Gituman Nila ang Kabubut-on ni Jehova

Si Moises ug Aaron—Maisogong mga Magwawali sa Pulong sa Diyos

HANDURAWA ang talan-awon: Ang 80 anyos nga si Moises ug ang iyang igsoong lalaki, si Aaron, nagbarog atubangan sa labing gamhanang tawo sa yuta​—si Paraon sa Ehipto. Alang sa mga Ehiptohanon kining tawhana dili lamang usa ka hawas sa mga diyos. Nagtuo sila nga siya mismo maoy usa ka diyos. Gilantaw siya ingong ang nagpakatawo mismo nga si Horus, ang diyos nga banog-ug-ulo. Duyog kang Isis ug Osiris, si Horus nahimong pangunang trinidad taliwala sa mga diyos ug mga diyosa sa Ehipto.

Ang bisan kinsa nga moduol kang Paraon tinong makamatikod gayod sa makahahadlok nga dagway sa ulo sa kobra nga misiwil sa sentro sa iyang korona. Kining bitina kuno makabugag kalayo ug kalaglagan diha kang bisan kinsa nga mga kaaway ni Paraon. Karon si Moises ug Aaron miduol atubangan niining diyos-hari nga may hangyo nga wala pa gayod sukad mahimo​—nga tugotan niyang palakwon ang giulipon nga mga Israelinhon aron sila makasaulog sa piyesta sa ilang Diyos, si Jehova.​—Exodo 5:1.

Gitagna na ni Jehova nga matig-a ang kasingkasing ni Paraon. Busa, wala mahibulong si Moises ug Aaron sa iyang masukihong tubag: “Kinsa si Jehova, aron ako mamati sa iyang tingog ug palakwon ang Israel? Wala gayod ako makaila kang Jehova ug, labaw sa tanan, dili nako palakwon ang Israel.” (Exodo 4:21; 5:2) Busa, naandam ang usa ka madulaong pagharongay. Sa sunod nga panagkita, gipresentar ni Moises ug Aaron ang katingalahang pamatuod kang Paraon nga sila naghawas sa matuod ug makagagahom nga Diyos.

Usa ka Milagro Nahitabo

Ingon sa gisugo ni Jehova, si Aaron mihimog milagro nga nagpamatuod sa pagkalabaw ni Jehova ibabaw sa mga diyos sa Ehipto. Iyang gilabay ang iyang sungkod sa atubangan ni Paraon, ug dihadiha kini nahimong dakong halas! Nahingangha niini nga milagro, gipatawag ni Paraon ang iyang madyikerong mga saserdote.a Uban sa tabang sa mga gahom sa demonyo, kining mga tawhana nakahimo sa pagsundog niini pinaagi sa ilang mga sungkod.

Kon nalipay si Paraon ug ang iyang mga saserdote, daklit ra kadto. Handurawa ang ilang mga nawong sa dihang gilamoy sa halas ni Aaron ang ilang mga halas, ang usag usa! Ang tanang atua didto nakakita nga ang Ehiptohanong mga diyos dili gayod makatugbang sa matuod nga Diyos, si Jehova.​—Exodo 7:8-13.

Apan, bisan pa human niini, nagpabiling matig-a ang kasingkasing ni Paraon. Human lamang nga nagpadala ang Diyos ug napulo ka malaglagong kadaot, o mga hampak, batok sa Ehipto nga si Paraon sa kataposan miingon kang Moises ug Aaron: “Bangon, pamahawa kamo gikan sa taliwala sa akong katawhan, kamo ug ang mga anak sa Israel, ug panlakaw kamo, pag-alagad kamo kang Jehova, ingon sa inyong gisulti.”​—Exodo 12:31.

Mga Pagtulon-an Alang Kanato

Unsay nagpaarang kang Moises ug Aaron sa pagduol sa gamhanang Paraon sa Ehipto? Sa sinugdan, nagpahayag si Moises ug kawalay-pagsalig sa iyang katakos, nga nangangkon nga “mahinay sa baba ug mahinay sa dila.” Bisan human pasaligi nga paluyohan ni Jehova, siya mihangyo: “Ipadala, palihog, pinaagi sa kamot sa usa nga imong ipadala.” Sa laing pagkasulti, si Moises mihangyo nga ang Diyos magpadalag lain. (Exodo 4:10, 13) Bisan pa niana, gigamit ni Jehova ang maaghop nga si Moises, nga naghatag kaniyag kaalam ug sa gikinahanglang kalig-on sa pagtuman sa iyang tinudlong buluhaton.​—Numeros 12:3.

Karon, ang mga alagad ni Jehova nga Diyos ug ni Jesu-Kristo nagatuman sa sugo sa “paghimog mga tinun-an sa katawhan sa tanang kanasoran.” (Mateo 28:19, 20) Aron mahimo ang atong bahin sa pagtuman niining sugoa, kinahanglan pahimuslan nato ug maayo ang kahibalo sa Kasulatan ug ang bisan unsang katakos nga atong nabatonan. (1 Timoteo 4:13-16) Imbes hunahunaon ang atong mga kahuyangan, atong dawaton nga may pagtuo ang bisan unsang buluhaton nga ihatag sa Diyos kanato. Siya magpatakos ug magpalig-on kanato sa pagtuman sa iyang kabubut-on.​—2 Corinto 3:5, 6; Filipos 4:13.

Sanglit giatubang ni Moises ang pagsupak sa tawo ug demonyo, gikinahanglan gayod niya ang labaw-tawhanong tabang. Busa, si Jehova nagpasalig kaniya: “Tan-awa, gihimo ko ikaw nga Diyos ngadto kang Paraon.” (Exodo 7:1) Oo, si Moises may diyosnong pagpaluyo ug awtoridad. Pinaagi sa espiritu ni Jehova nga diha kaniya, si Moises walay katarongan sa pagkahadlok kang Paraon o sa mga kaabin niadtong mapahitas-ong magmamando.

Kita usab kinahanglang mosalig sa balaang espiritu, o aktibong gahom, ni Jehova sa pagtuman sa atong ministeryo. (Juan 14:26; 15:26, 27) Uban sa diyosnong pagpaluyo ikapatugbaw nato ang mga pulong ni David, kinsa miawit: “Gibutang nako sa Diyos ang akong pagsalig. Dili ako mahadlok. Unsay mahimo sa tawong yutan-on nganhi kanako?”​—Salmo 56:11.

Sa iyang kahangawa wala biyai ni Jehova si Moises nga mag-inusara sa iyang asaynment. Hinunoa, ang Diyos miingon: “Si Aaron nga imong kaugalingong igsoon mahimong imong manalagna. Ikaw​—ikaw magsulti sa tanang isugo nako kanimo; ug si Aaron nga imong igsoon mao ang mosulti kang Paraon.” (Exodo 7:1, 2) Pagkamahigugmaon ni Jehova sa pagpabuhat sa maarangan lamang nga mahimo ni Moises!

Ang Diyos naghatag kanato ug panag-ubanay sa kaubang mga kristohanon kinsa nagadawat sa hagit sa pagkahimong mga Saksi ni Jehova, ang Labing Hataas. (1 Pedro 5:9) Busa, bisan pa sa mga babag nga tingali atong maatubang, sundogon nato si Moises ug Aaron​—nga maisogong mga magwawali sa pulong sa Diyos.

[Footnote]

[Hulagway sa panid 25]

Maisogong gihawasan ni Moises ug Aaron si Jehova atubangan kang Paraon