Kon sa Unsang Paagi Ikaw Makapakigsuod sa Diyos
“Duol sa Diyos, ug siya moduol kaninyo,” nag-ingon ang Santiago 4:8. Sa pagpakita sa kadako sa tinguha ni Jehova nga Diyos nga ang mga tawo makabatog suod nga relasyon kaniya, iyang gihatag ang iyang Anak alang kanato.
INGONG sanong nianang mahigugmaong tanyag, si apostol Juan misulat: “Kita nagahigugma [sa Diyos], tungod kay siya unang mihigugma kanato.” (1 Juan 4:19) Apan aron kita personal nga makapakigsuod sa Diyos, kinahanglang mohimo kitag pipila ka lakang. Parehas kini sa upat ka paagi sa pagpakigsuod sa atong mga isigkatawo, sama sa gilaraw diha sa nag-unang artikulo. Atong susihon kini karon.
Matikdi ang Katingalahang mga Hiyas sa Diyos
Daghag katingalahang mga hiyas ang Diyos, pipila sa labing talagsaon mao ang iyang gugma, kaalam, hustisya, ug gahom. Ang iyang kaalam ug gahom dagayang gipasundayag diha sa layog-abot nga uniberso ug sa kalibotan palibot kanato, gikan sa dagko kaayong mga galaksiya ngadto sa gigming nga mga atomo. Ang salmista misulat: “Ang kalangitan nagapahayag sa himaya sa Diyos; ug ang kawanangan nagasaysay sa buhat sa iyang mga kamot.”—Salmo 19:1; Roma 1:20.
Ang kalalangan nagbanaag usab sa gugma sa Diyos. Ang pagkagama kanato, pananglitan, nagpakita nga gusto sa Diyos nga malipay kita sa kinabuhi. Iya kitang gihatagan sa katakos nga makakitag mga kolor, makatilaw ug makasimhot, makadayeg sa musika, makakatawa, malingaw sa matahom nga mga butang, nga naghatag usab kanato sa daghan kaayong uban pang mga katakos ug mga kinaiya nga dili kaayo hinungdanon alang sa kinabuhi. Oo, ang Diyos manggihatagon, maluloton, ug mahigugmaon gayod—mga hiyas nga sa way-duhaduha nakaamot sa iyang pagkahimong “malipayong Diyos.”—1 Timoteo 1:11; Buhat 20:35.
Si Jehova nalipay tungod kay ang pagpasundayag sa iyang pagkasoberano ug ang pagpaluyo niini sa iyang intelihenteng mga linalang gipasukad sa panguna diha sa gugma. (1 Juan 4:8) Tinuod, si Jehova mao ang Soberano sa Uniberso, apan siya nagtratar sa mga tawo, ilabina sa iyang maunongong mga alagad, sama sa pagtratar sa usa ka mahigugmaong amahan sa iyang mga anak. (Mateo 5:45) Wala siyay ihikaw para sa ilang kaayohan. (Roma 8:38, 39) Sumala sa gihisgotan na, iyang gihatag bisan ang kinabuhi sa iyang bugtong nga Anak alang kanato. Oo, ang gugma sa Diyos mao ang katarongan nga kita naglungtad ug dunay paglaom sa kinabuhing dayon.—Juan 3:16.
Gihatagan kita ni Jesus ug lalom nga pagsabot sa personalidad sa Diyos tungod kay hingpit niyang gisundog ang iyang Amahan. (Juan 14:9-11) Siya dili gayod hakog, may konsiderasyon, ug mahunahunaon. Sa usa ka higayon, si Jesus gipaatubang sa usa ka tawo nga bungol ug may suliran sa pagsulti. Imong mahanduraw nga ang maong tawo mahimong dili komportable taliwala sa daghang tawo. Makaiikag, gidala ni Jesus kining tawhana ngadto sa usa ka pribadong lugar ug giayo siya didto. (Marcos 7:32-35) Imo bang gipabilhan ang mga tawo nga sensitibo sa imong pagbati ug nagtahod sa imong dignidad? Kon mao, nan mas makapakigsuod ka gayod kang Jehova ug kang Jesus samtang mokat-on kag dugang bahin kanila.
Hunahunaa ang mga Hiyas sa Diyos
Ang usa ka tawo mahimong dunay nindot nga mga hiyas, apan kinahanglang maghunahuna kita bahin nianang tawhana aron madani kaniya. Ikapadapat usab kana kang Jehova. Ang pagpamalandong bahin sa iyang mga hiyas maoy hinungdanon nga ikaduhang lakang sa pagpakigsuod kaniya. Si Haring David, usa ka tawo nga nahigugma gayod kang Jehova ug “gikahimut-an sa kasingkasing [ni Jehova],” miingon: “Ako nahinumdom sa kanhing mga adlaw; ako nagpalandong sa tanan mong kalihokan; kinabubut-on kong gihunahuna kanunay ang mga buhat sa imong mga kamot.”—Buhat 13:22; Salmo 143:5.
Sa dihang ikaw maniid sa mga katingalahan sa kalalangan o magbasa sa Pulong sa Diyos, ang Bibliya, ikaw ba, sama ni David, mamalandong bahin sa imong makita ug mabasa? Handurawa ang usa ka anak nga bag-o rang nakadawat ug sulat gikan sa iyang amahan nga iyang gimahal pag-ayo. Unsay iyang panglantaw sa maong sulat? Seguradong dili niya basta lang dalion pagtan-aw ang unod niini ug ipadaplin dayon kini diha sa hunos. Hinunoa, iya kining tun-an, nga magpupo sa tanang detalye ug sa buot ipasabot niini. Sa susama, ang Pulong sa Diyos kinahanglang bililhon alang kanato, sama sa pagkabililhon niini ngadto sa salmista kinsa miawit: “Gihigugma ko gayod ang imong balaod! Kini ang akong gipalandong sa tibuok nga adlaw.”—Salmo 119:97.
Padayong Pagbaton ug Maayong Komunikasyon
Ang maayong komunikasyon kinahanglanon kaayo sa bisan unsang relasyon. Kini naglangkit sa pagsulti ug pagpaminaw—ug dili lamang uban sa hunahuna kondili uban sa kasingkasing usab. Makigsulti kita sa Maglalalang pinaagi sa pag-ampo, nga maoy masimbahong pagpakigsulti sa Diyos. Si Jehova malipay sa mga pag-ampo niadtong nahigugma ug nag-alagad kaniya ug nag-ila kang Jesu-Kristo ingon nga Iyang pangulong hawas.—Salmo 65:2; Juan 14:6, 14.
Sa nangagi, ang Diyos nakigsulti sa mga tawo sa lainlaing mga paagi, lakip diha sa mga panan-awon, mga damgo, ug pinaagi sa mga manulonda. Apan, karon siya naghimo niini pinaagi sa iyang sinulat nga Pulong, ang Balaang Bibliya. (2 Timoteo 3:16) Ang sinulat nga Pulong dunay daghang bentaha. Mahimo kining konsultahon sa bisan unsang oras. Sama sa usa ka sulat, kini mahimong balikbalikon sa pagbasa. Ug dili kini maapektohan sa mga pagtuis nga maoy kasagarang mahitabo sa binaba nga pagsubli sa estorya. Busa hunahunaa ang Bibliya ingong usa ka dakong koleksiyon sa mga sulat gikan sa imong hinigugma nga langitnong Amahan, ug pinaagi niining mga sulata tugoti siya sa pagpakigsulti kanimo adlaw-adlaw.—Mateo 4:4.
Pananglitan, gipakita sa Bibliya ang panglantaw ni Jehova sa husto ug sayop. Nagsaysay kini sa iyang katuyoan alang sa katawhan ug alang sa yuta. Ug nagbutyag kini sa iyang mga pagpakiglabot sa daghang lainlaing matang sa mga tawo ug mga nasod, gikan sa maunongong mga magsisimba ngadto sa mayugtanong mga kaaway. Pinaagi sa pagpasulat sa iyang mga pakiglabot sa mga tawo niining paagiha, si Jehova naghatag kanato ug talagsaon nga detalyadong pagbatbat sa iyang personalidad. Siya nagpadayag sa iyang gugma, kalipay, kasubo, kahigawad, kasuko, kaluoy, kabalaka—oo, ang lainlain niyang hunahuna ug pagbati, ug ang pasukaranang mga hinungdan niini—ang tanan sa paagi nga daling masabtan sa mga tawo.—Salmo 78:3-7.
Human nimo mabasa ang usa ka bahin sa Pulong sa Diyos, sa unsang paagi ikaw makabaton ug kaayohan gikan sa imong pagbasa? Ug, ilabina, sa unsang paagi ikaw mas masuod sa Diyos? Una, hunahunaa ang imong nabasa ug nakat-onan bahin sa Diyos ingong usa ka persona, nga tugotang maabot ang imong kasingkasing sa maong mga punto. Dayon diha sa pag-ampo sultihi si Jehova sa imong mga hunahuna ug tim-os nga pagbati bahin sa impormasyon nga imong gitagad ug kon sa unsang paagi ikaw maningkamot sa pagbaton ug kaayohan gikan niini. Ingon niana ang komunikasyon. Siyempre, kon ikaw dunay ubang butang usab nga gihunahuna, mahimo mo gayod kining ilakip sa imong pag-ampo.
Buhata ang mga Butang Uban sa Diyos
Ang Bibliya naghisgot bahin sa pipila ka matinumanong mga tawo sa kakaraanan nga sila naglakaw uban, o atubangan, sa matuod nga Diyos. (Genesis 6:9; 1 Hari 8:25) Unsay ipasabot niana? Sa panguna sila nagkinabuhi matag adlaw nga maora bag kauban nila mismo ang Diyos. Tinuod, makasasala sila. Apan ilang gihigugma ang mga balaod ug mga prinsipyo sa Diyos, ug nagkinabuhi sila uyon sa katuyoan sa Diyos. Si Jehova madani sa maong mga tawo, ug siya may pagtagad kanila, ingon sa gipakita sa Salmo 32:8: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag samtang ako magatan-aw kanimo.”
Mahimo mo usab nga suod nga higala si Jehova—usa ka higala nga molakaw uban kanimo, motagad kanimo, ug mohatag kanimog amahanong tambag. Gihubit ni manalagnang Isaias si Jehova ingong “ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Samtang atong masinati kini nga mga kaayohan, atong mabati ang presensiya ni Jehova “sa [atong] tuong kamot,” ingnon ta, sama sa gibati ni David.—Salmo 16:8.
Ngalan sa Diyos—Nagpasiugda sa Iyang mga Hiyas
Daghang relihiyon ug nagkadaghang hubad sa Bibliya ang wala maggamit ug magpahibalo sa personal nga ngalan sa Diyos. (Salmo 83:18) Apan, diha sa orihinal nga Hebreohanong teksto, kanang ngalana—Jehova—makita sa mga 7,000 ka beses! (Sa di-harmonyang paagi, samtang gikuha ang ngalan sa Diyos, gipabilin sa kadaghanang mga maghuhubad sa Bibliya ang mga ngalan sa daghang bakak nga mga diyos nga gihisgotan sa orihinal nga teksto, sama sa Baal, Bel, Merodach, ug bisan gani Satanas!)
Gibati sa ubang tawo nga ang dili paggamit sa ngalan sa Diyos maoy usa lang ka gamayng butang. Apan hunahunaa: Mas lisod ba o mas sayon ang pag-ugmad ug suod, nalamdagang relasyon sa usa ka tawong walay ngalan? Ang mga titulo sama sa Diyos ug Ginoo (nga gigamit usab alang sa bakak nga mga diyos) mahimong magpunting sa pagtagad ngadto sa gahom, awtoridad, o posisyon ni Jehova, apan ang iyang personal nga ngalan lamang ang tataw nga magpaila kaniya. (Exodo 3:15; 1 Corinto 8:5, 6) Ang personal nga ngalan sa matuod nga Diyos nagpasiugda sa iyang mga hiyas ug mga kinaiya. Ang teologo nga si Walter Lowrie tukma nga nag-ingon: “Ang tawong wala makaila sa ngalan sa Diyos wala gayod makaila kaniya ingong usa ka persona.”
Tagda ang pananglitan ni Maria, usa ka sinserong Katoliko nga nagpuyo sa Australia. Sa dihang nahimamat siya sa mga Saksi ni Jehova sa unang higayon, gitugotan ni Maria ang mga Saksi nga ipakita kaniya ang ngalan sa Diyos diha sa Bibliya. Unsay iyang sanong? “Sa akong unang pagkakita sa ngalan sa Diyos diha sa Bibliya, mihilak ako. Natandog kaayo ako sa pagkahibalo nga puwede diay akong mahibalo ug mogamit sa personal nga ngalan sa Diyos.” Si Maria nagpadayon sa pagtuon sa Bibliya, ug sa unang higayon sa iyang kinabuhi, iyang nasinati si Jehova ingong usa ka persona ug nakaugmad ug malungtarong relasyon uban kaniya.
Oo, kita ‘makapakigsuod sa Diyos,’ bisan pag kita dili makakita kaniya pinaagi sa atong literal nga mga mata. Kita “makakita” sa iyang nindot kaayong personalidad diha sa atong mga hunahuna ug kasingkasing ug sa ingon motubo ang atong gugma alang kaniya. Kana nga gugma maoy “usa ka hingpit nga bugkos sa panaghiusa.”—Colosas 3:14.
[Kahon/Hulagway sa panid 6]
Si Jehova Mosanong sa Imong Gugma Alang Kaniya
DUNAY pagbalosay diha sa mga relasyon. Samtang makigsuod kita sa Diyos, siya mosanong pinaagi sa pagpakigsuod kanato. Tagda ang iyang pagbati alang sa mga tigulang nga si Simeon ug Ana, nga silang duha linaing gihisgotan diha sa Bibliya. Ang magsusulat sa Ebanghelyo nga si Lucas nagsulti kanato nga si Simeon “matarong ug masimbahon,” nga naghulat sa Mesiyas. Nakita ni Jehova kining maayong mga hiyas ni Simeon ug nagpakitag gugma alang niining minahal nga tigulang nga lalaki pinaagi sa pagbutyag ngadto kaniya nga “siya dili makakita sa kamatayon sa dili pa niya makita ang Kristo.” Gituman ni Jehova ang iyang saad ug gitultolan si Simeon ngadto sa masuso nga si Jesus, nga gidala sa Iyang mga ginikanan ngadto sa templo sa Jerusalem. Kay nalipay ug mapasalamaton kaayo, si Simeon migakos sa masuso ug miampo: “Karon, Soberanong Ginoo, ikaw nagapalakawng gawasnon sa imong ulipon diha sa kalinaw sumala sa imong pahayag; tungod kay nakita na sa akong mga mata ang imong galamiton sa pagluwas.”—Lucas 2:25-35.
“Nianang taknaa mismo,” gipasundayag usab ni Jehova ang iyang gugma sa 84-anyos nga si Ana pinaagi sa pagtultol kaniya ngadto usab kang Jesus. Gisuginlan kita sa Bibliya nga kining maong pinalanggang balo kanunayng tua didto sa templo “nga naghatag ug sagradong pag-alagad” kang Jehova. Tungod sa dakong pagpabili, siya, sama ni Simeon, nagpasalamat kang Jehova tungod sa iyang talagsaong kalulot, nga human niana siya misulti bahin sa bata “ngadto kanilang tanan nga nagahulat sa kapahigawasan sa Jerusalem.”—Lucas 2:36-38.
Oo, nakita ni Jehova kon unsa ka dulot ang gugma ug kahadlok ni Simeon ug Ana kaniya ug kon unsa ka dako sa ilang kabalaka sa katumanan sa iyang katuyoan. Dili ba ang maong mga asoy sa Bibliya makapasuod kanimo kang Jehova?
Sama sa iyang Amahan, si Jesus usab makaila sa tinuod nga sulod nga pagkatawo. Samtang nagtudlo didto sa templo, iyang namatikdan ang usa ka “kabos nga babayeng balo” nga nagdonar lamang ug “duha ka gagmayng sinsilyo nga kubos kaayog bili.” Sa ubang nakakita ang iyang gasa mahimong walay importansiya, apan dili ingon niana ang pagbati ni Jesus. Iyang gidayeg kining babayhana tungod kay iyang gihatag ang tanan nga iyang nabatonan. (Lucas 21:1-4) Busa, makasalig kita nga si Jehova ug si Jesus magpabili kanato kon atong ihatag kanila ang atong kinamaayohan, way sapayan kon ang atong gasa dako man o gamay.
Bisan tuod ang Diyos malipay niadtong nahigugma kaniya, siya masakitan sa dihang ang mga tawo motalikod kaniya ug mosubay sa dalan sa pagpakasala. Ang Genesis 6:6 nagsulti kanato nga si Jehova “nasakitan diha sa iyang kasingkasing” tungod sa pagkadaotan sa mga tawo sa wala pa ang Lunop sa adlaw ni Noe. Sa ulahi, ang dili masinugtanong mga Israelinhon sublisubli nga “nagsulay sa Diyos, ug ilang gipasakitan bisan ang Balaang Usa sa Israel,” matod pa sa Salmo 78:41. Oo, ang Diyos dili kay dili-matinagdanon nga “Unang Nagpahinabo” nga walay mga pagbati. Siya usa gayod ka persona, kansang pagbati balanse o wala mahabol tungod sa pagkadili hingpit, dili sama sa atong mga pagbati.
[Mga hulagway sa panid 7]
Ang pagpamalandong bahin sa kalalangan ni Jehova maoy usa ka paagi sa pagpakigsuod kaniya