Ilang Gihimo ang Kabubut-on ni Jehova

Usa ka Pagduaw nga Tugob nga Gigantihan

ANG biyahe gikan sa Sheba ngadto sa Jerusalem seguro makakapoy gayod alang sa rayna. Siya naanad sa maluho nga kinabuhi. Karon, siya nagbiyahe sa gikusgon sa paglakaw sa kamelyo sa 2,400 kilometros nga panaw, ang dakong bahin niana sa naglagiting nga desyerto. Sumala sa usa ka pamanabana, ang iyang mga biyahe tingali mikabat ug duolan sa 75 ka adlaw, ug kana paingon lang didto!a

Nganong gibiyaan sa adunahang rayna ang iyang komportableng pinuy-anan sa Sheba ug gihimo ang makakapoy kaayong panaw?

Usa ka Makaiikag nga Taho

Ang rayna sa Sheba miabot sa Jerusalem human “makadungog sa taho bahin kang Solomon mahitungod sa ngalan ni Jehova.” (1 Hari 10:1) Wala ipadayag kon unsa gayod ang nadunggan sa rayna. Kita nahibalo, hinunoa, nga gipanalanginan ni Jehova si Solomon ug talagsaong kaalam, bahandi, ug dungog. (2 Cronicas 1:11, 12) Sa unsang paagi nahibaloan kini sa rayna? Sanglit ang Sheba maoy usa ka sentro sa negosyo, tingali siya nakadungog sa kabantog ni Solomon pinaagi sa mga magpapatigayon nga miduaw sa iyang yuta. Tingali ang pipila kanila nakaadto sa Ophir, usa ka yuta diin si Solomon may dagkong mga negosyo.​—1 Hari 9:26-28.

Kon unsa man ugaling ang nahitabo, ang rayna miabot sa Jerusalem “uban sa dako kaayong panon, mga kamelyo nga gilulanan ug mga lanang balsamo ug daghan kaayong bulawan ug mahal nga mga bato.” (1 Hari 10:2a) Ang uban nag-ingon nga ang “dako kaayong panon” nag-apil sa armadong mga konsorte. Kini makataronganon, kon hunahunaon nga usa ka gamhanang dignitaryo ang rayna ug nagbiyahe nga nagdalag tinagpulo ka minilyong dolyares nga kantidad sa mahalong mga butang.b

Apan, matikdi nga nakadungog ang rayna sa kabantog ni Solomon “mahitungod sa ngalan ni Jehova.” Busa dili lamang kini usa ka panaw sa negosyo. Dayag, ang pangunang tuyo sa rayna sa pagduaw maoy sa pagpamati sa kaalam ni Solomon​—lagmit aron makahibalo pag dugang mahitungod sa iyang Diyos, si Jehova. Sanglit siya tingali naggikan sa kaliwat ni Shem o Ham, kinsa mga magsisimba ni Jehova, basin siya gustong mahibalo sa relihiyon sa iyang mga kagikan.

Makalibog nga mga Pangutana, Makatagbawng mga Tubag

Sa nagharong kang Solomon, ang rayna nagsugod sa pagsukitsukit kaniya ug “makalibog nga mga pangutana.” (1 Hari 10:1) Ang Hebreohanong pulong nga gigamit dinhi mahimong hubaron nga “mga tigmo.” Apan kini wala magpasabot nga giaghat sa rayna si Solomon sa pagpakigdulag walay hinungdang mga dula. Makaiikag, diha sa Salmo 49:4, ang mao gihapong Hebreohanong pulong gigamit sa paghubit sa maugdang nga mga pangutana mahitungod sa sala, kamatayon, ug pagtubos. Nan, lagmit ang rayna sa Sheba nakighisgot ug laglom nga mga topiko uban kang Solomon nga nagsulay sa giladmon sa iyang kaalam. Ang Bibliya nag-ingon nga siya “misugilon kaniya sa tanan nga anaa sa iyang kasingkasing.” Si Solomon, sa baylo, “nagtubag kaniya sa tanan niyang pangutana. Walay tinipigan nga bisan unsa gikan sa hari nga wala niya ikasulti kaniya.”​—1 Hari 10:2b, 3.

Ang rayna sa Sheba nakadayeg kaayo sa kaalam ni Solomon ug sa kauswagan sa iyang gingharian nga tungod niana “wala nay espiritu diha kaniya.” (1 Hari 10:4, 5) Gisabot kining mga pulonga sa uban nga nagkahulogan nga ang rayna “wala makaginhawa.” Ang usa ka eskolar nagsugyot pa gani nga siya nakuyapan! Apan kon unsa man ugaling ang nahitabo, ang rayna nahingangha sa iyang nakita ug nadungog. Siya mipahayag nga malipayon ang mga sulugoon ni Solomon nga makadungog sa kaalam niining haria, ug iyang gihimaya si Jehova sa pagbutang kang Solomon sa trono. Dayon iyang gihatagan ang hari ug mahalong mga gasa, ang bulawan lamang mokabat, sa kantidad karon, ug duolan sa $40,000,000. Si Solomon usab mihatag ug mga gasa, gihatagan ang rayna sa “tanan niyang gusto nga iyang gipangayo.”c​—1 Hari 10:6-13.

Pagtulon-an Alang Kanato

Gigamit ni Jesus ang rayna sa Sheba ingong pananglitan alang sa mga eskriba ug mga Pariseo. “Ang rayna sa habagatan bangonon sa paghukom uban niining kaliwatana ug maghusga niini,” iyang gisultihan sila, “tungod kay mianhi siya gikan sa mga katumyan sa yuta aron madungog ang kaalam ni Solomon, apan, tan-awa! usa nga labaw pa kay kang Solomon ang ania.” (Mateo 12:42) Oo, ang rayna sa Sheba nagpakitag dakong apresasyon sa hinatag-sa-Diyos nga kaalam. Kon siya mibiyahe ug 2,400 ka kilometros sa pagpamati kang Solomon, angay nga ang mga eskriba ug mga Pariseo mamati pag-ayo kang Jesus, kinsa anaa mismo didto sa ilang atubangan.

Kita karon makapakitag lalom nga apresasyon sa Dakong Solomon, si Jesu-Kristo. Sa unsang paagi? Ang usa ka paagi mao ang pagsunod sa iyang sugo nga ‘maghimog mga tinun-an sa katawhan sa tanang kanasoran.’ (Mateo 28:19) Ang laing paagi mao ang pagpalandong pag-ayo sa panig-ingnan ni Jesus ug sa iyang tinamdan ug dayon sundon kini.​—Filipos 2:5; Hebreohanon 12:2, 3.

Tinuod, ang pagsunod sa panig-ingnan sa Dakong Solomon nagkinahanglag paningkamot sa atong bahin. Bisan pa, kita tugob nga pagagantihan. Sa pagkatinuod, si Jehova nagsaad sa iyang katawhan nga kon sila magpakitag masinakripisyohon-sa-kaugalingon nga espiritu, iyang ‘buksan ngadto kanila ang mga tamboanan sa langit ug ibubo diha kanila ang panalangin hangtod nga wala nay panginahanglan.’​—Malaquias 3:10.

[Mga footnote]