Gituman Nila ang Kabubut-on ni Jehova

Si Daniel Nag-alagad sa Diyos nga Makanunayon

TALAGSA ra nga ang dagan sa kasaysayan mausab sa usa ka gabii. Bisan pa, kana nahitabo niadtong 539 W.K.P., sa dihang ang Imperyo sa Babilonya gipukan sa mga Medianhon ug mga Persianhon sa pipila lamang ka oras. Nianang tuiga, ang manalagna ni Jehova nga si Daniel nagpuyo ingong Hudiyohanong bihag sa Babilonya sa halos 80 ka tuig. Lagmit nga diha na sa iyang pangedarong 90, hapit nang atubangon ni Daniel ang usa sa labing dakong mga pagsulay sa iyang pagkamaunongon sa Diyos.

Human malaglag ang Babilonya, daw sa sinugdan maayo ang kahimtang ni Daniel. Ang bag-ong hari mao si Dario nga Medianhon, usa ka 62-anyos nga tawo nga naglantaw kang Daniel nga may pag-uyon. Usa sa unang mga buhat ni Dario ingong hari mao ang pagtudlog 120 ka satrap ug sa pagtuboy ug tulo ka lalaki nga mahimong hataas nga opisyal.a Si Daniel maoy usa niadtong tulo nga gipaborang lalaki. Nahibalo sa talagsaong katakos ni Daniel, buot pa ni Dario nga ihatag kaniya ang posisyon sa pagkahimong primero ministro! Niadtong tungora, hinunoa, may nahitabo nga nagpausab dihadiha sa mga plano sa hari.

Usa ka Malinglahong Plano

Ang kauban ni Daniel nga hataas nga mga opisyal, uban sa usa ka dakong grupo sa mga satrap, miduol sa hari nga may makaiikag nga ideya. Gihangyo nila si Dario nga mopakanaog ug balaod nga magsugo: “Ang si bisan kinsa nga magapangamuyo sa bisan unsang diyos o tawo sulod sa katloan ka adlaw gawas kanimo, Oh hari, ihulog sa langob sa mga leyon.” (Daniel 6:7) Alang kang Dario kining mga tawhana daw nagpahayag sa ilang pagkamaunongon ngadto kaniya. Nangatarongan usab tingali siya nga kini nga balaod motabang kaniya, nga usa ka langyaw, sa pagpalig-on sa iyang posisyon ingong pangulo sa gingharian.

Ugaling, ang hataas nga mga opisyal ug mga satrap wala maglaraw sa pagpakanaog niini nga balaod alang sa kaayohan sa hari. Sila “nangitag ikasumbong batok kang Daniel labot sa gingharian; apan walay ikasumbong o wala silay nakita nga daotan, sanglit siya kasaligan ug dili mapinasagdanon o may daotan nga nakita kaniya.” Busa kining malinglahong mga lalaki nangatarongan: “Wala gayod kitay makitang ikasumbong batok niining Daniel, gawas kon mangita kita niini batok kaniya maylabot sa kasugoan sa iyang Diyos.” (Daniel 6:4, 5) Nahibalo nga si Daniel nag-ampo kang Jehova kada adlaw, nagtinguha sila nga himoon kining krimen nga may silot nga kamatayon.

Tingali ang hataas nga mga opisyal ug mga satrap may gihambing kayugot batok kang Daniel sanglit siya “padayong nagpaila sa iyang kaugalingon nga may talagsaong katakos ibabaw [kanila], kay ang talagsaong espiritu diha man kaniya; ug ang hari naghunahuna sa pagtuboy kaniya ibabaw sa tibuok gingharian.” (Daniel 6:3) Ang kamatinud-anon ni Daniel lagmit nakapatunghag wala kaangaying panumpo batok sa korapsiyon ug pagpanikas. Bisan unsa pay kahimtang, nakombinsir niining mga tawhana ang hari sa pagpirma sa balaod, naghimo niining bahin “sa balaod sa mga Medianhon ug mga Persianhon, nga dili mabag-o.”​—Daniel 6:8, 9.

Si Daniel Nagpabiling Malig-on

Human hisayri ang bag-ong balaod, mihunong ba si Daniel sa pag-ampo kang Jehova? Wala gayod! Nagluhod diha sa lawak sa atop sa iyang balay, siya nag-ampo sa Diyos tulo ka higayon matag adlaw, “ingon sa iyang gibuhat kanunay una pa niini.” (Daniel 6:10) Samtang siya nag-ampo, ang iyang mga kaaway “mihugop ug nakakita kang Daniel nga nangaliya ug nangamuyo ug pabor atubangan sa iyang Diyos.” (Daniel 6:11) Sa dihang gipaabot nila kini sa pagtagad sa hari, naguol si Dario nga ang gipirmahan niya nga balaod mag-angin kang Daniel. “Hangtod sa pagsalop sa adlaw siya padayong naningkamot sa pagluwas kaniya,” ang asoy nagtug-an kanato. Apan bisan ang hari dili makausab sa balaod nga iyang gipakanaog. Busa si Daniel gidala ngadto sa langob sa mga leyon, dayag nga usa ka lalom nga lungag o dapit ilalom sa yuta. “Ang imong Diyos nga imong ginaalagaran kanunay, siya mismo ang magaluwas kanimo,” ang hari nagpasalig kang Daniel.​—Daniel 6:12-16.

Human sa walay katulog nga gabii ug pagpuasa, si Dario nagdali sa pag-adto sa langob. Buhi si Daniel ug wala maunsa! Dihadiha ang reaksiyon sa hari. Iyang gipahulog ang mga kaaway ni Daniel ug ilang mga pamilya ngadto sa langob sa mga leyon ingong balos. Gipahibalo usab ni Dario sa tibuok gingharian nga “sa matag dapit sa akong gingharian, ang mga tawo kinahanglang managpangurog ug magmahadlokon atubangan sa Diyos ni Daniel.”​—Daniel 6:17-​27.

Pagtulon-an Alang Kanato

Si Daniel maoy usa ka maayong panig-ingnan sa pagkamatinumanon. Bisan ang hari, nga wala magsimba kang Jehova, nakamatikod nga si Daniel nag-alagad Kaniya nga ‘makanunayon.’ (Daniel 6:16, 20) Ang gamot sa Aramaikong pulong nga gihubad “kanunay” sa paninugdan nagkahulogang “nagtuyok.” Kini nagsugyot nga walay-bugto. Pagkamaayo nga kahubitan kini sa dili-mabugto nga pagkamaunongon ni Daniel kang Jehova!

Dugay na nga naugmad ni Daniel ang sumbanan sa pagkamakanunayon sa wala pa siya ihulog ngadto sa langob sa mga leyon. Ingong batan-ong bihag sa Babilonya, midumili siya sa pagkaon sa mga kalan-on o ilimnon nga gidili sa Moisesnong Kasugoan o nahugawan sa paganong rituwal. (Daniel 1:8) Sa ulahi, maisogon niyang gimantala ang mensahe sa Diyos kang Nabucodonosor nga hari sa Babilonya. (Daniel 4:19-​25) Pipila ka oras lamang una mapukan ang Babilonya, walay kokahadlok nga gimantala ni Daniel ang paghukom sa Diyos batok kang Haring Belsazar. (Daniel 5:22-​28) Busa sa dihang giatubang ni Daniel ang langob sa mga leyon, siya nagpadayon diha sa matinumanong dalan nga iya nang nahimo.

Ikaw usab makaalagad kang Jehova nga makanunayon. Ikaw ba usa ka batan-on? Nan lihok na karon aron maugmad ang sumbanan sa pagkamakanunayon pinaagi sa pagsalikway sa daotang panagkauban ug makadaot nga panggawi niining kalibotana. Kon ikaw taudtaod nang nag-alagad sa Diyos, hupti ang sumbanan sa matinumanong paglahutay. Ayaw paghunong, kay ang matag pagsulay nga atong atubangon mohatag kanato ug higayon nga ipakita kang Jehova nga kita determinado sa pag-alagad kaniya nga makanunayon.​—Filipos 4:11-13.

[Footnote]