Si Kristo Nanguna sa Iyang Kongregasyon
“Tan-awa! Ako magauban kaninyo sa tanang adlaw hangtod sa kataposan sa sistema sa mga butang.”—MATEO 28:20.
1, 2. (a) Sa naghatag sa sugo sa paghimog mga tinun-an, unsay gisaad sa nabanhawng Jesus sa iyang mga sumusunod? (b) Sa unsang paagi aktibong nanguna si Jesus sa unang Kristohanong kongregasyon?
SA WALA pa mokayab sa langit, si Jesu-Kristo, ang atong nabanhawng Pangulo, nagpakita sa iyang mga tinun-an ug nag-ingon: “Ang tanang awtoridad gihatag na kanako sa langit ug sa yuta. Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.”—Mateo 23:10; 28:18-20.
2 Si Jesus wala lamang maghatag sa iyang mga tinun-an ug buluhaton nga makaluwas ug kinabuhi pinaagi sa paghimog dugang mga tinun-an kondili nagsaad usab nga siya magauban kanila. Ang kasaysayan sa unang Kristiyanidad, sumala sa girekord sa basahon sa Bibliya sa mga Buhat, klarong nagpakita nga gigamit ni Kristo ang awtoridad nga gihatag kaniya sa pagpanguna sa bag-o pang natukod nga kongregasyon. Iyang gipadala ang gisaad nga “magtatabang”—ang balaang espiritu—sa paglig-on sa iyang mga sumusunod ug sa paggiya sa ilang mga paningkamot. (Juan 16:7; Buhat 2:4, 33; 13:2-4; 16:6-10) Gigamit sa nabanhawng Jesus ang mga manulonda nga ilalom kaniya sa pagtabang sa iyang mga tinun-an. (Buhat 5:19; 8:26; 10:3-8, 22; 12:7-11; 27:23, 24; 1 Pedro 3:22) Dugang pa, ang atong Pangulo naghatag ug giya sa kongregasyon pinaagi sa pagtudlo ug kuwalipikadong mga lalaki aron moalagad ingong nagamandong lawas.—Buhat 1:20, 24-26; 6:1-6; 8:5, 14-17.
3. Unsang mga pangutana ang hisgotan niining artikuloha?
3 Apan, komosta sa atong panahon, “sa kataposan sa sistema sa mga butang”? Sa unsang paagi nanguna si Jesu-Kristo sa Kristohanong kongregasyon karon? Ug sa unsang paagi atong ikapasundayag nga kita midawat niini nga pagpanguna?
Ang Agalon Adunay Matinumanong Ulipon
4. (a) Kinsay naglangkob sa “matinumanon ug maalamong ulipon”? (b) Unsay gisalig sa Agalon nga atimanon sa ulipon?
4 Sa dihang naghatag sa tagna bahin sa ilhanan sa iyang presensiya, si Jesus miingon: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon? Malipayon kanang ulipona kon sa pag-abot sa iyang agalon makaplagan siya nga nagabuhat sa ingon! Sa pagkatinuod ako magaingon kaninyo, igatudlo niya siya ibabaw sa tanan niyang mga kabtangan.” (Mateo 24:45-47) Ang “agalon” mao ang atong Pangulo, si Jesu-Kristo, ug iyang gitudlo ang “matinumanon ug maalamong ulipon”—ang lawas sa dinihogang mga Kristohanon dinhi sa yuta—sa pag-atiman sa tanan niyang yutan-ong intereses.
5, 6. (a) Diha sa usa ka panan-awon nga nadawat ni apostol Juan, unsay gihulagwayan sa “pito ka tangkawan nga bulawan” ug sa “pito ka bituon”? (b) Unsay gipadayag bahin sa “pito ka bituon” nga anaa sa tuong kamot ni Jesus?
5 Ang basahon sa Bibliya nga Pinadayag nagpakita nga ang matinumanon ug maalamong ulipon direkta nga nailalom sa pagdumala ni Jesu-Kristo. Diha sa usa ka panan-awon sa “adlaw sa Ginoo,” si apostol Juan nakakita ug “pito ka tangkawan nga bulawan, ug taliwala sa mga tangkawan dihay usa nga sama sa anak sa tawo” nga sa ‘iyang tuong kamot dihay pito ka bituon.’ Nagpatin-aw sa panan-awon ngadto kang Juan, si Jesus miingon: “Bahin sa sagradong tinago sa pito ka bituon nga imong nakita sa akong tuong kamot, ug sa pito ka tangkawan nga bulawan: Ang pito ka bituon mao ang mga manulonda sa pito ka kongregasyon, ug ang pito ka tangkawan mao ang pito ka kongregasyon.”—Pinadayag 1:1, 10-20.
6 Ang “pito ka tangkawan nga bulawan” naghulagway sa tanang matuod nga Kristohanong mga kongregasyon nga naglungtad sa “adlaw sa Ginoo,” nga nagsugod sa 1914. Apan komosta ang “pito ka bituon”? Sa sinugdan, kini nagsimbolo sa tanang inanak-sa-espiritu, dinihogang mga magtatan-aw nga nag-atiman sa unang-siglong mga kongregasyon.a Ang maong mga magtatan-aw anaa sa tuong kamot ni Jesus—ilalom sa iyang pagdumala ug pagtultol. Oo, si Kristo Jesus mao ang nanguna sa ulipon nga matang nga gilangkoban ug indibiduwal nga mga membro. Apan, karong adlawa diyutay na lamang ang dinihogang mga magtatan-aw. Sa unsang paagi ang pagpanguna ni Kristo makaabot ngadto sa kapin sa 93,000 ka kongregasyon sa mga Saksi ni Jehova sa tibuok globo?
7. (a) Sa unsang paagi gigamit ni Jesus ang Nagamandong Lawas aron manguna diha sa mga kongregasyon sa tibuok yuta? (b) Nganong ikaingon nga ang Kristohanong mga magtatan-aw gitudlo sa balaang espiritu?
7 Sama sa unang siglo, usa ka gamayng pundok sa kuwalipikadong mga lalaki gikan sa dinihogang mga magtatan-aw karon ang nag-alagad ingong Nagamandong Lawas, nga naghawas sa bug-os nga matinumanon ug maalamong ulipon. Gigamit sa atong Pangulo kining Nagamandong Lawas aron sa pagtudlo ug kuwalipikadong mga lalaki—dinihogan man o dili—ingong mga ansiyano sa lokal nga mga kongregasyon. Niining bahina, ang balaang espiritu, nga niana gihatagan ni Jehova si Jesus ug awtoridad nga pagagamiton, adunay dako kaayong papel. (Buhat 2:32, 33) Una sa tanan, kining maong mga magtatan-aw kinahanglang makaabot sa mga kinahanglanon nga gipadayag diha sa Pulong sa Diyos, nga dinasig sa balaang espiritu. (1 Timoteo 3:1-7; Tito 1:5-9; 2 Pedro 1:20, 21) Ang mga rekomendasyon ug mga pagtudlo himoon human sa pag-ampo ug ilalom sa paggiya sa balaang espiritu. Dugang pa, ang mga indibiduwal nga gitudlo nagpasundayag nga naghupot sa bunga niana nga espiritu. (Galacia 5:22, 23) Nan, ang tambag ni Pablo aplikado usab sa tanang ansiyano, dinihogan man o dili: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw.” (Buhat 20:28) Kining tinudlo nga mga lalaki nagdawat sa paggiya gikan sa Nagamandong Lawas ug andam mobantay sa kongregasyon. Niining paagiha, si Kristo nag-uban kanato karon ug aktibong nanguna sa kongregasyon.
8. Sa unsang paagi gigamit ni Kristo ang mga manulonda sa pagpanguna sa iyang mga sumusunod?
8 Gigamit usab ni Jesus ang mga manulonda mismo aron manguna sa iyang mga sumusunod karon. Sumala sa ilustrasyon sa mga trigo ug sa mga bunglayon, ang ting-ani moabot sa “kataposan sa sistema sa mga butang.” Kinsa ang gamiton sa Agalon sa pagpangani? “Ang mga mag-aani mao ang mga manulonda,” miingon si Kristo. Siya midugang: “Ang Anak sa tawo magpadala sa iyang mga manulonda, ug ilang tigomon gikan sa iyang gingharian ang tanang butang nga magpahinabog kapandolan ug ang mga tawong nagabuhat sa kalapasan.” (Mateo 13:37-41) Dugang pa, maingon nga usa ka manulonda ang nangitag paagi aron makit-an ni Felipe ang Etiopianhong eunuko, sa ingon adunay daghang pamatuod karon nga gigamit ni Kristo ang iyang mga manulonda sa pagdumala sa buluhaton sa matuod nga mga Kristohanon sa pagpangita sa mga matinud-anon ug kasingkasing.—Buhat 8:26, 27; Pinadayag 14:6.
9. (a) Pinaagi sa unsa nga nanguna si Kristo sa Kristohanong kongregasyon karon? (b) Unsang pangutana ang angay natong palandongon kon kita buot makabaton ug kaayohan sa pagpanguna ni Kristo?
9 Pagkamakapadasig ang pagkahibalo nga si Jesu-Kristo nanguna sa iyang mga tinun-an karong adlawa pinaagi sa Nagamandong Lawas, sa balaang espiritu, ug sa mga manulonda! Bisan pa kon ang ubang mga magsisimba ni Jehova temporaryong mabulag gikan sa Nagamandong Lawas tungod sa paglutos o sa susama niini, si Kristo motagana gihapon ug pagpanguna pinaagi sa balaang espiritu ug tabang sa manulonda. Apan, makabaton lamang kita ug kaayohan sa iyang pagpanguna kon modawat kita niana. Sa unsang paagi atong ikapasundayag nga atong gidawat ang pagpanguna ni Kristo?
“Magmasinugtanon . . . Magmapinasakopon”
10. Sa unsang paagi ikapasundayag nato ang pagtahod sa tinudlong mga ansiyano sa kongregasyon?
10 Ang atong Pangulo naghatag sa mga kongregasyon ug “mga gasa nga mga lalaki”—“ang pipila ingong mga tig-ebanghelyo, ang pipila ingong mga magbalantay ug mga magtutudlo.” (Efeso 4:8, 11, 12) Ang atong tinamdan ug mga lihok ngadto kanila klarong madayag kon gidawat ba nato ang pagpanguna ni Kristo. Angay lamang nga ‘magmapasalamaton kita’ sa kuwalipikado sa espirituwal nga mga lalaki nga gihatag ni Kristo. (Colosas 3:15) Sila takos usab sa atong pagtahod. “Ang mga ansiyano nga nagdumala sa maayong paagi kinahanglang isipon nga takos sa doble nga pasidungog,” nagsulat si apostol Pablo. (1 Timoteo 5:17) Sa unsang paagi ikapasundayag nato ang atong pagkamapasalamaton ug pagtamod sa mga tigulang—mga ansiyano, o mga magtatan-aw—sa kongregasyon? Si Pablo nagtubag: “Magmasinugtanon kamo sa mga nagapanguna kaninyo ug magmapinasakopon.” (Hebreohanon 13:17) Oo, kita gisugo nga magmasinugtanon ug magmapinasakopon, magmasinugtanon, kanila.
11. Nganong ang pagtahod sa kahikayan may kalabotan sa ansiyano maoy bahin sa pagkinabuhi nga nahiuyon sa atong bawtismo?
11 Ang atong Pangulo hingpit. Ang mga lalaki nga iyang gihatagan ug mga gasa dili. Mao nga sila masayop usahay. Bisan pa niana, hinungdanon nga magpabilin kita nga maunongon sa kahikayan ni Kristo. Sa pagkamatuod, ang paglihok nga nahiuyon sa atong pahinungod ug bawtismo nagpasabot nga kita midawat sa pagkatinuod sa dinihogan-sa-espiritu nga awtoridad diha sa kongregasyon ug malipayon nga magpasakop niana. Ang atong pagbawtismo sa ‘ngalan sa balaang espiritu’ maoy usa ka deklarasyon ngadto sa publiko nga kita nakahibalo kon unsa ang balaang espiritu ug midawat sa papel nga gidula niini diha sa mga katuyoan ni Jehova. (Mateo 28:19) Ang maong bawtismo nagpasabot nga kita mokooperar sa espiritu ug dili mohimog bisan unsa nga makababag sa paglihok niini diha sa mga sumusunod ni Kristo. Kay dako man ug papel ang gidula sa balaang espiritu sa pagrekomendar ug pagtudlog mga ansiyano, matinumanon ba kita sa atong pahinungod kon dili kita mokooperar sa kahikayan may kalabotan sa ansiyano diha sa kongregasyon?
12. Unsang mga panig-ingnan sa pagkawalay-pagtahod sa awtoridad ang gikutlo ni Judas, ug unsay gitudlo niini kanato?
12 Ang Kasulatan naundan ug mga panig-ingnan nga nagtudlo kanato sa pagkahinungdanon sa pagkamasinugtanon ug pagkamapinasakopon. Naghisgot bahin niadtong nagsultig daotan batok sa tinudlong mga lalaki diha sa kongregasyon, ang tinun-ang Judas nagpadayag ug tulo ka pasidaang mga panig-ingnan, nga nag-ingon: “Pagkaalaot nila, tungod kay misubay sila sa dalan ni Cain, ug nagdali ngadto sa masalaypong dalan ni Balaam alang sa ganti, ug nangalaglag diha sa masuklanong pulong ni Kore!” (Judas 11) Si Cain wala mamati sa mahigugmaong tambag ni Jehova ug mituyo sa paglakaw sa dalan sa hingaping pagdumot. (Genesis 4:4-8) Bisag nakadawat kanunay ug mga pasidaan sa Diyos, si Balaam misulay sa pagtunglo sa katawhan sa Diyos tungod sa suhol. (Numeros 22:5-28, 32-34; Deuteronomio 23:5) Si Kore dako ug katungdanan sa Israel, apan wala siya matagbaw. Nanghulhog siya ug rebelyon batok sa alagad sa Diyos nga si Moises, ang labing maaghop nga tawo sa yuta. (Numeros 12:3; 16:1-3, 32, 33) Ang kalamidad midangat kang Cain, Balaam, ug Kore. Pagkatin-aw nga nagtudlo kanato kining maong mga panig-ingnan sa pagpamati sa tambag niadtong gigamit ni Jehova sa halangdong mga katungdanan ug sa pagtahod kanila!
13. Unsang mga panalangin ang gitagna ni manalagnang Isaias alang niadtong magpasakop sa kahikayan may kalabotan sa ansiyano?
13 Kinsay dili buot makapahimulos sa hamiling kahikayan sa pagdumala nga gisugdan sa atong Pangulo diha sa Kristohanong kongregasyon? Si manalagnang Isaias nagtagna sa mga panalangin niining maong kahikayan, nga nag-ingon: “Tan-awa! Usa ka hari magahari alang sa pagkamatarong; ug mahitungod sa mga prinsipe, sila magmando ingong mga prinsipe alang sa hustisya. Ug ang matag usa mahimong sama sa usa ka tagoanang dapit gikan sa hangin ug usa ka salipdanang dapit gikan sa bagyo, sama sa mga sapa sa tubig sa usa ka walay-tubig nga yuta, sama sa landong sa usa ka dako kaayong bato sa usa ka umaw nga yuta.” (Isaias 32:1, 2) Ang matag usa sa mga ansiyano angay nga mahimong ‘usa ka dapit’ sa panalipod ug kahilwasan. Bisan pag ang pagpasakop sa awtoridad malisod alang kanato, mag-ampo kita aron mahimong masinugtanon ug mapinasakopon sa gitudlo sa Diyos nga awtoridad sulod sa kongregasyon.
Kon sa Unsang Paagi Magpasakop ang mga Ansiyano sa Pagpanguna ni Kristo
14, 15. Sa unsang paagi kadtong nanguna sa kongregasyon nagpakita nga sila nagpasakop sa pagpanguna ni Kristo?
14 Ang matag Kristohanon—ilabina gayod ang mga ansiyano—kinahanglang mosunod sa pagpanguna ni Kristo. Ang mga magtatan-aw, o mga ansiyano, dunay igong awtoridad sa kongregasyon. Apan dili sila magtinguha nga mahimong ‘mga agalon sa pagtuo sa ilang isigkamagbubuhat’ pinaagi sa pagbuot sa ilang mga kinabuhi. (2 Corinto 1:24) Ang mga ansiyano mamati sa mga pulong ni Jesus: “Kamo nahibalo nga ang mga magmamando sa mga nasod mahariharion ibabaw kanila ug ang mga kadagkoan naggamit sa awtoridad ibabaw kanila. Dili kini ang paagi sa inyong taliwala.” (Mateo 20:25-27) Samtang ginatuman sa mga ansiyano ang ilang responsibilidad, sila kinasingkasing nga maningkamot sa pag-alagad sa uban.
15 Ang mga Kristohanon giawhag: “Hinumdomi sila nga nagapanguna kaninyo, . . . ug samtang mamalandong kamo kon unsay gisangpotan sa ilang panggawi sundoga ang ilang pagtuo.” (Hebreohanon 13:7) Wala kini magpasabot nga sundogon sa mga Kristohanon ang mga ansiyano tungod kay sila man ang nanguna. Si Jesus miingon: “Usa ra ang inyong Pangulo, si Kristo.” (Mateo 23:10) Ang pagtuo sa mga ansiyano ang angayng pagasundogon tungod kay sila nagsundog sa atong tinuod nga Pangulo, si Kristo. (1 Corinto 11:1) Tagda ang pipila ka paagi diin ang mga ansiyano naningkamot nga mahimong sama ni Kristo sa ilang relasyon sa uban diha sa kongregasyon.
16. Bisan pa sa awtoridad nga iyang nahuptan, giunsa pagtagad ni Jesus ang iyang mga sumusunod?
16 Bisan pag si Jesus mas labaw sa dili-hingpit nga mga tawo sa tanang paagi ug dunay dili-hitupngang awtoridad gikan sa iyang Amahan, siya makasaranganon sa iyang mga pakiglabot sa iyang mga tinun-an. Wala niya hupngi ang iyang mga tigpamati ug magarbohong pasundayag sa kahibalo. Si Jesus nagpasundayag ug pagkamahunahunaon ug kahangawa sa iyang mga sumusunod, nga naghunahuna sa ilang tawhanong mga panginahanglan. (Mateo 15:32; 26:40, 41; Marcos 6:31) Wala siya mangayog sobra sa mahatag sa iyang mga tinun-an, ug wala niya pabug-ati sila ug sobra sa ilang mapas-an. (Juan 16:12) Si Jesus “malumog-buot ug mapainubsanon sa kasingkasing.” Busa, dili ikahibulong nga gilantaw siya sa daghan nga makapalagsik.—Mateo 11:28-30.
17. Sa unsang paagi ipasundayag sa mga ansiyano ang samag-Kristo nga pagkamakasaranganon sa ilang relasyon sa uban diha sa kongregasyon?
17 Kon si Kristo nga Pangulo nagpasundayag ug pagkamakasaranganon, nan labaw na kadtong nagapanguna sa kongregasyon! Oo, magbantay sila nga dili nila abusohan ang awtoridad nga gipiyal kanila. Ug sila ‘dili moanha nga may paghinobra sa sinultihan,’ aron magpadayeg sa uban. (1 Corinto 2:1, 2) Hinunoa, sila maningkamot nga mapadayag ang kamatuoran sa Kasulatan pinaagi sa simpleng mga pulong ug sa katim-os. Dugang pa, ang mga ansiyano maningkamot nga mahimong makataronganon sa ilang mga pagdahom sa uban ug magmatinagdanon sa ilang mga panginahanglan. (Filipos 4:5) Kay nahibalo nga ang tanan adunay mga limitasyon, mahigugmaon nilang hunahunaon kining maong mga limitasyon sa ilang paagi sa pagtagad sa ilang mga igsoon. (1 Pedro 4:8) Ug dili ba tinuod nga makapalagsik ang mga ansiyano nga malumog-buot? Tinuod nga sila makapalagsik gayod.
18. Unsay makat-onan sa mga ansiyano sa paagi sa pagtagad ni Jesus sa mga bata?
18 Si Jesus dali nga duolon, bisan sa mga timawa. Palandonga ang iyang tubag sa dihang gibadlong sa iyang mga tinun-an ang mga tawo tungod sa ‘pagdala ngadto kaniya sa mga bata.’ “Pasagdi ang mga bata nga moduol kanako,” si Jesus miingon, “ayaw sila pagpugngi.” Dayon “iyang gikugos ang mga bata ug gipanalanginan sila, nga gitapion ang iyang mga kamot diha kanila.” (Marcos 10:13-16) Si Jesus mahigugmaon ug maluloton, ug ang uban nadani kaniya. Ang mga tawo dili mahadlok kang Jesus. Bisan ang mga bata dili magpanuko sa pagduol kaniya. Ang mga ansiyano dali usab duolon, ug samtang sila nagpakita ug mainit nga pagbati ug kalulot, ang uban—bisan ang mga bata—dili magpanuko sa pagduol kanila.
19. Unsay nalangkit sa pagkabaton “sa hunahuna ni Kristo,” ug kini nagkinahanglan ug unsang paningkamot?
19 Ang sukod sa pagsundog sa mga ansiyano kang Kristo Jesus nagadepende sa ilang pagkaila kaniya. “Kinsa bay nakasabot sa hunahuna ni Jehova, aron iyang matudloan siya?” si Pablo nangutana. Dayon siya midugang: “Apan nabatonan nato ang panghunahuna ni Kristo.” (1 Corinto 2:16) Ang pagkabaton sa hunahuna ni Kristo nagkinahanglan sa pagkasayod sa paagi sa iyang panghunahuna ug sa tanang bahin sa iyang personalidad aron kita mahibalo kon unsay iyang himoon sa usa ka partikular nga kahimtang. Hunahunaa lang ang pagkabaton ug bug-os nga kasayoran sa atong Pangulo! Oo, kini nagkinahanglan nga hatagan ug bug-os nga pagtagad ang asoy sa Ebanghelyo ug regular nga pun-on ang atong mga hunahuna ug pagsabot sa kinabuhi ug panig-ingnan ni Jesus. Kon ang mga ansiyano maningkamot sa pagsunod sa pagpanguna ni Kristo nga sama niana, kadtong anaa sa kongregasyon mas mokiling sa pagsundog sa ilang pagtuo. Ug ang mga ansiyano malipay inigkakita sa uban nga mangayaong nagsunod sa mga tunob sa ilang Pangulo.
Padayon Ilalom sa Pagpanguna ni Kristo
20, 21. Samtang magtan-aw kita sa unahan sa gisaad nga bag-ong kalibotan, unsa ang angay natong ihukom?
20 Hinungdanon nga kitang tanan magpadayon nga magpasakop sa pagpanguna ni Kristo. Samtang nagkaduol na kita sa kataposan niining sistema sa mga butang, ang atong kahimtang mahimong ikatandi nianang sa mga Israelinhon diha sa Kapatagan sa Moab sa 1473 W.K.P. Sila nakaabot na sa utlanan sa Yutang Saad, ug pinaagi kang manalagnang Moises, ang Diyos nag-ingon: “Ikaw [Josue] magdala niini nga katawhan sa yuta nga gipanumpa ni Jehova sa ilang mga katigulangan nga ihatag kanila.” (Deuteronomio 31:7, 8) Si Josue ang gitudlo nga pangulo. Aron makasulod sa Yutang Saad, ang mga Israelinhon kinahanglang magpasakop sa pagpanguna ni Josue.
21 Alang kanato ang Bibliya nag-ingon: “Usa ra ang inyong Pangulo, ang Kristo.” Si Kristo lamang ang manguna kanato ngadto sa gisaad nga bag-ong kalibotan nga niini magapuyo ang pagkamatarong. (2 Pedro 3:13) Busa, ihukom nato nga magpasakop sa iyang pagpanguna sa tanang bahin sa kinabuhi.
[Footnote]
a Ang mga “bituon” dinhi wala magsimbolo sa literal nga mga manulonda. Si Jesus dili gayod mogamit ug tawo sa pagrekord sa impormasyon alang sa dili-makitang espirituhanong mga linalang. Busa, ang mga “bituon” naghawas sa tawhanong mga magtatan-aw, o mga ansiyano, diha sa mga kongregasyon, nga gilantaw ingong mga mensahero ni Jesus. Ang ilang numero nga pito nagpasabot sa pagkahimong kompleto sumala sa sukdanan sa Diyos.
Nakahinumdom Ka Ba?
• Sa unsang paagi nanguna si Kristo sa unang kongregasyon?
• Sa unsang paagi nanguna si Kristo sa iyang kongregasyon karon?
• Nganong magpasakop kita niadtong nanguna sa kongregasyon?
• Sa unsang mga paagi makapasundayag ang mga ansiyano nga si Kristo mao ang ilang Pangulo?
[Hulagway sa panid 15]
Nanguna si Kristo sa iyang kongregasyon ug nagbutang sa mga magtatan-aw diha sa iyang tuong kamot
[Mga hulagway sa panid 16]
“Magmasinugtanon niadtong nagapanguna taliwala kaninyo ug magpasakop kamo”
[Hulagway sa panid 18]
Si Jesus mainiton ug dali nga duolon. Ang Kristohanong mga ansiyano maningkamot nga mahisama kaniya