Pagpahinungod ug Kagawasan sa Pagpili

“Alang sa maong kagawasan si Kristo nagapagawas kanato.”​—GALACIA 5:1.

 1. Ang Hebreohanon ug Gregong mga pulong nga gihubad nga “pagpahinungod,” inagurasyon,” o “konsagrasyon” pangunang mapadapat sa unsa?

ANG mga magsusulat sa Bibliya migamit ug ubay-ubayng Hebreohanon ug Gregong mga pulong aron ipasabot ang ideya sa pagkagibulag, o gilain, sa pag-alagad sa usa ka sagradong katuyoan. Sa Ingles nga mga Bibliya kining mga pulonga gihubad sa mga pulong nga sama sa “pagpahinungod,” “inagurasyon,” o “konsagrasyon.” Usahay kining mga terminoha gamiton may kalabotan sa mga estruktura​—kasagaran sa templo sa Diyos sa karaang Jerusalem ug sa pagsimba nga ginahimo didto. Kining mga pulonga talagsa rang gamiton sa paghisgot ug sekular nga mga butang.

Pagpahinungod Ngadto sa “Diyos sa Israel”

 2. Nganong si Jehova tukmang matawag nga “ang Diyos sa Israel”?

² Sa 1513 W.K.P., ang Diyos nagluwas sa mga Israelinhon gikan sa kaulipnan sa Ehipto. Wala madugay human niadto, siya naglain kanila isip iyang linain nga katawhan, nga nagpasulod kanila sa usa ka relasyong may pakigsaad uban niya. Sila gisultihan: “Karon kon kamo sa estrikto magsunod sa akong tingog ug magbantay gayod sa akong pakigsaad, nan kamo mahimong akong linain nga kabtangan gikan sa tanan nga ubang mga katawhan, tungod kay ang tibuok yuta ako man.” (Exodo 19:​5; Salmo 135:4) Kay ang mga Israelinhon gihimo man nga iyang linain nga kabtangan, si Jehova tukmang matawag nga “ang Diyos sa Israel.”​—Josue 24:23.

 3. Nganong si Jehova wala magpakitag pagkamapihigon pinaagi sa pagpili sa Israel isip iyang katawhan?

³ Sa paghimo sa mga Israelinhon nga iyang napahinungod nga katawhan, si Jehova dili kay mapihigon, kay siya mahigugmaong naghunahuna usab sa mga dili-Israelinhon. Gipahimangnoan niya ang iyang katawhan: “Kon ugaling ang usa ka langyaw nga lumolupyo magpuyo ipon kanimo isip usa ka langyaw diha sa inyong yuta, dili ninyo siya maltratahon. Ang langyaw nga lumolupyo nga magpuyo isip usa ka langyaw ipon kaninyo angay nga mahimong sama sa inyong lumad; ug pagahigugmaon mo siya sama sa imong kaugalingon, kay kamo nahimong mga langyaw nga lumolupyo sa yuta sa Ehipto. Ako mao si Jehova nga inyong Diyos.” (Levitico 19:​33, 34) Kasiglohan sa ulahi, ang panghunahuna sa Diyos dulot nga nasilsil kang apostol Pedro, kinsa miila: “Sa tino naila ko nga ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.”​—Buhat 10:​34, 35.

 4. Unsa ang mga kondisyon sa relasyon tali sa Diyos ug sa Israel, ug ang mga Israelinhon nagtuman ba niana?

⁴ Matikdi, usab, nga ang pagkahimong napahinungod nga katawhan sa Diyos maoy kondisyonal. Diha lamang nga sila estriktong magmasinundanon sa tingog sa Diyos ug magbantay sa iyang pakigsaad nga sila mahimong iyang “linain nga kabtangan.” Ikasubo, wala makab-ot sa mga Israelinhon kining mga kinahanglanona. Human isalikway ang Mesiyas nga pinadala sa Diyos sa unang siglo K.P., sila nawad-an sa ilang pribilehiyadong kahimtang. Si Jehova dili na mao “ang Diyos sa Israel.” Ug ang kinaiyanhong mga Israelinhon dili na napahinungod nga katawhan sa Diyos.​—Itandi ang Mateo 23:23.

Pagpahinungod sa “Israel sa Diyos”

5, 6. (a) Unsay gipasabot ni Jesus sa iyang matagnaong mga pulong nga nahitala sa Mateo 21:​42, 43? (b) Kanus-a ug sa unsang paagi mitungha “ang Israel sa Diyos”?

⁵ Nagpasabot ba kini nga si Jehova niadtong tungora mahimong wala nay napahinungod nga katawhan? Wala. Nga nagkutlo sa salmista, si Jesu-Kristo mitagna: “Wala ba gayod ninyo mabasahi sa mga Kasulatan, ‘Ang bato nga gisalikway sa mga magtutukod mao ang nahimong pangulong bato nga pamag-ang. Gikan kang Jehova kini nahimo nga ingon, ug makapahibulong kini sa atong mga mata’? Mao kini nganong ako magaingon kaninyo, Ang gingharian sa Diyos kuhaon gikan kaninyo ug ihatag sa nasod nga magpatunghag mga bunga niini.”​—Mateo 21:​42, 43.

⁶ Ang “nasod nga magpatunghag mga bunga niini” mao ang Kristohanong kongregasyon. Panahon sa iyang pagkinabuhi sa yuta, si Jesus mipili sa unang umaabot nga mga membro niini. Apan sa adlaw sa Pentekostes 33 K.P., si Jehova nga Diyos mismo ang nagtukod sa Kristohanong kongregasyon pinaagi sa pagbubo sa iyang balaang espiritu ibabaw sa unang mga membro niini, nga mikabat ug mga 120. (Buhat 1:​15; 2:​1-4) Sumala sa gisulat sa ulahi ni apostol Pedro, kining bag-ong napormang kongregasyon niadto nahimong “usa ka piniling rasa, usa ka harianong pagkasaserdote, usa ka balaan nga nasod, usa ka katawhan alang sa linaing pagpanag-iya.” Gipili alang sa unsang katarongan? Aron ilang “kaylap ipahayag ang mga kahamili sa usa nga nagtawag [kanila] gikan sa kangitngit ngadto sa iyang katingalahang kahayag.” (1 Pedro 2:9) Ang mga sumusunod ni Kristo, nga dinihogan sa espiritu sa Diyos, niadtong tungora maoy usa ka napahinungod nga nasod, “ang Israel sa Diyos.”​—Galacia 6:16.

 7. Unsay mapahimuslan sa mga membro sa Israel sa Diyos, ug busa unsay gipalikayan nila?

⁷ Bisan pag ang mga membro sa balaang nasod maoy “usa ka katawhan alang sa linaing kabtangan,” sila dili kay aron uliponon. Sa kasukwahi, mapahimuslan nila ang dako pang kagawasan kay sa nabatonan sa napahinungod nga nasod sa kinaiyanhong Israel. Gisaaran ni Jesus ang umaabot nga mga membro niining bag-ong nasod: “Inyong mahibaloan ang kamatuoran, ug ang kamatuoran magpagawas kaninyo.” (Juan 8:32) Gipunting ni apostol Pablo nga ang mga Kristohanon gipagawas gikan sa mga kinahanglanon sa Balaodnong pakigsaad. Niining bahina iyang gitambagan ang isigkamagtutuo sa Galacia: “Alang sa maong kagawasan si Kristo nagapagawas kanato. Busa barog nga malig-on, ug ayaw tugoting mabilanggo ang inyong kaugalingon pag-usab diha sa yugo sa pagkaulipon.”​—Galacia 5:1.

 8. Sa unsang bahin ang Kristohanong kahikayan nagatanyag sa mga indibiduwal sa mas dakong kagawasan kay sa nasinati ubos sa Balaodnong pakigsaad?

⁸ Lahi sa kinaiyanhong Israel sa kakaraanan, hangtod niining adlawa ang Israel sa Diyos estriktong nagsunod sa mga kinahanglanon sa pagpahinungod niini. Dili kini katingad-an tungod kay ang mga membro niini walay pagpanukong mipili sa pagsugot. Samtang ang mga membro sa kinaiyanhong Israel nahimong napahinungod tungod sa pagkatawo, ang mga membro sa Israel sa Diyos nahimong ingon tungod sa pagpili. Sa ingon ang Kristohanong kahikayan iladong sukwahi sa Hudiyonhong Balaodnong pakigsaad, nga nagpahamtang sa pagpahinungod diha sa mga indibiduwal nga wala silay kagawasan sa pagpili.

9, 10. (a) Giunsa pagpaila ni Jeremias nga adunay kausaban kon mahitungod sa pagpahinungod? (b) Nganong ikaw makaingon nga dili ang tanang napahinungod nga mga Kristohanon karong adlawa maoy mga membro sa Israel sa Diyos?

⁹ Si propetang Jeremias mitagna sa usa ka kausaban kon bahin sa pagpahinungod sa misulat siya: “‘Tan-awa! Umaabot ang mga adlaw,’ nagaingon si Jehova, ‘ug himoon ko uban sa balay sa Israel ug uban sa balay sa Juda ang usa ka bag-ong pakigsaad; dili usa nga sama sa pakigsaad nga akong gihimo uban sa ilang mga katigulangan sa adlaw sa akong pagkupot sa ilang kamot aron ipagawas sila gikan sa yuta sa Ehipto, “diin ang akong pakigsaad ila mismong gilapas, bisan pag ako mismo nanag-iya kanila sama sa usa ka bana,” nagaingon si Jehova.’ ‘Kay kini mao ang pakigsaad nga akong himoon uban sa balay sa Israel human niadtong mga adlawa,’ nagaingon si Jehova. ‘Ibutang ko ang akong balaod sa sulod nila, ug sa ilang kasingkasing ako kining isulat. Ug ako mahimong ilang Diyos, ug sila mismo mahimong akong katawhan.’”​—Jeremias 31:​31-33.

¹⁰ Kay ang balaod sa Diyos nasulat man “sa sulod nila,” ingnon ta, “sa ilang kasingkasing,” ang mga membro sa Israel sa Diyos mapalihok aron tumanon ang ilang pagpahinungod. Ang ilang panukmod kusganon pa kay sa iya sa kinaiyanhong mga Israelinhon, kinsa napahinungod pinaagi sa pagkatawo, dili pinaagi sa pagpili. Karong adlawa, ang kusganong panukmod sa pagbuhat sa kabubut-on sa Diyos, ingong gipasundayag sa Israel sa Diyos, nabatonan sa kapig lima ka milyong kaubang mga magsisimba sa tibuok kalibotan. Sila nagpahinungod usab sa ilang mga kinabuhi kang Jehova nga Diyos aron buhaton ang iyang kabubut-on. Bisan pag kining mga tawhana wala makabaton sa paglaom sa langitnong kinabuhi sama niadtong naglangkob sa Israel sa Diyos, sila nagkalipay sa palaaboton nga mabuhing walay kataposan sa yuta ubos sa pagmando sa langitnong Gingharian sa Diyos. Gipakita nila ang apresasyon alang sa espirituwal nga Israel pinaagi sa aktibong pagsuportar sa pila na lang ka nahibiling mga membro sa pagtuman sa ilang tinudlong-buluhaton nga “kaylap ipahayag ang mga kahamili sa usa nga nagtawag [kanila] gikan sa kangitngit ngadto sa iyang katingalahang kahayag.”

Maalamong Paggamit sa Hinatag-sa-Diyos nga Kagawasan

11. Uban sa unsang katakos nga ang tawo gilalang, ug sa unsang paagi angay gamiton kini?

¹¹ Ang Diyos naglalang sa mga tawo aron mahalon ang kagawasan. Iyang gihatagan silag katakos sa libreng pagbuot. Gigamit sa unang tawhanong magtiayon ang ilang kagawasan sa pagpili. Ugaling lang, sa kadili-maalamon ug kadili-mahigugmaon sila mipili nga misangpot sa katalagman alang kanila ug sa ilang mga kaliwat. Bisan pa, kini tin-awng nagpasundayag nga si Jehova dili gayod mopugos sa intelihenteng mga linalang nga mosubay sa usa ka dalang sukwahi sa ilang mga motibo o mga tinguha sa kahiladman. Ug sanglit “ang Diyos nahigugma sa mangayaong tighatag,” ang bugtong pagpahinungod nga dalawaton kaniya mao ang usang gipasukad sa gugma, usang gihimo nga kinabubut-on uban ang kamangayaon, usang gipasukad sa kagawasan sa pagpili. (2 Corinto 9:7) Ang bisan unsang laing matang maoy dili dalawaton.

12, 13. Sa unsang paagi si Timoteo nagsilbing usa ka sumbanan alang sa tukmang pagbansay sa bata, ug tungod sa iyang panig-ingnan ang daghang batan-on giagak ngadto sa unsa?

¹² Nga bug-os nag-ila niining kinahanglanona, ang mga Saksi ni Jehova nagpasiugda sa pagpahinungod sa kaugalingon ngadto sa Diyos, apan dili gayod sila mopugos kang bisan kinsa sa paghimo sa maong pahinungod, dili bisan sa ilang mga anak mismo. Kasukwahi sa daghang simbahan, ang mga Saksi dili magbawtismo sa ilang anak samtang mga masuso pa, nga samag posible ang pagpugos kanila nga magpahinungod nga wala ang benepisyo sa personal nga pagpili. Ang Kasulatanhong sumbanan nga sundon mao ang gisunod sa batan-ong si Timoteo. Ingong edaran na, siya gisultihan ni apostol Pablo: “Padayon sa mga butang nga imong nakat-onan ug nakakombinser kanimo sa pagtuo, nga nahibalo kon gikan sa unsa nga mga tawo ikaw nakakat-on niini nila ug nga sukad pa sa pagkamasuso ikaw nahibalo na sa balaang mga sinulat, nga makapahimo kanimong maalamon alang sa kaluwasan pinaagi sa pagtuo nga may kalabotan kang Kristo Jesus.”​—2 Timoteo 3:​14, 15.

¹³ Pagamatikdan nga si Timoteo nahibalo sa balaang mga sinulat tungod kay siya gitudloan niana sukad sa pagkamasuso. Siya nadani​—dili kay napugos​—sa pagtuo sa Kristohanong mga pagtulon-an pinaagi sa iyang inahan ug apohang babaye. (2 Timoteo 1:5) Ingong sangpotanan, nasabtan ni Timoteo ang pagkamaalamon nga mahimong sumusunod ni Kristo ug sa ingon personal nga mipili sa Kristohanong pagpahinungod. Sa modernong kapanahonan, tinagpulo ka libong batan-ong mga lalaki ug babaye kansang mga ginikanan maoy mga Saksi ni Jehova nagsunod niining panig-ingnana. (Salmo 110:3) Ang uban wala. Kini maoy butang sa personal nga pagpili.

Pagpili nga Mahimong Ulipon ni Kinsa?

14. Unsay gisulti kanato sa Roma 6:​16 mahitungod sa bug-os nga kagawasan?

¹⁴ Walay tawo nga bug-os gawasnon. Matag usa gilimitehan sa iyang kagawasan pinaagi sa pisikal nga mga balaod, sama sa balaod sa grabidad, nga dili mahimong dili tagdon nga dili makaagom ug kadaotan. Sa espirituwal usab nga diwa, walay usa nga bug-os gawasnon. Si Pablo nangatarongan: “Wala ba kamo mahibalo nga kon kamo padayong nagapresentar sa inyong kaugalingon kang bisan kinsa ingong mga ulipon sa pagsugot kaniya, kamo mga ulipon niya tungod kay kamo nagasugot kaniya, sa sala man nga mosangpot sa kamatayon o sa pagkamasinugtanon nga mosangpot sa pagkamatarong?”​—Roma 6:16.

15. (a) Unsay pagbati sa mga tawo mahitungod sa pagpaulipon, apan ang kadaghanan mosangpot nga nagabuhat sa unsa? (b) Unsang nahiangayng mga pangutana ang ikasukna nato sa atong kaugalingon?

¹⁵ Ngil-aran ang kadaghanang tawo sa ideya nga maulipon sa lain. Bisan pa niana, sa kalibotan karong adlawa ang kamatuoran mao nga subsob gitugotan sa mga tawo nga mamaniobra ug maimpluwensiyahan sila sa labihan ka daghang panglansis nga mosangpot nga nagabuhat silang dili-kinabubut-on sa ipabuhat kanila sa uban. Pananglitan, ang industriya sa panganunsiyo ug ang kalibotan sa kalingawan naningkamot nga idasok ang mga tawo sa usa ka hulmahan, pinaagi sa pagtukod ug mga sukdanan nga sundon nila. Gipasuportahan sa politikanhon ug relihiyosong mga organisasyon sa mga tawo ang ilang mga ideya ug mga katuyoan, dili kanunayng pinaagi sa makapakombinsir nga mga pangatarongan, kondili subsob pinaagi sa pagtandog sa ilang sentido sa pagkanahiusa o pagkamaunongon. Sanglit gipahayag ni Pablo nga ‘kita mga ulipon kanila nga atong ginasugot,’ ang matag usa kanato maayong mangutana sa kaugalingon, ‘Ulipon ba ako ni kinsa? Kinsay adunay labing dakong impluwensiya sa akong mga desisyon ug akong paagi sa kinabuhi? Relihiyosong mga klerigo ba, politikanhong mga lider, mga sapiang negosyante, o mga inilang maglilingaw? Kinsay akong gisunod​—Diyos o mga tawo?’

16. Sa unsang diwa ang mga Kristohanon maoy mga ulipon sa Diyos, ug unsa ang hustong hunahuna sa maong pagpaulipon?

¹⁶ Wala isipa sa mga Kristohanon ang pagsugot sa Diyos ingon nga dili-angayng pagpanghilabot sa personal nga kagawasan. Kinabubut-on silang nagagamit sa ilang kagawasan sumala sa paagi sa ilang Sulondan, si Jesu-Kristo, nga ang personal nga mga tinguha ug mga prioridad gipahiuyon sa kabubut-on sa Diyos. (Juan 5:​30; 6:38) Ilang giugmad “ang kaisipan ni Kristo,” nga nagpasakop sa ilang kaugalingon ngadto kaniya isip Ulo sa kongregasyon. (1 Corinto 2:​14-16; Colosas 1:​15-18) Kini sama kaayo sa usa ka babayeng magminyo ug kinabubut-ong mokooperar sa lalaki nga iyang gihigugma. Ngani, ang lawas sa dinihogang mga Kristohanon gihisgotan ingong usa ka putling ulay nga gikasaad kang Kristo sa kaminyoon.​—2 Corinto 11:​2; Efeso 5:23, 24; Pinadayag 19:​7, 8.

17. Ang tanang Saksi ni Jehova mipili nga mahimong unsa?

¹⁷ Matag usa sa mga Saksi ni Jehova, kon kaha siya adunay langitnon o yutan-ong paglaom, personal nga nagpahinungod sa Diyos aron buhaton ang iyang kabubut-on ug sugton siya ingong Magmamando. Alang sa matag usa ka Saksi, ang pagpahinungod maoy personal nga pagpili nga gipalabi ang pagkahimong ulipon sa Diyos inay magpabiling ulipon sa mga tawo. Nahiuyon kini sa tambag ni apostol Pablo: “Kamo gipalit sa usa ka bili; hunong na sa pagkahimong mga ulipon sa mga tawo.”​—1 Corinto 7:23.

Pagkat-on nga Mabenepisyohan Kita

18. Kanus-a ang usa ka umaabot nga Saksi mahimong kuwalipikado alang sa bawtismo?

¹⁸ Sa dili pa makuwalipikado ang usa ka tawo nga mahimong usa sa mga Saksi ni Jehova, kinahanglang makab-ot niya ang Kasulatanhong mga kuwalipikasyon. Ang mga ansiyano mag-amping sa paghukom kon ang umaabot nga Saksi tinuod nga nakasabot sa mga nalangkit sa Kristohanong pagpahinungod. Buot ba gayod niyang mahimong usa sa mga Saksi ni Jehova? Andam ba siyang motuman kon unsay nalangkit niini? Kon dili, dili siya angayan nga bawtismohan.

19. Nganong walay katarongan nga sawayon ang usa nga mohukom nga mahimong usa ka napahinungod nga alagad sa Diyos?

¹⁹ Apan, kon ang usa ka indibiduwal nakakab-ot sa tanang kinahanglanon, nganong siya sawayon man tungod sa kinabubut-ong paghimog personal nga desisyon nga magtugot kaniya nga maimpluwensiyahan sa Diyos ug sa Iyang inspiradong Pulong? Mas dili ba dalawaton nga ang usa magpaimpluwensiya sa Diyos inay sa mga tawo? O kini kaha dili kaayo makahatag ug kaayohan? Dili ingon niana ang hunahuna sa mga Saksi ni Jehova. Sa bug-os kasingkasing sila mouyon sa mga pulong sa Diyos nga gisulat ni Isaias: “Ako, si Jehova, mao ang imong Diyos, ang Usang nagatudlo kanimo sa pagpahimulos sa imong kaugalingon, ang Usang nagpahinabo nga ikaw mosubay sa dalan nga angay nimong pagalaktan.”​—Isaias 48:17.

20. Sa unsang mga bahin ang mga tawo napagawas tungod sa kamatuoran sa Bibliya?

²⁰ Ang kamatuoran sa Bibliya nagapagawas sa mga tawo gikan sa pagtuo sa bakak nga relihiyosong mga doktrina, sama sa walay-kataposang pagpaantos diha sa nagdilaab nga impiyerno. (Ecclesiastes 9:​5, 10) Inay hinuon, ang ilang mga kasingkasing nahupong sa pagkamapasalamaton tungod sa matuod nga paglaom sa mga patay​—ang pagkabanhaw nga nahimong posible pinasukad sa halad lukat ni Jesu-Kristo. (Mateo 20:​28; Buhat 24:​15; Roma 6:23) Ang kamatuoran sa Bibliya nagpagawas sa mga tawo gikan sa mga kahigawad sa pagsalig sa mga saad sa politiko nga kanunayng dili matuman. Inay hinuon, magpahinabo kini sa pagsugwak sa kalipay sa ilang mga kasingkasing tungod kay nahibalo nga ang Gingharian ni Jehova nagamando na sa mga langit ug sa dili madugay magamando ibabaw sa tibuok yuta. Ang kamatuoran sa Bibliya magpagawas sa mga tawo gikan sa mga buhat nga, bisag madanihon sa makasasalang unod, magahatag ug pakaulaw sa Diyos ug maningil ug dakong panimayad nga mao ang mga pakyas nga relasyon, balatian, ug ahat nga pagkamatay. Sa mubo, ang pagpaulipon sa Diyos mas makaayo kay sa pagpaulipon sa mga tawo. Sa pagkamatuod, ang pagpahinungod ngadto sa Diyos may saad nga mga kaayohan “niining yugtoa sa panahon . . . ug sa umaabot nga sistema sa mga butang kinabuhing walay kataposan.”​—Marcos 10:​29, 30.

21. Unsay pag-isip sa mga Saksi ni Jehova sa pagpahinungod ngadto sa Diyos, ug unsay ilang tinguha?

²¹ Ang mga Saksi ni Jehova karong adlawa wala mahimong bahin sa napahinungod nga nasod pinaagi sa pagkatawo sama sa mga Israelinhon sa kakaraanan. Ang mga Saksi maoy bahin sa usa ka kongregasyon sa napahinungod nga mga Kristohanon. Matag bawtismadong Saksi nahimong ingon pinaagi sa paggamit sa tagsatagsa sa kagawasan sa pagpili nga himoon ang pagpahinungod. Tinuoray, alang sa mga Saksi ni Jehova, ang pagpahinungod moresulta sa mainitong personal nga relasyon uban sa Diyos nga tiniman-an sa kinabubut-ong pag-alagad kaniya. Kining makapalipay nga relasyon buot nilang mamentinar nga bug-os kasingkasing, pinaagi sa hugot nga pagpangupot sa walay kataposan sa kagawasan nga alang niana gipagawas sila ni Jesu-Kristo.

Unsaon Nimo Pagtubag?

◻ Nganong ang Diyos dili mapihigon sa pagpili sa Israel nga mahimong iyang “linain nga kabtangan”?

◻ Nganong moingon ka nga ang Kristohanong pagpahinungod wala maglangkit ug kapildihan sa kagawasan?

◻ Unsa ang mga kaayohan sa pagpahinungod kang Jehova nga Diyos?

◻ Nganong mas maayo nga mahimong usa ka alagad ni Jehova inay kay ulipon sa mga tawo?

[Hulagway sa panid 15]

Sa karaang Israel, ang pagpahinungod ngadto sa Diyos maoy tungod kay natawo kang ingon

[Hulagway sa panid 16]

Ang Kristohanong pagpahinungod maoy tungod sa pagpili