Ilang Gituman ang Kabubut-on ni Jehova

Gipili ni Maria ang “Maayong Bahin”

SA PANAHON ni Jesus, ang mga babayeng Hudiyo gipig-otan sa rabbinikong mga tradisyon. Busa, wala sila dasiga nga magtuon sa Balaod. Sa pagkatinuod, usa ka opinyon nga gikutlo sa Mishnah nag-ingon: “Kon dunay tawo nga maghatag sa iyang anak babaye ug kahibalo sa Balaod kini morag siya nagtudlo kaniyag pagpamampam.”​—Sotah 3:4.

Ingong resulta, daghang babaye sa unang siglong Judea wala kaayo maedukar. “Walay pamatuod nga sa wala pa ang ministeryo ni Jesus ang mga babayeng Hudiyo gitugotan sukad nga mahimong mga tinun-an sa usa ka dakong magtutudlo, ug ilabinang wala tugoting mopanaw uban sa maong magtutudlo, o sa pagtudlo ni bisan kinsa gawas sa kabataan,” matod sa The Anchor Bible Dictionary. Sa dugang pang pagpakamenos sa mga babaye, ang ubang relihiyosong mga lider naghimo pa gani ug lagda nga nagbaod nga ang usa ka lalaki kinahanglang dili makigsulti ug babaye diha sa publiko!

Gisalikway ni Jesus ang maong di-diyosnong mga tinamdan. Iyang gitudloan ang mga babaye maingon man ang mga lalaki, ug ang mga lalaki ug babaye makaplagan taliwala sa iyang mga sumusunod. (Lucas 8:1-3) Sa usa ka okasyon, gidapit si Jesus ingong bisita ni Marta ug Maria. (Lucas 10:38) Mga igsoong babaye ni Lazaro kining duha, ug ang tulo maoy mga tinun-an ug suod nga mga higala ni Jesus. (Juan 11:5) Lagmit ilado kaniadto kining pamilyaha, kon isipon ang daghang tawo nga miabot aron sa paghupay kang Marta ug Maria sa pagkamatay ni Lazaro. Bisan unsa pa man, ang nahitabo sa ilang panimalay sa dihang si Jesus mibisita didto nagtaganag hinungdanong leksiyon dili lamang alang kanila kondili alang kanato usab.

Pagkakat-on Diha sa Tiilan ni Jesus

Sa walay duhaduha, si Marta ug Maria maikagon sa pagtagana kang Jesus ug engrandeng salosalo, ug lagmit duna silay ikasarang niini. (Itandi ang Juan 12:1-3.) Hinunoa, pag-abot sa ilang bisita, si Maria “milingkod sa may tiilan sa Ginoo ug nagapamati sa iyang pulong.” (Lucas 10:39) Walay tradisyon sa mga tawo ang makapugong kang Jesus sa pagtudlo sa usa ka sinserong babaye kinsa maikagon kaayong mokat-on! Atong mahanduraw si Maria nga naglingkod atubangan ni Jesus, nga nagpanig-ingon sa iyang kaugalingon sa kahimtang sa usa ka estudyante nga naminaw pag-ayo sa pagtudlo sa iyang Magtutudlo.​—Itandi ang Deuteronomio 33:3; Buhat 22:3.

Dili sama kang Maria, si Marta “nalinga sa pag-atiman sa daghang gimbuhaton.” Sa paghikay ug lamiang pagkaon, napuliki siya pag-ayo sa iyang dinaliang mga atimanonon. Wala madugay, si Marta naglagot nga gipasagdan siya sa pag-atiman sa tanang buluhaton samtang ang iyang igsoon naglingkod sa tiilan ni Jesus! Busa gipakgang ni Marta ang mga pulong ni Jesus ngadto kang Maria, lagmit sa kalit nga paagi, nga nag-ingon: “Ginoo, bali wala ba lang kanimo nga gipasagdan ako sa akong igsoong babaye nga nag-inusara sa pag-atiman sa mga butang? Busa, sultihi siya nga motabang kanako.”​—Lucas 10:40.

Walay daotan mismo sa hangyo ni Marta. Ngani, lisod ang paghikay ug pagkaon para sa usa ka grupo, ug ang luwan dili angayng abagahon sa usa ka tawo. Apan, nakita ni Jesus diha sa iyang pulong ang kahigayonan sa pagtudlo ug usa ka hinungdanong leksiyon. “Marta, Marta,” siya miingon, “ikaw nabalaka ug natugaw bahin sa daghang butang. Pipila ra ka butang, hinuon, ang gikinahanglan, o usa lang. Sa iyang bahin, si Maria mipili sa maayong bahin, ug kini dili pagakuhaon gikan kaniya.”​—Lucas 10:41, 42.

Wala mag-ingon si Jesus nga si Marta walay kaikag sa espirituwal nga mga butang. Sa kasukwahi, nailhan niya siya nga usa ka babayeng may tim-os nga diyosnong debosyon.a Sa walay duhaduha mao kanay unang nagpalihok kaniya sa pagdapit kang Jesus ngadto sa iyang balay. Bisan pa niana, sa iyang lumong pagbadlong, gipunting ni Jesus nga si Marta, tungod sa iyang mabalak-ong pagtagad sa pagkaon, nawad-an sa talagsaong kahigayonan sa pagdawat ug personal nga instruksiyon gikan sa Anak sa Diyos.

Ibutang ta, ang kultura niadtong panahona lagmit nagpaluyo sa panglantaw nga ang bili sa usa ka babaye mapamatud-ag maayo pinaagi sa iyang kahanas sa mga buluhaton sa panimalay. Apan ang mga pulong ni Jesus nagpakita nga ang mga babaye, sama sa mga lalaki, makalingkod diha sa tiilan sa Anak sa Diyos ug makadawat sa mga pulong sa kinabuhi! (Juan 4:7-15; Buhat 5:14) Tungod niini, mas maayo pa gayod unta nga magtagana lamang si Marta ug pipila ka potahe​—o bisag usa lang—​kon kini makahatag kaniyag kahigayonan sa paglingkod diha sa tiilan sa Agalon ug makakat-on gikan kaniya.​—Itandi ang Mateo 6:25.

Leksiyon Alang Kanato

Karong adlawa, ang mga lalaki ug babaye makaplagan taliwala niadtong kinsa misanong sa pagdapit ni Jesus sa ‘pagkuha sa tubig sa kinabuhi nga libre.’ (Pinadayag 22:17) Kay napalihok sa gugma, ang uban​—nga sama gayod kang Marta—​naghimo sa ilang maarangan sa pag-atiman sa mga panginahanglan sa mga isigkamagtutuo. Praktikal silag panghunahuna ug daling molihok, ug si Jehova nagsaad sa pagganti sa ilang mga paghago tungod sa gugma. (Hebreo 6:10; 13:16) Ang uban tingali mas susama kang Maria. Sila hilom ug mapalandongon. Ang ilang kasibot sa pagpalandong sa Pulong sa Diyos motabang kanila sa pagpabiling lig-ong nakagamot diha sa pagtuo.​—Efeso 3:17-19.

Ang duha ka matang sa mga tawo naghulip ug hinungdanong panginahanglan diha sa Kristohanong kongregasyon. Sa kataposan, hinunoa, ang tanan kinahanglang ‘magpili sa maayong bahin’ pinaagi sa paghatag ug pangunang pagtagad sa espirituwal nga mga butang. Pinaagi sa pagtino sa mas hinungdanong mga butang, atong maangkon ang pag-uyon ug panalangin ni Jehova.​—Filipos 1:9-11.

[Footnote]