Gituman Nila ang Kabubut-on ni Jehova

Usa ka Buhat sa Pagpasaylo Nag-abli sa Dalan Alang sa Kaluwasan

ANG napulo ka anak nga lalaki ni Jacob nga mibarog atubangan sa primer ministro sa Ehipto dunay makalilisang nga sekreto. Mga tuig kanhi ilang gibaligya ang ilang igsoon sa amahan nga si Jose ngadto sa pagkaulipon, nga nagplanong sultihan ang ilang amahan nga gipatay siya sa usa ka mapintas nga mananap.​—Genesis 37:18-35.

Karon, mga 20 ka tuig sa ulahi, usa ka grabeng gutom ang nagpugos niining napulo ka lalaki sa pag-adto sa Ehipto aron mopalit ug lugas. Apan dili hapsay ang mga panghitabo. Ang primer ministro, nga mao usab ang nagsilbing administrador sa pagkaon, nagpasangil kanila ingong mga espiya. Iyang gibilanggo ang usa kanila ug nagmando nga ang nahibilin mamauli ug sa pagbalik dad-on ang ilang kinamanghorang igsoong lalaki, si Benjamin. Sa dihang ilang gihimo kini, gibuhat sa primer ministro ang usa ka plano sa pagpabilanggo kang Benjamin.​—Genesis 42:1–​44:12.

Si Juda, usa sa mga anak nga lalaki ni Jacob, mitutol. ‘Kon mopauli kami nga wala si Benjamin,’ matod niya, ‘ang among amahan mamatay.’ Dayon usa ka butang ang nahitabo nga wala damha ni Juda o ni bisan kinsa sa iyang mga kaubang nagpanaw. Human mamandoi ang tanan gawas sa mga anak nga lalaki ni Jacob nga mogawas sa lawak, ang primer ministro mihilak ug kusog. Dayon, sa mikalma na siya, siya miingon: “Ako si Jose.”​—Genesis 44:18–​45:3.

Kaluoy ug Pagpahigawas

“Buhi pa ba ang akong amahan?” gipangutana ni Jose ang iyang mga igsoon sa amahan. Walay mitubag. Sa pagkatinuod, ang mga igsoon ni Jose sa amahan wala mahibalo kon unsay isulti. Angay ba silang malipay, o angay ba silang malisang? Kon buot sabton, 20 ka tuig kanhi, ilang gibaligya kining tawhana ngadto sa pagkaulipon. Si Jose adunay awtoridad sa pagpabilanggo kanila, papaulion sila nga walay pagkaon, o​—ang labing daotang butang nga mahitabo—​pamatyon sila! Tungod sa balidong rason, ang mga igsoon ni Jose sa amahan “wala gayod makatubag kaniya, tungod kay natugaw sila tungod kaniya.”​—Genesis 45:3.

Giwala gilayon ni Jose ang kabalaka niining mga tawhana. “Duol kamo kanako, palihog,” siya miingon. Sila mituman. Dayon siya miingon: “Ako si Jose nga inyong igsoon, kinsa inyong gibaligya sa Ehipto. Apan karon ayaw kamo pagbati ug kasakit ug ayaw pagkasuko sa inyong kaugalingon tungod sa inyong pagbaligya kanako dinhi; tungod kay alang sa pagtipig sa kinabuhi nga ang Diyos nagpadala kanako una kaninyo.”​—Genesis 45:4, 5.

May pasikaranan ang kaluoy nga gipakita ni Jose. Iya nang naobserbahan ang pamatuod sa ilang paghinulsol. Pananglitan, sa dihang gipasanginlan ni Jose ang iyang mga igsoon sa amahan ingong mga espiya, iyang nadunggan sila nga nagsultihanay: “Sa walay duhaduha kita sad-an maylabot sa atong igsoon . . . Mao kana kon nganong kini nga kasakit midangat kanato.” (Genesis 42:21) Usab, mitanyag si Juda nga mahimong ulipon puli ni Benjamin aron ang batan-on makapauli ngadto sa iyang amahan.​—Genesis 44:33, 34.

Busa, si Jose adunay katarongan sa pagpakitag kaluoy. Sa pagkamatuod, siya nakaamgo nga ang pagbuhat sa ingon mahimong mosangpot sa kaluwasan sa iyang tibuok nga panimalay. Busa, gisultihan ni Jose ang iyang mga igsoon sa amahan sa pagbalik ngadto sa ilang amahan, si Jacob, ug sultihan siya: “Mao kini ang giingon ni Jose nga imong anak: ‘Ang Diyos nagtudlo kanako nga ginoo sa tibuok Ehipto. Lugsong ngari kanako. Ayaw paglangan. Ug ikaw mopuyo gayod sa yuta sa Gosen, ug ikaw magpadayon nga duol kanako, ikaw ug ang imong mga anak ug ang mga anak sa imong mga anak ug ang imong mga panon ug ang imong mga kahayopan ug ang tanang butang nga imong gibatonan. Ug ako magatagana kanimo ug pagkaon didto.’”​—Genesis 45:9-11.

Ang Dakong Jose

Si Jesu-Kristo mahimong matawag nga ang Dakong Jose, tungod kay adunay talagsaong pagkasama tali niining duha ka lalaki. Sama ni Jose, si Jesus gidaogdaog sa iyang mga igsoon, mga isigkakaliwat nga lalaki ni Abraham. (Itandi ang Buhat 2:14, 29, 37.) Bisan pa niana, ang duha ka lalaki nakasinati ug talagsaong pagbali sa kahimtang. Sa ulahi, ang posisyon ni Jose ingong ulipon nausab ngadto nianang sa primer ministro, ikaduha lamang kang Paraon. Sa kaamgid, gibanhaw ni Jehova si Jesus gikan sa mga patay ug gibayaw siya ngadto sa usa ka labaw nga posisyon “ngadto sa tuong kamot sa Diyos.”​—Buhat 2:33; Filipos 2:9-11.

Isip primer ministro, si Jose makaapod-apod ug pagkaon sa tanan nga nanganha sa Ehipto sa pagpalit ug lugas. Karong adlawa, ang Dakong Jose adunay kasaligan ug mabuot nga ulipon nga matang dinhi sa yuta nga pinaagi kanila siya nag-apod-apod ug espirituwal nga pagkaon “sa hustong panahon.” (Mateo 24:45-47; Lucas 12:42-44) Sa pagkamatuod, kadtong modangop kang Jesus “dili na gutomon ni uhawon pa . . . tungod kay ang Kordero, nga anaa sa taliwala sa trono, magapastol kanila, ug magagiya kanila ngadto sa mga tuboran sa mga tubig sa kinabuhi.”​—Pinadayag 7:16, 17.

Pagtulon-an Alang Kanato

Si Jose nagtaganag talagsaong panig-ingnan sa kaluoy. Ang estriktong hustisya nagbaod unta nga angay niyang silotan kadtong nagbaligya kaniya ngadto sa pagkaulipon. Sa kasukwahi, ang emosyon mahimo untang motukmod kaniya nga ibalewala na lamang ang ilang kalapasan. Wala buhata ni Jose kining tanan. Hinunoa, iyang gisulayan ang pagkamahinulsolon sa iyang mga igsoon sa amahan. Dayon, sa dihang iyang nakita nga tiunay ang ilang kasubo, iyang gipasaylo sila.

Atong masundog si Jose. Sa dihang ang usa nga nakasala batok kanato magpasundayag ug tiunay nga pagbag-o sa kasingkasing, kita angayng mopasaylo kaniya. Siyempre, dili nato angayng tugotan ang yanong emosyon nga magbuta kanato sa tataw nga kasaypanan. Sa laing bahin, dili nato angayng tugotan ang mga pagbati sa kayugot nga magbuta kanato sa mga buhat sa tiunay nga paghinulsol. Busa ‘padayon kita nga mag-inantosay sa usag usa ug bukas nga magpinasayloay sa usag usa.’ (Colosas 3:13) Sa paghimo sa ingon, atong ginasundog ang atong Diyos, si Jehova, nga “andam mopasaylo.”​—Salmo 86:5; Miqueas 7:18, 19.