“Usa Lamang sa Daghang Kinabuhi nga Imong Natandog”
BALIK niadtong Enero 1996, si Carol nasakit ug tumor sa utok. Siya diha na sa iyang pangedarong 60 ug hangtod niadto kanunay nga malipayon, baskog nga babaye nga may makapadasig nga pulong alang sa tanan. Apan karon ang mga doktor naningkamot nga mapukgo ang makamatayng pagtubo. Sa tunga sa iyang pakigbisog, si Carol nakadawat sa mosunod nga sulat:
“Minahal nga Carol:
“Gikasubo nako pag-ayo ang imong nagkaluyang panglawas. Maayo na lang, kita adunay tinuod nga paglaom nga ang Bibliya nagtabang kanato nga mahibalo ug magustohan. Kini nga paglaom maoy alang sa Gingharian ni Jehova nga magmando sa yuta aron kita mabuhi diha sa usa ka paraisonhong kahimtang, usa ka panahon nga kitang tanan nagapaabot.
“Buot ko nga masayod ka nga ang imong personal nga buluhatong pagsangyaw nakaluwas ug daghang tawo gikan sa walay kataposang kamatayon. Ako usa niining mga tawhana. Ambot lang kon nahinumdom ka pa sa unang higayon nga kita nagkita. Niadtong panahona ako 20 anyos. Ako taas ug buhok, namaligyag mga droga, ug nag-estambayan kauban sa panon sa mga tawong bagis. Kaming tanan nagdalag mga pusil ug walay tinuod nga gugma kang bisan kinsa gawas sa among kaugalingon.
“Nanuktok ka sa akong pultahan kauban sa laing Saksi ug nagtanyag kanako sa Ang Bantayanang Torre ug Pagmata! Misulay ako sa paghatag kanimog usa ka dolyar ug miingon nga ako walay gusto sa mga magasin. Giingnan mo ako nga kamo wala magsangyaw aron makabatog mga donasyon. Gisultihan mo ako nga nagbuhat kamo sa buluhaton nga motabang sa mga tawo sa pagbasa sa Bibliya. Wala ako makaseguro kon nakuha nako ang mga magasin o nabasa kini. Ugaling, nakapugas ka ug binhi sa kamatuoran diha sa akong kinabuhi.
“Pipila ka tuig sa ulahi laing Saksi, si Gary, miduaw sa balay sa akong inahan nga ako didto niadtong higayona. Gisultihan ko siya bahin sa pagduaw nimo pipila ka tuig sa miagi. Gitun-an ako sa Bibliya ni Gary sa dugay nga panahon hangtod nga ako nabawtismohan niadtong 1984. Karon ako nagtudlo sa akong mga anak sa kamatuoran bahin sa Gingharian sa Diyos.
“Segurado ako nga ako usa lamang sa daghang kinabuhi nga imong natandog sa imong daghang tuig sa matinumanong pag-alagad. Apan, pinaagi niining mahigugmaong kalulot, ikaw nagpaarang kanako ug sa akong pamilya nga makadangat sa pagkaila sa Dakong Diyos, si Jehova, ug sa iyang Anak, si Kristo Jesus. Ako nagpaabot sa adlaw sa dihang ako kang makita sa bag-ong sistema sa mga butang sa dihang si Jehova magapahid sa tanang luha gikan sa atong mga mata, ug ang kamatayon mawala na.—Pinadayag 21:4.
“Alang kanako ug sa akong pamilya, kami malipayon nga kami nakabatog higayon nga makaila kanimo ug mahimong bahin sa imong buluhatong pagsangyaw. Salamat.
“Uban ang inigsoong gugma,
Peter”
Human sa unom ka bulan nga balatian, si Carol namatay niadtong Marso 1996, nga nakapugas ug daghang binhi sa kamatuoran sulod sa iyang 35 ka tuig ingong masibotong ebanghelisador. Iyang nakat-onan nga walay usa ang nasayod sa dihang ang binhi magapamunga, bisan sa daghang tuig sa ulahi.—Mateo 13:23.