Ikaw ba Usa ka Timbang nga Payunir?
ANG mga mata sa amahan mikislap samtang iyang gihulat uban sa mga kamot nga andam sa pagdawat sa iyang anak nga babaye sa iyang una nagpanukong mga tikang. Sa dihang matumba siyag kalit, iyang dasigon siya sa pagsulay pag-usab. Ang amahan nahibalo nga sa dili madugay makabalanse ra siya ug makabatog kalig-on.
Sa samang paagi, ang usa ka bag-ong payunir nga ministro mahimong magkinahanglag panahon ug pagdasig una niya makab-ot ang pagkatimbang nga gikinahanglan aron molampos ingong usa ka bug-os panahong magmamantala sa Gingharian. Daghang payunir ang padayong nag-alagad nga malipayon sa daghang dekada. Ang pipila nawad-an ug panimbang tungod sa wala damhang mga kausaban sa ilang mga kahimtang. Ang uban nawad-an gani sa ilang kalipay. Sa usa ka nasod, 20 porsiento sa mga nagsugod ug payunir ang mohunong sulod sa unang duha ka tuig sa ilang bug-os panahong pag-alagad. Unsay makapahunong sa usa ka payunir niining labing malipayong pag-alagad? Aduna bay mahimo aron malikayan kining maong mga kakulian?
Bisan tuod ang dili maayong panglawas, pinansiyal nga mga panginahanglan, ug mga responsabilidad sa pamilya mahimong makapaundang sa pipila sa bug-os panahong ministeryo, ang nakababag sa uban mao nga wala nila mamentinar ang maayong panimbang tali sa lainlaing Kristohanong mga obligasyon. Ang pagkatimbang nagpasabot sa “usa ka kahimtang diin walay usa ka bahin, rason, hinungdan, o impluwensiya ang mas bug-at kay sa uban o dili samag sukod sa uban.”
Gipakita ni Jesu-Kristo sa iyang mga tinun-an ang paagi sa pagsangyaw ug paghimog tinun-an. Sa iyang kaugalingong ministeryo, giilustrar usab niya kon sa unsang paagi mamentinar ang pagkatimbang. Gipakita ni Jesus nga ang Hudiyonhong mga pangulo sa relihiyon dili timbang, nga nag-ingon kanila: “Nagahatag kamo sa ikanapulo sa yerbabuyna ug sa eneldo ug sa cumino, apan wala ninyo panumbalinga ang mas bug-at nga mga butang sa Balaod, nga mao, ang hustisya ug kaluoy ug pagkamatinuohon. Obligado ang pagbuhat niining mga butanga, apan dili kay dili-panumbalingon ang ubang mga butang.”—Mateo 23:23.
Kining prinsipyoha samang mapadapat karon, ilabina sa payunir nga pag-alagad. Tinukmod sa kasibot ug maayong tuyo, ang uban misulod sa pagpayunir nga wala bug-os mangandam alang niini o magtagad sa tanang nalangkit niini. (Lucas 14:27, 28) Gibug-os sa uban ang pagtagad sa pag-alagad sa kanataran nga ilang nakalimtan ang ubang hinungdanong mga bahin sa Kristiyanidad. Sa unsang paagi nila makab-ot ug mamentinar ang pagkatimbang?
Pagpabiling Lig-on sa Espirituwal!
Wala gayod pasagdi ni Jesus ang iyang espirituwalidad. Bisag ang mga panon nga miduol kaniya aron mamati ug magpatambal nakakuhag dako sa iyang panahon, siya migahin ug panahon alang sa mapalandongong pag-ampo. (Marcos 1:35; Lucas 6:12) Ang timbang nga pagpayunir karon nagkinahanglan usab nga gamiton ug maayo sa usa ang tanang tagana aron makapabiling lig-on sa espirituwal. Si Pablo nangatarongan: “Ikaw ba, hinunoa, ang usa nga nagatudlo sa uban, dili magtudlo sa imong kaugalingon?” (Roma 2:21) Tino nga usa ka sayop nga hutdon sa usa ang iyang panahon sa pagsangyaw sa uban samtang wala nay igong panahon sa personal nga pagtuon ug regular nga pag-ampo.
Si Kumiko usa ka payunir sulod sa duha ka dekada. Bisan tuod tulo ang iyang anak ug dili magtutuo ang bana, nadiskobrehan niya base sa eksperyensiya nga ang labing maayong panahon alang kaniya sa pagbasa ug pagtuon sa Bibliya maoy sa dili pa siya matulog sa gabii. Samtang siya nagtuon, iyang markahan gayod ang mga punto nga magamit niya sa pag-alagad sa kanataran aron ang iyang adlaw-adlaw nga ministeryo magpabiling lab-as ug makaiikag. Ang ubang malamposong mga payunir momatag una sa ubang membro sa pamilya aron tagamtamon ang espirituwal nga pagpalagsik sa mga oras nga mahilom ang kabuntagon. Tingali aduna kay laing maayong mga panahon nga gigahin sa pagpangandam alang sa mga tigom ug pagnunot uban sa kinabag-ohang Kristohanong mga publikasyon. Kon buot nimo nga mamentinar ang kalipay sa pag-alagad, ang personal nga pagtuon maoy usa ka butang nga dili angay dalidalion o pasagdan.
Pagtimbang sa mga Responsabilidad sa Pamilya
Kinahanglan usab nga huptan sa hunahuna sa nagpayunir nga mga ginikanan nga ang dakong bahin sa “kabubut-on ni Jehova” alang kanila naglangkit sa pag-atiman sa pisikal, emosyonal, ug espirituwal nga mga panginahanglan sa ilang kaugalingong pamilya. (Efeso 5:17; 6:1-4; 1 Timoteo 5:8) Usahay bisan ang magtutuong kapikas ug mga membro sa pamilya mabalaka nga dili sila makadawat ug paglipay ug pagsuportar gikan sa asawa ug inahan sa dihang magsugod na siya ug payunir. Ang maong mga pagbati mosangpot ug dili-mainitong pagsanong sa iyang tinguha nga mahimong payunir. Hinunoa, pinaagi sa maayong pagplano ug abante nga paghunahuna, mahimong mamentinar ang pagkatimbang.
Daghang payunir ang naningkamot sa paghimo sa tanan nilang buluhaton sa pagsangyaw sa dihang ang mga membro sa pamilya wala sa balay. Si Kumiko, nga gihisgotan sa sinugdan, kauban sa iyang pamilya samtang mangaon sila sa ilang pamahaw, magpagikan sa iyang bana ug mga anak sa buntag, ug mobalik sa balay sa dili pa sila makapauli. Iyang gamiton ang matag Lunes sa pagluto daan sa pipila ka pagkaon aron nga siya makapahayahay ug makasalo sa pangaon sa iyang pamilya inay nga puliki siya sa kusina. Ang pagbuhat ug kapin sa usa ka buluhaton sa usa ka higayon, sama sa pagbuhat sa ubang trabaho samtang nagluto ug pagkaon, makatabang usab. Nianang paagiha nakakita pa gani ug panahon si Kumiko sa pagdapit sa mga higala sa iyang mga anak ug makapangandam ug lamiang pagkaon alang kanila.
Samtang nagtubo ang mga bata ngadto sa pagkatin-edyer, sagad nga kinahanglan nila ug dugang pagtagad gikan sa ilang mga ginikanan sa pagsagubang sa bag-ong mga pagbati, mga tinguha, mga pagduhaduha, ug mga kahadlok nga nagadaog kanila. Kini nagkinahanglan ug kaigmat ug pagpasibo sa eskedyul sa ginikanan nga payunir. Tagda si Hisako, usa ka nagpayunir nga inahan sa tulo. Unsay iyang gihimo sa dihang ang iyang kinamagulangan nga anak nga babaye misugod sa pagpakita ug kawalay kalipay ug kasibot sa Kristohanong mga tigom ug pag-alagad sa kanataran tungod sa impluwensiya sa kalibotanong mga higala sa tunghaan? Ang gikinahanglan gayod sa iyang anak nga babaye mao ang paghimo sa kamatuoran nga iyang kaugalingon ug bug-os nga kombinsido nga ang pagkabulag gikan sa kalibotan mao ang labing maayong dalan.—Santiago 4:4.
Si Hisako miingon: “Nakadesider ako sa pagdumala pag-usab ug pagtuon kaniya sa pangunang mga doktrina sa librong Mabuhing Walay Kataposan adlaw-adlaw. Sa sinugdan makatuon lamang kami ug pipila ka minutos, kay kanunayng magreklamo ang akong anak nga babaye nga sakit kaayo ang tiyan ug naglabad ang ulo kon panahon na sa pagtuon. Apan regular nga gidumala ko ang pagtuon. Human sa pipila ka bulan, ang iyang espiritu miuswag ug dako, nga sa mubong panahon misangpot sa iyang pagpahinungod ug pagpabawtismo.” Karon gikalipayan ni Hisako ang bug-os panahong ministeryo kauban sa iyang anak nga babaye.
Ang nagpayunir nga mga amahan kinahanglang magbantay usab nga dili sila malinga pag-ayo sa pag-atiman sa mga interesado diha sa kanataran ug sa ilang mga kaakohan sa kongregasyon nga ang nagtubo nilang mga anak dili na nila mahatagan ug lig-ong emosyonal nga pagpaluyo ug paggiya nga angay kanila. Usa kini ka butang nga dili angay ipasa sa usa ka bana ngadto sa iyang asawa. Ang usa ka puliking Kristohanong ansiano nga dugay nang payunir ug nagdumala usab ug usa ka gamayng negosyo nagagahin ug panahon sa pagdumala ug pagtuon sa matag usa sa iyang upat ka anak. (Efeso 6:4) Dugang pa, mangandam siya alang sa senemanang mga tigom uban sa iyang pamilya. Ang timbang nga mga payunir dili magpasagad sa iyang mga pamilya sa materyal o espirituwal nga paagi.
Pagkatimbang sa Panalapi
Ang hustong panglantaw may kalabotan sa adlaw-adlaw nga mga panginahanglan maoy laing natad diin ang mga payunir angay nga maningkamot aron maampingan ang maayong panimbang. Dinhi usab, daghan kitag makat-onan gikan sa maayong panig-ingnan ug tambag ni Jesus. Nagpasidaan siya batok sa sobrang pagkabalaka labot sa materyal nga mga butang. Hinunoa, gidasig niya ang iyang mga tinun-an sa pag-una sa Gingharian, nga nagsaad nga atimanon sila sa Diyos sama sa iyang gihimo sa uban niyang linalang. (Mateo 6:25-34) Pinaagi sa pagsunod niining maayong tambag, daghang payunir ang nakapabilin sa bug-os-panahon nga pag-alagad sa daghang tuig, ug gipanalanginan ni Jehova ang ilang mga paningkamot sa pagpangitag ‘tinapay matag adlaw.’—Mateo 6:11.
Gitambagan ni apostol Pablo ang isigka-Kristohanon sa ‘pagpaila sa ilang pagkamakataronganon ngadto sa tanang tawo.’ (Filipos 4:5) Tino, ang pagkamakataronganon nagkinahanglan nga ampingan gayod nato ang atong panglawas. Ang timbang nga mga payunir maningkamot sa pagpakita sa pagkamakataronganon sa ilang paagi sa kinabuhi ug sa ilang tinamdan sa materyal nga mga butang, kay nahibalo nga ginaobserbahan sa uban ang ilang panggawi.—Itandi ang 1 Corinto 4:9.
Angay nga dili pahimuslan sa mga batan-ong nagpayunir ang pagkamahinatagon sa ilang mga ginikanan. Kon sila nagpuyo sa balay sa ilang mga ginikanan, pagpakita ug maayong pagkatimbang ug apresasyon ang pagtabang sa buluhaton sa panimalay ug pagbaton ug partaym nga trabaho aron makaamot sila sa galastohan sa balay.—2 Tesalonica 3:10.
Tinuod nga Panalangin ang Timbang nga mga Payunir
Tingali usa ikaw ka payunir nga naningkamot ug maayo nga makabaton ug maayong panimbang. Magmasaligon. Sama sa usa ka gamayng bata nga nagkinahanglag panahon aron makakat-on sa pagbalanse sa iyang kaugalingon ug makalakaw, daghang hamtong nga mga payunir nag-ingon nga igoigong panahon una nga makab-ot nila ang pagkatimbang sa pag-atiman sa tanan nilang mga kaakohan.
Ang personal nga pagtuon, pag-atiman sa mga membro sa pamilya, ug pagtagana sa ilang kaugalingong materyal nga mga panginahanglan maoy apil sa mga natad diin ang mga payunir maningkamot nga makabaton ug pagkatimbang. Ang mga taho nagpakita nga daghang payunir nakatuman sa ilang mga kaakohan sa talagsaong paagi. Sila tinuod gayod nga panalangin sa komunidad ug pasidungog kang Jehova ug sa iyang organisasyon.