Hupti ang Imong Kalipay Diha sa Pag-alagad Kang Jehova
“Pagmaya kanunay diha sa Ginoo. Sa makausa pa ako magaingon, Pagmaya!”—FILIPOS 4:4.
1, 2. Sa unsang paagi ang usa ka igsoon ug ang iyang pamilya nakahupot sa ilang kalipay bisan pag nahanaw ang tanan nilang nabatonan?
SI James, usa ka 70-anyos nga Kristohanon nga nagpuyo sa Sierra Leone, naghago pag-ayo sa tibuok niyang kinabuhi. Handurawa ang iyang kalipay sa dihang sa kataposan nakatigom siyag igong salapi nga ikapalit ug kasarangang upat-ug-lawak nga balay! Apan, wala madugay human motawon si James ug ang iyang pamilya, mibuto ang sibil nga gubat sa maong nasod, ug ang ilang balay naugdaw. Nawad-an silag balay, apan wala sila mawad-i sa ilang kalipay. Ngano man?
2 Si James ug ang iyang pamilya nagsentro sa ilang hunahuna, dili sa kon unsay nawala kanila, kondili sa kon unsay nahibilin pa. Si James misaysay: “Bisan panahon sa kalisang, kami nagtigom, nagbasa sa Bibliya, duyog nga nag-ampo, ug nakig-ambit sa diyutay namong nabatonan ngadto sa uban. Nahuptan namo ang among kalipay tungod kay gisentro namo ang among pagtagad diha sa among maayong relasyon kang Jehova.” Pinaagi sa paghunahuna bahin sa mga butang nga ilang natagamtam, nga ang kinadak-an niana mao ang pagbaton ug suod nga personal nga relasyon kang Jehova, kining matinumanong mga Kristohanon nakaarang sa ‘pagpadayon sa pagmaya.’ (2 Corinto 13:11) Siyempre, ang ilang makapaguol nga mga kahimtang dili sayon antoson. Apan wala sila mohunong sa pagmaya diha kang Jehova.
3. Sa unsang paagi nahuptan sa pipila ka unang mga Kristohanon ang ilang kalipay?
3 Ang unang mga Kristohanon nasugamak sa mga pagsulay nga susama nianang naagoman ni James ug sa iyang pamilya. Bisan pa niana, si apostol Pablo misulat niining mga pulonga ngadto sa Hebreohanong mga Kristohanon: “[Kamo] malipayong nagdawat sa pagpangagaw.” Dayon gipatin-aw ni Pablo ang tinubdan sa ilang kalipay: “Kay nahibalo nga kamo adunay mas maayo ug dumalayong kabtangan.” (Hebreohanon 10:34) Oo, kadtong unang-siglong mga Kristohanon adunay gamhanang paglaom. Sila masaligong nagpaabot sa pagdawat sa usa ka butang nga dili maagaw—ang dili-madunot nga “purongpurong sa kinabuhi” diha sa langitnong Gingharian sa Diyos. (Pinadayag 2:10) Karon, ang atong Kristohanong paglaom—langitnon man kini o yutan-on—makatabang kanato sa paghupot sa atong kalipay bisan pag nag-atubang kita sa kalisdanan.
“Magmaya Diha sa Paglaom”
4, 5. (a) Nganong ang tambag ni Pablo nga “magmaya diha sa paglaom” tukma kaayo sa panahon alang sa mga taga-Roma? (b) Unsa tingaliy hinungdan nga ang usa ka Kristohanon malimot sa iyang paglaom?
4 Si apostol Pablo nagdasig sa mga isigkamagtutuo sa Roma nga “magmaya diha sa paglaom” sa walay-kataposang kinabuhi. (Roma 12:12) Kadto maoy tukma-sa-panahong tambag alang sa mga taga-Roma. Duolan sa usa ka dekada human mosulat si Pablo kanila, sila nailalom sa grabeng paglutos, ug ang uban gisakit hangtod mamatay sa mando ni Emperador Nero. Ang ilang pagtuo nga ang Diyos maghatag kanila sa gisaad nga purongpurong sa kinabuhi sa walay duhaduha nagpalig-on kanila diha sa ilang pag-antos. Komosta kita karon?
5 Ingong mga Kristohanon, kita usab makadahom nga lutoson. (2 Timoteo 3:12) Dugang pa, kita nakaamgo nga ang “panahon ug ang wala damhang panghitabo” modangat kanatong tanan. (Ecclesiastes 9:11) Ang usa ka aksidente mahimong mokalas sa kinabuhi sa atong minahal. Ang makamatayng sakit mahimong maoy makaingon sa kamatayon sa usa ka ginikanan o suod nga higala. Gawas kon kanunay natong gihatagag bug-os nga pagtagad ang paglaom sa Gingharian, kita tingali mameligro sa espirituwal sa dihang mahitabo ang maong mga pagsulay. Busa, maayong pangutan-on nato ang atong kaugalingon, ‘Ako ba “nagmaya diha sa paglaom”? Unsa ka subsob nga ako naggahin ug panahon sa pagpamalandong niana? Ang umaabot ba nga Paraiso tinuod alang kanako? Mahanduraw ba nako ang akong kaugalingon nga atua didto? Naghinamhinam ba ako nga moabot ang kataposan sa presenteng sistema sa mga butang sama sa akong gibati sa dihang una nakong nakat-onan ang kamatuoran?’ Kining kataposang pangutana angayang hunahunaon pag-ayo. Ngano man? Tungod kay kon kita maayog lawas, haruhay ug kinabuhi, ug nagpuyo sa usa ka dapit sa yuta nga wala kaayo maapektohi sa gubat, kanihit sa pagkaon, o kinaiyanhong mga katalagman, kita—labing menos sa pagkakaron—malimot sa pagkakinahanglanon gayod nga moabot ang bag-ong kalibotan sa Diyos.
6.(a) Sa dihang si Pablo ug Silas nag-antos sa kasakitan, sa unsa nila gisentro ang ilang hunahuna? (b) Sa unsang paagi ang panig-ingnan ni Pablo ug Silas makadasig kanato karon?
6 Si Pablo mitambag pa sa mga taga-Roma nga “mag-antos ilalom sa kasakitan.” (Roma 12:12) Si Pablo sinati sa kasakitan. Kas-a, nakita niya sa panan-awon ang usa ka tawo nga nagdapit kaniya sa ‘pag-adto sa Macedonia’ sa pagtabang sa mga tawo didto nga makakat-on bahin kang Jehova. (Buhat 16:9) Niana, si Pablo, uban kang Lucas, Silas, ug Timoteo, mibiyahe paingon sa Uropa. Unsay naghulat niadtong masibotong mga misyonaryo? Kasakitan! Human sila makasangyaw sa siyudad sa Filipos sa Macedonia, si Pablo ug Silas gibunalan ug gibalhog sa bilanggoan. Tin-aw, ang pipila ka molupyo sa Filipos dili lamang kay wala magtagad sa mensahe sa Gingharian—sila supak gayod niana. Kini bang maong mga panghitabo nakawagtang sa kalipay sa masibotong mga misyonaryo? Wala. Human sila bunali ug ibalhog sa bilanggoan, “sa mga tungang gabii si Pablo ug si Silas nanag-ampo ug nanagdayeg sa Diyos pinaagig awit.” (Buhat 16:25, 26) Siyempre, ang kasakit gumikan sa pagbunal wala makapalipay kang Pablo ug Silas, apan dili kana ang gihatagag pagtagad sa duha ka misyonaryo. Ang ilang hunahuna nasentro kang Jehova ug sa mga paagi nga siya nagapanalangin kanila. Pinaagi sa malipayon nga ‘pag-antos ilalom sa kasakitan,’ si Pablo ug Silas nagsilbing maayong mga panig-ingnan alang sa ilang mga igsoon sa Filipos ug sa ubang dapit.
7. Nganong ang atong mga pag-ampo angayng maglakip sa pasalamat?
7 Si Pablo misulat: “Lahutay sa pag-ampo.” (Roma 12:12) Mag-ampo ka ba sa panahon nga ikaw mabalaka? Unsay imong iampo? Lagmit hisgotan nimo ang imong espesipikong problema ug mangayog tabang kang Jehova. Apan mahimong ilakip usab nimo ang mga pasalamat tungod sa mga panalangin nga imong natagamtam. Sa dihang motungha ang mga problema, ang pagpamalandong sa pagkamaayo ni Jehova sa iyang mga pakiglabot kanato motabang kanato nga “magmaya diha sa paglaom.” Si David, kansang kinabuhi napuno sa mga kasamok, misulat: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo. Sa dihang buot ko nga isaysay ug hisgotan sila, daghan pa sila kay sa akong ikabatbat.” (Salmo 40:5) Kon, sama kang David, kita regular nga mamalandong sa mga panalangin nga atong nadawat gikan kang Jehova, tinong magmalipayon kita.
Hupti ang Positibong Espiritu
8. Unsay motabang sa usa ka Kristohanon sa pagpabiling malipayon sa dihang nakaagom sa paglutos?
8 Gidasig ni Jesus ang iyang mga sumusunod sa paghupot ug positibong espiritu sa dihang masugamak sila sa lainlaing mga pagsulay. Siya nag-ingon: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.” (Mateo 5:11) Unsay hinungdan nga kita malipay ilalom sa maong mga kahimtang? Ang atong katakos sa pag-agwanta sa pagsupak maoy pamatuod nga ang espiritu ni Jehova anaa kanato. Giingnan ni apostol Pedro ang kaubang mga Kristohanon sa iyang adlaw: “Kon kamo gipakaulawan tungod sa ngalan ni Kristo, kamo malipayon, tungod kay ang espiritu sa himaya, bisan ang espiritu sa Diyos, anaa kaninyo.” (1 Pedro 4:13, 14) Pinaagi sa iyang espiritu, si Jehova motabang usab kanato sa paglahutay ug, ingong resulta, sa paghupot sa atong kalipay.
9. Unsay nakatabang sa pipila ka igsoon sa pagkaplag ug mga hinungdan nga malipay sa dihang nabilanggo sila tungod sa ilang pagtuo?
9 Bisan pag kita anaa sa alaot kaayo nga mga kahimtang, kita makakaplag ug mga hinungdan sa pagmaya. Napamatud-an kana sa usa ka Kristohanon nga ginganlag Adolf. Nagpuyo siya sa usa ka nasod diin ang buluhaton sa mga Saksi ni Jehova gidili sulod sa daghang tuig. Si Adolf ug daghan sa iyang mga kauban gidakop ug gihukman nga mag-alagad ug tag-as nga mga sentensiya tungod kay wala nila isalikway ang ilang pinasukad-sa-Bibliya nga mga pagtuo. Lisod ang kinabuhi sa bilanggoan, apan sama kang Pablo ug Silas, si Adolf ug ang iyang mga kauban nakakaplag ug mga hinungdan nga magpasalamat sa Diyos. Ang ilang eksperyensiya sa bilanggoan, matod nila, mitabang kanila sa pagpalig-on sa ilang pagtuo ug sa pag-ugmad sa bililhong Kristohanon nga mga hiyas, sama sa pagkamahinatagon, empatiya, ug inigsoong gugma. Pananglitan, sa dihang ang usa ka binilanggo makadawat ug pakete gikan sa iyang panimalay, ipaambit niya ang mga sulod niana ngadto sa mga isigkamagtutuo, kinsa nag-isip niining dugang mga tagana ingong gikan kang Jehova, ang dakong Maghahatag sa “matag maayong gasa ug matag hingpit nga regalo.” Ang maong mga buhat sa kaluoy nakapalipay sa naghatag ug sa nakadawat. Busa ang pagkabilanggo sa tuyo nga paluyahon ang ilang pagtuo mas nakapalig-on pa hinuon kanila sa espirituwal!—Santiago 1:17; Buhat 20:35.
10, 11. Giunsa pagdumala sa usa ka igsoon ang walay-puas nga pagsukitsukit nga gisundan sa taas nga sentensiya sa pagkabilanggo?
10 Si Ella, kinsa nagpuyo usab sa usa ka nasod diin ang buluhaton sa Gingharian dugay nang gidili, gidakop tungod sa pagpaambit sa iyang Kristohanong paglaom sa uban. Sulod sa walo ka bulan, nailalom siya sa walay-puas nga pagsukitsukit. Sa dihang sa kataposan gibista ang iyang kaso, siya gisentensiyahan nga mapriso ug napulo ka tuig diha sa bilanggoan nga walay laing mga magsisimba ni Jehova. Si Ella 24 anyos pa lang niadtong panahona.
11 Siyempre, si Ella wala maglaom nga gugolon ang dakong panahon sa iyang pagka-hohamtong diha sa selda sa bilanggoan. Apan tungod kay dili niya mausab ang iyang kahimtang, nakahukom siya nga usbon ang iyang panglantaw. Busa, giisip niya ang bilanggoan ingong iyang personal nga teritoryo nga sangyawan. “Daghan kaayo ang kinahanglang sangyawan,” matod niya, “nga dali rang milabay ang katuigan.” Human sa kapin sa lima ka tuig, si Ella gisukitsukit na usab. Nakaamgo nga ang mga rehas sa bilanggoan wala makapaluya sa iyang pagtuo, giingnan siya sa mga tawong nagsukitsukit kaniya: “Dili ka namo puwedeng buhian; wala ka mausab.” “Apan ako nausab!” mao ang hugot nga tubag ni Ella. “Mas maayo ang akong tinamdan karon kay sa bag-o pa kong misulod sa bilanggoan, ug ang akong pagtuo mas lig-on pa kay kaniadto!” Ug siya midugang: “Kon dili ko ninyo gustong buhian, magpabilin ako hangtod nga makita ni Jehova nga angayan akong buhian.” Ang lima ka tuig ug tunga nga pagkabilanggo wala maghikaw kang Ella sa iyang kalipay! Nakakat-on siya sa pagkatagbaw sa bisan unsang kahimtang nga iyang nahimutangan. Duna ka bay makat-onan gikan sa iyang panig-ingnan?—Hebreohanon 13:5.
12. Unsay makahatag sa usa ka Kristohanon ug kalinaw sa hunahuna panahon sa malisod nga mga kahimtang?
12 Ayaw panghinapos nga nabatonan ni Ella ang usa ka talagsaong gasa nga nagtugot kaniya sa pag-atubang sa maong mga hagit. Naghisgot sa panahon sa pagsukitsukit kaniya sa mga bulan una pa siya masentensiyahi, si Ella miangkon: “Nahinumdom ako nga mikagot ang akong ngipon, ug gibati nako nga sama ako sa nahadlok nga goryon.” Apan, si Ella dunay lig-ong pagtuo kang Jehova. Nakakat-on siya sa pagsalig kaniya. (Proverbio 3:5-7) Ingong resulta, ang Diyos mas tinuod alang kaniya kay kaniadto. Siya misaysay: “Matag panahon nga mosulod ako sa lawak diin ako sukitsukiton, bation nako ang kalinaw sa kahiladman. . . . Kon mas makahahadlok ang kahimtang, mas lalom ang kalinaw nga akong bation.” Si Jehova mao ang tuboran sa maong kalinaw. Si apostol Pablo misaysay: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.
13. Unsay maghatag kanatog pagsalig nga kon makasagubang kita ug kasakitan, makabaton kita ug kusog sa paglahutay?
13 Si Ella, kinsa gibuhian na sukad niadto, naghupot sa iyang kalipay bisan pa sa kalisdanan. Naantos niya kini, dili sa kaugalingon niyang kusog, kondili sa kusog nga gihatag ni Jehova kaniya. Mao usab kanay nahitabo kang apostol Pablo, kinsa misulat: “Busa, sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako. . . . Kay sa dihang ako maluya, ako gamhanan hinuon.”—2 Corinto 12:9, 10.
14. Iilustrar kon sa unsang paagi lantawon sa usa ka Kristohanon sa positibong paagi ang usa ka masulayong kahimtang ug kon unsa tingali ang resulta.
14 Ang mga kapit-os nga giatubang nimo karon lahi tingali nianang gihisgotan nato dinhi. Sa gihapon, bisan unsa pa kini, ang mga kapit-os lisod sagubangon. Pananglitan, ang imong amo mas mokiling tingali sa pagsaway sa imong trabaho—labi pa kay sa trabaho sa mga empleyado nga sakop sa ubang mga relihiyon. Dili tingali posible nga mangita kag laing trabaho. Sa unsang paagi kaha mahuptan nimo ang imong kalipay? Hinumdomi si Adolf ug ang iyang mga kauban, kansang kasinatian sa bilanggoan nagtudlo kaniya sa pag-ugmad sa hinungdanong mga hiyas. Kon mohimo kag sinserong paningkamot aron malipay ang imong amo—bisan ang usa nga “lisod pahimut-an”—maugmad nimo ang Kristohanong mga hiyas sama sa paglahutay ug pagkamainantoson. (1 Pedro 2:18) Dugang pa, mahimo ka tingaling mas bililhon ingong empleyado, nga magpauswag tingali sa imong mga tsansa nga makabaton ug mas makapalipayng trabaho sa ulahi. Hisgotan nato karon ang uban pang mga paagi nga mahuptan nato ang atong kalipay diha sa pag-alagad kang Jehova.
Ang Pagpayano sa Kinabuhi Mosangpot sa Kalipay
15-17. Unsay nakat-onan sa usa ka magtiayon nga makahupay sa ilang kapit-os, bisan pag ang hinungdan niini dili bug-os nga mawagtang?
15 Basig wala ka kaayoy kapilian sa matang sa sekular nga trabaho nga imong mahimo o kon asa ka magtrabaho, apan duna tingaliy ubang bahin sa imong kinabuhi nga makontrolar nimo. Tagda ang mosunod nga kasinatian.
16 Ang usa ka Kristohanong magtiayon nagdapit sa usa ka ansiyano sa ilang balay aron sa pagpangaon. Sa naglakat ang gabii, ang igsoon ug ang iyang asawa misugid nga di pa dugay gibati nilang nabug-atan pag-ayo sa mga kapit-os sa kinabuhi. Bisan tuod sila may bug-os-panahong mga trabaho nga nagkinahanglan ug dakong panahon ug paningkamot, dili sila makapangita ug laing trabaho. Sila naghunahuna kon hangtod kanus-a kaha sila makasagubang niining kahimtanga.
17 Sa dihang gipangayoan ug tambag, ang ansiyano mitubag, “Himoang yano ang inyong kinabuhi.” Sa unsang paagi? Ang bana ug ang iyang asawa naggugol ug hangtod sa tulo ka oras kada adlaw sa pagpaingon sa trabahoan ug pagpauli gikan sa trabahoan. Ang ansiyano, kinsa nakaila kaayo sa magtiayon, misugyot nga palandongon nila ang pagbalhin ug puyo duol sa ilang trabahoan, aron nga mamenosan nila ang gitas-on sa panahon nga ilang gigugol sa pagbiyahe paingon sa trabahoan ug pagpauli gikan sa trabahoan kada adlaw. Ang panahon nga ilang madaginot mahimong gugolon sa pag-atiman sa ubang hinungdanong mga butang—o bisan sa pagpahulay. Kon ang mga kapit-os sa kinabuhi naghikaw kanimo sa usa ka sukod sa kalipay, nganong dili susihon ang imong kahimtang kon makabaton ka ba ug kahupayan pinaagi sa paghimo ug pipila ka mga pagpasibo?
18. Nganong hinungdanon ang paghunahuna pag-ayo una pa mohimog mga desisyon?
18 Ang laing paagi sa pagpamenos sa kapit-os mao ang paghunahuna pag-ayo una pa mohimog mga desisyon. Pananglitan, ang usa ka Kristohanon nakahukom nga magtukod ug balay. Gipili niya ang usa ka kuti kaayo nga disenyo, bisan tuod ug wala pa siya makatukod ug balay sukad. Karon nakaamgo siya nga malikayan unta niya ang dili-angayng mga suliran kon ‘gipalandong pa niya ang iyang mga lakang’ una pa mopili ug disenyo alang sa iyang balay. (Proverbio 14:15) Ang laing Kristohanon miuyon nga mogarantiya sa utang sa usa ka isigkamagtutuo. Sumala sa kasabotan, kon ang nanghulam dili makabayad sa utang, ang naggarantiya obligadong mobayad niana. Sa sinugdan, walay problema, apan ngadtongadto ang nanghulam wala na motuman sa gikasabotan. Ang nagpahulam nabalaka ug gipugos ang naggarantiya nga bayran ang tanang utang. Naghatag kanag dakong kapit-os sa naggarantiya. Dili ba malikayan unta kadto kon gipalandong pa niya pag-ayo ang tanang butang una pa siya miuyon nga mogarantiya sa maong utang?—Proverbio 17:18.
19. Unsa ang pipila ka paagi nga mamenosan nato ang kapit-os sa atong kinabuhi?
19 Sa dihang kapoyon kita, dili gayod kita mohinapos nga mamenosan nato ang kapit-os nga atong gisagubang ug mahibalik ang atong kalipay pinaagi sa pag-iban sa panahon alang sa personal nga pagtuon sa Bibliya, pagsangyaw sa kanataran, ug pagtambong sa tigom. Aw, kini maoy hinungdanong mga paagi diin madawat nato ang balaang espiritu ni Jehova, nga usa ka bunga niana mao ang kalipay. (Galacia 5:22) Ang Kristohanong mga kalihokan kanunayng makapalagsik ug kasagarang dili makapakapoy kaayo. (Mateo 11:28-30) Lagmit kaayo nga ang sekular nga kalihokan o ang mga lulinghayaw, dili ang espirituwal nga mga kalihokan, ang makaamot sa atong kakapoy. Ang pagbatasan sa pagkatulog sa hustong oras motabang tingali kanato nga maulian. Ang diyutayng dugang nga pahulay dakog kapuslanan. Si N. H. Knorr, nga nag-alagad ingong membro sa Nagamandong Lawas sa mga Saksi ni Jehova hangtod sa iyang kamatayon, moingon kaniadto sa mga misyonaryo: “Kon maluya ang inyong buot, ang unang buhaton mao ang pagpahulay. Matingala mo nga mas daling sulbaron ang bisan unsang problema human kamo makapahulay ug maayo sa gabii!”
20. (a) Sumaryoha ang pipila ka paagi nga mahuptan nato ang atong kalipay. (b) Unsay imong mahunahunaan nga mga hinungdan nga magmalipayon? (Tan-awa ang kahon sa panid 17.)
20 Ang mga Kristohanon adunay pribilehiyo nga mag-alagad sa “malipayong Diyos.” (1 Timoteo 1:11) Sa ato nang nakita, mahuptan nato ang atong kalipay bisan gihasol kita sa bug-at nga mga problema. Ibutang nato kanunay sa atong atubangan ang paglaom sa Gingharian, pasiboon nato ang atong panglantaw kon gikinahanglan, ug huptan natong yano ang atong kinabuhi. Unya, bisan unsay kahimtang nga atong mahimutangan, mosanong kita sa mga pulong ni apostol Pablo: “Pagmaya kanunay diha sa Ginoo. Sa makausa pa ako magaingon, Pagmaya!”—Filipos 4:4.
Palandonga Pag-ayo Kining mga Pangutanaha:
• Nganong isentro gayod sa mga Kristohanon ang ilang pagtagad diha sa paglaom sa Gingharian?
• Unsay makatabang kanato sa paghupot sa atong kalipay sa malisod nga mga kahimtang?
• Nganong angay natong sulayan sa pagpayano ang atong kinabuhi?
• Sa unsang mga bahin nga gipayano sa pipila ang ilang kinabuhi?
[Kahon/Mga hulagway sa panid 17]
Dugang mga Hinungdan nga Magmalipayon
Ingong mga Kristohanon, aduna kitay daghang hinungdan nga magmaya. Tagda ang mosunod:
1. Kita nakaila kang Jehova.
2. Atong nakat-onan ang kamatuoran sa Pulong sa Diyos.
3. Mapasaylo ang atong mga sala pinaagi sa atong pagtuo sa halad ni Jesus.
4. Ang Gingharian sa Diyos nagamando—ang bag-ong kalibotan ania na sa dili madugay!
5. Si Jehova nagdala kanato ngadto sa usa ka espirituwal nga paraiso.
6. Napahimuslan nato ang maayong Kristohanong panag-ubanay.
7. Nabatonan nato ang pribilehiyo nga makig-ambit sa buluhatong pagsangyaw.
8. Kita buhi, ug kita adunay usa ka sukod sa kusog.
Pila pa ka laing mga hinungdan sa kalipay ang imong mahisgotan?
[Hulagway sa panid 13]
Si Pablo ug Silas malipayon bisag nabilanggo
[Mga hulagway sa panid 15]
Ang imo bang panan-aw nasentro sa malipayong palaaboton sa bag-ong kalibotan sa Diyos?