Pagpabili sa Kristohanong mga Panagkatigom

“Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom.”​—HEBREOHANON 10:24, 25.

1, 2. (a) Nganong usa ka pribilehiyo ang pagtambong sa panagkatigom sa matuod nga mga Kristohanon? (b) Sa unsang diwa si Jesus presente sa mga panagkatigom sa iyang mga sumusunod?

PAGKADAKO nga pribilehiyo ang pagtambong sa Kristohanong panagkatigom, kon kaha gilangkoban kinig ubos sa pulo o kaha linibong magsisimba ni Jehova, kay si Jesus miingon: “Diin gani may duha o tulo nga nagkatigom sa akong ngalan, anaa ako sa ilang taliwala”! (Mateo 18:20) Tinuod, sa gipahayag kanang saara, gihisgotan ni Jesus ang hudisyal nga mga butang nga angayng dumalahon sa hustong paagi niadtong nagapanguna sa kongregasyon. (Mateo 18:15-19) Apan ang mga pulong ni Jesus ikapadapat ba usab diha sa prinsipyo ngadto sa tanang Kristohanong mga panagkatigom nga ablihan ug tak-opan sa pag-ampo diha sa iyang ngalan? Oo. Hinumdomi, sa gisugo ni Jesus ang iyang mga sumusunod nga buhaton ang paghimog-tinun-an nga buluhaton, siya misaad: “Tan-awa! ako uban kaninyo sa tanang mga adlaw hangtod sa katiklopan sa sistema sa mga butang.”​—Mateo 28:20.

² Sa walay duhaduha ang Ulo sa Kristohanong kongregasyon, si Ginoong Jesu-Kristo, interesado kaayo sa tanang panagkatigom sa iyang matinumanong mga sumusunod. Dugang pa, makapaneguro kitang siya nagauban kanila pinaagi sa balaang espiritu sa Diyos. (Buhat 2:33; Pinadayag 5:6) Si Jehova nga Diyos usab interesadong kita magtigom sa tingob. Ang pangunang katuyoan nianang mga tigoma maoy aron ang pagdayeg ipatugbaw alang sa Diyos “taliwala sa natigom nga mga panon.” (Salmo 26:12) Ang atong pagtambong sa mga tigom sa kongregasyon maoy usa ka ebidensiya sa atong gugma kaniya.

 3. Tungod sa unsang hinungdanong mga katarongan nga atong gipabilhan ang Kristohanong mga panagkatigom?

³ Adunay ubang lig-ong mga katarongan nga kita nagpabili sa Kristohanong mga panagkatigom. Una pa siya mobiya sa yuta, si Jesu-Kristo nagtudlo sa iyang dinihogang mga tinun-an nga magsilbing usa ka “matinumanon ug maalamong ulipon” aron itagana ang husto-sa-panahon nga pagkaong espirituwal ngadto sa panimalay sa mga magtutuo. (Mateo 24:45) Usa ka dakong paagi sa paghimo sa espirituwal nga pagpakaon maoy pinaagi sa mga tigom sa kongregasyon ingon man sa dagko pang mga panagkatigom​—ang mga asembliya ug mga kombensiyon. Si Ginoong Jesu-Kristo nagagiya niining matinumanong ulipon aron itagana ang bililhong impormasyon panahon sa maong mga panagkatigom alang sa tanang buot nga makalabang buhi sa kalaglagan niining daotang sistema ug makabatog kinabuhi diha sa matarong nga bag-ong kalibotan sa Diyos.

 4. Unsang makuyawng “batasan” ang gihisgotan diha sa Bibliya, ug unsay motabang kanato sa paglikay niana?

⁴ Busa, ang Kristohanon dili makaako sa pag-ugmad sa makuyawng batasan nga gihisgotan ni apostol Pablo, kinsa misulat: “Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:24, 25) Ang pagpalandong sa pribilehiyo ug mga benepisyo sa pagtambong sa Kristohanong mga panagkatigom moabag kanato nga sa pagkamaunongon ug sa bug-os-kasingkasing mosuportar sa maong mga panagkatigom.

Mga Tigom nga Makapalig-on

 5. (a) Angayng unsay epekto sa atong sinultihan panahon sa mga tigom? (b) Nganong dili kita maglangan sa pagdapit sa mga interesado sa pagtambong sa mga tigom?

⁵ Sanglit ang mga Kristohanon nagaampo alang sa balaang espiritu ni Jehova aron magmaaktibo panahon sa Kristohanong mga tigom, ang matag usa nga tumatambong angayng mohimo sa iyang labing maarangan nga mobuhat nga nahiuyon sa espiritu ug ‘dili magpaguol sa balaang espiritu sa Diyos.’ (Efeso 4:30) Sa dihang si apostol Pablo misulat nianang inspiradong mga pulong, siya naghisgot sa tukmang paggamit sa katakos sa pagsulti. Ang atong igasulti angay nga kanunayng gamiton “sa pagpalig-on sumala sa gikinahanglan, aron makahatag kini ug unsay paborable sa mga tigpaminaw.” (Efeso 4:29) Kini ilabinang hinungdanon panahon sa Kristohanong mga panagkatigom. Sa iyang sulat ngadto sa mga taga-Corinto, gipasiugda ni Pablo ang panginahanglan nga ang mga tigom maoy makapalig-on, matulon-anon, ug makapadasig. (1 Corinto 14:5, 12, 19, 26, 31) Ang tanang nagatambong makabenepisyo gikan sa maong mga tigom, lakip ang bag-ong mga tumatambong, kinsa mahimong mohinapos: “Ang Diyos anaa gayod sa inyong taliwala.” (1 Corinto 14:25) Tungod niini, angayng kita dili maglangan sa pagdapit sa mga bag-ong interesado nga makigtigom uban nato, kay ang pagbuhat niana makapadali sa ilang espirituwal nga pag-uswag.

 6. Unsa ang pipila ka elemento nga motabang sa paghimo sa usa ka tigom nga makapalig-on?

⁶ Ang tanang giasaynan ug mga pakigpulong, mga interbiyo, o mga demonstrasyon panahon sa Kristohanong tigom buot magtino nga ang ilang sinultihan makapalig-on ug nahiuyon sa sinulat nga Pulong sa Diyos, ang Bibliya. Dugang pa sa pagpahayag sa tukmang mga sinultihan, angayng ipahayag nato ang mga pagbati ug mga emosyon nga nahiuyon sa mahigugmaong mga personalidad sa Diyos ug ni Kristo. Kon ang tanan nga magpahayag sa mga bahin sa usa ka programa sa tigom magmahunahunaon nga ipabanaag ‘ang mga bunga sa espiritu sa Diyos,’ sama sa kangaya, hataas-nga-pailob, ug pagtuo, nan ang tanang nagatambong seguradong mobati nga napalig-on.​—Galacia 5:22, 23.

 7. Sa unsang paagi ang tanang tumatambong makaamot ngadto sa makapalig-ong panagkatigom?

⁷ Bisan pag tingali pipila ra ang may bahin sa programa sa mga tigom sa kongregasyon, ang tanan makaamot ngadto sa makapalig-ong panagkatigom. Kasagarang adunay kahigayonan nga ang mamiminaw motubag sa mga pangutana. Kini sila maoy mga higayon sa dayag nga pagpahayag sa atong pagtuo. (Roma 10:9) Dili gayod angay nga kana gamitong higayon aron iduso ang atong personal nga mga ideya, ipasigarbo ang atong personal nga mga kahimoan, o sawayon ang isigkamagtutuo. Dili ba kana makapaguol unya sa espiritu sa Diyos? Ang mga pakigbingkil batok sa isigkamagtutuo labing maayong sulbaron nga pribado diha sa espiritu sa gugma. Ang Bibliya nag-ingon: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” (Efeso 4:32) Pagkamaayong higayon ang ihatag kanato sa Kristohanong mga panagkatigom aron ipadapat kining maayong tambag! Sa maong katuyoan, daghan ang sayo nga moabot sa mga tigom ug magpabilin pa pagkatapos niana. Kini motabang usab sa mga bag-ong interesado, kinsa adunay espesyal nga panginahanglan nga mobating inabiabi. Sa ingon ang tanang dedikadong mga Kristohanon adunay bahin sa paghimo sa mga tigom nga makapalig-on pinaagi sa ‘pagpasibot sa usag usa sa paghigugma ug maayong mga buhat.’

Pag-andam ug Maayo

 8. (a) Unsang dalayegong mga sakripisyo ang gihimo sa pipila aron pagtambong sa mga tigom? (b) Unsang panig-ingnan ang gihatag ni Jehova ingong usa ka magbalantay?

⁸ Bisan pag alang sa pipila sayon ang pagtambong sa Kristohanong mga panagkatigom, alang sa uban kini nanginahanglan sa mapinadayonong pagsakripisyo. Pananglitan, ang usa ka Kristohanong inahan nga kinahanglang may sekular nga trabaho aron makatabang sa pagtagana sa mga kinahanglanon sa iyang panimalay kasagarang mopauli sa balay gikan sa trabaho nga gikapoy. Unya siya tingali kinahanglang magluto ug motabang sa iyang mga anak nga maandam alang sa tigom. Ang ubang mga Kristohanon tingali kinahanglang mobiyaheg lagyo aron makatambong sa mga tigom, o tingali luya tungod sa mga sakit o katigulangon. Segurado, si Jehova nga Diyos nakasabot sa kahimtang sa matag matinumanong tumatambong sa tigom, sama nga ang mahigugmaong magbalantay sa karnero nakasabot sa espesyal nga mga panginahanglan sa tagsatagsa ka karnero sa iyang panon. “Sama sa usa ka magbalantay,” ang Bibliya nag-ingon, “[si Jehova] magabantay sa iyang kaugalingong panon. Pinaagi sa iyang bukton iyang tiponon ang mga nati; ug sa iyang dughan iyang kugoson sila. Kadtong nagapatutoy iyang pagaampingan.”​—Isaias 40:11.

 9, 10. Sa unsang paagi makabenepisyo kita sa labing maayo sa mga tigom?

⁹ Kadtong kinahanglang mohimog dagkong mga pagsakripisyo aron maregular sa mga tigom tingali makagugol ug gamayng panahon sa pagpangandam sa tun-anan. Ang pagsunod sa senemanang eskedyul sa pagbasa sa Bibliya maghimo sa pagtambong sa Tunghaan sa Teokratikanhong Ministeryo nga mas magantihon. Sa susama, ang abanteng pagpangandam alang sa ubang mga tigom, sama sa Pagtuon sa Bantayanang Torre ug Pagtuon sa Basahon sa Kongregasyon, maghimo niini nga mas mapuslanon. Pinaagi sa abanteng pagbasa sa tun-anan ug pagbasa sa labing menos sa pipila ka gisitar nga mga teksto sa Bibliya, kadtong adunay puliking mga kahimtang sa pamilya mahimong mas andam nga makabaton ug dakong bahin niining hinungdanong mga panaghisgot sa Bibliya.

¹⁰ Ang uban, si kinsa mas haruhay ug kahimtang, makagugol ug mas dakong panahon aron mangandam alang sa tigom. Pananglitan, sila makahimog panukiduki bahin sa mga kasulatang gisitar apan wala makutlo. Niana ang tanan maandam sa pagpahimulos sa labing maayo sa mga tigom ug makaambit pag-ayo aron palig-onon ang kongregasyon pinaagi sa ilang mga pakigpulong ug mga komento. Pinaagi sa maayong pagpangandam, ang mga ansiyano ug mga ministeryal nga alagad maghatag ug maayong panig-ingnan nga ihatag ang mubo, laktod nga mga tubag. Tungod sa pagtahod sa mga tagana ni Jehova, kadtong nagatambong molikay sa bisan unsang makatugawng mga lihok samtang ang mga tigom nagpadayon.​—1 Pedro 5:3.

11. Nganong ang pagdisiplina-sa-kaugalingon gikinahanglan aron maandam alang sa mga tigom?

¹¹ Ang mga kalihokan ug mga lulinghayaw nga dili hinungdanon sa atong espirituwal nga kahimsog mahimong makahurot sa atong dakong panahon. Kon mao, kinahanglang magsusi kita sa atong kaugalingon ug “mohunong sa pagkahimong dili-makataronganon” kon bahin sa paggamit sa atong panahon. (Efeso 5:17) Ang atong tumong mao nga ‘mopalit ug panahon’ gikan sa dili kaayo hinungdanong mga butang aron makagugol ug mas dakong panahon diha sa personal nga pagtuon sa Bibliya ug pagpangandam alang sa tigom, ingon man sa pagsangyaw sa Gingharian. (Efeso 5:16) Tinuod, kini dili kanunayng sayon ug nanginahanglan sa pagdisiplina-sa-kaugalingon. Ang mga batan-on nga nagahatag ug pagtagad niini nagapahilunag maayong patukoranan alang sa umaabot nga pag-uswag. Si Pablo misulat ngadto sa iyang mas batan-ong kauban nga si Timoteo: “Hinuktoki kining mga butanga [tambag ni Pablo kang Timoteo]; magpatuhop diha niini, aron ang imong pag-uswag madayag sa tanan nga mga tawo.”​—1 Timoteo 4:15.

Mga Panig-ingnan Gikan sa Pulong sa Diyos

12. Unsang talagsaong panig-ingnan ang gihatag sa pamilya ni Samuel?

¹² Palandonga ang maayong panig-ingnan nga gihatag sa pamilya ni Samuel, kinsa regular nga misalmot sa mga kahikayan nga magkatigom ang isigkamagsisimba sa dihang ang tabernakulo sa Diyos nahimutang sa Shilo. Mga lalaki lamang ang gibaoran nga mohimog tinuig nga mga pagduaw alang sa mga pagsaulog sa pangilin. Apan ang amahan ni Samuel, si Elkana, nagdala sa tibuok niyang pamilya samtang siya “mitungas gikan sa iyang siyudad sa tuigtuig aron moyukbo ug maghalad kang Jehova sa mga panon sa Shilo.” (1 Samuel 1:3-5) Ang lungsod ni Samuel, ang Ramataim-zopim, lagmit nahimutang duol sa baybayon sa modernong-adlawng Rentis sa tiilan sa “bukirong rehiyon sa Epraim.” (1 Samuel 1:1) Sa ingon ang biyahe paingon sa Shilo maglangkit sa usa ka biyahe nga mga 30 kilometros, usa ka hago nga pagpanaw niadtong mga adlawa. Kini ang gibuhat nga maunongon sa pamilya ni Elkana “sa tuigtuig, ingon ka subsob sa [ilang] pagtungas ngadto sa balay ni Jehova.”​—1 Samuel 1:7.

13. Unsang panig-ingnan ang gihatag sa matinumanong mga Hudiyo sa panahong dinhi si Jesus sa yuta?

¹³ Si Jesus usab nagdako isip bahin sa usa ka dakong pamilya. Kada tuig ang pamilya mobiyahe gikan sa Nasaret ug mga 100 kilometros pahabagatan aron motambong sa pangilin sa Paskuwa sa Jerusalem. Adunay lagmit duha ka ruta nga mahimong ilang giagian. Ang mas direktang ruta naglangkit sa pagtugbong ngadto sa Walog sa Megido ug dayon pagtungas sa mga 600 metros agi sa Samarianhong teritoryo ug paingon sa Jerusalem. Ang laing popular nga ruta mao ang giagian ni Jesus sa iyang kataposang pagpanaw ngadto sa Jerusalem sa 33 K.P. Kadto naglangkit sa pagbaktas paubos sa Walog sa Jordan paingon sa ubos sa lebel sa dagat hangtod nga siya nakaabot sa “mga utlanan sa Judea . . . tabok sa Jordan.” (Marcos 10:1) Gikan sa maong dapit, “ang dalan patungas sa Jerusalem” maoy usa ka distansiyang mga 30 kilometros, nga naglangkit sa usa ka pagtungas sa kapig 1,100 metros. (Marcos 10:32) Sa regular, ang mga panon sa matinumanong mga tigsaulog sa pangilin naghimo sa hagong panaw gikan sa Galilea paingon sa Jerusalem. (Lucas 2:44) Pagkamaayong panig-ingnan alang sa mga alagad ni Jehova sa datong kanasoran karong adlawa, nga daghan kanila sayon nga makatambong sa Kristohanong mga panagkatigom, tungod sa modernong mga sakyanan!

14, 15. (a) Unsang panig-ingnan ang gihatag ni Ana? (b) Unsay atong makat-onan gikan sa maayong tinamdan nga gipasundayag sa pipila ka bag-ong mga tumatambong sa tigom?

¹⁴ Ang laing panig-ingnan mao ang iya sa 84-anyos nga babayeng balong si Ana. Ang Bibliya nag-ingong siya “wala gayod mawala diha sa templo.” (Lucas 2:37) Dugang pa, si Ana nagpakitag mahigugmaong kaikag sa uban. Sa pagkakita sa masusong si Jesus ug pagkahibalong siya ang sinaad nga Mesiyas, unsay iyang gibuhat? Siya nagpasalamat sa Diyos ug misugod sa ‘pagsulti bahin sa bata ngadto kanilang tanan nga nagahulat sa kagawasan sa Jerusalem.’ (Lucas 2:38) Pagkamaayong tinamdan, usa ka sulondan alang sa mga Kristohanon karong adlawa!

¹⁵ Oo, ang pagtambong ug pagpakigbahin sa atong mga tigom angayng makapahimuot pag-ayo nga, sama kang Ana, dili gayod buot natong mawala diha. Kini gayod ang pagbati sa daghang bag-ohan. Kay nakagawas gikan sa kangitngitan ngadto sa kahibulongang kahayag sa Diyos, buot nilang makakat-on sa tanan nga ilang maarangan, ug daghan ang nagpahayag sa dakong kasibot alang sa Kristohanong mga tigom. Sa laing bahin, kadtong dugay na sa kamatuoran kinahanglang magbantay batok sa ‘pagbiya sa gugma nga ilang nabatonan sa sinugdan.’ (Pinadayag 2:4) Ang grabeng mga sakit o ubang hinungdan nga dili magamhan sa usa ka tawo usahay mahimong maglimite sa pagtambong sa tigom. Apan dili gayod angayng atong tugotang ang materyalismo, lulinghayaw, o kakulang sa interes magpahinabo nga kita mahimong di-andam, di-makig-ambit, o di-regular nga mga tumatambong sa tigom.​—Lucas 8:14.

Ang Labing Maayong Panig-ingnan

16, 17. (a) Unsa ang tinamdan ni Jesus bahin sa espirituwal nga mga panagkatigom? (b) Unsang maayong batasan ang angayng paningkamotan pagsunod sa tanang Kristohanon?

¹⁶ Si Jesus mihatag ug talagsaong panig-ingnan sa pagpakitag pagpabili sa espirituwal nga mga panagkatigom. Sa linghod nga panuigong 12, iyang gipasundayag ang iyang gugma alang sa balay sa Diyos sa Jerusalem. Wala hisayri sa iyang mga ginikanan kon diin na siya apan sa kadugayan nakaplagan siyang naghisgot sa Pulong sa Diyos uban sa mga magtutudlo sa templo. Agig tubag sa kabalaka sa iyang mga ginikanan, si Jesus matinahurong nangutana: “Wala ba kamo mahibalo nga ako kinahanglang maania sa balay sa akong Amahan?” (Lucas 2:49) Sa kamapasakopon, ang binatilyong Jesus mibalik uban sa iyang mga ginikanan ngadto sa Nasaret. Didto iyang gipadayon ang pagpakitag gugma alang sa mga tigom sa pagsimba pinaagi sa regular nga pagtambong sa sinagoga. Sa ingon, sa iyang gisugdan ang iyang ministeryo, ang Bibliya nagtaho: “Siya miabot sa Nasaret, diin siya namatuto; ug, sumala sa iyang nabatasan sa adlawng igpapahulay, siya misulod ngadto sa sinagoga, ug siya mibarog aron mobasa.” Human sa pagbasa ug pagpatin-aw ni Jesus sa Isaias 61:1, 2, ang mamiminaw misugod “pagkahibulong sa madanihong mga pulong nga nanggula gikan sa iyang baba.”​—Lucas 4:16, 22.

¹⁷ Ang Kristohanong mga tigom karong adlawa nagsunod niining samang pangunang sumbanan. Human sa pagbukas sa tigom pinaagi sa usa ka awit sa pagdayeg ug usa ka pag-ampo, ang mga bersikulo gikan sa Bibliya (o mga bersikulong gikutlo diha sa tun-anang artikulo bahin sa Bibliya) ginabasa ug ginapatin-aw. Ang matuod nga mga Kristohanon obligado sa pagsunod sa maayong batasan ni Jesu-Kristo. Sumala sa itugot sa ilang mga kahimtang, sila magakalipay sa regular nga pagtambong sa Kristohanong mga panagkatigom.

Modernong-Adlawng mga Panig-ingnan

18, 19. Unsang talagsaong mga panig-ingnan ang gihatag sa mga igsoon sa dili kaayo datong kanasoran kon bahin sa mga tigom, mga asembliya, ug mga kombensiyon?

¹⁸ Sa dili kaayo datong mga bahin sa yuta, daghan sa atong mga igsoong lalaki ug mga babaye naghatag ug maayong panig-ingnan sa pagpabili sa Kristohanong mga panagkatigom. Sa Mozambique gigugol sa usa ka magtatan-aw sa distrito nga si Orlando, ug iyang asawa, si Amélia, ang 45 oras sa pagbaktas sa mga 90 kilometros agi sa usa ka habog nga bukid aron moalagad sa usa ka asembliya. Unya kinahanglang sila mohimo sa samang panaw sa pagbalik aron moalagad sa sunod nga asembliya. Si Orlando mapaubsanong mitaho: “Among gibati nga wala kamiy gihimo sa dihang among nahimamat ang mga igsoon gikan sa Bawa nga Kongregasyon. Ang pagtambong sa asembliya ug pagpauli ngadto sa ilang mga pinuy-anan naglangkit sa unom-ka-adlaw nga pagbaktas sa mga 400 kilometros, ug apil kanila ang usa ka 60-anyos nga igsoong lalaki!”

¹⁹ Komosta man ang pagpabili sa senemanang mga tigom sa kongregasyon? Si Kashwashwa Njamba maoy luyahong igsoong babaye nga kapin nag 70 anyos. Nagpuyo siya sa Kaisososi, usa ka gamayng balangay nga mga lima kilometros gikan sa Kingdom Hall sa Rundu, Namibia. Aron motambong sa mga tigom, siya mobaktas idabuwelta sa napulo kilometros nga panaw agi sa kamingawan. Ang uban giatake na sa pagsubay niining dalana, apan si Kashwashwa nagpadayon sa pagtambong. Kadaghanan sa mga tigom gidumala diha sa mga pinulongan nga dili niya hisabtan. Busa sa unsang paagi makabenepisyo siya sa pagtambong? “Pinaagi sa pagsunod sa mga kasulatan,” matod ni Kashwashwa, “akong mabanabana kon unsay gihisgotan sa pakigpulong.” Apan dili siya makamaong mobasa, busa unsaon niya pagsunod ang kasulatan? “Ako mamati alang sa mga kasulatang ako nang nasag-ulo,” siya mitubag. Ug latas sa katuigan, nakapondo na siyag ubay-ubayng kasulatan sa iyang panumdoman. Aron mapauswag ang iyang katakos sa paggamit sa Bibliya, siya nag-atender sa usa ka klase sa pagbasa ug pagsulat nga gihikay sa kongregasyon. “Gusto ko kaayo nga motambong sa mga tigom,” matod niya. “Sa kanunay adunay bag-ong mga butang nga makat-onan. Gusto ko kaayong makig-uban sa mga igsoong lalaki ug mga babaye. Bisan pag dili ako makaestorya kanilang tanan, sila kanunayng moduol ug motimbaya kanako. Ug labing hinungdanon, ako nahibalo nga pinaagi sa pagtambong sa mga tigom, ginalipay ko ang kasingkasing ni Jehova.”

20. Nganong kinahanglang dili nato talikdan ang atong Kristohanong mga panagkatigom?

²⁰ Sama kang Kashwashwa, minilyong magsisimba ni Jehova sa tibuok yuta nagpakitag dalayegong pagpabili sa Kristohanong mga panagkatigom. Samtang ang kalibotan ni Satanas nagpadulong sa kalaglagan niini, dili kita makaako sa pagtalikod sa atong panagkatigom. Hinunoa, magpabilin unta kitang nagmata sa espirituwal ug magpakitag lalom nga pagpabili alang sa mga tigom, mga asembliya, ug mga kombensiyon. Kana dili lamang maglipay sa kasingkasing ni Jehova kondili tugob nga magbenepisyo kanato samtang makig-ambit kita sa balaang pagtulon-an nga motultol sa kinabuhing dayon.​—Proverbio 27:11; Isaias 48:17, 18; Marcos 13:35-37.

Mga Pangutana Agig Pagsubli

◻ Nganong usa ka pribilehiyo ang pagtambong sa Kristohanong mga panagkatigom?

◻ Sa unsang paagi ang tanang tumatambong makaamot ngadto sa makapalig-ong tigom?

◻ Unsang talagsaong panig-ingnan ang gihatag ni Jesu-Kristo?

◻ Unsang pagtulon-an ang atong makat-onan gikan sa mga igsoon sa dili kaayo datong kanasoran?

[Hulagway sa panid 18]

Kining mga Saksi sa Romania naghatag ug maayong panig-ingnan sa pagpabili sa Kristohanong mga panagkatigom