Kalipayi ang Personal nga Pagtuon sa Pulong sa Diyos

“Palandongon ko gayod ang tanan mong kalihokan, ug ang imong mga pakiglabot akong hatagag pagtagad.”—SALMO 77:12.

1, 2. (a) Nganong kinahanglan kitang maggahin ug panahon alang sa pagpamalandong? (b) Unsay kahulogan sa “pagpalandong”?

INGONG mga tinun-an ni Jesu-Kristo, angay nga ang labing hinungdanon kanato mao ang atong relasyon uban sa Diyos ug ang atong motibo sa pag-alagad Kaniya. Apan karon, kadaghanang tawo puliki kaayo nga wala na silay panahon sa pagpamalandong. Sila nalinga pag-ayo sa gimok ug kisaw sa materyalismo, sa pagpamalit ug mga manggad, ug sa paturagas nga pagpangitag kalingawan. Sa unsang paagi malikayan nato kanang dili-mapuslanong kalihokan? Maingon nga kita maggahin ug espesipikong panahon kada adlaw alang sa hinungdanong mga kalihokan, sama sa pagkaon ug pagkatulog, kita usab angayng maggahin ug panahon kada adlaw alang sa pagpalandong sa mga kalihokan ug pakiglabot ni Jehova.—Deuteronomio 8:3; Mateo 4:4.

² Ikaw ba naggahin sukad ug panahon sa pagpalandong? Unsay kahulogan sa pagpalandong? Usa ka diksiyonaryo naghubit sa maong pulong ingong “pagsentro sa mga hunahuna sa usa: paghinuktok o lalom nga paghunahuna.” Unsay kahulogan niini alang kanato?

 3. Sa unsa nalangkit ang paghimog espirituwal nga pag-uswag?

³ Sa usa ka bahin, kini angayng magpahinumdom kanato kon unsay gisulat ni apostol Pablo ngadto sa iyang isigkaalagad nga si Timoteo: “Samtang ako nagsingabot, magmakugihon diha sa publikong pagbasa, sa pagpanambag, sa pagpanudlo. . . . Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” Oo, ang pag-uswag gidahom, ug ang mga pulong ni Pablo nagpakita nga dunay kalabotan tali sa pagpalandong sa espirituwal nga mga butang ug sa pag-uswag. Mao man usab karon. Aron matagamtam ang katagbawan sa pag-uswag sa espirituwal, kita kinahanglan gihapong ‘mamalandong’ ug ‘maghatag ug bug-os nga pagtagad’ sa mga butang nga may kalabotan sa Pulong sa Diyos.—1 Timoteo 4:13-15.

 4. Unsang mga tagana ang imong magamit sa pagtabang kanimo sa pagpalandong kanunay sa Pulong ni Jehova?

⁴ Ang labing maayong panahon sa pagpalandong nagdepende kanimo ug sa rutina sa imong pamilya. Daghan ang namalandong sa teksto sa Bibliya sayo sa buntag sa dihang mobasa sila sa pulyetong Pagsusi sa Kasulatan sa Adlaw-Adlaw. Ngani, mga 20,000 ka boluntaryo sa mga puy-anang Bethel sa tibuok kalibotan nagsugod sa ilang adlaw pinaagi sa 15-minutos nga paghisgot sa teksto sa Bibliya alang sa maong adlaw. Bisan tuod mga upat lamang diha sa pamilyang Bethel ang mokomento kada buntag, ang uban namalandong sa giingon ug gibasa. Ang ubang mga Saksi namalandong sa Pulong ni Jehova samtang nagpaingon sa trabahoan. Namati sila sa mga audiocassette sa Bibliya ug sa mga magasing Bantayanang Torre ug Pagmata! nga mabatonan sa pipila ka pinulongan. Daghang asawa ang naghimo niini samtang nagbuhatbuhat diha sa balay. Sa pagkatinuod, ilang gisundog si salmistang Asap, kinsa misulat: “Pagahinumdoman ko ang mga binuhatan ni Jah; kay hinumdoman ko ang imong kahibulongang buhat sa dugay na kanhi. Ug palandongon ko gayod ang tanan mong kalihokan, ug ang imong mga pakiglabot akong hatagag pagtagad.”—Salmo 77:11, 12.

Ang Hustong Tinamdan Magpatunghag Positibong mga Resulta

 5. Nganong ang personal nga pagtuon angayng mahimong hinungdanon kanato?

⁵ Sa atong modernong panahon sa TV, mga video, ug mga kompiyuter, kadaghanang tawo dili na kaayo mobasa. Dili kana angayng mahitabo taliwala sa mga Saksi ni Jehova. Sa pagkatinuod, ang pagbasa sa Bibliya maoy sama sa pisi nga gabayan nga nagkonektar kanato ngadto kang Jehova. Libolibo ka tuig kanhi, si Josue mipuli kang Moises ingong lider sa Israel. Aron maangkon ang panalangin ni Jehova, kinahanglang basahon ni Josue ang Pulong sa Diyos. (Josue 1:8; Salmo 1:1, 2) Mao gihapon kanay kinahanglanon karon. Apan, tungod sa kakulang sa edukasyon ang uban maglisod tingali sa pagbasa o kapoyang mobasa. Busa, unsay makatabang kanato aron ganahan kitang mobasa ug magtuon sa Pulong sa Diyos? Ang tubag makita diha sa giingon ni Haring Solomon sa Proverbio 2:1-6. Palihog buksi ang inyong Bibliya ug basaha kining mga bersikuloha. Dayon dunganan nato kini sa paghisgot.

 6. Unsang tinamdan ang angay natong ipakita sa kahibalo sa Diyos?

⁶ Una, makita nato kining maong tambag: “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam pinaagi sa imong igdulungog, aron ikiling mo ang imong kasingkasing sa katakos sa pag-ila; . . .” (Proverbio 2:1, 2) Unsay atong makat-onan gikan niining maong mga pamulong? Nga responsibilidad sa matag usa kanato ang pagtuon sa Pulong sa Diyos. Matikdi ang kondisyon nga “kon dawaton mo ang akong mga pulong.” Hinungdanon kana tungod kay ang kadaghanan sa katawhan wala maghatag ug pagtagad sa Pulong sa Diyos. Aron makakaplag kitag kalipay sa pagtuon sa Pulong sa Diyos, kita kinahanglang magmaandam sa pagdawat sa mga pulong ni Jehova ug isipon kini nga samag bahandi nga dili nato gustong mawala. Dili gayod nato tugotan ang atong adlaw-adlawng rutina nga makapapuliki kaayo o makapalinga kanato nga mawala na ang atong kaikag sa Pulong sa Diyos, nga magduhaduha pa gani niana.—Roma 3:3, 4.

 7.Kutob sa maarangan, nganong kita kinahanglang motambong ug maghatag ug pagtagad diha sa Kristohanong mga tigom?

⁷ Kita ba gayod ‘naghatag ug pagtagad’ ug namati pag-ayo sa dihang ang Pulong sa Diyos ginapatin-aw diha sa atong Kristohanong mga tigom? (Efeso 4:20, 21) Ato bang ‘gikiling ang atong kasingkasing’ aron makabaton ug katakos sa pag-ila? Tingali ang mamumulong dili mao ang labing eksperyensiyado, apan samtang siya naghisgot sa Pulong sa Diyos, siya takos sa atong bug-os nga pagtagad. Siyempre, aron makahatag ug pagtagad sa kaalam ni Jehova, kita kinahanglang motambong sa Kristohanong mga tigom, kutob sa maarangan. (Proverbio 18:1) Handurawa ang kahigawad ni bisan kinsa nga wala makatambong sa tigom didto sa lawak sa itaas sa Jerusalem sa Pentekostes 33 K.P.! Bisan tuod ang atong mga tigom dili sama ka makapaukyab niadtong tigoma, ang Bibliya, ang atong pasukaranang teksbok, maoy ginahisgotan. Busa, ang matag tigom mahimong usa ka panalangin kanato kon kita maghatag ug pagtagad ug magbasa diha sa atong Bibliya sa mga tekstong gihisgotan.—Buhat 2:1-4; Hebreohanon 10:24, 25.

8, 9. (a) Unsay gikinahanglan kanato labot sa personal nga pagtuon? (b) Unsaon nimo pagtandi ang bili sa bulawan ug ang pagsabot sa kahibalo sa Diyos?

⁸ Mao kini ang sunod nga giingon sa maalamong hari: “Dugang pa, kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, . . .” (Proverbio 2:3) Unsang tinamdan o kiling ang gipahayag niining mga pulonga kanato? Siyempre, ang tim-os nga tinguha sa pagsabot sa Pulong ni Jehova! Kini nagpakita ug pagkaandam sa pagtuon sa tuyo nga makabaton ug katakos sa pag-ila, aron masabtan kon unsa ang kabubut-on ni Jehova. Dayag nga kini nagkinahanglan ug paningkamot, ug kana magtultol kanato ngadto sa sunod nga mga pulong ug ilustrasyon ni Solomon.—Efeso 5:15-17.

⁹ Siya nagpadayon: “Kon ikaw magapadayon sa pagpangita niini [pagsabot] ingon sa plata, ug ingon sa tinagong mga bahandi ikaw magapadayon sa pagpangita niini, . . .” (Proverbio 2:4) Makapahunahuna kini kanato sa pagpangalot ug bahandi nga gihimo sa mga tawo kinsa sulod sa daghang siglo nangita sa bililhon kono nga mga metal nga plata ug bulawan. Ang mga tawo mipatay sa ubang tawo tungod sa bulawan. Ang uban migugol sa ilang tibuok kinabuhi sa pagpangita niana. Apan, unsa may tinuod nga bili sa bulawan? Kon ikaw nasaag sa desyerto ug himalatyon tungod sa kauhaw, hain man niana ang gusto nimo: ang usa ka baretang bulawan o usa ka basong tubig? Bisan pa niana, pagkamasiboton sa mga tawo sa pagpangita ug bulawan, way sapayan sa artipisyal ug nag-usab-usab nga bili niini!a Labaw pa nga kasibot ang angay natong ipakita sa pagpangita sa kaalam, katakos sa pag-ila, ug pagsabot sa Diyos ug sa iyang kabubut-on! Apan, unsa man ang mga benepisyo sa maong panukiduki?—Salmo 19:7-10; Proverbio 3:13-18.

10. Unsay atong makaplagan kon kita magtuon sa Pulong sa Diyos?

¹⁰ Ang pakigpulong ni Solomon nagpadayon: “Nan imong masabtan ang pagkahadlok kang Jehova, ug imong makaplagan ang mismong kahibalo sa Diyos.” (Proverbio 2:5) Katingalahan gayod—nga kitang makasasalang mga tawo makakaplag sa “mismong kahibalo sa Diyos,” si Jehova, ang Soberanong Ginoo sa uniberso! (Salmo 73:28; Buhat 4:24) Sulod sa daghang siglo ang mga pilosopo ug ang gitawag nga maalamong mga tawo sa kalibotan naningkamot sa pagsabot sa mga misteryo sa kinabuhi ug sa uniberso. Apan, wala nila makaplagi “ang mismong kahibalo sa Diyos.” Ngano? Bisan tuod mabatonan kini sulod na sa kaliboan ka tuig diha sa Pulong sa Diyos, ang Bibliya, ila kining gisalikway ingong yano ra kaayo ug sa ingon napakyas sila sa pagdawat ug pagsabot niana.—1 Corinto 1:18-21.

11. Unsa ang pipila ka kaayohan sa personal nga pagtuon?

¹¹ Aniay laing panukmod nga gipasiugda ni Solomon: “Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.” (Proverbio 2:6) Si Jehova boluntaryo ug dagayang nagahatag ug kaalam, kahibalo, ug katakos sa pag-ila ngadto kang bisan kinsa nga andam mangita niana. Segurado nga kita dunay katarongan nga magpabili sa personal nga pagtuon sa Pulong sa Diyos, bisan pag nagkinahanglan kinig paningkamot, disiplina, ug pagsakripisyo. Maayo na lang gani nga kita adunay pinatik nga mga kopya sa Bibliya ug dili na kinahanglang magsulat ug mga kopya, sama sa gibuhat sa pipila kaniadto!—Deuteronomio 17:18, 19.

Aron Makalakaw nga Takos Kang Jehova

12. Unsay angay natong motibo sa atong pagpangita sa kahibalo sa Diyos?

¹² Unsay angay natong motibo sa atong personal nga pagtuon? Aron malabwan ang uban? Aron sa pagpakita nga mas daghan kitag nahibaloan? Aron mahimong batid kaayo sa Bibliya? Dili. Ang atong tumong mao ang pagkahimong Kristohanon sa pulong ug sa buhat, nga andam kanunay sa pagtabang sa uban, diha sa makapalagsik nga espiritu ni Kristo. (Mateo 11:28-30) Si apostol Pablo nagpasidaan: “Ang kahibalo nagapaburot, apan ang gugma nagapalig-on.” (1 Corinto 8:1) Busa, angay natong batonan ang mapainubsanong tinamdan nga gipasundayag ni Moises sa dihang miingon siya kang Jehova: “Pahibaloa ako, palihog, sa imong mga dalan, aron ako makaila kanimo, aron ako makakaplag ug pabor sa imong mga mata.” (Exodo 33:13) Oo, angay natong tinguhaon ang kahibalo aron sa pagpahimuot sa Diyos, dili aron dayegon kita sa mga tawo. Buot natong mahimong takos, mapainubsanon nga mga alagad sa Diyos. Sa unsang paagi makab-ot nato kanang maong tumong?

13. Unsay gikinahanglan aron mahimong takos nga alagad sa Diyos?

¹³ Gitambagan ni Pablo si Timoteo kon unsaon pagpahimuot sa Diyos, nga nag-ingon: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.” (2 Timoteo 2:15) Ang pamulong nga “nagagamit . . . sa hustong paagi” naggikan sa Gregong berbo nga ang orihinal nga kahulogan maoy “tul-id nga pagtabas.” Sumala sa pipila ka eskolar, kini naghatag ug ideya bahin sa usa ka mananahi nga nagtabas sa panapton sumala sa disenyo, sa usa ka mag-uuma nga nagdaro sa mga tudling diha sa umahan, ug uban pa. Sa bisan hain niana, ang sangpotanan tul-id gayod. Ang punto mao nga aron mahimong takos ug inuyonan nga alagad sa Diyos, si Timoteo kinahanglang ‘mobuhat sa iyang maarangan’ aron maseguro nga ang iyang pagpanudlo ug panggawi nahiuyon sa pulong sa kamatuoran.—1 Timoteo 4:16.

14. Sa unsang paagi ang atong personal nga pagtuon makaapektar sa atong ginabuhat ug ginasulti?

¹⁴ Gihisgotan ni Pablo ang mao gihapong punto sa dihang giawhag niya ang mga isigka-Kristohanon sa Colosas ‘sa paglakaw nga takos kang Jehova aron bug-os nga makapahimuot kaniya’ pinaagi sa ‘pagpamunga sa tanang maayong buhat ug paglambo sa tukmang kahibalo sa Diyos.’ (Colosas 1:10) Dinhi gilangkit ni Pablo ang pagkahimong takos kang Jehova ngadto sa ‘pagpamunga sa tanang maayong buhat’ maingon man sa ‘paglambo sa tukmang kahibalo sa Diyos.’ Sa ato pa, ang hinungdanon kang Jehova dili lamang kon giunsa nato pagpabili ang kahibalo kondili kon unsa ka dulot ang atong pagsunod sa Pulong sa Diyos diha sa atong ginabuhat ug ginasulti. (Roma 2:21, 22) Kini nagpasabot nga ang atong personal nga pagtuon kinahanglang mag-apektar sa atong panghunahuna ug sa atong panggawi kon buot natong pahimut-an ang Diyos.

15. Sa unsang paagi mapanalipdan ug makontrolar nato ang atong kaisipan ug hunahuna?

¹⁵ Karon, si Satanas determinado nga daoton ang atong espirituwalidad pinaagi sa pagpasiugda ug pakiggubat nga naglangkit sa hunahuna. (Roma 7:14-25) Busa, kinahanglang panalipdan ug kontrolahon nato ang atong kaisipan ug mga hunahuna aron mapamatud-an nga takos sa atong Diyos, si Jehova. Ang hinagiban nga atong nabatonan mao ang “kahibalo sa Diyos,” nga makaarang sa ‘pagbihag sa tanang hunahuna aron himoon kining masinugtanon kang Kristo.’ Mas labaw kini nga katarongan nga kita maghatag ug pagtagad sa adlaw-adlaw nga pagtuon sa Bibliya, tungod kay gusto natong wagtangon ang mahakogon, unodnon nga mga hunahuna.—2 Corinto 10:5.

Mga Tabang sa Pagsabot

16. Sa unsang paagi kita makabaton ug kaayohan samtang nagatudlo si Jehova kanato?

¹⁶ Ang pagpanudlo ni Jehova nagahatag ug espirituwal ug pisikal nga mga kaayohan. Kini maoy makaiikag, mapuslanon nga pagtuon bahin sa Diyos. Busa, atong mabasa: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Sa unsang paagi kita gipalakaw ni Jehova diha sa iyang mapuslanong dalan? Una, atong nabatonan ang iyang inspiradong Pulong, ang Balaang Bibliya. Mao kini ang atong pangunang teksbok, nga kanunay natong susihon. Mao nga maayong maghatag ug pagtagad sa ginahisgotan diha sa Kristohanong mga tigom uban ang bukas nga Bibliya. Ang mga kaayohan sa pagbuhat niana makita sa asoy bahin sa Etiopianhong eunuko, nga nasulat diha sa Buhat kapitulo 8.

17. Unsay nahitabo sa kaso sa Etiopianhong eunuko, ug unsay giilustrar niini?

¹⁷ Ang Etiopianhong eunuko nakabig sa Judaismo. Siya usa ka sinserong magtutuo sa Diyos, ug siya nagtuon sa Kasulatan. Samtang nagsakay sa iyang karo, nagbasa siya sa basahon sa Isaias sa dihang si Felipe nagdagan abay kaniya ug nangutana: “Nakasabot ka ba gayod sa imong ginabasa?” Unsay tubag sa eunuko? “‘Sa pagkatinuod, unsaon ko man pagkasabot, gawas kon adunay magtudlo kanako?’ Ug siya nangaliyupo kang Felipe nga mosakay ug molingkod tupad kaniya.” Dayon si Felipe, nga gitultolan sa balaang espiritu, mitabang sa eunuko sa pagsabot sa tagna ni Isaias. (Buhat 8:27-35) Unsay giilustrar niini? Nga ang atong kinaugalingong pagbasa sa Bibliya dili pa igo. Si Jehova, pinaagi sa iyang espiritu, naggamit sa matinumanon ug maalamong ulipon nga matang sa pagtabang kanato sa pagsabot sa iyang Pulong sa hustong panahon. Sa unsang paagi kini gihimo?—Mateo 24:45-47; Lucas 12:42.

18. Sa unsang paagi ang matinumanon ug maalamong ulipon nga matang nagtabang kanato?

¹⁸ Bisan tuod ang ulipong matang gihubit ingong ‘matinumanon ug maalamon,’ si Jesus wala mag-ingon nga kini dili masayop. Kining pundok sa matinumanong dinihogan nga mga igsoon gilangkoban gihapon sa dili-hingpit nga mga Kristohanon. Bisan pag maayo ang mga tumong, sila mahimong masayop, sama sa nahitabo usahay sa maong mga lalaki sa unang siglo. (Buhat 10:9-15; Galacia 2:8, 11-14) Apan, putli ang ilang motibo, ug si Jehova naggamit kanila sa pagtagana kanato ug mga tabang sa pagtuon sa Bibliya aron sa pagpalig-on sa atong pagtuo diha sa Pulong ug mga saad sa Diyos. Ang pangunang tabang sa personal nga pagtuon nga gihatag kanato sa ulipon mao ang Bag-ong Kalibotang Hubad sa Balaang Kasulatan. Kini mabatonan na karon, sa bug-os o sa bahin niini, diha sa 42 ka pinulongan, ug 114 milyones ka kopya diha sa ubay-ubayng mga edisyon ang naimprenta. Sa unsang paagi epektibo nato kining magamit diha sa atong personal nga pagtuon?—2 Timoteo 3:14-17.

19. Unsa ang pipila ka bahin sa New World Translation—With References nga makatabang sa personal nga pagtuon?

¹⁹ Tagda, pananglitan, ang New World Translation of the Holy Scriptures—With References. Kini adunay mga lindog sa mga cross-reference, potnot, gamayng konkordansiya sa dagway sa “Bible Words Indexed” ug “Footnote Words Indexed,” ug usa ka Appendix nga masangkarong nagkobre sa 43 ka ulohan, lakip na sa mga mapa ug mga tsart. Anaa usab ang “Introduction,” uban ang pagpatin-aw niini sa daghang tinubdan nga gigamit alang niining talagsaong hubad sa Bibliya. Kon mabatonan kini sa pinulongan nga imong masabtan, paningkamoti gayod nga masinati sa mga bahin niini ug gamiton kini. Bisan unsa man ang kahimtang, ang Bibliya mao ang sinugdanan sa atong programa sa pagtuon, ug ang Bag-ong Kalibotang Hubad, maoy usa ka bersiyon nga hustong naghatag ug pagtagad sa balaang ngalan samtang gipasiugda niini ang pagmando sa Gingharian sa Diyos.—Salmo 149:1-9; Daniel 2:44; Mateo 6:9, 10.

20. Unsang mga pangutana bahin sa personal nga pagtuon ang nagkinahanglan karon ug tubag?

²⁰ Karon, makapangutana kita: ‘Unsang dugang tabang ang atong gikinahanglan sa pagsabot sa Bibliya? Sa unsang paagi makagahin kita ug panahon alang sa personal nga pagtuon? Sa unsang paagi mahimo natong mas epektibo ang atong pagtuon? Sa unsang paagi ang atong pagtuon makaapektar sa uban?’ Ang sunod nga artikulo maghisgot niining hinungdanong mga bahin sa atong pag-uswag ingong mga Kristohanon.

[Footnote]

Nahinumdom Ka Ba?

• Unsay buot ipasabot sa “pagpalandong”?

• Unsang tinamdan ang angay natong mabatonan maylabot sa pagtuon sa Pulong sa Diyos?

• Unsay angay natong motibo diha sa atong personal nga pagtuon?

• Unsang mga tabang sa pagsabot sa Bibliya ang atong nabatonan?

[Hulagway sa panid 15]

Nakaplagan sa mga membro sa pamilyang Bethel nga makapalig-on sa espirituwal ang pagsugod sa matag adlaw pinaagi sa pagkonsiderar sa teksto sa Bibliya

[Mga hulagway sa panid 15]

Ang hinungdanong panahon mahimong magamit pinaagi sa pagpaminaw sa mga teyp sa Bibliya samtang kita nagbiyahe

[Hulagway sa panid 16]

Ang mga tawo naghago pag-ayo aron makakuha ug bulawan. Unsa ka dakong paningkamot ang imong ginahimo sa pagtuon sa Pulong sa Diyos?

[Credit Line]

Courtesy of California State Parks, 2002

[Mga hulagway sa panid 17]

Ang Bibliya maoy usa ka bahandi nga mahimong motultol sa kinabuhing walay kataposan