ug pagkawalay-kasegurohan maoy miresulta sa pagmando sa tawo nga ilalom sa impluwensiya ni Satanas. Oo, ang “tawo nagmando sa tawo sa iyang kadaot.” (Ecclesiastes 8:9) Ang katawhan wala gayod makakaplag ug tinuod nga kasegurohan ug malungtarong kalipay ilalom sa tawhanong pagmando niining kalibotan nga anaa sa gahom ni Satanas. Ugaling, adunay maayong katarongan sa pagkamalaomon.

Mubo na Lamang ang Panahon ni Satanas!

Ang impluwensiya ni Satanas sa yuta lumalabay. Dili na itugot ni Jehova nga magpadayon pa ang satanikong pagmando! Sa dili madugay ang Yawa pagagaposon. Usa ka bag-ong magmamando maoy mogahom sa yuta, usa ka matarong nga hari nga gipili sa Diyos mismo. Kana nga Hari mao si Jesu-Kristo. Mahitungod sa iyang paglingkod sa trono sa langit, ang Pinadayag nag-ingon: “Ang gingharian sa kalibotan nahimong ang gingharian sa atong Ginoo [si Jehova] ug sa iyang Kristo.” (Pinadayag 11:15) Ang kronolohiya sa Bibliya, duyog sa ubang katumanan sa tagna sa Kasulatan, nagpamatuod nga kining hitaboa nahitabo sa tuig 1914.​—Mateo 24:3, 6, 7.

Ang Bibliya nagbatbat usab sa hitabo human gilayon sa paglingkod ni Jesus sa trono. Kini nag-ingon: “Miulbo ang gubat sa langit: Si Miguel [Jesu-Kristo] ug ang iyang mga anghel nakiggubat sa dragon [Satanas nga Yawa], ug ang dragon ug ang mga anghel niini nakiggubat apan kini wala makadaog, ni may dapit pang nakaplagan alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya.”​—Pinadayag 12:7-9.

Unsay resulta sa pagpalagpot kang Satanas gikan sa langit? Kadtong atua sa langit nangalipay, apan komosta ang mga molupyo sa yuta? “Alaot alang sa yuta ug sa dagat,” nag-ingon ang Pinadayag 12:12, “tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” Sa pagkatinuod, ang pagtambog kang Satanas gikan sa langit naghatag kaalaotan sa yuta. Ang The Columbia History of the World nag-ingon: “Ang dakong kalaglagan sa Upat ka Tuig nga Gubat sa 1914-1918 . . . nagpakita sa kalibotan sa Kasadpan nga kini dili makapanalipod sa sibilisasyon gikan sa kaugalingong kabuangan o sa daotang pangagda niini. Ang Kasadpan wala gayod maulii sa kadasig sukad sa pagkalaglag niini.”

Ang mga kaalaotan niini nga kaliwatan gitiman-an ug labaw pa kay sa nagun-ob nga kadasig. Si Jesus nagtagna: “Ang nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa nagkalainlaing dapit.” Siya usab nagtagna ug mga kamatay. (Mateo 24:7, 8; Lucas 21:11) Usa pa, ang Bibliya nag-ingon nga sa “kataposang mga adlaw” sa sistema sa mga butang ni Satanas, daghan ang mahimong “mga mahigugmaon sa kaugalingon, mga mahigugmaon sa salapi, . . . dili-masinugtanon sa mga ginikanan, . . . dili ikasabot sa bisan unsa.” Ang mga tawo usab mahimong “mga mahigugmaon sa kalingawan imbes mga mahigugmaon sa Diyos.”​—2 Timoteo 3:1-5.

Ang mga gubat, mga kamatay, mga kakulang sa pagkaon, mga linog, ug pagkadaot sa moral nga mga sukdanan​—kining tanang butanga nagakahitabo nga ang ingon wala pa mahitabo sukad sa 1914, sama sa gitagna sa Bibliya. Kini nagtimaan nga ang nasukong kaaway sa Diyos ug tawo​—si Satanas nga Yawa​—gitambog gikan sa langit ug karon nagtumong sa iyang kasuko dinhi sa palibot sa yuta. Apan ang Bibliya usab nagpakita nga dili tugotan si Satanas sa paglihok ug dugay. Siya aduna na lamay “mubo nga panahon” nga nahibilin hangtod sa Armageddon, sa dihang laglagon sa Diyos ang sistema sa kalibotan nga gikontrolar ni Satanas.

Unsay mahitabo kang Satanas? Si apostol Juan misulat: “Nakita ko ang usa ka anghel nga nanaog gikan sa langit uban ang yawi sa kahiladman ug usa ka dakong kadena diha sa iyang kamot. Ug iyang gidakop ang dragon, ang orihinal nga halas, kinsa mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrihan kini sa ibabaw kaniya.” (Pinadayag 20:1-3) Pagkadakong kahupayan kini alang sa nag-antos nga katawhan!

Kalipay Ilalom sa Pagmando sa Gingharian

Sanglit si Satanas dili na makapanghilabot, ang Gingharian sa Diyos ilalom sa pagmando ni Jesu-Kristo bug-os nga maoy modumala sa kalihokan sa katawhan. Imbes adunay daghang kagamhanan sa yuta, usa lamang ka langitnong kagamhanan ang magpabilin sa pagmando sa tibuok planeta. Ang gubat mahimong butang na unya sa nangagi, ug adunay pakigdait bisan asa. Ilalom sa pagmando sa Gingharian sa Diyos, ang tanan mag-usa sa pagpuyo diha sa mahigugmaong panag-igsoonay.​—Salmo 72:7, 8; 133:1; Daniel 2:44.

Unsang matanga sa magmamando unya si Jesus? Sa dihang dinhi pa siya sa yuta, siya nagpakitag lalom nga gugma sa mga tawo. Si Jesus maluloy-ong naghatag ug pagkaon sa gigutom. Iyang giayo ang mga masakiton ug gibalikan ug panan-aw ang mga buta, gipasulti ang mga amang, ug gipalakaw ang bakol. Gibanhaw pa gani ni Jesus ang mga patay! (Mateo 15:30-38; Marcos 1:34; Lucas 7:11-17) Kadtong maong mga milagro maoy pasiunang-paglantaw sa katingalahang mga butang nga iyang pagahimoon pa ingong Hari. Pagkalalim unya ang pagkabaton ug ingon niana ka manggiluy-ong magmamando!

Ang walay kataposang panalangin maoy masinati sa mga tawong magpasakop sa pagkasoberano ni Jehova. Ang Kasulatan nagsaad: “Nianang panahona ang mga mata sa mga buta mangabuka, ug ang mga dalunggan sa mga bungol makadungog. Nianang panahona ang bakol molukso sama sa lagsaw, ug ang dila sa amang mosinggit sa kalipay.” (Isaias 35:5, 6) Nagpunting sa unahan nianang dakong adlaw, si apostol Juan nagsulat: “Nadungog ko ang usa ka kusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’”​—Pinadayag 21:3, 4.

Ang mga kalipay nga gihatag sa pagmando ni Jehova nga Diyos pinaagi sa iyang Anak, si Jesu-Kristo, labaw pang makabayad sa bisan unsang pag-antos nga atong naagoman niining presenteng sistema sa mga butang nga gimandoan ni Satanas nga Yawa. Diha sa gisaad nga bag-ong kalibotan sa Diyos, ang mga tawo dili mahibulong, ‘Kinsa ba gayod ang nagmando?’ (2 Pedro 3:13) Ang masinugtanong katawhan magmalipayon ug may kasegurohan diha sa yutan-ong dominyo sa mahigugmaong mga Magmamando sa kalibotan nga espirituhanon, si Jehova ug si Kristo. Nganong dili mogakos sa paglaom nga mahimong usa sa ilang mga ginsakpan?

[Hulagway sa panid 7]

Ang katawhan may kasegurohan sa yutan-ong dominyo sa Gingharian sa Diyos

[Picture Credit Line sa panid 4]

Letrato sa NASA