“Kusganong Makigbugno Alang sa Pagtuo”!

“Kusganong makigbugno alang sa pagtuo nga sa makausa alang sa tanang panahon gikatugyan ngadto sa mga balaan.”​—JUDAS 3.

 1. Sa unsang diwa nga ang matuod nga mga Kristohanon karong adlawa miapil sa pagpakiggubat?

ANG mga sundalo nga nakiggubat kanunayng hago ug paagi sa kinabuhi. Hunahunaa ra nga magsul-ob ug bug-os nga kagamitan sa gubat ug magbaktas ug daghang kilometros sa tanang matang sa klima, nga makaagom sa budlay nga pagbansay sa paggamit ug hinagiban, o pagpanalipod sa imong kaugalingon batok sa tanang matang sa pintas nga mga kapeligrohan nga mahimong magpahinabog kamatayon o pagkaangol. Apan, ang matuod nga mga Kristohanon dili moapil sa mga gubat sa mga nasod. (Isaias 2:​2-4; Juan 17:14) Sa gihapon, dili gayod nato kalimtan nga kitang tanan nakiggubat sa usa ka diwa. Si Satanas nagdumot pag-ayo kang Jesu-Kristo ug sa iyang mga sumusunod dinhi sa yuta. (Pinadayag 12:17) Ang tanang modesisyon sa pag-alagad kang Jehova nga Diyos, sa pagkatinuod, nagpalista ingong mga sundalo aron moapil sa espirituwal nga pakiggubat.​—2 Corinto 10:4.

 2. Giunsa paghubit ni Judas ang Kristohanong pakiggubat, ug sa unsang paagi ang iyang sulat motabang kanato nga makalahutay niana?

² Sa katukma, ang igsoon ni Jesus sa inahan nga si Judas misulat: “Mga hinigugma, bisag gihimo ko ang tanang paningkamot nga sulatan kamo bahin sa kaluwasan nga gihuptan natong tanan, nakaplagan ko nga kinahanglan kamong sulatan aron sa pag-awhag kaninyo nga kusganong makigbugno alang sa pagtuo nga sa makausa alang sa tanang panahon gikatugyan ngadto sa mga balaan.” (Judas 3) Sa dihang si Judas nag-awhag sa mga Kristohanon nga “kusganong makigbugno,” gigamit niya ang termino nga nalangkit sa pulong nga “kasakit.” Oo, kining maong pakigbugno mahimong lisod, masakit pa gani! Ikaw ba usab usahay malisdan sa paglahutay niini nga pakiggubat? Ang mubo apan gamhanang sulat ni Judas makatabang kanato. Kini nag-awhag kanato sa pagpakigbisog sa imoralidad, sa pagtahod sa tinudlo sa Diyos nga awtoridad, ug sa pagpabilin sa atong kaugalingon diha sa gugma sa Diyos. Tan-awon nato kon sa unsang paagi ipadapat kining tambaga.

Sukli ang Imoralidad

 3. Unsang malisod nga kahimtang ang giatubang sa Kristohanong kongregasyon sa adlaw ni Judas?

³ Nakita ni Judas nga dili ang tanan niyang kaubang mga Kristohanon midaog sa gubat batok kang Satanas. Ang panon nag-atubang sa malisod nga kahimtang. Ang madinaotong mga tawo “nakayuhot,” misulat si Judas. Kining mga tawhana malalangong nagpasiugda sa imoralidad. Ug sila tusong nagpakamatarong sa ilang mga binuhatan, “nga nagahimo sa dili-takos nga kalulot sa atong Diyos nga katarongan alang sa malaw-ayng panggawi.” (Judas 4) Tingali, sama sa pipila ka karaang mga Gnostiko, sila nangatarongan nga kon sigeng makasala ang usa, labi pa siyang makadawat sa dili-takos nga kalulot sa Diyos​—busa, kon buot sabton, mas maayo pang magsigeg pagpakasala! O tingali sila mihinapos nga ang usa ka malulotong Diyos dili gayod mosilot kanila. Bisan unsa pa man, sila nasayop.​—1 Corinto 3:​19.

 4. Unsang tulo ka panig-ingnan sa Kasulatan bahin sa miaging mga paghukom ni Jehova ang gihisgotan ni Judas?

⁴ Gipanghimakak ni Judas ang ilang daotang mga pangatarongan pinaagi sa paghisgot ug tulo ka panig-ingnan sa mga paghukom ni Jehova sa miaging kapanahonan: batok sa mga Israelinhon nga “wala magpakita ug pagtuo”; batok sa “mga anghel nga . . . mitalikod sa ilang kaugalingong angay nga dapit puy-anan” aron makasala uban sa kababayen-an; ug batok sa mga molupyo sa Sodoma ug Gomora, nga “nakighilawas nga mapatuyangon ug nag-agap sa unod alang sa dili-kinaiyanhong gamit.” (Judas 5-7; Genesis 6:​2-4; 19:​4-25; Numeros 14:35) Sa matag kaso si Jehova nagpahinabog tataw nga paghukom batok sa mga makasasala.

 5. Gikan kang kinsang karaang manalagna nga mikutlo si Judas, ug sa unsang paagi ang maong tagna nagpahayag ug bug-os nga katinoan sa katumanan niini?

⁵ Sa ulahi, si Judas naghisgot bahin sa mas layog-abot nga paghukom. Mikutlo siya ug usa ka tagna ni Enoc​—usa ka teksto nga dili makaplagan sa bisan haing dapit diha sa dinasig nga Kasulatan.a (Judas 14, 15) Mitagna si Enoc ug usa ka panahon sa dihang si Jehova maghukom sa tanang dili-diyosnon ug sa ilang dili-diyosnong mga binuhatan. Makaiikag, si Enoc naghisgot sa panahon nga miagi na, sanglit ang mga paghukom sa Diyos tino kaayo nga daw kini nahitabo na. Ang mga tawo lagmit nagbugalbugal kang Enoc ug sa ulahi kang Noe, apan kanang tanang mga mabiaybiayon nangalumos sa tibuok-yutang Lunop.

 6. (a) Sa unsa nga kinahanglang pahinumdoman ang mga Kristohanon sa adlaw ni Judas? (b) Nganong atong sundon ang mga pahinumdom ni Judas?

⁶ Nganong nagsulat si Judas bahin niining balaang mga paghukom? Tungod kay siya nasayod nga ang pipila nga nakig-uban sa Kristohanong mga kongregasyon sa iyang adlaw nagpakasala nga sama ka ngil-ad ug ka salawayon sa mga tawo nga maoy nakaaghat niadtong miaging mga paghukom. Busa, si Judas misulat nga ang mga kongregasyon kinahanglang pahinumdoman sa pipila ka pasikaranang espirituwal nga mga kamatuoran. (Judas 5) Dayag nga nakalimtan nila nga nakita ni Jehova nga Diyos kon unsay ilang ginabuhat. Oo, sa dihang ang iyang mga alagad tinuyong molapas sa iyang mga balaod, nga maghugaw sa ilang kaugalingon ug sa uban, siya nakakita. (Proverbio 15:3) Masakitan siya pag-ayo sa maong mga buhat. (Genesis 6:​6; Salmo 78:40) Makalilisang hunahunaon nga kita nga mga tawo lamang makaapektar sa mga pagbati sa Soberanong Ginoo sa uniberso. Siya nagabantay kanato adlaw-adlaw, ug sa dihang buhaton nato ang atong kinamaayohan sa pagsunod sa mga lakang sa iyang Anak, si Jesu-Kristo, nan ang atong panggawi maglipay sa iyang kasingkasing. Nan, dili gayod nato kayugtan ang maong mga pahinumdom sama sa gihatag ni Judas kondili sundon kana.​—Proverbio 27:​11; 1 Pedro 2:21.

 7. (a) Nganong hinungdanon alang niadtong nalangkit sa grabeng pagpakasala nga mangayo dayon ug tabang? (b) Sa unsang paagi kitang tanan makalikay sa imoralidad?

⁷ Dili lang kay nakakita si Jehova kondili siya molihok. Sanglit usa ka Diyos sa hustisya, siya magpahamtang ug silot sa mga mamumuhat ug daotan​—sa madugay o madali. (1 Timoteo 5:24) Kadtong mangatarongan nga ang iyang mga paghukom maoy karaang kasaysayan lamang ug nga siya wala manumbaling sa pagkadaotan nga ilang gibuhat naglimbong lamang sa ilang kaugalingon. Pagkahinungdanon gayod alang ni bisan kinsa karong adlawa nga nalangkit sa imoralidad nga mangayo dayon ug tabang sa Kristohanong mga ansiyano! (Santiago 5:​14, 15) Kitang tanan tingali namalandong bahin sa kapeligrohan sa imoralidad diha sa atong espirituwal nga pakiggubat. Kada tuig adunay mga nakalas​—mga indibiduwal nga gipalagpot gikan sa atong taliwala, ang kadaghanan kanila tungod sa dili-mahinulsolong paghimo sa imoral nga mga buhat. Kinahanglang magmadeterminado kita pag-ayo sa pagsukol sa bisan unsang mga tentasyon nga basin mosugod pa lang sa pagtultol kanato sa maong direksiyon.​—Itandi ang Mateo 26:41.

Tahora ang Tinudlo sa Diyos nga Awtoridad

 8. Kinsa ang “mga mahimayaon” nga gihisgotan sa Judas 8?

⁸ Ang laing suliran nga gihisgotan ni Judas mao ang kakulang ug pagtahod alang sa tinudlo sa Diyos nga awtoridad. Pananglitan, sa bersikulo 8 iyang giakusar ang mao gihapong daotang mga tawo nga “nagapamulong nga inabusar labot sa mga mahimayaon.” Kinsa kining “mga mahimayaon”? Sila maoy dili-hingpit nga mga tawo, apan sila adunay mga kaakohan nga gihatag kanila sa balaang espiritu ni Jehova. Pananglitan, ang mga kongregasyon adunay mga ansiyano, nga gipiyalan sa pagbantay sa panon sa Diyos. (1 Pedro 5:2) Aduna usab ing nagapanawng mga magtatan-aw, sama kang apostol Pablo. Ug ang lawas sa mga ansiyano sa Jerusalem naglihok ingong nagamandong lawas, nga naghimog mga desisyon nga nag-apektar sa Kristohanong kongregasyon sa katibuk-an. (Buhat 15:6) Si Judas nabalaka pag-ayo nga ang pipila ka tawo diha sa mga kongregasyon namulong nga madinaoton, o nagpasipala, sa maong mga tawo.

 9. Unsang mga pananglitan bahin sa dili-pagtahod sa awtoridad ang gihisgotan ni Judas?

⁹ Sa pagsaway nianang dili-matinahurong sinultian, sa bersikulo 11, si Judas naghisgot ug tulo pa ka pananglitan ingong mga pahinumdom: si Cain, Balaam, ug Kore. Wala panumbalinga ni Cain ang mahigugmaong tambag ni Jehova ug kinabubut-ong nagsunod sa iyang mabunoong pagdumot. (Genesis 4:​4-8) Nadawat ni Balaam ang sublisubling mga pasidaan nga sa walay duhaduha naggikan sa labaw-tawhanong tinubdan​—bisan ang iyang kaugalingong asno nga baye misulti kaniya! Apan si Balaam mahakogong nagpadayon sa paglaraw batok sa katawhan sa Diyos. (Numeros 22:​28, 32-​34; Deuteronomio 23:5) Si Kore dunay iyang kaugalingong responsibilidad, apan dili pa kadto igo. Siya nagpasiugdag rebelyon batok sa labing maaghop nga tawo sa yuta, si Moises.​—Numeros 12:​3; 16:​1-3, 32.

10. Sa unsang paagi ang pipila karong adlawa mahulog sa bitik sa ‘pagpamulong nga inabusar labot sa mga mahimayaon,’ ug nganong angayng likayan ang maong sinultihan?

¹⁰ Pagkatin-aw nga nagtudlo kanato kining maong mga pananglitan nga mamati sa tambag ug motahod niadtong kinsa gigamit ni Jehova sa responsableng mga posisyon! (Hebreohanon 13:17) Sayon kaayo nga mangitag sayop sa tinudlong mga ansiyano, tungod kay sila dili-hingpit, maingon nga kitang tanan dili-hingpit. Apan kon kita magsigeg sulti bahin sa ilang mga sayop ug magdaot sa pagtahod alang kanila, dili ba kita “nagapamulong nga inabusar labot sa mga mahimayaon”? Sa bersikulo 10, si Judas naghisgot niadtong “nagapamulong nga inabusar bahin sa tanang butang nga sa pagkatinuod wala nila mahibaloi.” Ang uban, usahay, mosaway sa usa ka desisyon nga gihimo sa lawas sa mga ansiyano o sa hudisyal nga komite. Bisan pa niana, wala sila mahibalo sa tanang detalye nga kinahanglang konsiderahon sa mga ansiyano aron makab-ot ang usa ka desisyon. Busa nganong mosulti nga madinaoton bahin sa mga butang nga wala gayod nila mahibaloi? (Proverbio 18:13) Kadtong nagpadayon sa maong negatibong sinultihan makapahinabog pagkabahinbahin diha sa kongregasyon ug tingali ipakasama pa gani sa peligrosong “mga bato nga natago ilalom sa tubig” diha sa mga panagtipon sa kaubang mga magtutuo. (Judas 12, 16, 19) Dili gayod nato buot nga maghatag ug espirituwal nga kapeligrohan sa uban. Hinunoa, hinaot nga magmadeterminado ang matag usa kanato nga pabilhan ang responsableng mga tawo tungod sa ilang paghago ug debosyon ngadto sa panon sa Diyos.​—1 Timoteo 5:17.

11. Nganong midumili sa Miguel sa pagpahamtang ug paghukom pinaagi sa inabusar nga mga pulong batok kang Satanas?

¹¹ Si Judas naghisgot ug usa ka panig-ingnan bahin sa usa nga nagtahod sa tinudlong awtoridad. Siya misulat: “Sa dihang si Miguel nga arkanghel may panagbingkil sa Yawa ug nakiglalis bahin sa lawas ni Moises, wala siya mangahas sa pagpakanaog ug hukom batok kaniya sa inabusar nga mga pulong, kondili miingon: ‘Hinaot si Jehova magbadlong kanimo.’” (Judas 9) Kining makaiikag nga talaan, nga gisulat lamang ni Judas diha sa dinasig nga Kasulatan, nagtudlo ug duha ka lainlaing mga pagtulon-an. Sa usa ka bahin, kini nagtudlo kanato nga itugyan ang paghukom kang Jehova. Si Satanas dayag nga buot mogamit sa lawas sa matinumanong tawo nga si Moises sa sayop nga paagi aron sa pagpasiugda sa bakak nga pagsimba. Pagkadaotan gayod! Bisan pa niana, si Miguel mapaubsanong naglikay sa pagpahamtang ug paghukom, sanglit si Jehova lamang ang aduna niana nga awtoridad. Nan, labi pa kitang maglikay nga hukman ang matinumanong mga tawo nga naningkamot sa pag-alagad kang Jehova.

12. Unsay mahimong makat-onan niadtong adunay responsableng mga katungdanan diha sa Kristohanong kongregasyon gikan sa panig-ingnan ni Miguel?

¹² Sa laing bahin, kadtong adunay usa ka sukod sa awtoridad diha sa kongregasyon makakat-on usab ug leksiyon gikan kang Miguel. Kon buot hunahunaon, bisan tuod si Miguel mao ang “arkanghel,” pangulo sa tanang manulonda, wala niya abusohi ang iyang posisyon sa gahom, bisan ubos sa paghagit. Ang matinumanong mga ansiyano mosunod pag-ayo sa maong panig-ingnan, nga nag-ila nga ang pag-abusar sa ilang awtoridad maoy dili-pagtahod sa pagkasoberano ni Jehova. Ang sulat ni Judas daghag ikasulti bahin sa mga lalaki nga adunay mga posisyon nga talahoron diha sa mga kongregasyon apan nag-abusar sa ilang gahom. Pananglitan, sa mga bersikulo 12 hangtod sa 14, si Judas nagsulat ug grabeng paghukom sa “mga magbalantay nga nagpakaon sa ilang kaugalingon nga walay kahadlok.” (Itandi ang Ezequiel 34:​7-10.) Sa laing pagkasulti, ang ilang pangunang interes maoy aron makapahimulos ang ilang kaugalingon, dili ang panon ni Jehova. Ang mga ansiyano karong adlawa makakat-on ug dako gikan sa maong negatibong mga pananglitan. Sa pagkatinuod, ang mga pulong ni Judas dinhi tin-aw nga naghubit kon unsay dili nato buot nga mahimong ingon. Kon kita mapadala sa kahakog, dili kita mahimong mga sundalo ni Kristo; puliki kaayo kita sa pagpakig-away alang sa kaugalingon. Hinunoa, magkinabuhi kitang tanan sumala sa mga pulong ni Jesus: “Adunay labaw nga kalipay sa paghatag kay sa pagdawat.”​—Buhat 20:35.

“Ipabilin ang Inyong Kaugalingon Diha sa Gugma sa Diyos”

13. Nganong kitang tanan kinasingkasing nga magtinguha sa pagpabilin diha sa gugma sa Diyos?

¹³ Sa hinapos sa iyang sulat, si Judas naghatag niining makapadasig nga tambag: “Ipabilin ang inyong kaugalingon diha sa gugma sa Diyos.” (Judas 21) Walay bisan unsa nga motabang kanato sa pag-apil sa Kristohanong pakiggubat nga labaw pa kay niining usa ka butang, ang pagpabilin nga mga hingtungdan sa gugma ni Jehova nga Diyos. Kon buot hunahunaon, ang gugma maoy pangunang kalidad ni Jehova. (1 Juan 4:8) Si Pablo misulat sa mga Kristohanon sa Roma: “Ako kombinsido nga dili ang kamatayon ni kinabuhi ni mga anghel ni mga kagamhanan ni mga butang nga ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makahimo sa pagbulag kanato gikan sa gugma sa Diyos nga anaa kang Kristo Jesus nga atong Ginoo.” (Roma 8:​38, 39) Apan, sa unsang paagi makapabilin kita diha sa maong gugma? Matikdi ang tulo sa mga paagi nga atong mahimo, sumala kang Judas.

14, 15. (a) Unsay kahulogan sa pagpalig-on sa atong kaugalingon diha sa atong “labing balaan nga pagtuo”? (b) Sa unsang paagi masusi nato ang kahimtang sa atong espirituwal nga hinagiban?

¹⁴ Una, giingnan kita ni Judas nga magpadayon sa pagpalig-on sa atong kaugalingon diha sa atong “labing balaan nga pagtuo.” (Judas 20) Ingon sa nakita nato sa miaging artikulo, kini maoy mapinadayonong proseso. Sama kita sa mga tinukod nga nagkinahanglan ug dugang ug dugang nga pagpalig-on batok sa nagakagrabeng pag-atake sa klima. (Itandi ang Mateo 7:​24, 25.) Busa dili gayod kita maghinobra ka masaligon sa kaugalingon. Hinunoa, kinahanglang tan-awon nato kon asa nato palig-onon ang atong kaugalingon diha sa pundasyon sa atong pagtuo, nga mahimong mas lig-on, mas matinumanong mga sundalo ni Kristo. Pananglitan, mahimong konsiderahon nato ang mga bahin sa espirituwal nga hinagiban nga gibatbat sa Efeso 6:​11-18.

¹⁵ Unsay kahimtang sa atong kaugalingong espirituwal nga hinagiban? Ang ato bang “dakong taming sa pagtuo” sama ka lig-on sa kon unsay angay niana? Samtang handomon nato ang dili pa dugayng katuigan, makita ba nato ang mga timailhan sa pagkaluya, sama sa pagsigeg palta sa panagkatigom, kawalay-kadasig alang sa ministeryo, o pagkahanaw sa kadasig alang sa personal nga pagtuon? Ang maong mga ilhanan maoy peligroso! Kinahanglang molihok kita karon sa pagtukod ug pagpalig-on sa atong kaugalingon diha sa kamatuoran.​—1 Timoteo 4:​15; 2 Timoteo 4:​2; Hebreohanon 10:​24, 25.

16. Unsay kahulogan sa pag-ampo uban sa balaang espiritu, ug unsay usa ka butang nga angay natong pangayoon kanunay kang Jehova?

¹⁶ Ang ikaduhang paagi sa pagpabilin diha sa gugma sa Diyos mao ang pagpadayon sa “pag-ampo uban sa balaang espiritu.” (Judas 20) Kana nagkahulogan nga mag-ampo ubos sa impluwensiya sa espiritu ni Jehova ug kaharmonya sa iyang Pulong nga dinasig sa espiritu. Ang pag-ampo maoy hinungdanong paagi sa pagkahimong suod kang Jehova mismo ug pagpahayag sa atong debosyon kaniya. Dili gayod nato ipakawalay-bili kining kahibulongang pribilehiyo! Ug sa dihang kita moampo, kita tingali mangayo​—sa pagkatinuod, magpadayon sa pagpangayo​—sa balaang espiritu. (Lucas 11:13) Mao kana ang kinalig-onang puwersa nga mabatonan nato. Uban sa maong tabang, kanunay kitang makapabilin diha sa gugma sa Diyos ug makalahutay ingong mga sundalo ni Kristo.

17. (a) Nganong ang panig-ingnan ni Judas bahin sa kaluoy talagsaon kaayo? (b) Sa unsang paagi ang matag usa kanato makapadayon sa pagpakita ug kaluoy?

¹⁷ Ikatulo, giawhag kita ni Judas nga magpadayon sa pagpakita ug kaluoy. (Judas 22) Ang iyang kaugalingong panig-ingnan niining bahina maoy talagsaon. Kon buot hunahunaon, angayan siyang mahasol sa kadunotan, imoralidad, ug apostasya nga miyuhot ngadto sa Kristohanong kongregasyon. Bisan pa niana, wala siya magpadala sa kahadlok, nga misagop sa hunahuna nga ang mga kahimtang morag peligroso ra kaayo nga ipakita ang maong malumong hiyas sama sa kaluoy. Wala, giawhag niya ang iyang mga igsoon sa pagpadayon sa pagpakitag kaluoy kon posible, nga mangatarongang maluloton uban niadtong nanag-antos gumikan sa mga pagduhaduha ug bisan ‘pagsakmit gikan sa kalayo’ niadtong hapit nang makahimog seryosong sala. (Judas 23; Galacia 6:1) Pagkamaayong tambag alang sa mga ansiyano niining gubot nga kapanahonan! Sila usab maningkamot sa pagpakitag kaluoy kon adunay pasikaranan alang niana, sa samang higayon magmalig-on gihapon sa dihang gikinahanglan. Kitang tanan usab buot nga magpakitag kaluoy ngadto sa usag usa. Pananglitan, inay maghambin ug kahiubos sa gagmayng mga butang, mahimo kitang magmadagayaon sa atong pagpasaylo.​—Colosas 3:13.

18. Sa unsang paagi makaseguro kita sa kadaogan sa atong espirituwal nga pagpakiggubat?

¹⁸ Ang gubat nga atong giapilan dili sayon nga gubat. Sumala sa giingon ni Judas, kini maoy ‘kusganong pakigbugno.’ (Judas 3) Gamhanan ang atong mga kaaway. Dili lamang si Satanas kondili ang iyang daotang kalibotan ug ang atong kaugalingong pagkadili-hingpit nanaglaray batok kanato. Bisan pa niana, kita bug-os nga makasalig nga modaog! Ngano man? Tungod kay kita dapig kang Jehova. Gitapos ni Judas ang iyang sulat pinaagi sa usa ka pahinumdom nga si Jehova angayang hatagan ug “himaya, kahalangdon, gahom ug awtoridad sa tanang nangaging kapanahonan ug sa pagkakaron ug ngadto sa tanang kapanahonang dayon.” (Judas 25) Dili ba kana makalilisang nga hunahunaon? Nan, kaduhaduhaan pa ba nga kining mao gihapong Diyos “makahimo sa pagbantay kaninyo gikan sa pagkapandol”? (Judas 24) Dili gayod! Hinaot nga ang matag usa kanato magmadeterminado nga magpadayon sa pagpakigbisog sa imoralidad, sa pagtahod sa tinudlo sa Diyos nga awtoridad, ug sa pagpabilin sa atong kaugalingon diha sa gugma sa Diyos. Nianang paagiha, kita duyog nga makapahimulos ug mahimayaong kadaogan.

[Mga footnote]

Mga Pangutana Agig Repaso

◻ Sa unsang paagi gitudloan kita sa sulat ni Judas sa pagpakigbisog sa imoralidad?

◻ Nganong hinungdanon kaayo nga motahod sa tinudlo sa Diyos nga awtoridad?

◻ Unsay nakapapeligroso kaayo sa sayop nga paggamit sa awtoridad diha sa kongregasyon?

◻ Sa unsang paagi maningkamot kita nga magpabilin diha sa gugma sa Diyos?

[Hulagway sa panid 15]

Dili sama sa Romanong kasundalohan, ang mga Kristohanon miapil sa espirituwal nga pakiggubat

[Hulagway sa panid 18]

Ang Kristohanong mga magbalantay nag-alagad, dili tungod sa kahakog, kondili tungod sa gugma