Mga Pangutana Gikan sa mga Magbabasa

Daghan sa mga Saksi ni Jehova nagsaulog sa mga anibersaryo sa kasal. Ang adlawng natawhan maoy usa ka anibersaryo kon kanus-a ka natawo. Busa nganong saulogon ang mga anibersaryo sa kasal ug dili ang mga anibersaryo sa adlawng natawhan?

Sa pagkatinuod, dili kinahanglan nga saulogon sa usa ka Kristohanon ang bisan hain sa duha. Bisan pa niana, wala kana magkahulogan nga ang duha adunay samang kahinungdanon o kinahanglang lantawon sa mga Kristohanon ang ulahi (mga anibersaryo sa kasal) nga sama sa ilang paglantaw sa mga pagsaulog sa adlawng natawhan.

Ingon sa gipaila, ikaingon nga ang duha maoy mga anibersaryo tungod kay ang usa ka “anibersaryo” mao ‘ang tinuig nga pagsubli sa petsa nga nagtimaan sa usa ka hitabo.’ Kana mahimong usa ka anibersaryo sa bisan unsang hitabo​—ang adlaw sa imong pagkaaksidente sa kotse, pagkakita sa eklipse sa bulan, pagpangaligo uban sa imong pamilya, ug uban pa. Tataw nga dili himoon sa mga Kristohanon ang tanang “anibersaryo” ingong usa ka espesyal nga adlaw o magsalosalo aron handomon kana. Angayng palandongon sa usa ang mga kahimtang sa usa ka hitabo ug mohukom kon unsay angay.

Pananglitan, espesipikong gisugo sa Diyos ang mga Israelinhon nga saulogon matag tuig ang adlaw sa dihang gisayloan sa iyang manulonda ang mga balay sa mga Israelinhon sa Ehipto ug ang miresultang pagpanggawas sa iyang katawhan sa 1513 W.K.P. (Exodo 12:14) Human niadto, sa dihang ang mga Hudiyo, nga naglakip kang Jesus, nagsaulog sa anibersaryo sa maong hitabo, kadto maoy pagsugot sa pagtultol sa Diyos, ug wala nila buhata ang ingon uban sa salosalo o pagbayloay ug gasa. Gitamod usab sa mga Hudiyo ingong espesyal ang anibersaryo sa pagpahinungod pag-usab sa templo. Bisan pag ang paghandom niining makasaysayanhong hitabo wala isugo sa Bibliya, ang Juan 10:​22, 23 nagsugyot nga wala sawaya ni Jesus ang pagbuhat niana. Sa kataposan, ang mga Kristohanon adunay usa ka espesyal nga tigom sa anibersaryo sa kamatayon ni Jesus. Siyempre, buhaton kini tungod sa pagsugot sa usa ka tataw nga sugo nga makaplagan diha sa Pulong sa Diyos.​—Lucas 22:​19, 20.

Komosta ang mahitungod sa mga anibersaryo sa kasal? Sa ubang kayutaan sagad alang sa bana ug asawa nga magsaulog sa anibersaryo sa ilang pagsulod sa kaminyoon, usa ka kahikayan nga gimugna sa Diyos. (Genesis 2:​18-24; Mateo 19:​4-6) Dayag, ang Bibliya wala magdaot sa kaminyoon. Si Jesus mitambong sa usa ka selebrasyon sa kaminyoon ug miamot sa kalipay sa maong okasyon.​—Juan 2:​1-11.

Busa dili talagsaon nga ang usa ka magtiayon tingali sa ilang anibersaryo sa kasal maggahig panahon sa paghinumdom sa kangaya nianang hitaboa ug sa ilang determinasyon nga maningkamot aron molampos ingong magtiayon. Kon kaha ilang itumong ang ilang pagtagad niining malipayong okasyon diha sa pribado, ingong magtiayon lamang, o kauban ang pipila ka paryente o suod nga mga higala maoy ila na nga desisyon. Dili angay nga himoon lamang katarongan ang maong okasyon alang sa usa ka dakong sosyal nga tipontipon. Niining okasyona ang mga Kristohanon buot magpagiya sa mga prinsipyo nga mapadapat sa ilang kinabuhi sa matag adlaw. Busa personal nga butang kon kaha saulogon sa usa ang anibersaryo sa kasal o dili.​—Roma 13:​13, 14.

Apan, komosta ang bahin sa pagsaulog sa adlawng natawhan? Aduna ba kitay makita diha sa Bibliya bahin sa maong anibersaryo?

Aw, sayo niining sigloha, ang mga Estudyante sa Bibliya, ingon sa pag-ila sa mga Saksi ni Jehova kaniadto, nagsaulog ug mga adlawng natawhan. Daghan kanila ang nagtipig ug mga libreta nga gitawag ug Daily Heavenly Manna. Kini naundan sa teksto sa Bibliya alang sa matag adlaw, ug daghan sa mga Kristohanon nagbutang ug gamay nga letrato diha sa mga panid nga takdo sa mga adlawng natawhan sa kaubang mga Estudyante sa Bibliya. Dugang pa, ang The Watch Tower sa Pebrero 15, 1909, nag-asoy nga sa usa ka kombensiyon sa Jacksonville, Florida, T.B.A., si Igsoong Russell, ang presidente sa Sosyedad niadtong panahona, gipasaka ngadto sa plataporma. Ngano? Siya gihatagan ug usa ka sorpresang regalo alang sa adlawng natawhan nga pipila ka kahong buongon, mga pinya, ug mga kahel. Kana naghatag kanatog diyutayng ideya sa kanhing mga tulumanon. Aron makita ang mga butang diha sa konteksto niini, hinumdomi nga nianang yugtoa, ang mga Estudyante sa Bibliya nagsaulog usab sa Disyembre 25 ingong anibersaryo sa pagkatawo, o adlawng natawhan, ni Jesus. Naandan pa gani ang paghimog espesyal nga panihapon sa Pasko didto sa hedkuwarter sa Brooklyn.

Siyempre, sukad kaniadto ang katawhan sa Diyos miuswag sa espirituwal sa daghang paagi. Ang nag-uswag nga kahayag sa kamatuoran sa katuigang 1920 nagpaarang kanila nga masabtan ang mosunod:

Si Jesus wala matawo sa Disyembre 25, usa ka petsa nga nalangkit sa paganong relihiyon. Ang Bibliya nagsugo kanato sa paghandom sa petsa sa kamatayon ni Jesus, dili sa anibersaryo sa iya o ni bisan kinsang natawhan. Ang pagbuhat sa ingon nahiuyon sa Ecclesiastes 7:​1 ug sa kamatuoran nga ang sangpotanan sa kinabuhi sa usa ka matinumanong tawo maoy mas hinungdanon kay sa adlaw sa iyang pagkatawo. Ang Bibliya walay rekord nga si bisan kinsang matinumanong alagad nagsaulog sa iyang adlawng natawhan. Kana nagrekord sa mga adlawng natawhan sa mga pagano, nga naglangkit niining mga okasyona sa mabangis nga mga buhat. Atong tagdon ang kahimtang niadtong mga anibersaryo sa adlawng natawhan.

Ang una mao ang adlawng natawhan sa Paraon sa adlaw ni Jose. (Genesis 40:20-23) Niining bahina, ang artikulo bahin sa mga adlawng natawhan diha sa Encyclopædia of Religion and Ethics ni Hastings nag-ingon: “Ang kostumbre sa paghandom sa adlawng natawhan konektado, diha sa matang niini, uban sa pag-ihap sa panahon, ug, sa kaundan niini, uban sa pipila ka karaang relihiyosong mga prinsipyo.” Sa ulahi, ang ensiklopedia nagkutlo sa Ehiptologo nga si Sir J. Gardner Wilkinson, kinsa misulat: “Ang matag Ehiptohanon naghatag ug dakong importansiya sa adlaw, ug bisan sa oras sa iyang pagkatawo; ug malagmit nga, sama didto sa Persia, ang matag indibiduwal nagsaulog sa iyang adlawng natawhan uban sa dakong pagmaya, nga nagaabiabi sa iyang mga higala uban sa tanang kalingawan sa katilingban, ug sa labihan ka dagayang kinaham nga mga pagkaon.”

Ang laing pagsaulog sa adlawng natawhan nga gihisgotan sa Bibliya mao ang kang Herodes, nga niana si Juan Bawtista gipunggotan ug ulo. (Mateo 14:​6-10) Ang The International Standard Bible Encyclopedia (1979 nga edisyon) naghatag niini nga pagsabot: “Ang una-Helenistikong mga Grego nagsaulog sa mga adlawng natawhan sa mga diyos ug sa prominenteng mga tawo. Ang Gr[egong] genéthlia nagpasabot niini nga mga pagsaulog, samtang ang genésia nagkahulogan sa pagsaulog sa adlawng natawhan sa patay nang importanteng indibiduwal. Sa 2 Mak[abeo] 6:​7 atong makaplagan ang paghisgot sa usa ka binulang genéthlia ni Antiochus IV, sa panahon nga ang mga Hudiyo gipugos sa ‘pag-ambit sa mga halad.’ . . . Sa dihang gisaulog ni Herodes ang iyang adlawng natawhan siya nagbuhat sumala sa Helenistikong kostumbre; walay ebidensiya sa pagsaulog sa mga adlawng natawhan sa Israel sa una-Helenistikong kapanahonan.”

Sa pagkatinuod, ang tinuod nga mga Kristohanon karong adlawa dili sobra ka maikagon sa mga sinugdanan ug posibleng karaang relihiyosong mga kalangkitan sa bisan unsa ug matag tulumanon o kostumbre, apan dili usab sila mokiling sa dili-pagpanumbaling sa tin-awng mga pagpaila nga makita diha sa Pulong sa Diyos. Kini naglakip nga ang bugtong mga pagsaulog sa adlawng natawhan nga narekord sa Bibliya maoy sa mga pagano ug nalangkit sa mabangis nga mga panghitabo. Busa, ang Kasulatan tin-awng dili uyon sa mga pagsaulog sa adlawng natawhan, usa ka kamatuoran nga dili isalikway sa sinserong mga Kristohanon.

Nan, bisan tuod sa katibuk-an usa ka pribadong butang kon ang mga Kristohanon mopili sa pagsaulog sa ilang anibersaryo sa kasal, adunay maayong mga katarongan kon nganong ang hamtong nga mga Kristohanon maglikay sa pagsaulog sa mga adlawng natawhan.